Nyob Rawv ntawm txoj Kev Ua Lawv tej Dej Num

Nyob rau xyoo 1947 yog 100 xyoo tom qab thawj pawg pioneer uas yog Haiv Neeg Ntseeg hauv Hnub Nyoog Kawg tuaj txog lub hav Salt Lake. Xyoo ntawd twb muaj ntau txoj kev ua koob tsheej nco txog, thiab neeg coob ua Vajtswv tsaug rau Yexus Khetos cov thwj tim uas tau tsim tej kev, ua tsev, cog qoob loo hauv roob moj sab qhua, thiab txhim tsa tej zej zog tshiab.

Thawj Tswj Hwm J. Reuben Clark, tus Pab Cuam thib Ib hauv Thawj Pawg Thawj Tswj Hwm, tau hais ib zaj lus qhuas cov pioneer uas rau siab ntseeg nyob hauv lub Kaum Hli Ntuj xyoo 1947 lub tuam rooj sab laj.

Nyob hauv nws zaj lus, Thawj Tswj Hwm Clark tau hais ua tsaug rau cov thawj coj uas tau coj kev mus rau sab hnub poob, xws li Brigham Young, Heber C. Kimball, Wilford Woodruff, Parley P. Pratt, thiab neeg coob ntxiv. Tiam sis, nws lub hom phiaj thib ib tsis yog kom hais txog tag nrho tej yam uas cov neeg zoo no tau ua. Tiam sis, nws tau hais lus ntau txog cov neeg ruaj nrees uas tsis muaj leej twg paub lawv lub npe thiab tsis tau sau lawv tej xwm txheej hauv lub Koom Txoos zaj keeb kwm. Lub npe ntawm nws zaj lus yog “Lawv cov Nyob hauv lub Tsheb Nees Kawg.”¹

Thawj Tswj Hwm Clark piav ntau yam txog tej xwm txheej thiab tej teeb meem uas cov neeg raug thaum lawv nyob hauv lub tsheb nees kawg hauv ib pawg tsheb nees uas ib kab hla tiaj nras. Nws qhuas cov pha-ej no uas tsis paub lawv lub npe, cov uas ib hnub dhau ib hnub, lub lim tiam dhau lub lim tiam, lub hli dhau lub hli, noj cov av hmoov uas txhua lub tsheb nees nyob tom hauv ntej ua kom nce—thiab cov uas tau kov yeej tej kev cov nyom uas lawv raug tsis tu tsis tseg thaum lawv mus.

Thawj Tswj Hwm Clark hais tias, “Cov uas nyob hauv lub tsheb nees kawg tau sib zog mus tom ntej, lawv sab thiab nkees, mob ko taw, tej lub sij hawm yuav luag poob siab, lawv txoj kev ntseeg tias Vajtswv hlub lawv tau txhawb nqa lawv, lawv ntseeg tias txoj moo zoo uas tau muab txum tim rov qab los muaj tseeb, thiab tus Tswv tau coj cov Kwv Tij uas nyob puag tom hauv ntej.”²

Nws kaw nws zaj lus thaum nws hais lus qhuas lawv li no: “Rau cov neeg txo hwj chim no, cov uas muaj kev ntseeg heev, cov uas khwv ua hauj lwm, cov uas ua neej ncaj ncees, cov uas tsim peb txoj hmoov uas muaj nqis heev, kuv txo hwj chim qhia nej tias kuv hlub nej, saib nej rau nqi, kuv qhuas nej heev.”³

Nyob rau xyoo 1990, Thawj Tswj Hwm Howard W. Hunter, tus uas yog Thawj Tswj Hwm ntawm Pawg Kaum Ob tug Thwj Tim thaum ntawd, tau hais ib zaj lus txog tej hauj lwm ntawm lub Koom Txoos cov mej zeej suav tsis txheeb uas rau siab thiab mob siab ua hauj lwm tiam sis tsis txais kev qhuas pes tsawg los yog tsis muaj koob muaj npe hlo li.

Thawj Tswj Hwm Hunter piav hais tias:

“Twb hais li no txog [tus Thawj Tub Rog Maulaunais uas hluas thiab muaj peev xwm heev]:

“‘Tag nrho tej neeg uas nyob yav tas los, thiab nyob nim no, thiab tseem yuav nyob lawm yav tom ntej, yog lawv zoo li Maulaunais, saib seb, ntshe ntuj txiag teb tsaus lub hwj chim twb yuav raug tshee hnyo mus ib txhis; muaj tseeb tiag, ntshe tus dab phem twb tsis muaj hwj chim kav noob neej lub siab ib zaug li’ (Amas 48:17).

