Muaj Kev Hlub Nyob No
Thov kom peb yuav kawm hais lus thiab hnov Nws txoj kev hlub nyob no, hauv peb lub siab thiab peb lub tsev, thiab nyob hauv peb tej kev hu, yam ntxim saib ntxim ua, kev txhawb pab, thiab kev pab lwm tus.
Peb cov me nyuam hauv lub Koom Haum Me Nyuam Yaus hu zaj nkauj, “Muaj kev hlub nyob no.”1
Muaj ib zaug kuv muab ib txog saw uas muaj lub kib. Nyob hauv los twb kos dot-dot, dot-dot, dot-dot-dash. Cov neeg uas paub Morse code yuav paub tias yog tej tsiaj ntawv I, I, U. Tiam sis kuv twb muaj ib co lus uas muab zais thiab. Nyob hauv Lus Suav, “ai” txhais tias “hlub.” Yog li ntawd, thaum muab txhais ob zaug lawm, ces zaj uas kuv hais yog “Kuv hlub koj.” Susan, kuv tus hlub, “I, ai (爱), U.”
Peb siv ntau yam lus hais txog kev hlub. Kuv kawm tias tib neeg nyob thoob plaws lub ntiaj teb hais 7,168 yam lus.2 Nyob hauv lub Koom Txoos, peb hais 575 yam lus, muaj ntau hom lus sis thiab. Peb kuj qhia tias tib neeg xav li cas, xav tau li cas, thiab muaj dab tsi hauv lub siab los ntawm kev kos duab, kev ntaus nkauj, kev seev cev, tej lub cim, thiab kev txuas lus.3
Hnub no, kuv xav hais txog peb yam lus ntawm txoj kev hlub ntawm txoj moo zoo: yam lus ntawm lub siab sov so thiab kev tswm seeb, yam lus ntawm kev pab thiab kev txi, thiab yam lus ntawm kev koom siab raws li kev khi lus.
Qhov thib ib, txoj moo zoo yam lus ntawm lub siab sov so thiab kev tswm seeb.
Nrog lub siab sov so thiab kev tswm seeb, kuv tus poj niam nug cov me nyuam thiab cov tub hluas ntxhais hluas, “Nej ho ua li cas paub tias nej niam nej txiv thiab nej tsev neeg hlub nej?”
Nyob hauv Guatemala, cov me nyuam hais tias, “Kuv niam kuv txiv khwv ua hauj lwm kom pub peb tsev neeg tau noj.” Nyob hauv Amelikas Qaum Teb, cov me nyuam hais tias, “Kuv niam kuv txiv nyeem dab neeg rau kuv thiab muab kuv pw hauv txaj thaum hmo ntuj.” Nyob hauv Thaj Av Dawb Huv, cov me nyuam hais tias, “Kuv niam kuv txiv pov hwm kuv.” Nyob hauv Ghana, Afikas Teb Sab Hnub Poob, cov me nyuam hais tias, “Kuv niam kuv txiv pab kuv ua raws li kuv tej lub hom phiaj ntawm cov Me Nyuam thiab cov Tub Hluas Ntxhais Hluas.”
Ib tug me nyuam hais tias, “Txawm yog nws nkees heev txhua hnub tom qab nws ua hauj lwm, kuv niam los nrog kuv ua nyob nraum zoov.” Nws niam quaj thaum nws hnov tias nws tej kev txi txhua hnub muaj nqis heev. Ib tug ntxhais hluas hais tias, “Txawm yog tej lub sij hawm kuv niam thiab kuv wb tsis sib pom zoo, kuv tso siab rau kuv niam.” Nws niam quaj thiab.
Tej lub sij hawm peb yuav tsum paub tias peb tsev neeg hnov thiab ris peb txiaj rau qhov muaj txoj kev hlub nyob no.
Nrog lub siab sov so thiab kev tswm seeb, peb tej kev sib ntsib txais lub cim nco txog thiab lwm yam kev sib ntsib tsom ntsoov rau Yexus Khetos. Peb hais zoo txog Yexus Khetos txoj Kev Theej Txhoj, los ntawm peb lub neej, tsis yog hais txog kev txheej txhoj zoo li yog ib lub tswv yim xwb. Peb hu Yexus Khetos lub Koom Txoos raws li Nws lub npe, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Peb siv tej lus zoo thaum peb thov Leej Txiv Saum Ntuj Ceeb Tsheej thiab thaum peb sib tham ib leeg yuav tsum saib taus ib leeg. Thaum peb nco ntsoov tias Yexus Khetos yog lub plawv ntawm tej kev khi lus hauv lub tuam tsev, peb tsis hais tias peb “mus rau lub tuam tsev” thiab peb hais tias peb “los cuag Yexus Khetos nyob hauv tus Tswv lub tsev.” Txhua txoj kev khi lus qhia tias “Muaj txoj kev hlub nyob no.”
