Ua cov Neeg uas Nyob Kaj Siab Lug Coj Raws Li Khetos
Kuv ua tim khawv tias “cov neeg uas nyob kaj siab lug coj raws li Khetos” yuav nyob kaj siab lug hauv lub neej no thiab yuav zoo siab kawg koom ua ke nyob saum ntuj.
Peb nyob hauv ib lub caij nyoog thaum “cov neeg uas nyob kaj siab lug coj raws li Khetos”1 lawv kuj raug tej xwm txheej uas ib txwm tsis muaj. Cov neeg uas ntseeg, txo hwj chim teev tiam Vajtswv, thiab ua tim khawv txog Yexus Khetos yeej ib txwm tau raug kev sim siab, kev txom nyem, thiab tej yam nyuaj.2 Kuv tus poj niam, Mary, thiab kuv wb tsis txawv nej. Ob peb xyoo no wb tau muaj cov phooj ywg uas nrog wb kawm ntawv ua ke thiab cov khub ua tub txib thiab lawv cov poj niam tas sim neej no, thiab cov neeg uas nrog wb ua hauj lwm, los yog, raws li Thawj Tswj Hwm Russell M. Nelson hais tias, lawv kawm ntawv tiav mus rau daim ntaub thaiv sab tod. Twb muaj ib txhia uas ntseeg thaum lawv loj hlob tuaj tiam sis lawv tau tso lawv tej kev khi lus tseg.
Tu siab, uas wb ib tug tub xeeb ntxwv uas muaj 23 xyoos raug tsheb sib tsoo thiab nws tso lub ntiaj teb no tseg. Muaj cov phooj ywg zoo, tsev neeg, thiab cov neeg nrog wb ua hauj lwm uas twb raug teeb meem ntawm lawv txoj kev noj qab nyob zoo.
Thaum tib neeg raug kev sim siab, ua rau peb nyuaj siab thiab xav ris lwm tus tej nra.3 Peb quaj nyiav txog tej yam uas lawv ua tsis taus thiab tej zaj nkauj uas lawv yuav tsis hu.4 Tej yam phem raug tib neeg zoo hauv lub neej no. Tej hluav taws uas kub hnyiab Maui hauv Hawaii, Chile Sab Qab Teb, thiab Canada yeej yog ob peb yam xwm txheej phem uas tib neeg zoo raug.
Peb nyeem hauv phau Lub Hlaws uas Muaj Nqis Heev txog thaum tus Tswv tau qhia Anplaham txog qhov uas cov ntsuj plig nyob mus ib txhis li. Anplaham tau kawm txog peb lub neej ua ntej lub neej hauv ntiaj teb no, kev tsa los ua ntej , txoj Kev Tsim Ntiaj Teb, kev xaiv ib tug Txhiv Dim, thiab lub neej hauv ntiaj teb no, uas yog lub neej theem ob.5 Tus Txhiv Dim tshaj hais tias:
“Peb yuav tsim ib lub ntiaj teb rau cov neeg no mus nyob;
“Thiab peb los ntawm qhov no peb yuav sim lawv lub siab, seb lawv puas yuav ua txhua tsav txhia yam uas tus Tswv lawv tus Vajtswv yuav txib kom lawv ua.”6
Tam sim no peb sawv daws nyob hauv lub neej theem ob ntawm peb txoj kev hloov kom txais tau ib lub nceeg vaj uas muaj yeeb koob uas yog ib feem ntawm Vajtswv txoj hau kev cawm seej thiab kev tsa nto. Peb muaj kev ywj siab xaiv thiab yuav raug tej kev sim siab ntawm lub neej no. Nov yog lub sij hawm uas tau teem tseg rau peb kom npaj siab ntsib Vajtswv.7 Peb tau koob hmoov vim peb paub txog Yexus Khetos thiab Nws lub luag hauj lwm hauv txoj hau kev no. Peb tau koob hmoov vim peb yog cov mej zeej ntawm Nws lub Koom Txoos—Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Vim peb yog cov neeg uas nyob kaj siab lug coj raws li Khetos, peb siv zog ua neej raws li Nws cov lus txib. Yeej tsis yooj yim rau cov neeg uas coj raws li Nws. Kuj tsis yooj yim rau tus Cawm Seej rau siab ua Nws ntiag tug hauj lwm hauv lub ntiaj teb no.
