Tej Nceeg Vaj Muaj Yeeb Koob

Los ntawm tej kev tshwm sim hauv peb lub caij nyoog no peb paub tias tag nrho cov neeg uas ua neej nyob hauv lub ntiaj teb yuav tsis tau ob tug nqi zog nkaus xwb, lub ntuj ceeb tsheej rau cov neeg ncaj ncees los yog ntuj txiag teb tsaus rau cov seem. Vajtswv txoj hau kev rau Nws cov me nyuam suav qhov tseeb no uas yog peb tus Cawm Seej, Yexus Khetos, qhia hais tais: “Kuv Txiv lub tsev muaj chaw ntau rau sawv daws nyob.”¹

Tej lus qhuab qhia ntawm Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg uas txum tim rov qab los qhia hais tias tag nrho Vajtswv cov me nyuam—tsuas yog cov tsawg tsawg uas peb tsis hais txog tam sim no—thaum kawg lawv yuav txais tau ib lub nceeg vaj uas muaj yeeb koob, twg yog lub qis tshaj plaws tseem uas rau yus “xav tsis thoob.”² Tom qab ib lub caij uas cov uas tsis mloog lus raug txim txom rau lawv tej kev txhaum, es tej kev txom nyem ntawd npaj lawv rau qhov uas yuav muaj los tom qab no, tag nrho txhua tus neeg yuav sawv rov los thiab mus rau qhov uas Yexus Khetos Txiav Txim Kawg. Nyob ntawd, peb tus Cawm Seej, uas, peb tau kawm hais tias, nws “muab yeeb koob rau Leej Txiv, thiab txhiv tag nrho tej yam nws ob txhais tes tau ua,”³ tus Tswv yuav muab ib lub nceeg vaj muaj yeeb koob ntawm peb lub no rau tag nrho Vajtswv cov me nyua m raws li lawv tej kev xaiv hauv lub neej no.

Muaj dua ib qho kev qhuab qhia thiab kev xyaum ua ntawm lub Koom Txoos uas txum tim rov qab los uas muab lub cib fim dawb ceev rau tag nrho Vajtswv cov me nyuam kom ua neeg tsim nyog txais tus nqi zog yeeb koob siab tshaj plaws hauv lub nceeg vaj xilethi-aus. Qhov chaw siab tshaj plaws ntawd—kev tsa nto hauv lub nceeg vaj xilethi-aus—yog qhov uas Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg tsom ntsoov.

Los ntawm tej kev tshwm sim hauv peb lub caij nyoog no, Tsoom Haiv Neeg Ntseeg hauv Hnub Nyoog Kawg to taub Vajtswv txoj hau kev zoo siab rau Nws cov me nyuam txawv dua cov. Txoj hau kev ntawd pib nyob ntawm qhov chaw uas peb cov ntsuj plig nyob ua ntej peb yug los, thiab thiab txoj hau kev ntawd hais txog yog vim li cas peb lub neej no zoo li thiab saib yuav muaj li cas tom qab no.

Los ntawm tej kev tshwm sim hauv lub caij nyoog no peb paub hais tias “Vajtswv muab ib txoj kev cai rau txhua lub nceeg vaj”⁴ thiab hais tias lub nceeg vaj yeeb koob peb txais hauv Kev Txiav Txim Kawg yog nyob ntawm saib peb xaiv ua raws li tej kev cai twg hauv lub neej no. Raws li txoj hau kev no, muaj ob peb lub nceeg vaj—ntau lub tsev—xwv kom tag nrho Vajtswv cov me nyuam yuav txais ib lub nceeg vaj yeeb koob uas lawv nyob nyog “nyob taus haud.”