Cov mej zeej tshiab pheej hais tias yuav tsum muab lub Koom Txoos tej lo lus txhais kom thiaj li to taub. Peb luag thuam peb xav tias “stake house” yog ib lub tsev noj nqaij nyuj; “ward building” tej zaum yog ib lub tsev kho mob; “opening exercises” ua rau peb xav tias yuav kov taub hau, xub pwg, hauv caug, thiab ntiv taw tom lub tsev koom txoos tshav nres tsheb. Tiam sis, thov kom peb cia li to taub thiab ua siab zoo thaum peb kawm tej yam lus tshiab ntawm kev hlub ua ke. Muaj neeg qhia ib tug neeg hloov siab los ntseeg tshiab tom lub koom txoos tias nws daim tiab luv dhau. Nws tsis tu siab li, nws tsuas teb hais tias, “Kuv twb hloov siab los ntseeg; thov ua siab ntev rau kuv thaum kuv tej daim tiab tseem hloov.”4
Tej lus uas peb siv yeej yuav pab peb txav mus ze lwm tus neeg Ntseeg Khetos thiab cov phooj ywg los yog txav mus deb. Tej lub sij hawm peb hais txog cov tub txib txoj hauj lwm, kev ua hauj lwm hauv lub tuam tsev, tej hauj lwm pab neeg txom nyem ntshe ua rau lwm tus xav tias peb ntseeg tias peb ua tej hauj lwm no peb tus kheej xwb. Cia peb hais yam lus ntawm lub siab sov so thiab kev tswm seeb hais ua tsaug rau Vajtswv txoj hauj lwm thiab lub yeeb koob thiab Yexus Khetos tej cwj pwm, txoj kev tshav ntuj, thiab lub siab hlub tshua thiab Nws txoj kev theej txhoj.5
Qhov thib ob, txoj moo zoo yam lus ntawm kev pab lwm tus thiab kev txi.
Thaum peb sib sau ua ke txhua lub lim tiam kom hwm thiab muaj kev zoo siab rau Hnub Caiv, peb qhia Yexus Khetos thiab txhua tus tias peb rau siab ua raws li peb txoj kev khi lus thaum txais lub cim nco txog dhau los ntawm peb tej hauj lwm hauv lub Koom Txoos, kev ua phooj ywg, kev sib raug zoo, thiab kev pab lwm tus.
Thaum kuv nug peb cov thawj coj hauv lub Koom Txoos seb muaj dab tsi uas ua rau lawv txhawj, cov kwv tij thiab cov muam hais tias, “Peb cov mej zeej ib txhia tsis lees txais txoj kev hu ua hauj lwm hauv lub Koom Txoos.” Kev hu kom ua hauj lwm rau tus Tswv thiab sib pab nyob hauv Nws lub Koom Txoos muab cib fim kom muaj kev khuv leej, muaj peev xwm, thiab txo hwj chim. Thaum cov thawj coj foom koob hmoov tsa peb, peb txais tau tus Tswv tej kev tshoov siab kom txhawb nqa thiab txhawb lwm tus thiab peb tus kheej lub zog. Muaj tseeb tiag, tej xwm txheej thiab tej lub caij nyoog hauv peb lub neej los tej zaum yuav hloov peb txoj kev muaj peev xwm ua hauj lwm pab, tiam sis cia siab tias yuav tsis hloov peb txoj kev xav ua. Nrog Vaj Ntxwv Npeyamis, peb hais tias, “Yog kuv muaj kuv yeej yuav pub rau nws”6 thiab pub txhua yam peb pub taus.
