Kev Tshwj Haiv Neeg Khi Lus lub Suab Tseg hauv Tiam Neeg Loj Hlob Tuaj

Ib qho ntxim tshoov yus lub siab hauv Phau Ntawv Maumoos yog thaum tus Cawm Seej uas tau sawv rov los tau los xyuas cov neeg rau ntawm lub tuam tsev hauv lub teb chaws Huaj Vam. Tom qab Yexus qhia cov neeg, kho lawv tej kev mob, thiab ntxiv dag zog rau lawv txoj kev ntseeg, Yexus saib cov me nyuam nyob ntawd thiab hais tias: “Nws txib kom lawv coj lawv cov me nyuam yaus los.”¹ Nws thov Vajtswv pab lawv thiab foom koob hmoov rau lawv ib leeg dhau ib leeg. Qhov uas muaj los tshoov tus Cawm Seej lub siab npaum li tias nws quaj ob peb pluag.

Ces, hais lus rau cov neeg sawv daws, Yexus hais tias:

“Saib seb nej tej me nyuam yaus.

“Thiab thaum lawv ntsia kom saib … , lawv pom rooj ntug qhib, thiab lawv pom cov tim tswv nqis saum ntuj ceeb tsheej los” txhawb pab lawv cov me nyuam.²

Kuv yeej los xav txog qhov uas muaj los no. Tej zaum sawv daws lub siab lub ntsws mas zoo siab heev! Lawv pom tus Cawm Seej. Lawv cev tes xuas tau Nws. Lawv paub Nws. Nws qhia lawv. Nws foom koob hmoov rau lawv. Thiab Nws hlub lawv. Yeej tsim nyog uas tom qab qhov tshwj xeeb no, cov me nyuam no loj hlob tuaj pab txhim tsa ib lub xam khoo muaj kev kaj siab lug, kev vam meej, thiab Khetos txoj kev siab hlub uas kav ob peb tiam neeg.³

Yuav yog ib qho zoo kawg heev yog tias peb cov me nyuam yuav muaj tej yam zoo li ntawd nrog Yexus Khetos—ib yam dab tsi uas yuav muab lawv tej siab tej ntsws khi rau Nws! Nws caw peb, ib yam li Nws caw cov niam txiv ntawd hauv Phau Ntawv Maumoos, kom coj peb cov me nyuam los cuag Nws. Peb pab tau lawv paub lawv tus Cawm Seej thiab lawv tus Txhiv Dim ib yam li cov me nyuam thaum ub ntawd. Peb qhia tau lawv kom nrhiav tau tus Cawm Seej hauv cov vaj lug kub thiab muab Yexus ua lawv lub hauv paus.⁴

Tsis ntev tas los no, kuv ib tug phooj ywg qhia kuv txog ib yam uas kuv tsis pom ua ntej no hais txog zaj dab neeg txog tus neeg uas muaj tswv yim uas txhim tsa nws lub tsev saum ib lub pob zeb. Raws li zaj uas sau tseg hauv Lukas, thaum tus neeg muaj tswv yim pua lub hauv paus rau nws lub tsev, nws “khawb tob tob.”⁵ Tsis yog ib yam uas lam tau lam ua—yuav tsum rau rau siab ua!

Kom txhim tsa peb lub neej saum peb tus Txhiv Dim, Yexus Khetos, lub Pob Zeb, peb yuav tsum khawb tob tob. Peb tshem tej yam uas yog av xuab zeb los yog tsis tseem ceeb tawm ntawm peb lub neej mus. Peb khawb khawb mus txog thaum peb nrhiav kom tau Nws. Thiab peb qhia peb cov me nyuam kom muab siab npuab rau Yexus dhau ntawm tej kab ke dawb ceev thiab tej kev khi lus, xwv kom thaum muaj nag xob nag cua thiab dej nyab, thiab yeej yuav muaj, tej ntawd yuav tsis raug rau peb cov me nyuam vim yog “lub pob zeb uas [lawv] tau cog rau saud.”⁶

Qhov uas muaj zog li no tsis yog ib yam lam tau lam muaj. Tsis yog ib qho qub txeeg qub teg ntawm sab ntsuj plig uas muab pub rau lwm tiam tau. Txhua tus neeg yuav tsum khawb tob tob kom nrhiav tau lub Pob Zeb.

