Kom Pab Tau Nej cov Xeeb Leej Xeeb Ntxwv
Tsis txhob ua tus uas tsis ruaj khov nyob hauv txoj saw hlau uas koj tau pib, los sis koj tau txais los ua nej ntiag tug. Cia li muaj zog.
Ob peb xyoos tas los, thaum kuv ua hauj lwm hauv Cheeb Tsam South America Northwest thiab kuv nyob hauv Peru, muaj ib lub sij hawm zoo kawg nkaus uas kuv xav qhia rau nej.
Lub sij hawm ntawd yog thaum kuv rov qab mus tsev tom qab kuv ua hauj lwm ntau. Tom qab uas kuv tau ua tus txheej txheem rov qab nkag hauv lub teb chaws nyob ntawm tshav nyab hoom, kuv twb ntsib tus kws tsav tsheb taxi tos kuv los ntawm qhov chaw xa taxi uas kuv ib txwm siv. Nws coj kuv mus rau nws lub tsheb, thiab kuv zaum nram qab kom so tau thiab nyob ntsiag to rov qab mus tsev. Tom qab kuv caij ob peb nplov, tus tsav tsheb tus thawj saib xyuas hu nws, thiab qhia nws tias kuv caij taxi tsis yog. Twb tau muab lwm lub tsheb tshwj tseg rau kuv, thiab tus thawj saib xyuas hais kom nws thauj kuv rov qab mus rau tshav nyab hoom yog tias kuv xav hloov tsheb. Kuv qhia nws tias tsis tas ua li ntawd, thiab wb tseem mus tom ntej los tau. Tom qab ob peb me pliag, nws ntsia kuv nyob hauv daim iav saib tom qab thiab nug hais tias, “Koj yog neeg Maumoos, puas yog?”
Es tom qab nws nug li ntawd, kuv paub tias kuv tsis muaj cuab kav nyob ntsiag to ntxiv. Kuv yeej xav paub seb nws lo lus nug yuav ua rau kuv kawm dab tsi.
Kuv kawm tias nws lub npe hu ua Omar, nws tus poj niam lub npe hu ua Maria Teresa, thiab nkawd muaj ob tug me nyuam—Carolina, uas muaj 14 xyoos, thiab Rodrigo, uas muaj 10 xyoo. Omar yog ib tug mej zeej ntawm lub Koom Txoos txij thaum nws yog ib tug me nyuam los. Nws tsev neeg muab siab ntseeg, tiam sis muaj ib lub sij hawm uas nws niam nws txiv tsis mus koom lub koom txoos ntxiv. Omar tsis mus koom lub koom txoos hlo li thaum nws muaj 15 xyoos. Ces thaum kuv nrog nws tham nws muaj 40 xyoo.
Lub sij hawm ntawd kuv to taub tias kuv tsis tau caij lub taxi tsis yog. Tsis yog ib yam uas lam tshwm sim! Kuv qhia nws tias kuv yog leej twg thiab kuv caij nws lub taxi vim tus Tswv hu nws rov qab los koom tus Tswv pab yaj.
Ces wb tau sib tham txog lub sij hawm uas nws thiab nws tsev neeg yog cov mej zeej uas muab siab rau ntseeg lub Koom Txoos. Nws nco qab ntsoov txog thaum nws tsev neeg tau ua tsev neeg hmo ua ke thiab thaum nws tau hu tej zaj nkauj los ntawm lub Koom Haum Me Nyuam Yaus. Ces nws tau ua lub suab yau hu ob peb lo lus ntawm zaj nkauj “Kuv Yog Vajtswv Me Nyuam.”1
Tom qab kuv tau nws qhov chaw nyob, naj npawb xov tooj, thiab kev tso cai qhia tej no rau nws tus npisov, kuv qhia nws tias kuv yuav nyob hauv chav teev tiam thawj hnub uas nws rov qab mus koom lub koom txoos. Thaum txog kuv lub tsev, wb sib tham txog yav tas los tiav lawm, ces wb sib ncaim.
Ob peb lub lim tiam tom qab ntawd nws tus npisov tau hu tuaj qhia kuv tias Omar yuav tuaj koom lub koom txoos thaum hnub Sunday. Kuv hais tias kuv mam li nyob ntawd. Hnub Sunday ntawd, Omar nrog nws tus tub tuaj. Nws tus poj niam thiab tus ntxhais tseem tsis xav tuaj. Ob peb lub hlis tom qab ntawd, nws tus npisov rov qab hu tuaj, es zaum no nws qhia kuv tias Omar yuav muab nws tus poj niam thiab ob tug me nyuam ua kev cai raus dej, thiab nws caw kuv tuaj. Nov yog daim duab txog hnub Sunday uas tau muab lawv ua kev pom zoo ua cov mej zeej ntawm lub Koom Txoos.
