Tej Yam Tseem Ceeb txog Kev Zoo Siab
Peb yuav tsum muab Yexus Khetos ua lub hauv paus rau peb lub neej kom peb zoo siab.
Thaum kuv caij nyab hoom mus ua lag luam ob peb xyoos tas los, kuv zaum ze ntawm ib tug txiv neej uas nyob hauv teb chaws Netherlands. Kuv xav nrog nws sib tham vim tias kuv twb ua tub txib nyob hauv Belgium thiab Netherlands thaum kuv yog ib tug tub hluas.
Thaum wb sib tham, nws muab nws daim ntawv ua lag luam rau kuv es muaj ib txoj hauj lwm hu ua “xib hwb ntawm kev zoo siab.” Kuv hais me ntsis txog nws txoj hauj lwm zoo kawg thiab nug seb ib tug xib hwb ntawm kev zoo siab ua dab tsi. Nws hais tias nws tau qhia tib neeg kom muaj ib lub neej zoo siab thaum lawv cuab hom phiaj uas muaj nqis thiab nrog lwm tus sib raug zoo. Kuv teb hais tias, “Zoo kawg, tiam sis yog tias koj qhia tau tias tej kev sib raug zoo nrog lwm tus yuav kav mus dhau kev tuag thiab teb tej lus nug ntxiv los ntawm sab siab ntsws, xws li lub hom phiaj ntawm lub neej no yog dab tsi, peb yuav ua li cas kom kov yeej peb tej kev qaug zog, thiab peb mus qhov twg tom qab peb tuag?” Nws lees hais tias yeej yuav zoo kawg nkaus yog tias peb teb tau tej lus nug ntawd, thiab kuv zoo siab heev qhia nws tias peb yeej teb tau.
Hnub no, kuv xav qhia txog ob peb lub ntsiab cai tseem ceeb txog kev zoo siab uas muaj tseeb uas neeg feem coob hauv lub ntiaj teb nrhiav tsis tau, qhov chaw uas muaj ntau yam uas tib neeg nyiam tiam sis muaj tsawg uas tseem ceeb tiag.
Amas tau qhia cov neeg hauv nws lub caij nyoog tias, “Vim saib seb, kuv hais rau nej tias muaj ntau yam yuav los; thiab saib seb, muaj ib yam uas tseem ceeb tshaj txhua yam—vim saib seb, lub sij hawm tshuav tsis deb ncua lawm uas tus Txhiv Dim yuav los thiab nyob nrog nws cov neeg.”1
Cov lus no yeej tseem ceeb rau peb niaj hnub nim no thaum peb tos ntsoov thiab npaj rau Yexus Khetos txoj Kev Los Zaum Ob!
Yog li ntawd, thawj qhov uas kuv kawm yog qhov uas peb yuav tsum muab Yexus Khetos ua lub hauv paus rau peb lub neej kom peb zoo siab. Nov yog ib lub hauv paus ruaj nrees, “ib lub hauv paus uas yog neeg cog rau saud lawv yuav tsis vau.”2 Ua li ntawd ces peb thiaj li npaj siab kov yeej tej teeb meem ntawm lub ntiaj teb.
Ntau xyoo tas los thaum lub caij ntuj sov, kuv tau nrog kuv tus tub Justin mus nrog cov Scout mus ua si hauv hav zoov. Thaum tab tom ua tej yam ntxim saib ntxim ua, nws zoo siab tshaj tawm tias nws thiab nws cov phooj ywg xav tau lub merit badge rau kev tua hneev. Cov tub hluas yuav tsum xeem ntawv me me thiab tua hneev raug lub hom phiaj.
Ua rau kuv poob siab. Thaum lub sij hawm no, Justin qaug zog heev vim nws muaj mob cystic fibrosis, ib kab mob uas nws ib txwm muaj txij thaum nws yug los. Ua rau kuv xav tias nws puas muaj zog txaus rub txoj hlua rab hneev txaus kom xib xub raug lub hom phiaj.