Peb kawm zaj lus qhuab qhia no los ntawm lwm zaj dab neeg hauv Phau Ntawv Maumoos. Thaum Vaj Ntxwv Npeyamis hais lus kawg rau nws haiv neeg, lawv sau ua ke ua tsev neeg kom mloog nws cov lus.⁷ Vaj Ntxwv Npeyamis ua tim khawv muaj zog heev txog Yexus Khetos, thiab cov neeg hnov tau nws zaj lus tim khawv tob tob. Lawv hais tias:

“Tus Ntsuj Plig … ua rau peb hloov loj heev, los sis hloov peb lub siab. …

“Thiab peb txaus siab khi lus nrog peb tus Vajtswv los ua li nws lub siab nyiam … thiab ua raws li nws tej lus txib ua txhua yam uas nws yuav txib kom peb ua, tag nrho peb lub neej uas tseem tshuav.”⁸

Yus yeej xav tias cov me nyuam ntawm cov niam txiv uas hloov siab loj npaum li no yuav loj hlob tuaj hloov siab loj ib yam thiab nrog Vajtswv khi lus lawv tus kheej. Tiam sis, vim yog dab tsi uas peb tsis paub, cov me nyuam no ib txhia tsis khi lus tseg li lawv niam lawv txiv. Ob peb xyoos tom qab ntawd, zaj lus no hais tias, “Nim no tau muaj tias coob leej ntawm tiam neeg uas tab tom loj hlob tsis to taub vaj ntxwv Npeyamis tej lus, vim lawv tseem yog me nyuam yaus thaum lub sij hawm nws hais rau nws cov neeg; thiab lawv tsis ntseeg lawv cov yawg koob tej kab lis kev cai.

“Lawv tsis ntseeg tej uas tau hais txog kev sawv rov los ntawm cov tuag, thiab lawv kuj tsis ntseeg tias Khetos yuav los. …

“Thiab lawv tsis kam ua kev cai raus dej; thiab lawv kuj tsis kam koom nrog lub koom txoos. Thiab lawv yog ib co neeg txawv xws li ntawm lawv txoj kev ntseeg.”⁹

Yeej ntxim xav txog tiag! Rau tiam neeg loj hlob tuaj no, yeej tsis txaus uas txoj kev ntseeg Yexus Khetos yog “lawv cov yawg koob kab lig kev cai.” Lawv yuav tsum muaj siab ntseeg Khetos lawv tus kheej. Ua ib haiv neeg nrog Vajtswv khi lus, peb yuav ua li cas pab peb cov me nyuam muaj lub siab xav nrog Vajtswv khi lus thiab ua raws li tej kev khi lus ntawd?

Peb pib tau thaum peb coj raws li Nifais tus yam ntxwv: “Peb hais txog Khetos, peb xyiv fab rau Khetos, peb qhia txog Khetos, peb qhia tej yuav muaj los yav tom ntej txog Khetos, thiab peb sau raws li peb tej lus qhia tej yuav muaj los yav tom ntej, xwv kom peb cov me nyuam yuav paub cia siab rau lub hauv paus twg kom txais kev zam txim rau lawv tej kev txhaum.”¹⁰ Nifais cov lus hais txog qhov uas tsim nyog peb rau rau siab qhia peb cov me nyuam txog Khetos. Peb ua tau kom lub suab ntawm haiv neeg khi lus tsis ntsiag to hauv tiam neeg tom ntej ob sab pob ntseg thiab tsis tham txog Yexus thaum hnub Sunday xwb.¹¹

Lub suab ntawm haiv neeg khi lus yog nrhiav tau hauv peb cov lus tim khawv. Yog nrhiav tau hauv cov yaj saub niaj hnub nim no cov lus. Thiab yog tshwj tseg yam muaj hwj chim kawg hauv cov vaj lug kub. Yog los ntawm cov vaj lug kub peb cov me nyuam thiaj yuav los paub txog Yexus thiab nrhiav tau lus teb rau lawv cov lus noog. Yog nyob hauv cov vaj lug kub lawv thiaj yuav kawm tau Khetos cov lus qhuab qhia. Yog nyob haud lawv thiaj nrhiav tau kev cia siab. Ua li no yuav npaj lawv nrhiav tau qhov tseeb hauv lawv lub neej thiab coj raws li tej kev khi lus.

Kuv nyiam cov lus qhia no los ntawm Thawj Tswj Hwm Russell M. Nelson:

“Peb yuav mus qhov twg kom thiaj mloog Nws hais?

“Peb nrhiav hauv vaj lug kub los tau. Vaj lug kub qhia peb txog Yexus Khetos thiab Nws txoj moo zoo, Nws txoj Kev Theej Txhoj, thiab peb Leej Txiv txoj hau kev zoo siab thiab kev txhiv dim. Peb yuav tsum kawm txog Vajtswv txoj lus txhua hnub kom peb thiaj li yuav muaj peev xwm nyiaj kom dhau hauv lub caij nyoog uas muaj tej xwm txheej ntawm sab ntsuj plig. Thaum peb mloog ntsoov Khetos tej lus txhua hnub, Khetos tej lus yuav qhia peb paub ua li cas thaum peb raug tej teeb meem uas peb xav tias peb yeej yuav tsis raug”¹²

Ces yuav ua li cas kom thiaj kawm tau Khetos cov lus thiab mloog Nws? Ua qhov uas zoo rau nej! Tej zaum yuav yog sau nej tsev neeg ua ke kom thiaj sib tham txog tej yam tus Vaj Ntsuj Plig Dawb Huv tau qhia nej hauv nej tej kev kawm vaj lug kub siv Los Nrog Kuv Mus. Tej zaum yuav yog sib sau nrog nej cov me nyuam ua ke txhua hnub kom thiaj nyeem ob peb nqes vaj lug kub thiab tom qab ntawd nrhiav cib fim sib tham saib nej kawm dab tsi lawm. Txiav txim siab saib dab tsi ua hauj lwm rau nej thiab nej tsev neeg thiab sim ua zoo dua zuj zus txhua hnub.

