Nej Yuav Muaj txoj Kev Xyiv Fab Loj Heev
Kuv caw nej siv tej yam uas nej paub ua, nrog nej tej zaj lus tim khawv uas kav ntev, thiab mus ua tub txib.
Kuv cov kwv tij thiab cov muam, hnub no kuv xav txog kev sau Ixayees los ua ke, qhov uas Thawj Tswj Hwm Russell M. Nelson hais tias yog “yog qhov tseem ceeb tshaj plaws uas muaj hauv lub ntiaj teb no. Tsis muaj ib yam loj dua, tsis muaj ib yam tseem ceeb dua, tsis muaj ib yam uas muaj yeeb koob dua ntxiv.”1
Peb muab Ixayees sau los ua ke vim peb paub tias “tib neeg muaj nqis heev rau Vajtswv.”2 Yeej yooj yim npaum li ntawd. Peb muab Vajtswv cov me nyuam sau los ua ke hauv lub caij nyoog kawg no lawv thiaj li yuav “foom tej koob hmoov tseem ceeb heev rau saum lawv tej taub hau”3 thiab cog lus tias lawv yuav txais “tej kev nplua nuj nyob mus ib txhis.”4 Ua rau peb yeej paub tias yog peb xav muab Ixayees sau los ua ke peb yuav tsum muaj cov tub txib—yuav tsum muaj coob dua li muaj tam sim no.5 Hnub no kuv hais rau nej cov laus hauv lub Koom Txoos uas ua tau tub txib. Tus Tswv xav tau nej. Peb xav tau nej nyob hauv New York thiab Chicago, Audaliyas thiab Akifas, Thaib Teb thiab Mev Teb, thiab txhua qhov chaw.
Cia kuv pab nej rov qab xav txog xyoo 2015. Kuv yog ib tug uas nyuam qhuav txais kev hu los koom Pawg Kaum Ob tug Thwj Tim. Ib txoj kev lav ris uas peb cov Thwj Tim ua yog kev txib cov tub txib mus rau lawv tej qhov chaw tshaj tawm txoj moo zoo. Kuv tau koom ua tus txheej txheem no thaum kuv yog ib tug Xya Caum,6 tiam sis kuv twb los ua ib tug Thwj Tim lawm, kuv thiaj li lav ris kev txib ua li no tag nrho. Kuv pib thov Vajtswv ces txib cov txwj laug thiab cov muam, ib tug dhau ib tug, mus rau tej qhov chaw tshaj tawm txoj moo zoo nyob thoob plaws lub ntiaj teb. Ces kuv yuav pib txib tej nkawm niam txiv laus. Tsuas muaj 10 nkawm nyob hauv kuv daim ntawv. Tsis muaj ntau pes tsawg. Kuv xav tsis thoob, es kuv nug tus uas ua hauj lwm rau lub Rooj Tsav Xwm Ua Tub Txib seb, “Peb xav tau pes tsawg kom ua tau tag nrho tej kev thov?”
Nws teb tias, “300.”
Lub sij hawm ntawd los kuv yeej nco ntsoov: 10 nkawm xwb thaum xav tau 300.
Thawj Tswj Hwm Russell M. Nelson tau yaum tej nkawm niam txiv kom “txhos caug thiab thov Leej Txiv Saum Ntuj Ceeb Tsheej seb puas yog lub sij hawm rau lawv mus ua tub txib.”7 Nws hais tias “kev xav ua hauj lwm yeej yog qhov tseem ceeb tshaj plaws uas nej yuav tsum muaj.”8
Ib yam li vaj lug kub hais tias, “Yog li ntawd, yog nej muaj tej kev xav ua hauj lwm rau Vajtswv ces Vajtswv hu nej mus ua txoj hauj lwm no.”9 Txoj hauj lwm ntawd yeej yog los ntawm txoj kev cai txog kev sau qoob loo. Nyob hauv phau Yauhas peb nyeem hais tias, “Tus uas cog thiab tus uas hlais yuav zoo siab kawg li.”10
Kuv twb pom tias tau muaj raws li txoj kev cai txog kev sau qoob loo nyob hauv kuv tsev neeg.
Thaum yav tas los, kuv tuaj xyuas cov txheeb ze thaum tus npisov thov kom kuv hais lus xaus kev sib ntsib txais lub cim nco txog.11 Thaum kuv nqis lub sam thiaj los, ib tug poj niam tuaj nrog nws xya tus me nyuam thiab hais tias nws yog Muam Rebecca Guzman.