Thaum nws thiab nws cov phooj ywg mus rau lawv qhov chaw kawm tua hneev, kuv tau thov Vajtswv kom nws yuav tsis poob siab. Ob peb teev tom qab ntawd, kuv pom nws taug txoj kev tuaj es nws luag nyav. “Txiv!” nws hais. “Kuv tau lub merit badge! Kuv tua hneev ncav nruab nrab lub hom phiaj; yog lub hom phiaj ntawm kuv li ib sab, tiam sis yog twb raug lawm!” Nws tau siv zog rub txoj hlua rab hneev thiab muab tso xwb thiaj li kav tsis taus xib xub tsis paub yuav mus qhov twg. Kuv zoo siab uas tus kws qhia tua hneev to taub, es nws tsis hais tias, “Thov txim, koj raug lub hom phiaj tsis yog lawm!” Tiam sis, nws pom Justin tej teeb meem uas yooj yim pom taus thiab qhov uas nws siv zog ua, es nws thiaj li teb hais tias, “Zoo kawg!”
Yuav zoo li no yog peb ua zoo npaum li peb ua tau kom coj raws li Yexus Khetos thiab Nws cov yaj saub txawm yog muaj tej kev qaug zog los yog. Yog peb los cuag Nws thaum peb ua raws li peb tej kev khi lus thiab hloov siab lees txim rau peb tej kev txhaum, peb yuav muaj kev xyiv fab hnov peb tus Cawm Seej qhuas peb tias: “Zoo heev, koj yog tus tub qhe uas zoo thiab ncaj ncees.”3
Kuv ua tim khawv rau nej txog tus Cawm Seej ntawm lub ntiaj teb thiab Nws txoj kev hlub txhiv dim uas muaj hwj chim kho, txhawb peb dag zog, thiab txhawb nqa peb thaum peb rau siab siv zog los cuag Nws. Tiam sis, tsis muaj ib txoj kev uas peb yuav koom nrog pawg neeg coob thiab mus cuag Yexus thiab. Tus Cawm Seej tau kov yeej kev tuag, kab mob, thiab kev txhaum thiab tau npaj ib txoj kev rau peb hloov los ua neeg zoo tag nrho yog tias peb coj raws li Nws kawg siab kawg ntsws.4
Qhov tseem ceeb thib ob uas kuv kawm txog peb txoj kev zoo siab yog qhov uas peb yuav tsum nco ntsoov tias peb yog cov tub thiab cov ntxhais ntawm ib Leej Txiv Saum Ntuj Ceeb Tsheej uas hlub peb. Kev paub thiab kev ntseeg qhov no yeej hloov txhua yam.
Ob peb xyoos tas los, thaum caij nyab hoom los tsev tom qab ua hauj lwm rau lub Koom Txoos, kuv tus poj niam thiab kuv wb zaum tom qab ntawm ib tug txiv neej loj heev uas muaj kev kos duab nyob nraum nws lub taub hau uas do do kos ib lub ntsej muag loj uas chim siab heev thiab kos tus naj npawb 439.
Thaum nyab hoom tsaws, kuv hais tias, “Thov txim os. Koj puas kam kuv nug seb tus naj npawb uas kos duab rau koj lub taub hau ntawd txhais li cas?” Kuv tsis muaj cuab kav nug txog nws lub ntsej muag chim.
Nws hais tias, “Yog kuv. Kuv yog tus naj npawb ntawd. Yog kuv cheeb tsam: 219!”
Plaub puas thiab peb caug cuaj yog tus naj npawb rau ntawm nws lub taub hau, kuv thiaj li xav tsis thoob vim li cas nws hais tsis yog vim yog ib yam tseem ceeb rau nws.