Cia peb piav txog saib peb lub nceeg vaj no zoo li cas thiab yuav tsum ua li cas kom thiaj ncav tau txhua lub, peb pib hais txog qhov siab tshaj plaws, uas yog lub nceeg vaj uas tej kev txib thiab tej kab ke los saum ntuj los dhau ntawm Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg tsom ntsoov. Nyob hauv lub nceeg vaj “xilethi-aus”⁵ muaj peb theem,⁶ es theem siab tshaj plaws yog kev tsa nto hauv lub nceeg vaj xilethi-aus. Nov yog qhov chaw ntawm lawv cov “uas tau txais tag nrho nws lub hwj chim, thiab nws lub yeeb koob,” yog li ntawd, “lawv yog cov vaj tswv, uas twb yog Vajtswv cov tub [thiab cov ntxhais]”⁷ thiab “nyob ntawm Vajtswv thiab nws tus Khetos xub ntiag mus ib txhiab thiab ib txhis li.”⁸ Dhau ntawm kev tshwm sim, Vajtswv tau qhia tawm tej kev cai, tej kab ke, thiab tej kev khi lus nyob mus ib txhis li uas yuav tsum ua raws li kom thiaj rais los mus ua neeg zoo li Vajtswv thiab ncav tau lub hom phiaj no. Nov yog tej yam uas peb qhia hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg vim lub hom phiaj ntawm cov lus qhuab qhia thiab tej tsab cai ntawm lub Koom Txoos no yog kom npaj Vajtswv cov me nyuam rau kev cawm seej nyob hauv lub yeeb koob xilethi-aus, thiab, qhov tseem ceeb, kev tsa nto nyob hauv theem siab tshaj plaws.

Vajtswv txoj hau kev, uas muaj qhov tseeb nyob mus ib txhis li ua lub hauv paus, hais tias yus ncav tau kev tsa nto tsuas yog dhau ntawm txoj kev coj raws li tej kev khi lus ntawm kev sib txis ua txij ua nkawm nyob mus ib txhis li ntawm ib tug txiv neej thiab ib tug poj niam hauv lub tuam tsev,⁹ es kev sib txis ua txij ua nkawm thaum kawg yuav muaj rau tag nrho cov uas coj ncaj ncees. Yog vim li no peb thiaj li qhia tias “qhov uas yus yog ib tug poj niam los yog ib tug txiv neej yog ib yam tseem ceeb ntawm ib tug neeg tus xeeb ceem thiab lub ntsiab, txawm hais tias nyob lub qub neej los yog, lub neej no los yog, lub neej nyob mus ib txhis li los yog.”¹⁰

Ib co lus qhia uas muaj nqis heev kom pab peb npaj txais tau kev tsa nto yog xyoo 1995 zaj lus tshaj tawm txog tsev neeg.¹¹ Nws tej lus qhuab qhia qhia txog tej yam xilethi-aus uas yuav tsum ua kom thiaj npaj nrog Vajtswv Leej Txiv thiab Nws Leej Tub, Yexus Khetos, nyob ua ke. Cov uas tsis to taub txog Vajtswv txoj hau kev rau Nws cov me nyuam tej zaum yuav xav tias zaj lus tshaj tawm txog tsev neeg no yeej yog ib tsab cai uas yuav hloov xwb. Tiam sis, peb paub tias zaj lus tshaj tawm txog tsev neeg yeej yog cov lus qhuab qhia uas tsis hloov thiab qhia hais tias saib hom tsev neeg twg thiaj yuav tsim tau qhov tseem ceeb tshaj ntawm peb txoj kev loj hlob tuaj ntawm sab ntsuj plig.

Tus Thwj Tim Pov Lauj piav txog peb theem yeeb koob, muab piv rau lub yeeb koob ntawm lub hnub, lub hli, thiab lub hnub qub.¹² Nws tis npe rau lub yeeb koob siab tshaj plaws “xilethi-aus” thiab lub nruab nrab “thawlethi-aus.”¹³ Nws tsis tis npe rau lub qis tshaj plaws, tiam sis ib qho kev tshwm sim rau Joseph Smith ntxiv lub npe: “thilethi-aus.”¹⁴ Muaj dua ib qho kev tshwm sim ntawd kuj piav txog saib cov neeg zoo li cas thiaj txais tau peb lub yeeb koob no. Cov uas tsis xaiv kom “coj raws li txoj kev cai ntawm lub nceeg vaj xilethi-aus”¹⁵ yuav txais dua ib lub nceeg vaj yeeb koob, qis dua lub xilethi-aus tiam sis phim tej kev cai uas lawv xaiv ua raws li thiab nyob nyog “thev taus.” Lo lus thev taus, uas muaj ntau hauv cov vaj lug kub, txhais tau hais tias nyob khov khov.¹⁶ Piv txwv hais tias, cov nyob hauv lub nceeg vaj thawlethi-aus—muab piv tau rau qhov uas neeg coob xav txog lub ntuj ceeb tsheej—“yog cov uas txais Leej Tub lub yeeb haum, tiam sis tsis tau tag nrho tej uas Leej Txiv muaj.”¹⁷ Lawv yog cov “neeg ncaj ncees hauv lub ntiaj teb, tiam sis raug tib neeg ntiaj teb tej kev dag ntxias,”¹⁸ tiam sis “tsis rau siab ua raws li tej lus tim khawv txog Yexus.”¹⁹