Tib hnub ntawd, kuv tau qhia Omar thiab nws tsev neeg, yog tias lawv npaj siab, ib xyoos tom ntej, kuv yuav zoo siab ua lawv txoj kev cai sib khi hauv lub Tuam Tsev Lima Peru. Nov yog ib daim duab txog lub sij hawm ntawd uas peb txhua tus yuav nco ntsoov, ib xyoos tom qab ntawd.
Vim li cas kuv hais zaj no rau nej? Kuv muaj ob lub hom phiaj.
Qhov thib ib, kuv xav hais rau cov mej zeej zoo uas twb tau muab Yexus Khetos txoj moo zoo uas muab txum tim rov qab los tso tseg lawm. Qhov thib ob, xav hais rau cov mej zeej niaj hnub nim no uas tej zaum tsis tshua rau siab ntseeg ua raws li lawv tej kev khi lus. Ob pawg no, los ntshe tej tiam neeg tom ntej yuav raug xwm txheej, thiab nyaj cov koob hmoov thiab tej lus cog tseg uas tau tshwj tseg rau lawv cov xeeb leej xeeb ntxwv yuav ploj mus.
Cia peb pib hais txog pawg thib ib, cov mej zeej uas tau tso tej kev khi lus tseg, xws li kuv tus phooj ywg Peruvian Omar. Thaum kuv nug nws seb vim li cas nws txiav txim siab rov qab los, nws hais tias yog vim nws thiab nws tus poj niam xav tias nkawd ob tug me nyuam yuav zoo siab dua hauv lub neej no yog lawv muaj Yexus Khetos txoj moo zoo. Nws xav tias twb txog lub sij hawm rov qab mus koom lub koom txoos kom pab tau nkawd ob tug me nyuam.
Yeej tu siab heev thaum peb ntsib cov mej zeej uas tsis muab siab rau ntseeg lawm los yog cov uas tsis yog mej zeej hauv lub Koom Txoos uas thaum yav tas los lawv tsev neeg muaj txoj moo zoo tiam sis twb ploj lawm vim lawv niam lawv txiv los yog lawv yawg thiab pog txiav txim siab tias yuav so ib ntus tsis mus rau lub Koom Txoos. Txoj kev txiav txim siab ntawd los tej zaum yuav raug lawv cov poj koob yawm txwv tas mus li!
Ntshe lawv cov me nyuam thiab cov xeeb ntxwv yuav tsis txais kev tiv thaiv thiab cov koob hmoov uas los ntawm Yexus Khetos txoj moo zoo hauv lawv lub neej. Tu siab kawg nkaus uas lawv twb ua poob qhov uas lawv tau kev cog lus tias lawv tsev neeg yuav nyob ua ke mus ib txhis li. Txoj kev txiav txim ntawm ib tug twb raug ib co xeeb leej xeeb ntxwv tas lawm. Twb muab kev ntseeg tu lawm.
Tiam sis, peb yeej paub tias, txhua yam uas tau muab tu lawm los Yexus Khetos kho taus. Yog li ntawd, thov xav txog kev caw uas Thawj Tswj Hwm Russell M. Nelson tau hais no: “Nim no, yog tias nej twb tau tawm txoj kev no, nrog tag nrho kev cia siab kuv caw thiab thov nej rov qab los. Txawm tias nej txhawj txog dab tsi, txawm nej muaj teeb meem dab tsi los, yeej muaj chaw rau nej nyob hauv qhov chaw no, uas yog tus Tswv lub Koom Txoos. Nej thiab tej tiam neeg uas tseem tsis tau yug los yuav txais koob hmoov los ntawm tej yam nej ua tam sim no yog nej rov qab los rau txoj kev khi lus.”2
Nim no, kuv mam li hais txog pawg thib ob, cov mej zeej uas tsis tshua muab siab rau ntseeg npaum li yuav tsum ua. Ib yam li tej yam uas neeg txiav txim siab ua nag hmo hloov los ua tej yam uas muaj tiag hnub no, tej kev txiav txim siab hnub no yuav hloov peb tsev neeg lub neej thaum yav tom ntej.
Thawj Tswj Hwm Dallin H. Oaks qhia peb tias:
“Yexus Khetos txoj moo zoo uas tau muab txum tim rov qab los ua rau peb xav txog yav tom ntej. … Txoj moo zoo qhia txog tej uas yuav muaj los thaum yav tom ntej uas pab peb xaiv tej yam niaj hnub no.