Cia li xav txog lub tswv yim no los ntawm Kev Qhia Raws Li tus Cawm Seej txoj Kev: “Xav txog ib lub sij hawm xwb, xws li ib zaug thaum ua tsev neeg hmo ua ke, kawm vaj lug kub, los sis sib tham txog txoj moo zoo ces yeej yuav xav tias tsis tshua pab hlo li. Tiam sis qhov uas yus ua tej yam me thiab yooj yim tsis tu tsis tseg tau ntev, thaum koom a ke, ces yuav muaj hwj chim thiab txhawb zog ntau tshaj qhov uas yus ua ib yam loj loj ib zaug xwb los sis qhia ib zaj lus qhia zoo zoo. … Yog li ntawd txhob tso tseg, thiab tsis txhob txhawj tias yuav tsum ua ib yam loj heev txhua zaus. Cia li siv zog ua mus li tsis tu tsis tseg.”¹³

Peb ib qho kev lav ris dawb ceev tshaj plaws yog kom pab peb cov me nyuam paub tias Yexus yog tus Khetos, Vajtswv Ntuj Leej Tub, lawv tus Cawm Seej thiab tus Txhiv Dim, uas coj Nws lub Koom Txoos! Peb yuav tsum tsis pub peb lub suab khi lus nyob ntsiag to thaum hais txog tus Tswv.

Tej zaum nej nyob tsis tswm ua lub luag hauj lwm no, tiam sis nej yuav tsum tsis txhob xav tias nej nyob nej ib leeg xwb. Piv txwv hais tias, pawg ntseeg tej pawg sab laj muaj cai teem tej kev sib ntsib rau cov xib hwb pawg sab laj. Hauv tej kev sib ntsib no, tej niam txiv sib sau ua ke tau kom thiaj kawm ua ke, sib tham saib lawv ua li cas ntxiv dag zog rau lawv tsev neeg, thiab kawm tej ntsiab cai tseem ceeb ntawm txoj kev qhia zoo li Khetos. Txoj kev sib ntsib no yuav tsum muaj tom qab txoj kev sib ntsib noj lub cim nco txog.¹⁴ Ib tug mej zeej uas yog tus npisov xaiv coj qhia hoob no thiab ua raws li tus txheej txheem tej kev sib ntsib rau cov xib hwb, siv phau Kev Qhia Raws Li tus Cawm Seej txoj Kev ua lub hauv paus.¹⁵ Cov npisov, yog tias nej pawg ntseeg tsis muaj tej kev sib ntsib rau cov niam txiv kawm txoj kev qhia, nrog nej tus Thawj Tswj Hwm rau Hnub Caiv Kev Kawm Vaj Lug Kub thiab pawg ntseeg pawg sab laj sib tham kom npaj nej tus kheej.¹⁶

Kuv cov phooj ywg uas koom nrog Khetos, nej ua zoo dua nej xav. Yeej meem rau rau siab mus lawm tom ntej. Nej cov me nyuam tab tom saib nej, mloog nej, thiab kawm tej yam nej ua. Thaum nej qhia lawv nej yuav paub tias lawv yog Vajtswv cov tub thiab cov ntxhais. Tej zaum lawv yuav tsis nco qab txog tus Cawm Seej rau ib ntus, tiam sis kuv cog lus hais tias, Nws yeej yuav nco qab ntsoov lawv! Tej lub sij hawm uas tus Vaj Ntsuj Plig Dawb Huv hais lus rau lawv yuav kav ntev hauv lawv tej siab tej ntsws. Thiab muaj ib hnub nej cov me nyuam yuav hais lus tim khawv ib yam li Enos hais tias: “Kuv paub tias kuv niam kuv txiv nkawd yog neeg ncaj ncees—rau qhov nkawd qhia kuv txog nws yam lus, thiab qhia kuv raws li tus Tswv tej kev cob qhia thiab kev qhuab ntuas—thiab cia li qhuas kuv tus Vajtswv lub npe vim yog tej yam ntawd.”¹⁷

Cia peb txais yuav tus Cawm Seej txoj lus caw thiab coj peb cov me nyuam los cuag Nws. Thaum peb ua li no, lawv yuav pom tau Nws. Lawv yuav hnov tau Nws. Lawv yuav paub Nws. Thiab Nws yuav qhia lawv. Nws yuav foom koob hmoov rau lawv. Thiab saib seb Nws yuav hlub lawv heev. Auj, kuv hlub Nws heev. Los ntawm Nws lub npe dawb ceev, uas yog Yexus Khetos, amees.