Qhov tseem ceeb txog lawv cov uas txais lub yeeb koob qis tshaj plaws ntawm lub nceeg vaj yeeb koob, lub thilethi-aus, yog “tus uas tsis muaj peev xwm thev taus lub yeeb koob thawlethi-aus.”²⁰ Qhov no hais txog lawv cov uas tsis txais yuav tus Cawm Seej thiab tsis tswj hwm lawv tus cwj pwm raws li tej kev cai los saum ntuj los. Nov yog lub nceeg vaj uas cov neeg phem nyob haud, tom qab uas lawv raug txom nyem vim yog lawv tej kev txhaum. Cov neeg no yog cov uas tej kev tshwm sim hais txog hais tias “cov tsis kam txais Khetos txoj moo zoo, thiab tej lus tim khawv txog Yexus. …

“Cov no yog cov neeg dag; thiab neeg txawj ua khawv koob, thiab neeg deev luag poj luag txiv, neeg deev nkauj deev nraug, thiab txhua tus uas nyiam dag thiab hais lus dag.”²¹

Ua ib tug yaj saub hais txog peb lub nceeg vaj yeeb koob no, Thawj Tswj Hwm Russell M. Nelson sau ntawv tsis ntev tas los no hais tias: “Twb yog lub neej ntiaj teb no luv npaum li ib qho vib nas this nanosecond piv rau lub neej nyob mus ib txhis li. Tiam sis yog ib qho vib nas this tseem ceeb heev! Ua tib zoo xav saib txoj hau kev no ua hauj lwm li cas: Thaum lub sij hawm nyob hauv lub ntiaj teb no nej muaj peev xwm xaiv seb nej yuav ua raws li tej kev cai twg—cov ntawm lub nceeg vaj xilethi-aus, los sis lub thawlethi-aus, los yog lub thilethi-aus—thiab, yog li ntawd, seb nej yuav nyob hauv lub nceeg vaj yeeb koob twg nyob mus ib txhis li. Yog ib txoj hau kev zoo heev! Yog ib txoj hau kev uas saib nej txoj kev ywj siab xaiv rau nqi.”²²

Tus Thwj Tim Pov Lauj qhia tias tus Tswv tej lus qhuab qhia thiab tej kev txib yog muab kom peb thiaj yuav “ua tau lub neej zoo ib yam li Yexus Khetos.”²³ Ua li ntawd peb yuav tsum ua ntau tshaj qhov uas kawm paub nkaus xwb. Yeej tsis txaus yog tias peb paub tiag tiag hais tias txoj moo zoo muaj tseeb; peb yuav tsum ua tej yam thiab muaj tej kev xav kom txoj moo zoo yuav hloov peb lub siab. Muab piv rau lwm cov kev qhia, uas qhia kom peb kawm paub ib yam dab tsi, Yexus Khetos txoj moo zoo yaum kom peb rais los mus ua ib tug neeg zoo.

Los ntawm tej kev qhia no peb pom tau tias Kev Txiav Txim Thaum Kawg tsis yog ntsuam xyuas saib ib tug neeg twg ua zoo los sis ua phem nkaus xwb—tej yam peb tau ua. Nws yog suav seb tej yam peb tau ua thiab peb tej kev xav—tau ua rau peb rais los ua neeg zoo li cas lawm. Peb tsim nyog txais lub neej nyob mus ib txhis li dhau ntawm txoj kev hloov siab los ntseeg tiag. Raws li siv ntawm no, lo lus hloov siab los ntseeg no uas txhais tau ntau yam yog ib txoj kev hloov loj heev hauv yus lub nruab siab. Nws tsis txaus yog tias yus lam ua tej yam zoo xwb tsis muaj lub siab xav ua qhov zoo. Cov lus txib, tej kab ke, thiab tej kev khi lus hauv txoj moo zoo tsis yog tej yam yus lam ua kom thiaj tau khab nias saum ntuj ceeb tsheej xwb. Yexus Khetos txoj moo zoo yog txoj hau kev uas qhia peb tias peb yuav tsum ua li cas thiaj li rais los mus ua neeg uas peb Leej Txiv Saum Ntuj Ceeb Tsheej xav kom peb ua.”²⁴

Vim yog Yexus Khetos thiab Nws txoj Kev Theej Txhoj, thaum peb poob qab hauv lub neej no, peb hloov siab tau thiab rov qab taug txoj kev khi lus uas coj peb mus rau qhov uas Leej Txiv Saum Ntuj Ceeb Tsheej xav kom peb txais tau.