“Yeej yog lus qhuas zoo rau ib tug txiv neej uas muaj npe thiab muaj hwj chim heev. … Ob nqe tom qab ntawd, muaj ib nqe lus txog Hilamas thiab nws cov kwv tij, uas twb ua ib lub luag hauj lwm uas tsis pom npaum li pom tau Maulaunais li, uas hais tias:

“‘Nim no saib seb, Hilamas thiab nws cov kwv tij yeej ua hauj lwm pab rau cov neeg npaum li Maulaunais’ (Amas 48:19).”

Thawj Tswj Hwm Hunter hais ntxiav tias, “Los yog hais tias, txawm yog tsis tau pom Hilamas txoj kev ua hauj lwm npaum li pom tau Maulaunais li, nws twb ua hauj lwm pab npaum li Maulaunais.”⁴

Ces Thawj Tswj Hwm Hunter tau ntuas peb kom ua hauj lwm pab npaum li ntawd. Nws hais tias: “Yog nej xav tias tej yam uas nej ua xyoo no los yog tej xyoo tom ntej tsis ua rau nej muaj npe heev, cia li tsis txhob poob siab. Neeg zoo tshaj plaws feem coob tsis tau muaj npe pes tsawg thiab. Cia li ua hauj lwm thiab kawm zuj zus, rau siab thiab ua ntsiag to.”⁵

Kuv ua Vajtswv tsaug rau lub Koom Txoos cov mej zeej coob uas hnub no los cuag tus Cawm Seej⁶ thiab sib zog taug txoj kev ua raws li lawv tej kev khi lus nyob hauv tej tsheb nees kawg ntawm peb tej pawg tsheb nees niaj hnub nim no—cov uas yeej ua hauj lwm pab npaum li cov thawj coj. Nej txoj kev ntseeg Leej Txiv Saum Ntuj Ceeb Tsheej thiab tus Tswv Yexus Khetos uas muaj zog thiab qhov uas nej ua siab ncaj fij nej lub neej tseg rau Nkawd yeej tshoov kuv lub siab kom xav ua ib tug neeg thiab ib tug thwj tim zoo dua.

Kuv hlub nej. Kuv saib nej rau nqi. Kuv ua nej tsaug. Thiab kuv qhuas nej.

Ib nqe lus hauv Phau Ntawv Maumoos los ntawm Xamuyees tus Neeg Lamas

“[Cia li] pom tias feem coob ntawm lawv yeej nyob rawv ntawm lawv txoj kev ua lawv tej dej num, thiab Vajtswv pom tias lawv yeej taug kev ceev faj, thiab lawv yeej mob siab ua raws li nws tej lus txib thiab nws tej kev cai thiab nws tej kev txiav txim raws li Mauxes txoj kev cai.” …

“Muaj tseeb tiag, kuv hais rau nej tias, feem coob ntawm lawv tab tom ua li no, thiab lawv tab tom rau siab ntso yam tsis nkees kiag xwv kom lawv yuav coj tau lawv cov kwv tij uas tseem tshuav los paub txog qhov tseeb.”⁷

Kuv ntseeg tias tej lus “nyob rawv ntawm lawv txoj kev ua lawv tej dej num” piav txog cov kwv tij thiab cov muam uas nrhiav thiab zaum ze cov neeg uas nyob lawv ib leeg nyob hauv lub Koom Txoos tej kev sib ntsib thiab nyob lwm qhov chaw. Lawv rau siab sib zog “nplij cov neeg lub siab uas xav tau txoj kev nplij siab,”⁸tsis xav tias yuav muaj neeg qhuas lawv.

Tej lus “nyob rawv ntawm lawv txoj kev ua lawv tej dej num” piav txog tej nkawm niam txiv thiab cov me nyuam uas txhawb nqa ib tug khub, niam txiv, los sis ib tug me nyuam uas ua hauj lwm ua tus thawj coj hauv tus Tswv lub Koom Txoos. Lawv lub hwj huam ntsiag to uas tsis tu tsis tseg yeej foom koob hmoov rau tib neeg thiab tsev neeg coob kom txais tau tej yam uas tsuas yuav paub hauv lub neej nyob mus ib txhis li.