Cov vaj lug kub qhia meej tias: neeg coob yuav nyiam ua raws li tib neeg ntxias kom “yeej meem noj, yeej meem haus, thiab cia li zoo siab, vim tag kis peb yuav tuag.”8 Lwm tus neeg uas tsis ntseeg koom ua ke nrog cov uas xav li lawv thiab pheej hais txog tej “yam tshiab”9 thiab tib neeg laj lim tswv yim.10 Lawv tsis paub nrhiav qhov tseeb nyob rau qhov twg.11
Cov neeg uas nyob kaj siab lug coj raws li Khetos tsis taug ob txog kev no. Peb yog cov neeg hauv zej zog uas muaj lub siab zoo thiab xav koom tes pab. Peb hlub, qhia, thiab caw tag nrho Vajtswv cov me nyuam kom coj raws li Yexus Khetos tej lus qhia.12 Peb ua raws li peb tus yaj saub, Thawj Tswj Hwm Nelson, tej lus ntuas: peb xaiv ua ib tug uas ua kom tib neeg sib haum xeeb, tam sim no thiab txhua lub sij hawm.13 Tus txheej txheem no yog raws li cov vaj lug kub thiab cov yaj saub tej lus qhia.
Nyob rau xyoo 1829, twb tsis tau muab lub Koom Txoos uas txum tim rov qab los txhim tsa, thiab tseem tsis tau muab Phau Ntawv Maumoos luam tawm. Ib pawg neeg uas txom nyem, vim Vajtswv tus Ntsuj Plig tau tshoov lawv lub siab, tau coj raws li tus Yaj Saub Joseph Smith hais. Tus Tswv muab tej lus ntuas rau Joseph thaum raug tej yam nyuaj: “Tsis txhob ntshai, pab me nyuam yaj; cia li ua tej uas zoo; cia lub ntiaj teb thiab ntuj txiag teb tsaus los koom ua ke tawm tsam neb, vim yog neb cog rau saum kuv lub pob zeb, ces lawv yuav kov tsis yeej.”14 Nws kuj ntuas lawv tias:
“Ntsia ntsoov kuv nrog txhua txoj kev xav; tsis txhob ua xyem xyav, tsis txhob ntshai.
“… Cia li rau siab ntseeg, ua raws li kuv tej lus txib, thiab [nej] yuav tau txais lub nceeg vaj ceeb tsheej ua [nej] tug.”15
Peb paub meej tias, peb txoj hmoov nyob saum ntuj yeej tsis hloov thaum peb raug kev ntxhov siab. Nyob hauv phau Henplais Povlauj qhia peb kom “cia li ua siab tawv qhawv mus cuag Vajtswv tus uas zaum saum lub [rooj zaum], rau qhov nws yog tus uas hlub peb. Nws yuav pab peb thiab foom koob hmoov rau txhua tus uas thov nws.”16 Yexus Khetos yog “tus uas pub txoj sia ntev dhawv mus ib txhis.”17
Kuv nyiam Maumoos cov lus, uas nws tus tub Maulaunais hais, qhuas “cov neeg uas nyob kaj siab lug coj raws li Khetos … vim yog nej taug kev thaj yeeb nrog noob neej.”18
Rau peb cov nyob hauv lub Koom Txoos uas siv zog “nyob kaj siab lug coj raws li Khetos,” yuav muaj ib hnub ci ntsa iab dua nyob rau yav tom ntej thaum peb tsom ntsoov rau peb tus Tswv thiab tus Cawm Seej, Yexus Khetos. Tej kev sim siab yeej yog ib feem ntawm lub neej no thiab txhua tus muaj tej no nyob thoob plaws lub ntiaj teb. Tej teb chaws thiab tej haiv neeg los ua tsov ua rog thiab sib cav sib ceg.
Tib neeg pheej nug lub Koom Txoos cov thawj coj hais tias, “Vim li cas Vajtswv cia neeg raug tej yam phem, qhov tseem ceeb yog thaum cov neeg zoo raug tej ntawd?” thiab “Vim li cas cov neeg ncaj ncees thiab cov uas ua tus Tswv txoj hauj lwm tsis dim tej kev txom nyem li ntawd?”
Peb tsis paub tag nrho tej lus teb; tiam sis, peb paub txog tej lub ntsiab cai tseem ceeb uas cia peb muaj kev ntseeg thaum peb raug kev sim siab, kev tsim txom, thiab kev txom nyem thiab ua siab loj vim peb paub tias yav tom ntej yuav zoo li cas. Tsis muaj lwm tus uas coj yam ntxwv txog kev nyiaj dhau kev tsim txom nyob hauv cov vaj lug kub uas zoo tshaj Joseph Smith tus Yaj Saub, tus uas raug kaw hauv lub Tsev Kaw Liberty, thaum nws txais tus Tswv txoj lus.
Tus Tswv hais tias:
“Yog hais tias ntuj txiag teb tsaus lub qhov ncauj kiag yuav qhib loj loj raws koj, koj yuav tsum paub, kuv tus tub, hais tias tag nrho tej yam no yuav muab kev kawm rau koj, thiab yuav zoo rau koj.