Phau Ntawv Maumoos qhia hais tias, “lub neej no yog lub caij rau [peb] npaj mus ntsib Vajtswv.”²⁵ Tiam sis qhov kev cov nyom no rau “lub neej no” yeej muaj ib qho kev cia siab thiab (rau ib txhia neeg) los ntawm tej yam uas tus Tswv tshwm sim qhia rau Thawj Tswj Hwm Joseph F. Smith, uas sau tseg hauv Lus Qhuab Qhia thiab Kev Khi Lus tshooj 138. Tus yaj saub ntawd sau hais tias, “Kuv pom hais tias cov txwj laug uas rau siab ntseeg nyob rau lub caij nyoog tso txoj cai no, thaum lawv ncaim lub neej hauv ntiaj teb no mus, lawv ua lawv tej hauj lwm ntxiv mus tshaj tawm txoj moo zoo ntawm kev hloov siab lees txim thiab kev txhiv dim, los ntawm Vajtswv Tib Leeg Tub txoj kev txi, rau cov uas nyob hauv qhov tsaus ntuj thiab ua qhev rau kev txhaum nyob hauv lub ntuj loj ntawm cov tuag cov ntsuj plig.

“Cov tuag uas hloov siab lees txim yuav txais kev txhiv dim, los ntawm kev ua raws li cov kab ke hauv Vajtswv lub tsev,

“Thiab tom qab lawv tau raug txim rau lawv tej kev ua txhaum lawm, thiab tau ntxuav lawv huv lawm, lawv yuav txais nqi zog raws li tej yam lawv ua, vim lawv yog cov uas muaj tug txais txoj kev cawm seej.”²⁶

Tsis tas li ntawd xwb, peb paub tias lub Caij Ib Txhiab Xyoos, ib txhiab xyoos uas los tom qab tus Cawm Seej Rov Qab Los Zaum Ob, yuav yog ib lub sij hawm ua tej kab ke rau lawv cov uas tsis tau txais tej kab ke no thaum lawv ua neej hauv lub ntiaj teb.²⁷

Yeej muaj ntau yam uas peb tsis paub txog peb lub caij nyoog ntawm txoj hau kev cawm seej: (1) lub ntuj ua ntej yug los, (2) lub neej no, thiab (3) lub neej tom ntej, thiab saib tej no sib txuas li cas. Tiam sis peb paub tej qhov tseeb nyob mus ib txhis no: “Kev cawm seej yog ib yam uas nyob ntawm ib tug neeg, kev tsa nto yog ib yam uas nyob ntawm ib tsev neeg.”²⁸ Peb muaj ib Leej Txiv Saum Ntuj Ceeb Tsheej uas yuav foom koob hmoov rau peb raws li peb tej kev xav tau xav yuav thiab tej kev xaiv cia peb txais tej koob hmoov ntawd. Tsis tas li ntawd, peb paub hais tias Vajtswv yuav tsis yuam muab leej twg nrog lwm tus neeg sib khi yog tias tus ntawd tsis kam. Tej koob hmoov ntawm txoj kev sib khi yeej muaj rau tag nrho lawv cov uas ua raws li lawv tej kev khi lus tiam sis Vajtswv yuav tsis yuam leej twg nrog lwm tus neeg sib khi uas tsis tsim nyog los sis tsis kam.

Kuv cov kwv tij thiab cov muam, kuv ua tim khawv hais tias tej no muaj tseeb tiag. Kuv ua tim khawv txog peb tus Tswv Yexus Khetos, “ tus uas yog peb lub hauv paus kev ntseeg thiab ua kom [peb] kev ntseeg tiav,”²⁹ es twb yog Nws txoj Kev Theej Txhoj, raws li Leej Txiv Saum Ntuj Ceeb Tsheej txoj hau kev, uas ua rau peb muaj tej koob hmoov no tau, los ntawm Yexus Khetos lub npe zoo, amees.