Kev Them Ib Feem Kaum: Kev Qhib tej Qhov Rais ntawm lub Ntuj Ceeb Tsheej
Muaj ntau txoj kev uas tej qhov rais saum ceeb tsheej qhib. Cia li tso siab rau lub sij hawm uas tus Tswv teem tseg; cov koob hmoov yeej yuav los.
Tsis ntev tas los kuv nyob hauv hauv Amelikas Sab Qab Teb, Tij Laug Roger Parra los ntawm Venezuela tau hais zaj lus no rau kuv:
“Nyob rau xyoo 2019 Venezuela raug tej teeb meem uas ua kom tsis muaj hluav taws xob rau tsib hnub.
“Nyob hauv txhua qhov chaw muaj kev ntxhov hnyo thiab kev puas tsuaj, thiab neeg coob tsis muaj txaus noj.
“Ib txhia pib txeeb tej lag luam uas muag zaub mov, ua kom txhua yam puas tsuaj tas.
“Vim kuv yog tus tswv tsev ntawm ib qhov chaw ci khoom noj, kuv txhawj txog kuv qhov chaw ua lag luam. Kuv tsev neeg txiav txim siab tias peb yuav muab tag nrho cov mov mog nyob hauv qhov chaw ci khoom noj rau cov neeg uas txom nyem.
“Muaj ib hmo thaum tsaus ntuj muaj neeg sib ntaus txhua qhov chaw. Kuv tsuas txhawj txog kuv tus poj niam thiab cov me nyuam txoj kev nyab xeeb.
“Thaum kaj ntug txoog kuv tau mus rau peb qhov chaw ci khoom noj. Tu siab uas yuav luag txhua qhov chaw ua lag luam muag zaub mov los cov neeg tsim kev kub ntxhov tau ua puas tsuaj tas lawm, tiam sis ua rau kuv xav tsis thoob vim peb qhov chaw ci khoom noj tsis tau puas. Tsis muaj dab tsi uas raug puas tsuaj. Kuv txo hwj chim ua kuv Leej Txiv Saum Ntuj Ceeb Tsheej tsaug.
“Thaum kuv txog tsev, kuv qhia kuv tsev neeg txog Vajtswv txoj koob hmoov thiab txoj kev pov hwm.
“Txhua tus yeej ris Vajtswv txiaj.
“Kuv tus tub hlob, Rogelio, uas muaj 12 xyoos, hais tias, ‘Txiv! Kuv paub vim li cas Vajtswv pov hwm peb lub tsev muag khoom. Koj thiab niam yeej them ib feem kaum.’”
Tij Laug Parra hais tias: “Ua rau kuv xav txog Malakis tej lus. ‘Kuv yuav tsis pub kab thiab kooj noj nej tej qoob loo, thiab nej tej txiv hmab yuav txi txiv ncw’ [Malakis 3:11]. Peb tau txhos caug thiab ua peb Leej Txiv Saum Ntuj Ceeb Tsheej tsaug rau Nws txuj ci tseem ceeb.”1
Sim Kuv Los ntawm Qhov No
Txhua yam uas peb muaj thiab txhua yam ntawm peb yeej los ntawm Vajtswv los. Vim peb yog Yexus Khetos cov thwj tim, peb txaus siab qhia lwm tus nyob ib puag ncig peb.
Vim tus Tswv muab txhua yam rau peb, Nws tau hais kom peb muab ib feem 10 ntawm cov nyiaj uas peb tau rau Nws thiab Nws lub nceeg vaj hauv lub ntiaj teb. Nws tau cog lus tias yog peb ua siab ncaj them ib feem kaum, Nws yuav “qhib tej qhov rais saum ceeb tsheej rau nej, thiab foom koob hmoov nplua mias los rau nej xwv kom yuav tsis muaj chaw txaus txais.”2 Nws tau cog lus tias Nws yuav pov hwm peb kom txhob raug kev phem.3 Tej lus cog tseg no yeej muaj tseeb tiag,4 tus Tswv thiaj hais tias, “sim kuv los ntawm qhov no,”5 uas yog ib kab lus uas tsis muaj hauv vaj lug kub tsuas muaj thaum hais Malakis cov lus xwb.
Muaj ntau txoj kev uas tej qhov rais saum ceeb tsheej qhib. Tej txoj kev yog los ntawm sab cev nqaij daim tawv, tiam sis tej txoj kev yog los ntawm sab ntsuj plig. Muaj tej txoj kev uas me me thiab nyuaj rau neeg pom tau. Cia li tso siab rau lub sij hawm uas tus Tswv teem tseg; cov koob hmoov yeej yuav los.
