Cov Kwv Tij thiab Muam uas Koom Nrog Khetos

Kuv cov phooj ywg es, hnub no peb twb muaj tej tuas rooj sab laj zoo kawg nkaus. Peb tau hnov tus Tswv tus Ntsuj Plig thiab Nws txoj kev hlub los ntawm tej zaj lus zoo uas peb cov thawj coj tau hais. Kuv zoo siab los hais lus rau nej hmo no ua tus kawg uas hais lus hauv tuas no. Kuv thov kom tus Tswv tus Ntsuj Plig yuav nrog nraim peb thaum peb muaj kev zoo siab ua ke vim peb yog cov kwv tij thiab cov muam uas koom nrog Khetos.

Peb tus yaj saub, Russell M. Nelson, hais tias: “Kuv hais kom peb cov mej zeej nyob txhua qhov chaw coj kev rau txhua tus kom muab lawv tej kev xav thiab tej yam lawv ua los ntawm kev xaiv ntsej muag tso tseg. Kuv thov kom nej saib txhua tus rau nqi li lawv yog Vajtswv cov me nyuam.”¹ Vim nov yog lub Koom Txoos uas loj hlob thoob plaws ntiaj teb no, txoj kev ua raws li peb tus yaj saub txoj kev caw no yog ib yam tseem ceeb heev kom txhim tsa tau tus Cawm Seej lub nceeg vaj hauv txhua lub teb chaws hauv ntiaj teb no.

Yexus Khetos txoj moo zoo qhia peb tias peb sawv daws yog niam txiv saum ntuj ceeb tsheej cov tub thiab cov ntxhais thiab Nkawd hlub peb heev² thiab qhia tias peb nyob ua ke nrog Vajtswv ua ib tse neeg ua ntej peb yug los rau hauv ntiaj teb no. Txoj moo zoo kuj qhia tias peb sawv daws raug tsim los muaj ib tug yam ntxwv thiab yeej zoo li Vajtswv.³ Yog li ntawd, peb nyob sib txig rau ntawm Nws,⁴ rau qhov Nws “tsim txhua haiv neeg tawm hauv tib tug neeg li roj ntsha los xwb.”⁵ Yog li ntawd, peb muaj tej cwj pwm uas los saum ntuj los, thiab yog ib haiv neeg, thiab muaj kev txawj, vim tsuas muaj “tib tug Vajtswv, nws yog sawv daws Txiv. Nws yog tus uas kav sawv daws, … thiab nws nyob hauv [peb] sawv daws lub siab.”⁶

Ua Yexus cov thwj tim, Nws caw peb kom haj yam muaj kev ntseeg, thiab kev hlub, rau peb cov kwv tij thiab cov muam ntawm sab ntsuj plig thaum peb los koom siab koom ntsws vim muaj kev hlub thiab kev sib haum xeeb, tab txawm peb sib txawv li cas los xij, ua li ntawd peb ib leeg yuav haj yam txawj saib ib leeg rau nqi es kom Vajtswv cov tub thiab cov ntxhais yuav saib tau txhua tus neeg.⁷

Puas yog muaj li no rau Nifais cov neeg rau ob puas xyoo tom qab Yexus tau los qhuab qhia lawv?

“Thiab tseeb tiag ntshe twb tsis tau muaj ib co neeg uas yuav zoo siab tshaj nyob hauv tag nrho cov neeg uas Vajtswv txhais tes tau tsim los. …

“Twb tsis muaj qhov hais tias yog cov Neeg Lamas, los sis yog lwm yam neeg twg hlo li; tiam sis lawv tsuas ua ib pab, uas yog Khetos cov me nyuam, thiab cov uas tau Vajtswv lub nceeg vaj ua lawv tug.

“Thiab lawv tau koob hmoov ntau heev!”⁸

Thawj Tswj Hwm Nelson qhia ntxiv seb kev saib tau thiab ib leeg hwm ib leeg tseem ceeb npaum li cas thaum nws hais tias: “Tus uas Tsim Ntuj tau hu peb txhua tus kom muab kev xaiv Vajtswv cov me nyuam ntsej muag tso pov tseg huv tib si. Peb leej twg uas muaj kev ntxub rau lwm haiv neeg yuav tsum hloov siab lees txim tiag! … Peb yuav tsum ua txhua yam peb ua tau kom ib leeg saib tau ib leeg rau nqi thiab hwm Vajtswv txhua tus tub thiab ntxhais.”⁹ Tiag tiag mas, kev saib tau tib neeg rau nqi yeej saib tau tej yam uas peb ua sib txawv rau nqi.¹⁰