Ceg txheem ntseeg thiab pawg ntseeg cov thawj coj, cia peb ua peb tej hauj lwm thiab. Thaum peb hu (thiab tso) cov kwv tij thiab cov muam ua hauj lwm hauv tus Tswv lub Koom Txoos, thov kom peb hais lus zoo thiab txais kev tshoov siab. Hais ua tsaug rau lawv thiab pab lawv paub tias lawv ua tau qhov uas nej hu lawv ua. Thov nrog cov thawj coj uas yog cov muam sib tham thiab mloog lawv hais. Thov kom peb nco ntsoov, ib yam li Thawj Tswj Hwm J. Reuben Clark qhia tias, nyob hauv tus Tswv lub Koom Txoos peb ua hauj lwm raws li Vajtswv hu peb, “uas yog tej hauj lwm uas yus tsis nrhiav thiab yeej tsis thim.”7
Thaum Muam Gong thiab kuv wb sib yuav, Txwj Laug David B. Haight ntuas hais tias: “Cia li muaj ib txoj kev hu hauv lub Koom Txoos. Qhov tseem ceeb yog thaum muaj num ua ntau, neb yuav tsum hnov tus Tswv txoj kev hlub rau cov uas neb pab thiab txoj kev hlub neb thaum neb pab lwm tus.” Kuv cog lus tias muaj kev hlub nyob no, nyob ntawd, thiab nyob txhua qhov chaw thaum peb teb rau lub Koom Txoos cov thawj coj tias peb mam li ua hauj lwm rau tus Tswv nyob hauv Nws lub Koom Txoos los ntawm Nws tus Ntsuj Plig thiab peb tej kev khi lus.
Tus Tswv lub Koom Txoos yog ib qho chaw kom npaj muaj Xi-oos. Thaum peb teev tiam Vajtswv, ua hauj lwm, thiab kawm txog Nws txoj kev hlub nyob ua ke, peb ib leeg pab ib leeg txheem lub zog rau ntawm txoj moo zoo. Tej zaum peb tsis sib pom zoo txog kev coj tseem fwv los yog tej teeb meem hauv lub sawm fem tiam sis peb sib haum xeeb thaum peb hu nkauj ua ke hauv pawg ntseeg pawg hu nkauj. Peb sib raug zoo thiab tawm tsam kev kho siab thaum peb txhawb pab kawg siab kawg ntsws ib leeg nyob hauv ib leeg lub tsev thiab zej zog.
Thaum kuv nrog tej ceg txheem ntseeg cov thawj tswj hwm mus xyuas cov mej zeej, kuv hnov lawv txoj kev hlub cov mej zeej txhua leej txhua tus. Thaum wb tsav tsheb dhau cov mej zeej hauv nws ceg txheem ntseeg, muaj ib tug thawj tswj hwm uas hais tias txawm peb nyob hauv ib lub tsev uas muaj lub dab ua luam dej los sis nyob hauv ib lub tsev uas yog av xwb. Tiam sis, nws hais tias, thaum peb ua hauj lwm thiab ua kev txi kom ua raws li txoj moo zoo ua ke, ces peb ib leeg tsis nrhiav kev txhaum rau ib leeg thiab peb nyob kaj siab lug. Thaum peb cia Yexus Khetos pab, ces Nws pab peb hais Nws txoj kev hlub nyob no.
Thaum lub caij ntuj sov tas los no, peb tsev neeg tau ntsib lub Koom Txoos cov mej zeej thiab phooj ywg zoo nyob hauv Loughborough thiab Oxford, Askiv Teb. Qhov uas peb tau koom ua ke ua rau kuv nco txog thaum ib pawg ntseeg tej yam ntxim saib ntxim ua yuav pab tib neeg sib ntsib thiab sib raug zoo tas mus li. Tau ntev lawm kuv xav tias nyob hauv ntau qhov chaw ntawm lub Koom Txoos, yog muaj pawg ntseeg tej yam ntxim saib ntxim ua ntxiv ces peb haj yam yuav sib raug zoo thiab sib pab, yeej yuav tsum npaj thiab ua kom muaj hom phiaj raws li txoj moo zoo.
Ib tug thiab pawg neeg uas npaj pawg ntseeg tej yam ntxim saib ntxim yeej saib xyuas thiab tu tib neeg thiab ib pawg Haiv Neeg Ntseeg. Tej yam ntxim saib ntxim ua uas lawv tau npaj zoo yuav pab txhua tus paub tias lawv muaj nqis, pab lawv koom siab, thiab caw lawv ua tau hauj lwm ua ke. Tej yam no yuav pab cov hluas cov laus thiab txhua leej txhua tus koom siab, tsim tej yam uas lawv yuav nco ntsoov, thiab tsis siv nyiaj pes tsawg. Tej yam ntxim saib ntxim ua ntawm txoj moo zoo kuj caw cov phooj ywg thiab neeg zej zog.
Kev sib raug zoo thiab kev pab lwm tus los feem ntau koom ua ke. Cov tub hluas ntxhais hluas paus tias yog yus xav paub lwm tus tiag tiag ces cia li ua hauj lwm ua ke nyob ntawm ib tug ntaiv thiab tha xim ua ke kom pab lwm tus.
