Hlub Nej tej Kwv Tij Zej Zog
Kev khuv leej yog Yexus Khetos ib tug cwj pwm. Qhov no yeej los ntawm lwm tus txoj kev hlub thiab tsis muaj ciaj ciam hlo li.
Tag kis no, kuv caw nej koom nrog kuv mus rau Afikas teb. Nej yuav tsis pom cov tsov, cov nees txaij, los yog cov ntxhw, tiam sis tej zaum thaum kawg, nej yuav pom tias cov mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg ua li cas kom ua raws li Yexus Khetos txoj lus txib tseem ceeb thib ob kom “hlub nej tej kwv tij zej zog” (Malakaus 12:31).
Rau ib me pliag, cia li xav txog cov av liab nyob tim npab nauj ntawm Afikas teb. Nej pom cov av qhuav qhawv vim ntuj tsis los nag ntau pes tsawg rau ntau xyoo. Cov nyuj uas hla kev los yeej pom tau cov pob txha hauv qab cov tawv nqaij thiab ib tug neeg yug nyuj Karamojong uas vov pam thiab rau khau khiab, mus tom ntej kom nrhiav tau cov tsob ntoo thiab cov dej.
Thaum nej taug txoj kev uas muaj pob zeb ntau thiab ntxhib heev, nej pom tau ob peb pawg me nyuam yaus uas zoo nkauj zoo nraug heev thiab nej xav yog vim li cas lawv tsis kawm ntawv. Cov me nyuam luag thiab yoj tes, thiab koj yoj tes los kua muag luag nyav rau lawv. Cuaj caum ob feem pua ntawm cov me nyuam yaus uas nej pom thaum taug kev li no los tsis muaj zaub mov txaus noj thiab ua rau nej nyuaj siab kawg nkaus li.
Nyob tom hauv ntej, nej pom ib tug niam tsev uas ev ib lub hub dej loj li tsib gallon (19 L) saum nws lub taub hau thiab lwm lub uas nws nqa ntawm tes. Nws yeej zoo li ib feem ob tsev neeg hauv cheeb tsam no uas cov poj niam, cov hluas thiab cov laus los yog, taug kev mus deb li 30 feeb, txhua hnub, muv rau ib lub hauv paus dej thiab rov qab los kom lawv tsev neeg tau dej haus. Ua rau yus tu siab kawg nkaus li.
Ob teev dhau mus ces nej tuaj txog ib tshav uas cais tawm me ntsis thiab muaj ntxoov ntxoo. Chaw sib ntsib no tsis yog ib lub tsev los yog ib lub tsev pheeb suab tiam sis yog nyob hauv qab ob peb tug ntoo loj heev uas pab tiv taus tshav ntuj kub. Nyob hauv qhov chaw no, nej pom tias tsis muaj dej, tsis muaj hluav taws xob, tsis muaj hoob nab. Nej saib ib puag ncig thiab paub nej koom nrog ib haiv neeg uas hlub Vajtswv thiab ua rau nej hnov Vajtswv txoj kev hlub rau lawv. Lawv twb sib sau ua ke kom txais kev pab thiab kev cia siab, thiab nej twb tuaj kom muab tej ntawd.
Kuv tus poj niam thiab kuv, nrog Muam Camille Johnson, peb lub Koom Haum Niam Tsev tus Tuam Thawj Tswj Hwm thiab nws tus txiv, Doug thiab Muaj Sharon Eubank, tus coj lub Koom Txoos tej Kev Pab Neeg Txom Nyem, thaum peb mus ncig Uganda, ib lub teb chaws uas muaj 47 plhom tus neeg nyob hauv Afikas chaw nruab nrab. Hnub ntawd, thaum nyob hauv ntxoov ntxoo ntawm tej tsob ntoo, peb tau mus xyuas ib lub txheej xwm pab zej zog noj qab nyob zoo uas txais nyiaj los ntawm lub Koom Txoos tej Kev Pab Neeg Txom Nyem, UNICEF, thiab tseem fwv Ugandan Chaw Txhawb Nqa Kev Noj Qab Nyob Zoo. Tej no yog tej lub koom haum uas peb tso siab rau, twb ua tib zoo xaiv kom siv pob nyiaj uas cov mej zeej ua siab dawb pub raws li laj lim tswv yim.