Ua rau kuv tu siab uas tus txiv neej xav tias qhov uas nws yog leej twg thiab nws muaj nqi raws li ib tug naj npawb ntawm ib pab laib cheeb tsam. Ua rau kuv xav rau kuv tus kheej tias: Tus txiv neej no thaum yav tas los yog leej twg ib tug me nyuam tub uas xav paub tias nws muaj nqis thiab muaj neeg hlub nws. Kheev lam nws paub tias nws yog leej twg tiag thiab muaj neeg hlub nws tiag, vim “Vajtswv twb txhiv [peb sawv daws] kim kawg li los lawm.”5
Muaj ib kab lus los ntawm ib zaj nkauj hauv duab yeeb yaj kiab hu ua The Prince of Egypt uas hais tias, “Saib nej lub neej raws li ntuj ceeb tsheej saib.”6 Thaum txoj kev paub tias peb yog Vajtswv cov me nyuam thiab peb muaj peev xwm hloov los ua zoo li Nws nyob hauv peb lub siab ntsws, peb yuav txawj saib lub neej no yog ib yam uas muaj nqis heev thiab pab peb loj hlob tuaj txawm yog rau ib ntus xwb “tej uas nim no peb pom, zoo li tus duab plooj plooj uas nyob hauv daim tsom iav xwb”7.
Qhov tseem ceeb thib peb uas kuv kawm txog kev zoo siab yog kom nco ntsoov ib tug neeg muaj nqis npaum li cas. Peb ua li no thaum peb ua raws li tus Cawm Seej tej lus ntuas: “Ib leeg … [yuav tsum] hlub ib leeg ib yam li kuv hlub nej.”8
Nws kuj qhia tias, “Thaum uas nej tau pab kuv cov kwv tij no ib tug, txawm yog tus ntawd muaj hwj chim yau dua cov los nej tseem pab nws thiab, qhov uas nej pab tus ntawd, twb yog nej pab kuv ntag.”9
Phau Paj Lug ntuas hais tias, “Yog muaj tej yam uas koj pab tau lwm tus, cia li pab tsis txhob muab khaws cia.”10
Peb yeej yuav tsis khuv xim qhov uas peb siab zoo dhau. Raws li Vajtswv pom, kev ua siab zoo yeej yog qhov zoo kawg. Thaum yus ua siab zoo yus zam txim pub rau lwm tus thiab tsis txiav txim rau lawv.
Ntau xyoo tas los peb tsev neeg yuav mus saib movie rau tsev neeg hmo ua ke. Peb sawv daws nyob hauv lub tsheb tsuas yog ib tug tub thiab kuv tus poj niam, Valerie. Twb tsaus ntuj lawm, thiab thaum wb tus tub qhib qhov rooj thiab khiav mus rau lub tsheb, nws ua yuam kev ncaws ib tug tsiaj uas nws xav tias yog ib tug miv nyob ntawm qhov rooj. Wb tus tub thiab kuv tus poj niam twb raug hmoov phem, vim tsis yog ib tug miv tiam sis yog ib tug puam sem uas tsis zoo siab, es nws tsuag nws cov kua tsw phem raug nkawd! Peb sawv daws rov qab mus hauv lub tsev, es nkawd ob leeg da dej thiab siv kua txiv lws suav ntxhua plaub hau, uas yog qhov uas tib neeg hais tias nyaj yuav tshem tus tsw puam sem ntawd. Txog sij hawm uas nkawd da dej thiab hloov ris tsho, peb sawv daws hnov tsis tau tus tsw ntxhiab, yog li ntawd peb txiav txim siab tias peb tseem mus saib movie los tau.
Thaum peb zaum hauv chav saib movie, cov neeg ib puag ncig tam sim ntawd txiav txim siab mus yuav paj kws ib tug mus ib tug zuj zus. Tiam sis thaum lawv rov qab los, tsis muaj leej twg uas zaum hauv lub rooj zaum qub.
Peb luag ntau thaum peb hais txog zaj ntawd, tiam sis yuav ua li cas yog tias peb tej kev txhaum muaj tus tsw ntxhiab? Yuav ua li cas yog peb hnov tau kev dag, kev ntshaw, kev khib siab, los yog kev muab hlob? Yog txhua tus paub txog peb tej kev qaug zog, cia siab tias peb yuav hais lus zoo ntxiv thiab ua siab ntev rau lwm tus, thiab lawv mam li ua ib yam li ntawd rau peb thaum peb hloov tej yam uas yuav tsum hloov hauv peb lub neej. Kuv nyiam tsw luam yeeb nyob hauv lub tsev koom txoos, vim qhov ntawd qhia tias muaj ib tug neeg uas xav hloov siab. Lawv xav tau peb puag lawv.