Peb nyuaj siab nrog cov uas txom nyem heev. Tsis ntev tas los lub Koom Txoos twb tau muab 54 plhom duas Amelikas pub dawb kom pab cov me nyuam thiab cov niam tsev nyob thoob plaws lub ntiaj teb.6 Thiab los ntawm cov nyiaj yoo mov, peb cov npisov zoo pab ntau txhiab tus neeg txhua lub lim tiam uas xav tau cov zaub mov noj, ris tsho hnav, thiab lub tsev kom tiv thaiv. Tib yam uas kho tau neeg ntiaj teb txoj kev raug txom nyem tsuas yog Yexus Khetos txoj moo zoo.7
Nyob ntawm Kev Ntseeg
Tus Thwj Tim Povlauj ceeb toom tias tib neeg lub tswv yim txawj to taub tej yam ntawm tib neeg tiam sis nyuaj rau lawv to taub tej yam ntawm Vajtswv.8 Neeg ntiaj teb hais txog kev them ib feem kaum zoo li yog peb cov nyiaj, tiam sis kev cai them ib feem kaum yeej yog ib lub ntsiab cai los ntawm peb txoj kev ntseeg. Qhov uas peb ua siab ncaj them ib feem kaum yog ib txoj kev uas peb qhia tias peb txaus siab tsom ntsoov rau tus Tswv hauv peb lub neej ua ntej peb xav txog tej yam uas peb nyiam thiab txhawj txog. Kuv cog lus rau nej tias thaum nej tso siab rau tus Tswv, ces nej tau cov koob hmoov saum ntuj ceeb tsheej.
Yexus tau hais tias “yam uas yog Xixas li, cia li muab rau Xixas thiab yam uas yog Vajtswv li, cia li muab rau Vajtswv.”9 Tus Cawm Seej uas sawv rov los tau hais kom cov Neeg Nifais sau lawv tej xwm txheej txog Nws tej lus cog tseg nyob hauv phau Malakis.10 Nyob rau hauv peb lub caij nyoog, tus Tswv tau rov qab qhia txog txoj kev cai them ib feem kaum, hais tias, “Qhov no yuav yog qhov chiv keeb ntawm txoj kev them ib feem kaum ntawm kuv cov neeg. Thiab [lawv] yuav muab ib feem kaum ntawm tag nrho lawv tej paj laum txhua xyoo los them; thiab qhov no yog ib txoj kev cai ruaj khov rau lawv mus ib txhis li.”11
Tus Tswv tau qhia meej tias yuav tsum siv cov nyiaj ib feem kaum li cas, hais tias, “Nej cia li nqa tag nrho tej ib feem kaum tuaj rau hauv lub tsev rau khoom,”12 uas txhais tias yuav tsum nqa cov nyiaj ib feem kaum los rau hauv Nws lub nceeg vaj uas tau muab txum tim rov qab los, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.13 Nws tau qhia kom siv cov nyiaj ib feem kaum dawb huv no thaum pawg sab laj thov Vajtswv txog qhov no uas yog Thawj Pawg Thawj Tswj Hwm, Pawg Kaum Ob tug Thwj Tim, Pawg Thawj Npisov, thiab “los ntawm kuv tus kheej lub suab rau lawv, tus Tswv hais li.”14
Tus Tswv cov Nyiaj Dawb Ceev
Cov nyiaj dawb huv no tsis yog lub Koom Txoos cov thawj coj li. Cov nyiaj yog tus Tswv li. Nws cov tub qhe yeej paub tseeb tias lawv txoj kev saib xyuas cov nyiaj no dawb ceev npaum li cas.
Thawj Tswj Hwm Gordon B. Hinckley tau hais zaj lus no: “Thaum kuv yog ib tug me nyuam tub kuv tau nug kuv txiv … txog kev siv lub Koom Txoos cov nyiaj. Nws ua rau kuv nco qab tias qhov uas Vajtswv txib kuv ua yog kev them kuv cov nyiaj ib feem kaum thiab cov nyiaj pab. Thaum kuv ua li ntawd, [kuv txiv hais tias,] ces qhov uas kuv pub yeej tsis yog kuv li lawm. Yog tus Tswv li vim kuv muab fij rau Nws.” Nws txiv kuj hais tias: “Qhov uas lub Koom Txoos cov thawj coj siv li cas yeej tsis yog ib yam uas koj yuav tsum txhawj txog, [Gordon]. Lawv lav ris qhov no rau tus Tswv, Nws yeej yuav hais kom lawv hais tias lawv siv li cas.”15
Peb yeej paub tias peb “lav ris qhov no rau tus Tswv.”