Thaum xav txog qhov uas peb sib koom ua Vajtswv cov me nyuam, ces tej lus qhuab qhia uas Thawj Tswj Hwm Nelson hais no yeej yog lub hauv paus rau txoj kev tuam choj uas yuav pab peb haj yam sib to taub es kom txhob muaj tej phab ntsa thaiv peb kev uas yog kev ntxub thiab xaiv tib neeg ntsej muag.¹¹ Tiam sis, yam li Povlauj qhia cov neeg Efexus, peb yuav tsum to taub hais tias yog peb yuav ua raws li txoj ntsiab lus no, peb txhua tus yuav tsum ua thiab sawv daws yuav tsum sib koom siab muaj siab mos siab muag, txo hwj chim, thiab ua siab ntev ib leeg rau ib leeg.¹²

Muaj ib zag dab neeg txog ib tug xib hwb rau neeg Yudais uas nrog nws ob tug phooj ywg ntsia lub hnub tawm tuaj. Nws txawm nug nkawd tias, “Neb ua li cas thiaj paub hais tias hmo ntuj dhau los mus lawm thiab ib hnub tshiab twb pib lawm?”

Nkawd ib tug teb hais tias, “Thaum yus ntsia tim sab hnub tuaj thiab pom tau hais tias ib tug yaj thiab ib tug tshis sib txawv li cas.”

Lwm tus ntawd teb hais tias, “Thaum yus ntsia lub ntuj thiab pom hais tias tsob ntoo txiv roj thiab tsob ntoo txiv dub sib txawv li cas.”

Ces nkawd txawm nug tus xib hwb tib lo lus nug ntawd. Tom qab xav zog, nws txawm teb hais tias, “Thaum yus ntsia mus rau sab hnub tuaj thiab pom tau ib tug poj niam los is txiv neej ntsej muag thiab hais tau hais tias, ‘Nws yog kuv tus muam; es nws yog kuv tus kwv tij.’”¹³

Kuv cov phooj ywg es, kuv qhia tseeb rau nej tias lub hnub tshiab haj yam ci ntsa iab hauv peb lub neej thaum peb pom thiab ua zoo rau lwm tus neeg thiab saib lawv rau nqi thiab hwm lawv vim lawv ua peb tus kwv tij thiab cov muam uas koom nrog Khetos.

Thaum Nws ua hauj lwm qhuab qhia hauv ntiaj teb no, Yexus ua yam ntxwv zoo txog txoj ntsiab ncai no thaum uas Nws “mus thoob plaws txhua qhov chaw … ua hauj lwm zoo,”¹⁴ rau txhua tus neeg, caw lawv los cuag Nws thiab txais yuav Nws tej txiaj ntsim zoo, txawm lawv tuaj qhov twg tuaj, muaj los sis tsis muaj nyiaj, los sis coj kab lig kev cai twg los xij. Nws txhawb pab, kho neeg mob, thiab saib xyuas txhua tus neeg, nws haj yam pab cov neeg txawv, cov uas tsis muaj hwj chim, los sis cov uas luag tej twb xyeej pov tseg lawm. Nws tsis txwv leej twg tiam sis saib lawv rau nqi ib yam nkaus thiab hlub lawv, vim Nws pom hais tias lawv yog Nws cov kwv tij thiab cov muam, tib Leej Txiv cov tub thiab cov ntxhais.¹⁵

Ib qho piv txwv zoo txog qhov no yog thaum tus Cawm Seej tab tom taug kev mus rau Kalilais, nws txhob txwm mus dhau plaws lub teb chaws Xamalis.¹⁶ Yexus txawm txiav txim los zaum ze so rau ntawm Yakhauj lub qhov dej. Thaum nyob ntawd, tus poj niam Xamalis los yuav cev dej hliv rau hauv nws lub taub dej. Vim Nws paub txhua nrho, Yexus thiaj hais rau nws hais tias, “Thov koj ce me ntsis dej rau kuv haus.”¹⁷

Tus poj niam xav tsis thoob vim ib tug neeg Yudais tau thov ib tug poj niam Xamalis los pab thiab qhia li ntawd thaum nws hais tias, “Koj yog neeg Yudais, thiab kuv yog neeg Xamalis, ua li cas koj lam thov dej ntawm kuv haus? vim cov Yudais yeej ib txwm tsis koom siv cov Xamalis tej khob thiab tej tais li.”¹⁸

Tiam sis Yexus, txawm tso qhov uas cov neeg Xamalis thiab Yudais tsis sib nyiam tseg, es tau ua tib zoo qhuab qhia tus poj niam no, es pab nws to taub seb Yexus yog leej twg tiag—tias Nws yog tus Mexiyas, uas yuav qhia txhua nrho thiab tus uas nws tab tom tos tuaj.¹⁹ Txoj kev txhawb pab ntawd ua rau tus poj niam khiav tiaj loo mus hauv nroog tshaj tawm seb tau muaj xwm dab tsi, hais tias, “Nws puas yog tus Mexiyas?”²⁰