Nws nug tias, “Txwj Laug Rasband, koj puas paub Rulon thiab Verda Rasband?”
Kuv luag nyav thiab teb hais tias, “Nkawd yog kuv niam kuv txiv.”
Nyaj nej paub kuv yuav hais li cas. Rebecca nrog nws tsev neeg nyob hauv lub Tsev rau Rooj Sab Laj tam sim no, es nws tau tso cai rau kuv qhia txog nws tsev neeg zaj dab neeg.12
Kuv niam kuv txiv, Txwj Laug Rulon thiab Muam Verda Rasband, tau ua hauj lwm ua ib nkawm niam txiv laus ua tub txib nyob hauv Qhov Chaw Tshaj Tawm txoj Moo Zoo Florida Fort Lauderdale Florida.13 Nkawd tab tom mus nrhiav neeg rau nkawd qhia thiab tus Ntsuj Plig tau coj lawv mus khob qhov rooj ntawm Rebecca lub tsev. Nws yog ib tug ntxhais hluas thiab nyiam mloog cov nkauj los ntawm tsev neeg Osmonds, tus nws nyiam tshaj yog kuv tus phooj ywg Donny—uas kuj nrog peb nyob hnub no thiab.14 Nws tau mloog lawv tej kev xam phaj thiab kawm tias lawv yog cov mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Nws xav tias muaj ib yam dab tsi txawv txog lawv, thiab nws xav tias tej zaum yog lawv txoj kev teev ntuj, yog li ntawd Rebecca tau siv ob xyoos kawm txog lub Koom Txoos txoj kev ntseeg nyob hauv nws lub tsev kawm ntawv chaw khaws ntawv. Ces thaum ib khub khob nws tsev neeg lub qhov rooj thiab hais tias nkawd yog tub txib rau Tsoom Haiv Neeg Ntseeg hauv Hnub Nyoog Kawg, ua rau nws xav tsis thoob.
Rebecca sau hais tias, “Kuv niam tau qhia kuv hais kom nkawd mus, tiam sis kuv lub siab hais tias ‘Txhob ua li ntawd.’ Kuv ntsia nkawd lub ntsej muag thiab ua rau kuv lub siab sov so thiab muaj kev hlub. Thaum kuv nco txog qhov no tseem ua rau kuv los kua muag thiab kuv lub siab puv npo.”15
Rebecca tau caw nkawd nkag hauv tsev, thiab kuv niam kuv txiv tau qhia ib zaj rau nws, nws ob tug niam hluas, thiab nws niam, txawm yog nws niam tsis pom zoo.
Rebecca hais rau kuv tias: “Koj niam koj txiv twb tau ua siab zoo teb txhua lo lus nug uas peb muaj. Kuv tseem pom tau nkawd lub ntsej muag zoo li nkawd ci ntsa iab. Peb yeej khawm koj niam thaum nws mus thiab nws ib txwm pab kuv niam txaus siab thiab saib taus kuv niam. Koj txiv yeej muaj qhov ci ntsa iab hauv nws qhov muag thaum nws qhia peb txog Yexus Khetos. Nws sim hais kom kuv txiv xav koom peb tej kev sib tham thiab thaum kawg twb ua li ntawd. Kuv txiv yog ib tug kws ua zaub mov hauv ib lub koom haum rau cov neeg nplua nuj thiab pib ua hmo rau koj niam koj txiv, tsis hais nws ua qhov uas koj txiv nyiam tshaj, yog lub ncuav qab zib key lime.”16
Thaum Txwj Laug thiab Muam Rasband thov Rebecca thiab nws tsev neeg nyeem Phau Ntawv Maumoos, Rebecca tau siv tsib hnub xwb ua li ntawd. Nws xav ua kev cai raus dej tam sim ntawd, tiam sis lwm tus hauv nws tsev neeg tsis tau npaj siab. Tom qab plaub lub hlis, Rebecca yuam kom pub nws ua kev cai raus dej thiab los ua mej zeej hauv lub Koom Txoos tseeb. Nws hais tias, “Kuv paub tias qhov no muaj tseeb kawg siab kawg ntws.”17 Thaum lub Plaub Hlis Ntuj 5, 1979, cov tub txib muab Rebecca uas muaj 19 xyoos, nws niam, thiab ob tug viv ncaus ua kev cai raus dej. Kuv txiv yog ib tug tim khawv thaum lawv ua kev cai raus dej.