Tej lus “nyob rawv ntawm lawv txoj kev ua lawv tej dej num” piav txog tib neeg uas dhau los tau txav mus deb ntawm Vajtswv, tiam sis lawv txo hwj chim rov qab txav mus nyob ze Nws,⁹ hloov siab lees txim txog lawv tej kev txhaum, thiab nrhiav lub hwj chim ntawm tus Cawm Seej txoj Kev Theej Txhoj uas ntxuav lawv huv thiab kho lawv zoo. Kev los cuag Khetos¹⁰ yog kev rov qab mus taug txoj kev ua raws li tej kev khi lus tom qab lawv twb taug “tej kev uas txwv tsis pub mus” ntawm kev txhaum¹¹ yeej yog ib txoj kev tseem ceeb thiab ncaj ncees. Thaum lawv sib zog mus tom ntej nrog kev ntseeg thiab tsis txhob nkees ua tej yam zoo, lawv teeb lub hauv paus ntawm ib txoj hauj lwm tseem ceeb rau lawv lub neej,¹² rau txhua tiam neeg thiab nyob mus ib txhis li.¹³

Tej lus “nyob rawv ntawm lawv txoj kev ua lawv tej dej num” piav txog tib neeg ncaj ncees uas xav xav nrog tus Cawm Seej sib khi dhau los ntawm tej kev khi lus thiab cov kab ke ntawm Nws txoj moo zoo—tiam sis tej zaum muaj tej yam uas lawv tswj tsis tau uas tav lawv kev. Kuv cog lus tias yuav nplij nej txoj kev ntxhov siab thiab qhov uas nej mloog lus thiab rau siab ntseeg ua siab ntev ywj rau Vajtswv lub siab nyiam yuav ua rau nej txais nqi zog “raws li lub caij nyoog uas tus Tswv pom zoo.”¹⁴ “Thaum tsaus ntuj muaj kev quaj ntsuag, tiam sis thaum kaj ntug muaj kev zoo siab.”¹⁵

Tej lus “nyob rawv ntawm lawv txoj kev ua lawv tej dej num” piav txog cov neeg txhais lus nyob thoob plaws lub ntiaj teb uas ua hauj lwm rau tus Tswv thaum lawv pab cov phooj ywg thiab cov mej zeej “hnov qhov txhij txhua ntawm txoj moo zoo los ntawm [lawv] yam lus hais, thiab los ntawm [lawv] yam lus.”¹⁶ Lawv lub suab, kev piav tes, thiab cov ntaub ntawv txhais lus muaj tej lus tseeb mus ib txhis li, tiam sis peb feem tsawg paub lawv tej npe los yog qhia tias peb ris lawv txiaj. Txawm yog lawv muaj lub txiaj ntsim hais lwm yam lus uas tus Ntsuj Plig foom pub rau lawv, cov neeg txhais lus rau siab ua hauj lwm, tsis xav txog lawv tus kheej, thiab feem ntau tsis muaj leej twg paub lawv thaum lawv pab tib neeg txais lub txiaj ntsim muaj kev ntseeg thaum lawv nyeem thiab hnov Vajtswv txoj lus.¹⁷

Tej lus “nyob rawv ntawm lawv txoj kev ua lawv tej dej num” piav txog cov txiv neej thiab cov poj niam rau siab ntseeg uas saib taus lawv txoj kev khi lus kom huaj vam mus puv nkaus lub ntiaj teb thiab cov uas txais koob hmoov kom muaj zog txaus nrog cov me nyuam sib txhom hauv kev sib ntsib txais lub cim nco txog. Nyob hauv ib lub ntiaj teb ntxhov hnyo uas muaj kev kub ntxhov thiab tsom ntsoov rau tej yam tsis yog, cov neeg ua siab loj no tsis mloog tej lub suab uas qhuas kev xav txog tus kheej; lawv hwm qhov uas tib neeg txoj sia yeej dawb huv thiab tseem ceeb nyob hauv Leej Txiv Saum Ntuj Ceeb Tsheej txoj hau kev zoo siab rau Nws cov me nyuam.

Tej nkawm niam txiv coob kuj tso siab rau Vajtswv thaum twg tsis muaj raws li lawv lub siab xav ua ncaj ncees los yog tsis muaj thaum twg lawv xav tias lawv txais. Lawv “tos ntsoov tus Tswv”¹⁸ thiab tsis yuam kom Nws ua raws li lub sij hawm uas lawv teem tseg. “Vim txij thaum chiv keeb ntawm lub ntiaj teb los yeej tsis tau muaj neeg lub pob ntseg tau hnov los yog tau paub, thiab tsis tau muaj ib lub qhov muag tau pom, ntxiv rau ntawm koj, auj Vajtswv, koj tau npaj tej yam tseem ceeb heev rau [cov] uas tos rawv koj.”¹⁹

Tej lus “nyob rawv ntawm lawv txoj kev ua lawv tej dej num” piav txog cov thawj coj zov me nyuam thiab cov xib hwb uas qhia nyob hauv lub Koom Haum Me Nyuam Yaus uas hlub thiab qhia cov me nyuam hauv lub Koom Txoos txhua Hnub Caiv.