“Neeg Leej Tub tau nqis mus qis tshaj tag nrho tej ntawd. Koj puas tseem ceeb dua nws?
“… Tsis txhob ntshai tej yam neeg ua tau, vim Vajtswv yuav nrog koj nyob mus ib txhiab thiab ib txhis li.”19
Peb paub meej tias, peb muaj ib Leej Txiv Saum Ntuj Ceeb Tsheej uas paub peb thiab hlub peb thiab to taub peb tej kev raug txom nyem. Nws Leej Tub, Yexus Khetos yog peb tus Cawm Seej thiab tus Txhiv Dim.
Thawj Tswj Hwm Russell M. Nelson thiab Thawj Tswj Hwm M. Russell Ballard nkawd ob leeg tau qhia tias kev muab phau Qhia Kuv txoj Moo Zoo luam zaum ob tseem ceeb npaum li cas.20 Kuv koom nrog nkawd cia siab txog qhov no. Kev luam ntawv tshiab, uas hais ntau txog cov vaj lug kub, muaj hwj chim qhia hais tias:
“Nyob hauv Nws txoj kev theej txhoj, Yexus Khetos tau ris peb tej kev mob kev nkees, kev txom nyem, thiab kev nyuaj siab. Vim Nws ua li no, Nws paub ‘ntawm sab cev nqaij daim tawv, … paub pab nws cov neeg ntawm sab cev nqaij daim tawv raws li lawv tej kev qaug dag qaug zog’ (Amas 7:12; kuj saib nqe 11). Nws caw hais tias, ‘Los cuag kuv’, thiab thaum peb ua li ntawd, Nws muab kev so, kev cia siab, lub zog, lub zeem muag, thiab kev kho mob rau peb (Mathais 11:28; kuj saib nqe 29–30).
“Thaum peb tso siab rau Yexus Khetos thiab Nws txoj Kev Theej Txhoj, Nws pab tau peb nyiaj tau kom dhau peb tej kev sim siab thiab kev mob kev nkees. Peb yuav muaj kev xyiv fab, kev kaj siab lug, thiab kev nplij siab puv npo. Yexus Khetos txoj Kev Theej Txhoj yuav muab txhua yam uas tsis ncaj ncees txog lub neej kho kom yog.”21
Peb muaj peev xwm muaj kev xyiv fab thaum ua cov neeg uas nyob kaj siab lug coj raws li Khetos.
Peb Leej Txiv txoj hau kev rau Nws cov me nyuam txoj kev zoo siab muaj ib lub neej ua ntej yug los thiab lub neej hauv ntiaj teb no, tiam sis kuj nyob tau mus ib txhis li, thiab rov qab koom ua ke nrog cov uas tas sim neej no lawm. Yeej yuav kho txhua yam tsis yog, thiab peb yuav pom meej thiab peb yuav to taub txhua yam tsis ua yuam kev.
Cov thawj coj hauv lub Koom Txoos tau muab qhov no piv rau ib tug neeg uas nkag hauv kev ua yeeb yam uas muaj peeb zag thaum ua zaj nruab nrab.22 Cov uas tsis paub txog Leej Txiv txoj hau kev tsis to taub tias tau ua li cas hauv zaj thib ib los sis lub neej ua ntej yug los thiab lub hom phiaj uas peb kawm txog nyob ntawd; lawv tsis to taub tej lus piav thiab tej kev kho uas muaj thaum ua zaj thib peb, uas yog lub sij hawm uas yuav muaj raws li Leej Txiv txoj hau kev kom tag.