Thaum kuv ntsib Rebecca thiab nws tsev neeg nyob hauv lub tsev koom txoos, peb tau thaij duab ntawm nws tsev neeg thiab kuv. Kuv tau nqa daim duab ntawd rau kuv niam pom thiab nws tso rau ntawm nws lub hauv siab. Ces nws hais rau kuv tias, “Ronnie, nov yog ib hnub zoo siab kawg nkaus hauv kuv lub neej.”
Kuv niam teb li ntawd los ua rau kuv xav nug peb cov neeg laus: “Nej ua dab tsi hauv nej lub neej tam sim no?” Muaj ntau yam uas cov tub txib laus ua tau uas lwm tus ua tsis tau. Nej yog ib pawg neeg uas ua tau zoo ntau heev, paub ntau txog lub Koom Txoos, thiab muaj peev xwm txhawb nqa thiab cawm Vajtswv cov me nyuam dim.
Nej ib txhia xav tias: “Tiam sis yuav tsum ncaim cov xeeb ntxwv nev? Wb yuav tsis nyob thaum txog tsev neeg hnub yug thiab tej hnub tseem ceeb, yuav ncaim phooj ywg, thiab wb cov aub cov miv thiab.” Yog kuv tau nug kuv niam seb vim li cas nws thiab kuv Txiv tau mus ua tub txib, kuv paub tias nws yuav hais tias: “Kuv muaj xeeb ntxwv. Kuv xav kom lawv paub tias koj txiv thiab kuv wb tau ua hauj lwm hauv qhov chaw tshaj tawm txoj moo zoo, wb xav coj yam ntxwv rau wb cov xeeb leej xeeb ntxwv, thiab wb tau koob hmoov, tau koob hmoov ntau kawg.”
Thaum kuv mus xyuas tej qhov chaw tshaj tawm txoj moo zoo nyob thoob plaws lub ntiaj teb, kuv tau pom peb cov tub txib laus ua hauj lwm pab zoo kawg. Kuv pom meej hais tias lawv zoo siab ua raws li “tus Tswv lub siab nyiam” thiab ua “tus Tswv tej hauj lwm.”18
Rau cov neeg laus ib txhia, thiab peb cia siab tias yuav muaj coob heev, kev ua tub txib nyob hauv lwm qhov chaw ntawm lub ntiaj teb no yeej yog qhov chaw yog lawm.19 Ib txhia yuav xav ua hauj lwm rau lub Koom Txoos thaum tseem nyob hauv tsev. Vim tias muaj kev mob kev nkees thiab lwm yam xwm txheej, muaj cov neeg uas ua tsis taus. Peb to taub tej xwm txheej no, thiab kuv cia siab tias nej yuav nrhiav kev kom txhawb nqa cov uas tab tom ua hauj lwm pab. Cia li ua raws li tus yaj saub qhia thiab thov Vajtswv kom paub tias tus Tswv xav kom nej ua dab tsi.
Tej qhov chaw tshaj tawm txoj moo zoo nyob thoob plaws lub ntiaj teb no thov kom nej pab lawv. Thawj Tswj Hwm Nelson tau hais txog peb cov tub txib laus hais tias, “Lawv muaj lub siab hluas, lawv muaj tswv yim, thiab txaus siab ua hauj lwm.”20
Nyob hauv qhov chaw tshaj tawm txoj moo zoo, muaj tej cib fim ntau heev: tej zaum nej yuav ua hauj lwm hauv tej tsev hauv paus los yog tej tuam tsev, txhawb nqa cov tub txib hluas, pab tej ceg ntseeg me me muaj zog, ua hauj lwm hauv qhov chaw FamilySearch los yog tej qhov chaw nco txog liv xwm, qhia institute, ua hauj lwm pab neeg txom nyem, pab cov tub hluas ntxhais hluas, pab hauv tej qhov chaw nrhiav hauj lwm los yog nyob hauv lub Koom Txoos tej daim teb. Nej ua tau dab tsi kom ua hauj lwm pab, tej yam twg haum nej lub neej, xav tau nej mus qhov twg, thiab nej yuav ua dab tsi kom npaj mus los txhua yam nyob hauv qhov website “Tub Txib Laus.”21 Nej kuj nrog nej tus npisov los yog ceg ntseeg tus thawj tswj hwm tham los tau.