“Tiam sis, peb txhua tus paub tib neeg uas xav txog tam sim no xwb: siv nyiaj hnub no, zoo siab hnub no, thiab tsis txhob xav txog yav tom ntej.
“… Thaum peb txiav txim siab, peb yuav tsum nug tias, ‘Yav tom ntej yuav zoo li cas?’”3 Tej yam uas peb txiav txim siab ua tam sim no puas yuav ua rau peb txais kev xyiv fab tam sim no thiab nyob mus ib txhis li, los yog yuav ua rau peb tu siab thiab los kua muag?
Ib txhia xav tias, “Peb tsis tas koom lub koom txoos txhua hnub Sunday,” los yog “Peb yuav them ib feem kaum thaum peb lub neej zoo dua,” los yog “Kuv tsis kam txhawb nqa lub Koom Txoos cov thawj coj hais txog qhov no.”
Lawv hais tias, “Tiam sis, peb paub tias lub Koom Txoos muaj tseeb, thiab peb yeej yuav tsis tso Yexus Khetos txoj moo zoo tseg.”
Cov neeg uas xav li no ntshe lawv tsis to taub tias qhov uas lawv “lam” ua mej zeej li no yuav ua li cas rau lawv lub neej thiab lawv cov xeeb leej xeeb ntxwv lub neej. Tej zaum cov niam tsev txiv tsev muab siab rau ntseeg, tiam sis ntshai hais tias lawv cov me nyuam yuav poob mus—nyob hauv lub neej no thiab nyob mus ib txhis li.
Hais txog cov uas yuav tsis txais lub yeeb koob xilethi-aus ua lawv tug nrog lawv tsev neeg tus Tswv hais tias, “Cov no yog cov uas tsis rau siab ua raws li tej lus tim khawv txog Yexus; yog li ntawd, lawv thiaj txais tsis tau lub meej mom kav peb tus Vajtswv lub nceeg vaj.”4 Peb xav kom peb cov me nyuam zoo li no los? Puas tsim nyog uas peb rau siab ntxiv thiab tsis txhob lam ntseeg xwb kom pab peb thiab pab peb cov xeeb leej xeeb ntxwv?
Thawj Tswj Hwm M. Russell Ballard twb hais txog qhov no thiab:
“Nyuaj rau ib txhia ntseeg Yexus Khetos cov lus caw thiab tseem ua nyuaj rau lawv lees txais. … Muaj ib txhia uas ua nyuaj rau lawv to taub ib tsab cai los yog tej lus qhia ntawm lub Koom Txoos. Lwm tus nrhiav tej yam nyuaj to taub txog peb zaj keeb kwm los yog tej yam uas cov mej zeej thiab cov thawj coj ua yuam kev, tsis hais thaum yav tas los thiab tam sim no los yog. …
“… Kev txiav txim siab kom ‘tsis nrog’ cov mej zeej ntawm lub Koom Txoos thiab tus Tswv cov thawj coj yuav ua rau nej raug xwm txheej uas kav ntev thaum yav tom ntej uas nej tsis pom tam sim no.”5
Yeej yog ib qho tu siab kawg—thiab vim li cas yuav ua li no? Txawm yog vim li cas los, yeej tsis yog ib yam uas zoo txaus kom tshem tej yam phem uas tej tiam neeg tom ntej yuav raug.
Kuv cov kwv tij thiab cov muam, yog tias nej zoo li ob pawg uas kuv hais txog nyob hauv kuv zaj lus no, thov rov qab xav txog txoj kev uas nej mus. Nej paub tias muaj ib txoj hau kev rau peb hauv lub neej no. Nej paub tias tsev neeg yeej nyob tau ua ke mus ib txhis li. Vim li cas yuav ua tej yam kom txaus ntshai? Tsis txhob ua tus uas tsis ruaj khov nyob hauv txoj saw hlau uas koj tau pib, los sis koj tau txais los ua nej ntiag tug. Cia li muaj zog. Yog nej thib ua, thiab tus Tswv muaj peev xwm pab nej.
Kawg kuv lub siab lub ntsws, kuv caw nej kom xav txog qhov no, saib yav tom ntej thiab ntsuas seb “txoj kev ua li no yuav ua dab tsi rau peb” thiab, yog tias yuav tsum ua, rau siab kom hloov nej txoj kev mus kom pab tau nej cov xeeb ntxwv. Los ntawm Yexus Khetos lub npe, amees.