Kuv muaj kev khuv leej rau cov neeg uas raug luag tsim txom, tsis saib lawv rau nqi, los sis raug ua phem vim tib neeg tsis txawj xav thiab tsis khe txog lawv, vim hais tias hauv kuv lub neej mas, kuv twb pom tib neeg tej kev mob siab vim luag twb txiav txim tsis ncaj rau lawv los sis tau muab lawv xyeej pov tseg vim lawv hais lus txawv txav, coj txawv los sis ua neej nyob txawv luag tej. Kuv kuj tu siab rau cov neeg uas tseem xav yuam kev, vim lawv pom kev tsis khav, thiab lawv tseem ua siab tawv es ntseeg hais tias lawv zoo tshaj cov neeg uas txawv lawv. Vim lawv pom kev tsis khav lawv thiaj txawj pom hais tias lawv yog Vajtswv cov me nyuam thiab.

Xws li cov yaj saub twb qhia tseg, peb nyob hauv ib lub caij uas muaj kev kub ntxhov ua ntej tus Cawm Seej txoj Kev Rov Qab Los Zaum Ob²¹ Feem ntau neeg ntiaj teb raug sib faib, ces haj yam muaj teeb meem vim xaiv ntsej muag, xav coj kas moos li cas, thiab cov ua muaj nyiaj cov uas tsis muaj. Tej kev sib faib li no ua rau tib neeg muaj tej kev xav thiab yuav coj li cas rau lwm tus neeg. Yog vim li ntawd, feem ntau tib neeg yuav hais tias ib txoj kev xav, kev coj ua, thiab kev hais lus txog lwm kab lig kev cai, haiv neeg, thiab hom neeg yog cov uas qis zog, ces thiaj hais tej tswv yim cuav, ua yuam kev, thiab hais lus tsis zoo, ces thiaj ua kom lawv muaj kev ntxub, kev tsis quav ntsej, kev saib tsis taus, thiab kev xaiv ntsej muag rau lawv. Tej cwj pwm zoo li no muaj hauv paus hauv ntsis ntawm kev khav theeb, kev khav txiv, kev ntshaw, thiab khib siab, tej cwj pwm uas yog neeg ntiaj teb li,²² es tag nrho tej no yog qhov fab ntxeev ntawm Yexus tej cwj pwm. Txoj kev coj li no yeej tsis zoo rau cov neeg uas tab tom sim los ua Nws cov ntseeg tiag tiag.²³ Muaj tseeb tiag, kuv cov kwv tij thiab cov muam, tej kev xav los sis coj ua uas xaiv tib neeg ntsej muag li no yeej tsis muaj chaw hauv ib Tsoom Haiv Neeg Ntseeg.

Ua cov tub thiab cov ntxhais ntawm kev sib khi lus, peb pab tshem tej kev coj no thaum peb pom peb tej kev sib txawv ib yam li tus Cawm Seej yuav pom²⁴ thiab ua raws li tej yam cwj pwm uas peb coj sib xws—uas yog peb txoj kev los saum ntuj thiab kev ua kwv tij nus muam. Tsis tas li ntawd xwb, peb yuav tsum xav hais tias peb nyob hauv peb cov neeg zej zog tej zaj npau suav, tej kev cia siab, tej kev nyuaj siab thiab tej kev mob siab. Peb yeej sib koom taug kev ua Vajtswv cov me nyuam, nyob sib txig vim peb sawv daws tsis zoo tag nrho tiam sis muaj peev xwm loj hlob tuaj. Peb raug caw los taug kev ua ke, muaj kev thaj yeeb, muaj kev hlub puv npo rau Vajtswv thiab noob neej sawv daws—los yog, raws li Abraham Lincoln hais, “txhob ntxub leej twg thiab muaj kev siab hlub rau txhua leej txhia tus.”²⁵

Nej puas tau xav txog kev saib lwm tus neeg rau nqi thiab kev nyob sib txog yog ib qho uas peb ua thaum peb hnav khaub ncaws hauv tus Tswv lub tsev? Peb sawv daws los rau hauv lub tuam tsev sib koom siab muaj tib lub hom phiaj thiab muaj lub siab huv thiab dawb huv los nyob ntawm Nws xub ntiag dawb huv. Hnav ib ce khaub ncaws dawb paug, tus Tswv Kiag txais peb txhua leej txhia tus vim peb yog Nws cov me nyuam, Vajtswv cov txiv neej thiab poj niam, uas sim ua raws li Yexus ua.²⁶ Peb muaj cib fim ua tib co kab ke, ua tib co kev sib khi lus, cog lus tseg hais tias peb yuav ua neej zoo dua thiab dawb huv dua, thiab txais yuav tib co kev cog lus uas kav mus ib txhis. Sib koom siab, peb ib leeg thiaj pom ib leeg ua neeg tshiab, thiab thaum sib koom siab li no, peb zoo siab rau peb tej kev sib txawv vim peb yog Vajtswv cov me nyuam uas los saum ntuj los.