Kuv twb hu ntau nkawm niam txiv ua hauj lwm thiab kuv saib thaum Yexus Khetos txoj Kev Kaj tau ci ntsa iab puv lawv lub ntsej muag.22 Thaum lawv rov qab los lawv twb piav tias lawv nrog tus Tswv thiab lwm tus sib raug zoo, lawv hnov tus Tswv tus Ntsuj Plig nrog nraim lawv nyob, thiab lawv paub tias lawv yeej pab heev.23 Leej twg tsis xav tau qhov no?
Kev mus ua txub txib tej zaum yuav yog lub sij hawm zoo tshaj plaws hauv ib nkawm niam txiv lub neej. Tej zaum ib lub npe zoo rau lub sij hawm no yog “Tus Tswv Yuav Xav Tau Kuv Ua Hauj Lwm.”24 Tej zaum nej yuav tsis swm kev ua tub txib, tiam sis tus Ntsuj Plig lub hwj chim yuav pab nej xav tias zoo li nej nyob hauv tsev xwb.
Kuv niam kuv txiv thiab kaum txhiab nkawm niam txiv uas tau rov qab los yeej tau ua tim khawv txog kev xyiv fab uas muaj los ntawm kev ua tub txib txoj hauj lwm. Tus Tswv tau hais li no nyob hauv cov vaj lug kub hauv hnub nyoog kawg no, “Thiab txawm hais tias neb yuav khwv tag nrho neb lub neej mus tshaj tawm kev hloov siab lees txim rau cov neeg no, es coj tau ib tug neeg los cuag kuv xwb los, neb yuav muaj txoj kev xyiv fab loj nrog tus ntawd nyob hauv kuv Txiv lub nceeg vaj!”25
Yaxayas tau hais paj lug txog qhov uas yus ua li cas thaum ua hauj lwm hauv qhov chaw tshaj tawm txoj moo zoo los yog “daim teb.” Cov vaj lug kub hais tias “Daim teb yog lub ntiaj teb.”26 Tus yaj saub puag thaum ub sau hais tias, “Nej yuav tawm hauv lub nroog Npanpiloos mus zoo siab hlo, luag yuav coj nej tawm kaj siab lug hauv lub nroog ntawd mus. Tej roob thiab tej pov roob yuav tsa suab hu nkauj, thiab tej xyoob tej ntoo yuav qw zoo siab.”27 Tej pov roob thiab tej xyoob tej ntoo piv tau rau qhov chaw tshaj tawm txoj moo zoo cov thawj tswj hwm, cov npisov, koog chaw cov thawj coj, cov mej zeej, thiab cov uas nrhiav qhov tseeb tiam sis “lawv tsis paub mus nrhiav qhov tseeb nyob rau qhov twg.”28 Lawv yuav ua tim khawv tias tej nkawm niam txiv laus yeej hloov txhua yam los ntawm lawv zaj lus tim khawv txog peb tus Cawm Seej thiab tus Txhiv Dim, Yexus Khetos.
Vim kuv yog tus Tswv Yexus Khetos ib tug Thwj Tim, kuv thov kom nej ua tub txib kom ua hauj lwm muab Ixayees sau los ua ke thiab tej zaum rov qab ua ib zaug ntxiv. Peb xav tau nej—peb xav tau nej heev. Peb zoo siab rau nej cov neeg laus, rau nej lub neej thiab nej txoj kev coj yam ntxwv nyob hauv nej lub tsev, pawg ntseeg, thiab ceg txheem ntseeg. Kuv caw nej siv tej yam uas nej paub ua, nrog nej tej zaj lus tim khawv uas kav ntev, thiab mus ua tub txib. Kuv thov Vajtswv kom lwm zaus kuv mus txib tej nkawm niam txiv ces yuav muaj coob heev uas tos ntsoov nej txoj kev hu.
Kuv cog lus rau nej tias thaum nej ua hauj lwm nej yuav hnov tus Tswv txoj kev hlub hauv nej lub neej, nej yuav paub Nws, Nws yuav paub nej, thiab nej “yuav muaj txoj kev xyiv fab loj.”29 Qhov uas nej rau siab ua hauj lwm rau Yexus Khetos yuav pab foom koob hmoov rau nej tsev neeg thiab nej cov xeeb leej xeeb ntxwv. “Vajtswv [yuav] hlub [lawv] thiab pab kom [lawv] tau zoo nyob kaj siab lug”30 rau ntau xyoo tom ntej. Kuv cog lus rau nej. Los ntawm Yexus Khetos lub npe, amees.