Thawj Tswj Hwm Russell M. Nelson tau hais tias, “Txoj kev yooj yim tshaj kom paub tias leej twg yog tus coj raws li Yexus Khetos tiag tiag yog kev saib tus ntawd ua siab zoo rau lwm tus npaum li cas.”11
Povlauj sau rau cov neeg Efexus tias, “Nej yuav tsum ua siab dawb siab zoo, ib tug hlub ib tug, thiab ib tug zam txim rau ib tug, ib yam li Vajtswv twb zam txim rau nej cov uas ntseeg Yexus Khetos lawm.”12
Vim peb yog Yexus Khetos cov thwj tim, peb yuav tsum tso siab rau Leej Txiv Saum Ntuj Ceeb Tsheej thiab peb tus Cawm Seej thiab tsis txhob muab leej twg pauv Nkawd. Yexus Khetos paub txhua tus tej kev qaug zog thiab txawj txiav txim rau lawv zoo tag nrho.
Qhov tseem ceeb thib plaub uas kuv kawm txog kev zoo siab yog kev muaj lub zeem muag uas pom tau mus ib txhis li. Peb Leej Txiv txoj hau kev ncav mus ib txhis li; yeej yooj yim rau peb tsom ntsoov rau lub sij hawm tam sim no thiab tsis nco qab lub neej yav tom ntej.
Kuv twb kawm qhov no thaum yav tas los los ntawm wb tus ntxhais uas muaj 16 xyoo, Jennifer. Nws tab tom yuav raug phais ob lub ntsws, es tsib pob mob hauv nws lub ntsws los yuav raug txiav tawm thiab raug tshem mus ces tso ob lub pob ntsws me me zoo rau hauv, uas ob tug phooj ywg zoo tau ua siab dawb pub. Yeej yog ib txoj kev phais mob uas txaus ntshai heev, tiam sis hmo ua ntej yuav phais mob, Jennifer tshaj tawm rau kuv txawm nws tsuas muaj 90 phaus (41 kg) xwb, hais tias, “Txiv os, tsis txhob txhawj! Tag kis kuv yuav tsim los es muaj ob lub ntsws tshiab los yog kuv yuav tsim los nyob hauv ib qho chaw zoo dua. Ob yam yeej yuav zoo.” Nov yog kev ntseeg; nov yog kev txawj pom kev mus ib txhis li! Qhov uas yus saib lub neej no raws li yog ib feem ntawm kev nyob mus ib txhis li yeej ua rau yus pom meej, muaj kev nplij siab, kev ua siab loj, thiab kev cia siab.
Tom qab phais lub ntsws, thaum txog hnub uas tos ntsoov kom tshem txoj hlua tso pa thiab tua lub tshuab uas pab Jennifer ua pa, peb txhawj xeeb tos seb nws ob lub pob ntsws puas ua tau hauj lwm. Thawj zaug nws ua pa, tam sim ntawd nws pib quaj. Thaum nws pom tias peb txhawj heev, nws hais kiag hais tias, “Kuv tsuas zoo siab kawg vim ua taus pa.”
Txij thaum hnub ntawd, kuv tau ua Leej Txiv Saum Ntuj Ceeb Tsheej tsaug txhua hnub txhua hmo vim kuv ua taus pa. Peb muaj cov koob hmoov ntau nplua mias nyob ib puag ncig uas peb saib tsis taus yog tias peb tsis xyuam xim. Tiam sis, thaum twg tsis xau tau tej yam thiab ris Vajtswv txiaj rau txhua yam, ces peb lub neej yeej zoo siab kawg.