Txawm ua rau peb nyuaj siab kawg pom cov me nyuam uas tsis muaj txaus noj thiab cov uas raug mob ntsws qhuav, mob npaws, thiab raws plab tsis tu tsis tseg, twb ua rau peb txhua tus muaj kev cia siab tias yav tom ntej yuav zoo dua rau cov neeg uas peb tau ntsib.
Kev cia siab ntawd twb los ntawm qhov uas lub Koom Txoos cov mej zeej nyob thoob plaws lub ntiaj teb tau ua siab dawb pub sij hawm thiab nyiaj rau lub Koom Txoos tej hauj lwm pab neeg txom nyem. Thaum kuv pom tias cov nyiaj no tau txhawb nqa pab cov neeg mob thiab cov neeg txom nyem, ces ua rau kuv nyo hau ris Vajtswv txiaj. Tib lub sij hawm ntawd, kuv to taub zoo dua txog lub ntsiab ntawm qhov uas tus Vaj Ntxwv ntawm cov vaj ntxwv hais:
“Nej cov uas tau kuv txiv txoj koob hmoov, nej cia li los nyob lub teb chaws uas nws twb npaj cia rau nej … :
“Thaum kuv tshaib plab, nej pub mov rau kuv noj, thaum kuv nqhis dej; nej pub dej rau kuv haus; thaum kuv tuaj ua qhua, nej hu kuv los hauv nej tsev” (Mathais 25:34–35).
Peb tus Cawm Seej tau hais rau peb tias “Nej yuav tsum ci rau sawv daws pom tej hauj lwm zoo uas nej ua, lawv thiaj yuav qhuas nej Leej Txiv tus uas nyob saum ntuj ceeb tsheej” (Mathais 5:16; kuj saib nqe 14–15). Nyob hauv qhov chaw nyob deb heev ntawm lub ntiaj teb no, nej tej hauj lwm zoo twb ci ntsa iab rau ib co neeg uas xav tau heev lub neej thiab pab lawv lub nra tsis hnyav, thiab Vajtswv tau yeeb koob.
Nyob rau hnub sov sov thiab hnub muaj plua plav ntawd, kheev lam nej tau hnov lawv tej lus thov Vajtswv hais tias lawv ua Nws tsaug tiag tiag. Lawv yuav xav kom kuv hais lawv yam lus Karamojong hais li no rau nej tias, “Alakara.” Ua tsaug.
Peb txoj kev mus ua rau kuv nco txog zaj lus piv txwv txog tus Neeg Xamalis zoo, tus uas taug ib txoj kev uas muaj plua plav, zoo li txoj kev uas kuv piav txog, ib txoj kev uas pib ntawm Yeluxalees mus rau Yelikaus. Tus neeg Xamalis uas txhawb pab neeg qhia peb tias yuav tsum ua li cas kom “hlub nej tej kwv tij zej zog.”
Nws pom “ib tug txiv neej … [es] muaj ib pab tub sab muab nws lub tsho lwg tas thiab muab nws ntaus yuav luag tuag tso rau ntawm kev” (Lukas 10:30). Tus Neeg Xamalis “hlub tus txiv neej ntawd” (Lukas 10:33).
Kev khuv leej yog Yexus Khetos ib tug cwj pwm. Qhov no yeej los ntawm lwm tus txoj kev hlub thiab tsis muaj ciaj ciam hlo li. Yexus, tus Cawm Seej ntawm lub ntiaj teb, yog tus yam ntxwv zoo tshaj plaws txog kev khuv leej. Thaum peb nyeem hais tias “Yexus txawm quaj” (Yauhas 11:35), peb koom nrog Maivliag thiab Mathas ua tim khawv txog Nws txoj kev khuv leej uas ua rau Nws Yexus hlub lawv thiab nyuaj siab kawg li (saib Yauhas 11:33). Muaj ib zaj nyob hauv Phau Ntawv Maumoos uas qhia txog Yexus Khetos txoj kev khuv leej, thaum Yexus tshwm sim rau ib pawg neeg thiab hais tias:
“Nej puas muaj neeg ceg tawv, los sis dig muag, los sis neeg khoov duav, … los sis cov uas lag ntseg, los sis cov uas raug txom nyem ib yam dab tsi? Coj lawv los ntawm no thiab kuv yuav kho kom lawv zoo, vim kuv muaj kev khuv leej rau nej. …
“…Nws tau kho lawv txhua tus zoo” (3 Nifais 17:7, 9).