Xav txog qhov uas cov thwj tim txoj kev pab yuav nyob mus ib txhis li—thiab txog cov koob hmoov zoo kawg uas tau cog lus rau cov uas txhawb pab cov me nyuam.

“Yexus mus coj ib tug me nyuam yaus los sawv ntawm cov thwj tim xub ntiag. Yexus puag tus me nyuam yaus ntawd thiab hais rau cov thwj tim hais tias,

“Tus uas lees yuav cov me nyuam yaus no ib tug los ntawm kuv lub npe kuj yog tus ntawd lees yuav kuv, thiab leej twg lees yuav kuv, tsis yog nws lees yuav kuv tib leeg xwb, tiam sis yog nws lees yuav tus uas txib kuv los thiab.”²⁰

Tej lus “nyob rawv ntawm lawv txoj kev ua lawv tej dej num” piav txog cov me nyuam uas mob siab saib xyuas lawv niam lawv txiv laus, ib tug niam tsev uas tsis pw tsaug zog vim nws nplij ib tug me nyuam uas ntshai thaum nws zov zoo li tus tsov nyob ntawm nws lub tsev lub qhov rooj ²¹ lub Koom Txoos cov mej zeej uas tuaj ntxov thiab nyob lig kom tsa thiab qhau cov rooj, thiab cov neeg uas caw tsev neeg, phooj ywg thiab cov neeg ua hauj lwm kom los saib, los pab, thiab los nyob.²²

Kuv tsuas piav ob peb yam ntxwv txog kev ua raws li kev khi lus thiab Yexus Khetos cov thwj tim uas rau siab li nej cov uas sib zog mus tom ntej “nyob rawv ntawm lawv txoj kev ua lawv tej dej num” Muaj Haiv Neeg Ntseeg hauv Hnub Nyoog Kawg coob coob ntxiv uas muab “tag nrho lawv lub siab lub ntsws”²³ rau Vajtswv nyob hauv tej tsev neeg uas tsom ntsoov rau Yexus Khetos thiab lub Koom Txoos tej pawg ntseeg nyob thoob plaws lub ntiaj teb.

Nej hlub thiab pab, mloog thiab kawm, saib xyuas thiab nplij siab, thiab qhia thiab ua tim khawv los ntawm tus Vaj Ntsuj Plig Dawb Huv lub hwj chim. Nej yoo mov thiab thov Vajtswv tsis tu tsis tseg, nej txoj kev txo hwj chim loj hlob muaj zog zuj zus tuaj, thiab nej txoj kev ntseeg Khetos ruaj khov zuj zus tuaj, “txog rau thaum [nej] muaj kev xyiv fab thiab kev nplij siab puv nkaus, muaj tseeb tiag, twb txog rau thaum ua rau [nej] lub siab hloov ua ntshiab thiab dawb huv, kev hloov ua dawb huv uas tau muaj vim yog [nej] ywj [nej] lub siab rau Vajtswv.”²⁴

Lawv cov uas nyob hauv lub tsheb nees kawg, tag nrho nej cov uas ua hauj lwm zoo npaum li cov thawj coj, thiab nej cov uas niaj hnub sib zog mus tom ntej kom nyob rawv ntawm nej txoj kev ua nej tej dej num, nej yog lub zog ntawm tus Cawm Seej lub Koom Txoos. Thiab raws li tus Tswv tau cog lus, “txhua txoj kev tswj thiab kev kav, tej nom tswv thiab tej lub hwj chim, yuav tshwm sim los thiab yuav muab cob rau tag nrho cov uas rau siab nyiaj rau Yexus Khetos txoj moo zoo.”²⁵

Kuv zoo siab ua tim khawv tias Leej Txiv Saum Ntuj Ceeb Tsheej thiab Nws Leej Tub muaj txoj sia nyob, thiab Nkawd tej lus cog tseg muaj tseeb, los ntawm tus Tswv Yexus Khetos lub npe dawb huv, amees.