Tsis ntev tas los no kuv tau coj tsoom fwv ib co nom tswv thiab thawj coj mus saib lub Tuam Tsev Brasília Brazil. Kuv nrog tus thawj kav thib ob hauv Brazil teb nres hauv qhov chaw hloov ris tsho, thiab thaum peb sib tham txog cev khaub ncaws dawb uas sawv daws hnav hauv lub tuam tsev. Kuv piav rau nws tias qhov uas sawv daws hnav cev khaub ncaws dawb no ua piv txwv tias hauv Vajtswv qhov muag peb sawv daws yeej zoo ib yam thiab tias hauv lub tuam tsev, peb tsis yog ua tus thawj kav ib lub teb chaws los sis ib tug thawj coj hauv lub Koom Txoos tiam sis hais tias peb yog Leej Txiv Saum Ntuj Ceeb Tsheej cov tub tas mus ib txhis.

Daim Duab

Iguaçú Falls.

Tus Dej Iguaçú ntws sab qab teb Brazil thiab kawg ntawm ib lub tiaj nrag ces txawm muaj tej tus deg poob tsag uas nrov thoob plaws ntiaj teb no hu ua Iguaçú Falls—yog ib qho uas zoo nkauj heev uas Vajtswv tau tsim hauv ntiaj teb no, yog ib qho ntawm xya qhov chaw zoo tshaj plaws hauv ntiaj teb no. Muaj dej ntau kawg nkaus uas ntws los rau hauv ib tug dej uas txawm faib los ua ntau puas tus dej poob tsag loj kawg nkaus. Hais paj lug mas, cov dej poob tsag no yog ib qho piv txwv txog Vajtswv tsev neeg hauv ntiaj teb no, vim peb sawv daws los ntawm tib qhov chaw los, vim peb yog cov kwv tij thiab cov muam uas los saum ntuj los. Tiam sis, peb sawv daws txawm ntws mus rau hauv tej kab lig kev cai, haiv neeg, thiab hom neeg sib txawv, nyias muaj nyias tej tswv yim, tej hauj lwm, thiab tej kev xav. Txawm muaj li no los, peb mus lawm tom ntej ua Vajtswv cov me nyuam thiab cov kwv tij thiab cov muam uas koom nrog Khetos, tsis xiam qhov uas peb los saum ntuj los, es peb thiaj li nyias txawv nyias li thiab peb ua ib lub koog zej zog zoo kawg.²⁷

Kuv cov me kwv tij thiab cov muam, thov kom peb yuav muab peb lub siab khi los ua ke vim peb paub thiab muaj ib zag lus tim khawv hais tias peb yeej nyob sib txig rau ntawm Vajtswv, es peb sawv daws raug tsim los muaj tib lub hwj chim thiab ntiag tug uas nyob mus ib txhis. Thov kom peb yuav muaj kev sib haum xeeb vim peb yog kwv tij nus muam ntawm sab ntsuj plig thiab ib leeg yuav saib tau ib leeg rau nqi thiab tej cwj pwm uas sib txawv uas peb sawv daws yeej muaj. Yog peb ua li no, kuv cog lus rau nej tias peb nyias yuav mus nyias kev, ib yam li cov dej hauv tus Dej Poob Tsag Iguaçú, es tsis xiam qhov uas peb los saum ntuj los ua ib co neeg txawv txav, “uas yog Khetos cov me nyuam, thiab cov uas yuav txais Vajtswv lub nceeg vaj.”²⁸

Kuv hais lus pov thawj rau nej tias thaum peb ua li no hauv peb lub neej hauv ntiaj teb no, yuav muaj ib hnub tshiab uas cia ntsa iab hauv peb lub neej thiab ci rau tej qhov uas haj yam muaj nuj nqi, thiab yuav haj yam muaj koob hmoov, los ntawm tus Vajtswv uas tsim Nws cov me nyuam sib txawv hauv ntiaj teb no.²⁹ Ces peb yeej yuav ua cuab yeej hauv Nws txhais tes uas txhawb nqa qhov uas ib leeg saib ib leeg rau nqi thiab hwm tag nrho Nws cov tub thiab ntxhais. Vajtswv muaj sia nyob. Yexus yog tus Cawm Seej rau lub ntiaj teb. Thawj Tswj Hwm Nelson yog Vajtswv tus yaj saub hauv peb lub caij nyoog no. Kuv hais lus tim khawv txog tej qhov tseeb no los ntawm Yexus Khetos lub npe dawb huv, amees.