Koj cov Nyiaj Ib Feem Kaum thiab Nyiaj Pab
Los ntawm cov nyiaj ib feem kaum thiab cov nyiaj pab uas nej tau muab fij tseg rau tus Tswv, xyoo tas los no twb siv ib puas plhom duas tawm kom foom koob hmoov rau cov neeg uas xav tau.16
Vim peb lav ris qhov uas yuav tsum tshaj tawm txoj moo zoo thoob plaws lub ntiaj teb, peb muaj 71,000 tawm tus tub txib uas ua hauj lwm hauv 414 qhov chaw tshaj tawm txoj moo zoo.17 Vim nej them ib feem kaum thiab muab nyiaj pab, cov tub txib muaj txaus mus ua txoj hauj lwm no, tsis hais lawv tsev neeg muaj los tsis muaj txaus.
Peb ua cov tuam tsev tshiab nyob thoob plaws lub ntiaj teb. Tam sim no, muaj 177 lub tuam tsev uas qhib lawm, 59 lub tuam tsev los tseem ua los yog kho, thiab tseem npaj yuav ua 79 lub tuam tsev ntxiv.18 Nej cov nyiaj ib feem kaum pab kom muaj cov koob hmoov los ntawm lub tuam tsev nyob hauv tej qhov chaw uas tus Tswv ib leeg xwb pom tau.
Yeej muaj 30,000 pawg ntseeg nyob hauv ntau txhiab lub tsev koom txoos thiab lwm qhov chaw nyob hauv 195 lub teb chaws.19 Vim nej rau siab ntseeg them ib feem kaum, ces yeej txhim tsa lub Koom Txoos nyob hauv tej qhov chaw uas tej zaum nej yuav tsis mus xyuas rau cov Neeg Ntseeg ncaj ncees uas tej zaum nej yuav tsis paub.
Tam sim no lub Koom Txoos pab txhawb nqa tsib lub tsev kawm ntawv qib siab.20 Cov tsev kawm ntawv no muaj 145,000 tus tub ntxhais kawm ntawv. Peb qhia ib puas kaum txhiab chav kawm seminary thiab institute txhua lub lim tiam.21
Muaj cov koob hmoov no thiab ntau ntxiv feem ntau vim cov neeg hluas thiab cov neeg laus uas muaj nyiaj thiab tsis muaj nyiaj ua siab ncaj them ib feem kaum.
Lub hwj chim ntawm sab ntsuj plig uas los ntawm kev cai them ib feem kaum yeej tsis txais los ntawm kev ntsuas yus them npaum li cas, vim cov muas muaj thiab cov uas tsis muaj los tus Tswv txib txhua tus pub ib feem 10 ntawm cov nyiaj uas lawv khwv tau.22 Lub hwj chim no los ntawm qhov uas peb tso siab rau tus Tswv.23
Qhov uas nej ua siab dawb them ib feem kaum los ntawm tus Tswv txoj kev muab ntau nplua mias rau nej twb tau pab lub Koom Txoos pob nyiaj muaj zog, thiaj li muaj cib fim kom ua taus tus Tswv tej hauj lwm ntau tshaj yam uas peb ua taus thaum yav tas los. Tus Tswv paub txhua yam, thiab thaum txog lub sij hawm, peb yuav pom muaj raws li tag nrho Nws lub hom phiaj dawb ceev.24
Muaj Ntau txoj Kev uas Tau Koob Hmoov
Cov koob hmoov los ntawm kev them ib feem kaum los muaj ntau heev. Nyob rau xyoo 1998, kuv tau nrog Txwj Laug Henry B. Eyring mus rau lub Koom Txoos txoj kev sib ntsib loj heev nyob hauv qhov chaw hauv Utah hu ua Silicon Slopes, uas yog ib qho chaw uas tsim ntau yam txuj ci technology. Twb yog ib lub sij hawm uas tib neeg vam meej ntau heev, thiab Txwj Laug Eyring tau ceeb toom Tsoom Haiv Neeg Ntseeg kom txhob muab tej yam uas lav muaj piv rau lwm tus lawv thiaj li yuav xav tau ntxiv. Kuv yeej yuav nco ntsoov nws cov lus cog tseg, hais tias yog lawv ua siab ncaj them ib feem kaum, ces lawv txoj kev xav tau tej khoom yuav ploj zuj zus. Ob xyoos tom qab ntawd, pob nyiaj kom pab tsim txuj ci technology twb ploj lawm. Neeg coob tsis muaj hauj lwm ua, thiab nyuaj rau tej lub koom haum hloov tau vim tsis muaj nyiaj txaus. Cov uas tau ua raws li Txwj Laug Eyring tej lus ntuas twb tau koob hmoov.