Thawj Tswj Hwm Nelson tau hais tias, “Txhua hnub yog ib lub txiaj ntsim los ntawm Vajtswv. Qhov uas peb ua pa kuj yog ib yam uas Nws foom pub rau peb. Nws tsom kwm saib xyuas peb txhua hnub thiab txhawb nqa peb txhua lub sij hawm. Yog li ntawd, yam thib ib uas peb yuav tsum txhua hnub ua yog txo hwj cim thov Vajtswv ua Nws tsaug.”13
Ces twb txog qhov tseem ceeb thib tsib uas yog qhov kawg, hais tias nej yeej yuav tsis muaj kev zoo siab dua li nej ris Vajtswv txiaj.
Tus Tswv hais tias, “Thiab tus uas txais txhua yam nrog txoj kev ua tsaug los tus Tswv yuav ua kom tus ntawd muaj yeeb koob.”14 Tej zaum muaj li no vim hais tias kev ris txiaj ua rau yus muaj ntau tus cwj pwm zoo zuj zus.
Peb lub siab yuav hloov hlo yog tias txhua hnub thaum peb tsim los tsuas muaj cov koob hmoov uas peb tau hais ua tsaug rau Vajtswv thaum hmo ntuj ua ntej. Qhov uas peb tsis ris Vajtswv txiaj rau peb cov koob hmoov yuav ua rau peb tsis txaus siab, peb thiaj li yuav tsis muaj kev xyiv fab thiab kev zoo siab. Cov neeg nyob hauv lub tsev loj thiab dav yeej ntxias peb kom ntsia dhau lub hom phiaj, yog li ntawd peb ncav tsis tau lub hom phiaj ntawd hlo li.
Tiam sis, kev zoo siab loj tshaj plaws thiab cov koob hmoov zoo tshaj plaws ntawm lub neej no los peb yuav nrhiav tau thaum peb tau hloov siab lawm los ntawm Vajtswv txoj kev tshav ntuj thaum peb ua raws li peb tej kev khi lus nrog Nws. Peb tus Cawm Seej yuav muab peb kho thiab hloov ua dawb huv zuj zus, dhau los ntawm Nws txoj kev theej txhoj thiab tau hais li no txog cov uas txaus siab coj raws li Nws, “Lawv yuav yog kuv tug nyob rau hnub uas kuv yuav los xaiv kuv cov pov haum.”15
Kuv cog lus rau nej tias yog peb ua peb lub neej saum lub hauv paus uas yog Yexus Khetos; saib qhov uas peb yog Vajtswv cov tub thiab cov ntxhais rau nqi; nco ntsoov tias ib tug neeg muaj nqi npaum li cas; txawj pom kev mus ib txhis li; thiab ris Vajtswv txiaj rau peb cov koob hmoov, qhov tseem ceeb yog Yexus Khetos tej lus caw peb los cuag Nws, peb thiaj li yuav nrhiav tau kev zoo siab uas muaj tseeb raws li peb nrhiav hauv lub neej no. Lub neej no tseem yuav muaj tej teeb meem thiab, tiam sis peb yuav muaj peev xwm kov yeej tej no nrog ib lub hom phiaj thiab kev kaj siab lug vim peb to taub thiab ua raws li tej lus tseeb mus ib txhis li.
Kuv ua tim khawv rau nej txog qhov uas Vajtswv, peb Leej Txiv uas hlub peb, muaj txoj sia nyob, thiab txog Nws Leej Tub, Yexus Khetos. Kuv kuj ua tim khawv txog cov yaj saub, cov pom tau, thiab cov txais kev tshwm sim uas muaj txoj sia nyob niaj hnub no. Yeej yog ib txoj koob hmoov uas peb txais lus ntuas ntawm Vajtswv lub siab nyiam dhau los ntawm lawv. Raws li tus Cawm Seej qhia meej tias, “Txawm yog los ntawm kuv lub suab los sis los ntawm kuv cov tub qhe lub suab, yeej zoo ib yam.”16 Los ntawm Yexus Khetos lub npe dawb ceev, amees.