Yeej tsis muaj ib tug neeg los yog ib tse neeg uas zoo tag nrho. Peb txhua tus yuav tsum txais kev pab kom hais txog kev hlub ntawm no. “Kev hlub zoo tag nrho ntiab kev ntshai tawm mus.”8 Kev ntseeg, kev pab, thiab kev txi ua rau peb txav los ze peb tus Cawm Seej. Peb yim ua siab zoo, rau siab ntseeg, thiab tsis xav txog peb tus kheej thaum peb ua hauj lwm thiab ua kev txi, ces peb yim yuav pib paub tias Yexus Khetos txoj kev theej txhoj ntawm kev khuv leej thiab kev tshav ntuj muaj hwj chim npaum li cas.
Thiab txog lub sij hawm hais txog txoj moo zoo yam lus txog kev sib khi lus.
Peb nyob hauv ib lub ntiaj teb uas tib neeg tsuas xav txog lawv tus kheej. Muaj neeg coob hais tias “Kuv xaiv kuv tus kheej.” Zoo li peb ntseeg tias peb paub zoo dua tias peb xav tau dab tsi thiab yuav tsum ua li cas kom thiaj li tau.
Tiam sis qhov no tsis muaj tseeb. Yexus Khetos yog tus uas coj yam ntxwv txog qhov tseeb uas kav mus ib txhis li no:
“Rau qhov tus uas khuv xim nws txoj sia, tus ntawd yuav tsis tau txoj sia, tiam sis tus uas tsis khuv xim nws txoj sia, vim nws ntseeg kuv, tus ntawd yuav tau txoj sia.
“Ib tug neeg yuav tau nqi dab tsi yog tias nws tau ib puas yam tsav hauv ntiaj teb tiam sis xiam nws tus ntsuj plig”9
Yexus Khetos yeej muab ib txoj kev zoo dua—tej kev sib raug zoo uas muaj lub hauv paus ntawm Vajtswv tej kev khi lus, uas muaj zog txaus kov yeej kev tuag. Tej kev sib khi lus nrog Vajtswv thiab thaum ib leeg khi lus rau ib leeg ces yuav kho thiab hloov peb los ua neeg dawb huv thiab pab peb sib raug zoo. Muaj tseeb tiag, Nws paub peb thiab hlub peb zoo dua peb paub los sis hlub peb tus kheej. Thaum peb sib khi lus tag siab tag ntsws, peb thiaj rais los mus ua neeg zoo tshaj peb ua tas sim no. Vajtswv lub hwj chim thiab lub tswv yim yuav foom koob hmoov rau peb kom txais tau txhua lub txiaj ntsim, raws li Nws lub sij hawm thiab Nws txoj kev.
Generative artificial intelligence (AI) twb tau ua ntau yam kom txawj txhais lus zoo. Qhov uas ib lub koospistawj yuav muab lo lus “The spirit is willing, but the flesh is weak” txhais ua yuam kev ua “The wine is good, but the meat is spoiled.” Tiam sis, qhov uas yus muab tej kab lus tso rau lub koospistawj kawm ib yam lus yeej zoo dua qhov uas yus qhia ib lub koospistawj txog tej kev cai hais lus.
Ib yam li ntawd, qhov uas peb pheej ua tej yam no nyaj yuav pab peb sab ntsuj plig zoo dua kom kawm txoj moo zoo tej yam lus ntawm lub siab sov so thiab kev tswm seeb, kev pab thiab kev txi, thiab kev sib khi lus.
Yog li ntawd, thaum twg thiab ua li cas Yexus Khetos thiaj li hais txoj kev hlub rau nej?
Thaum twg thiab ua li cas nej thiaj hnov tau Nws txoj kev hlub nyob no?
Thov kom peb yuav kawm hais lus thiab hnov Nws txoj kev hlub nyob no, hauv peb lub siab thiab peb lub tsev, thiab nyob hauv peb tej kev hu, yam ntxim saib ntxim ua, kev txhawb pab, thiab kev pab lwm tus.
Nyob hauv Vajtswv txoj hau kev, muaj ib hnub peb yuav tas sim neej no thiab nyob hauv lub neej tom ntej. Thaum peb ntsib tus Tswv, kuv xav tias Nws yuav hais, los ntawm tej lus qhia thiab tej kev cog lus tias, “Muaj kuv txoj kev hlub nyob no.” Los ntawm Yexus Khetos lub npe dawb ceev, amees.