Nws cov lus cog tseg twb ua rau kuv nco txog lwm lub sij hawm. Kuv ntsib ib tug ntxhais uas muaj 12 xyoos hu ua Charlotte Hlimi nyob ze Carcassonne, Fabkis Teb, nyob rau xyoo 1990 thaum kuv yog qhov chaw tshaj tawm txoj moo zoo tus thawj tswj hwm. Tsev neeg Hlimi yeej rau siab ntseeg nyob hauv ib lub tsev kem me me nrog yim tus me nyuam. Lawv muaj ib daim duab txog tus Cawm Seej thiab tus yaj saub uas dai rau ntawm phab ntsa. Thaum kuv muab nws xam phaj kom txais nws yawg suab txoj koob hmoov, kuv nug Charlotte seb nws puas tau ua siab ncaj them ib feem kaum. Nws teb hais tias, “Yog los mas, Thawj Tswj Hwm Andersen. Kuv niam qhia kuv tias muaj cov koob hmoov ntawm sab cev nqaij daim tawv thiab sab ntsuj plig uas los ntawm kev them ib feem kaum. Kuv niam qhia kuv tias yog peb them ib feem kaum txhua lub sij hawm, ces peb yeej yuav tsis xav tau dab tsi. Thiab Thawj Tswj Hwm Andersen, peb yeej tsis xav tau dab tsi.”
Thaum nws tso cai rau kuv hais nws zaj no, Charlotte, uas muaj 45 xyoos thiab tau ua kev cai sib khi hauv lub tuam tsev, hais tias, “Kuv zaj lus txim khawv txog kev them ib feem kaum los muaj tiag, thiab tam sim no kuv zaj lus tim khawv muaj zog ntxiv. Kuv ua Vajtswv tsaug rau txoj lus txib no. Thaum kuv ua raws li txoj kev cai no kuv tau koob hmoov ntau.”25
Muaj ib hnub peb txhua tus lub neej no yuav tiav. Nees nkaum tsib xyoos tas los, ob peb hnub ua ntej kuv tus poj niam niam, Martha Williams, tso lub ntiaj teb no tseg vim nws mob cancer, nws tau txais ib daim check. Nws thov kuv tus poj niam, Kathy, tam sim ntawd kom muab nws phau ntawv sau check rau nws kom them tau ib feem kaum. Vim nws niam qaug zog heev nws thiaj li tsis muaj zog sau ntawv, Kathy nug seb puas kam nws cia Kathy sau daim check. Nws niam teb tias, “Tsis kam Kathy. Kuv xav ua kuv tus kheej.” Ces nws hais ntxiv tias, “Kuv xav ua qhov yog rau tus Tswv pom. Ib yam kawg uas Kathy ua rau nws niam yog kev muab hnab ntawv uas tso nyiaj ib feem kaum rau nws niam tus npisov.
Vajtswv txoj Hauj Lwm Tseem Ceeb
Kuv cov kwv tij thiab cov muam, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej yuav “tawm hauv txoj kev pom tsis tseeb,”26 ua rau tag nrho lub ntiaj teb txais tau cov koob hmoov zoo kawg. Yeej yuav muaj cov neeg uas zoo siab qhuas peb kom mus tom ntej thiab cov uas tsis zoo siab. Kuv twb xav txog tej lus ntawm tus Nkamaliyees uas muaj tswv yim, thaum nws hnov txog ob tug Thwj Tim Petus thiab Yauhas ua txuj ci tseem ceeb, nws ceeb toom pawg sab laj hauv Yeluxalees:
“Tsis txhob ua li cas rau lawv; Tej hauj lwm uas lawv ua ntawd, yog neeg kom lawv ua xwb ces tej ntawd yeej yuav ploj mus:
“Tiam sis yog Vajtswv kom lawv ua ces nej yuav kov tsis yeej lawv li. Yog nej tawm tsam lawv, nyob tsam yog nej tawm tsam Vajtswv.”27
Peb yog ib feem ntawm Vajtswv txoj hauj lwm tseem ceeb hauv lub ntiaj teb no. Txoj hauj lwm no yuav mus thoob plaws lub ntiaj teb no, kom npaj txoj kev rau tus Cawm Seej rov qab los. Kuv ua tim khawv txog Thawj Tswj Hwm Russell M. Nelson tej lus hais tias: “Thaum yav tom ntej, peb yuav pom tej kev tshwm sim txog tus Cawm Seej lub hwj chim uas zoo tshaj plaws tej uas lub ntiaj teb yeej tsis tau pom dua. Txij no mus txog lub sij hawm uas Nws rov qab los … , Nws yuav muab cov txiaj ntsim, cov koob hmoov, thiab ua tej txuj ci tseem ceeb rau cov uas mob siab ntseeg.”28
Kuv ua tim khawv li no. Yexus yog tus Khetos. Nov yog Nws txoj hauj lwm dawb huv. Nws yeej yuav rov qab los Los ntawm Yexus Khetos lub npe, amees.