Neeg coob tsis to taub tias raws li Nws txoj hau kev uas npaj txhua yam cov uas peb pom tias yog neeg raug txom nyem heev, tsis hais lawv tsis tau ua txhaum hlo li, los lawv yeej yuav tsis raug phem thaum kawg.23
Cov vaj lug kub qhia meej hais tias: cov neeg uas nyob kaj siab lug coj raws li Khetos cov uas ncaj ncees, ua raws li tus Cawm Seej qhia, thiab coj raws li Nws cov lus txib yeej yuav tau koob hmoov. Ib nqe vaj lug kub tseem ceeb tshaj rau cov neeg ua ncaj ncees, tsis hais lawv raug xwm txheej li cas hauv lawv lub neej, yog ib feem ntawm Vaj Ntxwv Npeyamis zaj lus rau nws cov neeg. Nws cog lus tias cov uas rau siab ua raws li cov lus txib yeej tau koob hmoov rau txhua txhia yam hauv lub neej no, thiab “Vajtswv yuav txais lawv mus rau hauv ceeb tsheej … [thiab] yuav nrog Vajtswv nyob hauv qhov chaw uas muaj kev zoo siab tsis txawj kawg.”24
Peb paub tias yuav luag peb txhua tus twb muaj tej kev kub ntxhov loj heev hauv peb lub neej tsis hais los ntawm sab cev nqaij daim tawv thiab sab ntsuj plig los yog. Peb Leej Txiv Saum Ntuj Ceeb Tsheej thiab Nws Leej Tub, Yexus Khetos, uas yog tus thawj ntawm lub Koom Txoos, tau muab vaj lug kub thiab yaj saub rau peb kom npaj peb lub siab, ceeb toom peb txog tej xwm txheej, thiab muab tswv yim rau peb kom pab peb npaj thiab pov hwm peb. Cov lus qhia no ib txhia hais kom ua tej yam tam sim no, thiab ib txhia pov hwm peb rau ntau xyoo tom ntej mus. Tus Tswv zaj lus qhia ua ntej phau Lus Qhuab Qhia thiab Kev Khi Lus, tshooj 1, ntuas peb kom “mloog cov yaj saub … cov lus.”25
Tshooj 1 kuj ceeb toom peb tias, “Nej cia li npaj, nej cia li npaj rau qhov uas tab tom yuav los.”26 Tus Tswv muab tib neeg ib lub cib fim npaj rau tej kev cov nyom uas yuav muaj los.
Tus Tswv tau muab kev tshwm sim rau Thawj Tswj Hwm Brigham Young thaum lub Ib Hlis Ntuj 14, 1847, nyob ntawm Winter Quarters.27 Kev tshwm sim no yog ib yam piv txwv txog tus Tswv txoj kev npaj tib neeg rau tej yam uas yuav los. Haiv Neeg Ntseeg uas rau siab ntseeg twb pib mus puag tim lub Hav Salt Lake uas muaj cov pov roob tiv thaiv. Lawv twb tau ua lub Tuam Tsev Nauvoo tiav lawm thiab txais cov kab ke cawm seej uas dawb huv lawm. Lawv raug ntiab tawm Missouri, thiab cov uas tsim txom lawv tau ntiab lawv tawm hauv ib lub caij ntuj no no uas txias kawg. Kev tshwm sim uas Brigham txais yog tej lus qhia zoo kom pab lawv npaj khiav tawm mus. Tus Tswv tau hais txog kev saib xyuas cov neeg pluag, cov poj ntsuam, cov me nyuam ntsuag, thiab tej tsev neeg uas muaj ib tug tub hauv Pawg Tub Rog Maumoos thaum Haiv Neeg Ntseeg yuav hla teb chaws uas muaj xwm txheej ntau.
Tus Tswv tau hais lwm yam txog kev ua neej ncaj ncees, es Nws twb qhia ntxiv txog ob lub ntsiab cai uas tseem muaj nqis rau peb niaj hnub no.
Lub ntsiab cai thib ib, Nws yaum lawv kom “Cia li qhuas tus Tswv nrog kev hu nkauj, nrog tej suab nkauj, nrog kev seev cev, thiab nrog kev thov qhuas thiab ua Vajtswv tsaug.”28
Lub thib ob, tus Tswv ntuas lawv tias yog lawv “tu siab, cia li thov rau tus Tswv nej tus Vajtswv, kom nej tus ntsuj plig thiaj yuav xyiv fab.”29
Ob lub ntsiab cai no yeej yog tej lus ntuas zoo rau peb hnub no. Tib neeg uas qhuas Vajtswv, hu nkauj, thiab ua Vajtswv tsaug yeej tau koob hmoov. Kev xyiv fab thiab kev tso siab rau Vajtswv txoj kev pab thaum yus thov yeej yog ib txoj kev zoo kom ua cov neeg uas nyob kaj siab lug coj raws li Yexus Khetos. Kev siv zog ua ib co neeg zoo siab yeej pab tau kom txhob poob siab nthav.
Ib kab lus zoo nkauj los ntawm ib zaj nkauj qhuas Vajtswv zoo hais tias yuav tsum ua li cas: “Tsis muaj kev tu siab tus Tswv kho tsis taus.”30
Vim kuv yog tus Tswv Yexus Khetos ib tug Thwj Tim, kuv ua tim khawv tias “cov neeg uas nyob kaj siab lug coj raws li Khetos” yuav nyob kaj siab lug hauv lub neej no thiab yuav zoo siab kawg koom ua ke nyob saum ntuj. Kuv ua tim khawv txog tus Cawm Seej thiab qhov uas Nws txoj Kev Theej Txhoj muaj tseeb. Nws yog peb tus Cawm Seej thiab tus Txhiv Dim. Los ntawm Yexus Khetos lub npe, amees.