Txawm yog peb siv zog npaum li cas, peb tsis muaj peev xwm kho txhua leej txhua tus zoo, tiam sis peb txhua tus yeej pab tau ib tug neeg kom muaj tej yam zoo hauv lawv lub neej. Yeej yog ib tug tub hluas xwb uas tau muab tsib lub ncuav thiab ob tug ntses uas pub tsib txhiab tus neeg noj. Ntshe peb yuav xav ib yam li tus thwj tim Adales hais txog cov ncuav thiab ob tug ntses tias, “Tiam sis yuav tsis txaus cov neeg no noj.” (Yauhas 6:9). Kuv qhia nej tias: yeej txaus kom pub tej yam uas nej pub tau ces cia Yexus Khetos pub ntxiv kom txaus.
Hais txog qhov no, Txwj Laug Jeffrey R. Holland caw peb , “Txawm peb muaj nyiaj los sis peb pluag, … peb yuav tsum ‘ua li peb ua tau’ thaum lwm tus xav tau kev pab.” Ces nws tau ua tim khawv, ib yam li kuv ua tim khawv tias, Vajtswv “yuav pab nej thiab coj nej ua siab dawb siab zoo pab lwm tus” (“Tsis Yog Peb Txhua Tus Yog Neeg Thov Khawv Los?,” Liyahaunas, Kaum Ib Hlis Ntuj 2014, 41)
Nyob hauv lub teb chaws nyob deb ntawd, thaum hnub uas yeej yuav nco ntsoov, thaum ntawd thiab tam sim no kuv sawv ua tim khawv txog kev khuv leej ntawm lub Koom Txoos cov mej zeej, tsis hais cov nplua nuj thiab cov pluag, uas tshoov neeg lub siab thiab hloov tib neeg lub neej.
Peb tseem yuav ua raws li zaj lus piv txwv txog tus Neeg Xamalis Zoo thaum nws “muab ntaub qhwv; … thiab tu tus mob ntawd” (Lukas 10:34). Peb tej hauj lwm hauv lub Koom Txoos tej kev pab neeg txom nyem pab tau sai sai thaum muaj tej xwm txheej thiab kho tau tej teeb meem hauv lub ntiaj teb no xws li kab mob, kev tshaib kev nqhis, cov me nyuam mos liab tuag ntxov, tsis muaj txaus noj, cov neeg thoj nam, thiab tej yam uas tsis tshua txawj pom xws li kev poob siab, kev nyuaj siab, thiab kev txhawj xeeb.
Tus Neeg Xamalis tau “muab tau ob lub nyiaj rau tus tswv tsev ntawd thiab hais tias, Thov koj pab tu tus neeg mob no” (Lukas 10:35). Peb lub koom txoos zoo siab koom ua ke nrog lwm lub koom haum xws li Catholic Relief Services, UNICEF, thiab Red Cross/Red Crescent, kom pab peb txhawb nqa cov neeg txom nyem. Peb yeej zoo siab ua nej tsaug rau nej “ob lub nyiaj” los yog ob lub euro, ob lub peso, los yog ob lub shilling, uas pab cov neeg nyob thoob plaws lub ntiaj teb ris lawv tej nra. Nyaj nej yuav tsis paub leej twg txais nej tej sij hawm thiab nej cov nyiaj, tiam sis kev khuv leej tsis yuam kom nej paub lawv; peb yuav tsum hlub lawv xwb.
Ua tsaug, Thawj Tswj Hwm Russell M. Nelson, vim koj ua rau peb nco qab tias “thaum peb hlub Vajtswv tag siab tag ntsws, Nws tig peb lub siab kom pib xav txog lwm tus neeg txoj kev noj qab nyob zoo” (“Txoj Lus Txib Tseem Ceeb thib Ob,” Liyahaunas, Kaum Ib Hlis Ntuj 2019, 97). Kuv ua tim khawv tias peb txhua tus yuav muaj kev xyiv fab, kev kaj siab lug, kev txo hwj chim, thiab kev hlub ntxiv thaum peb ua raws li Thawj Tswj Hwm Nelson txoj kev hu thiab Joseph Smith txoj kev thov kom “pub rau neeg tshaib plab noj, muab khaub ncaws rau cov liab qab hnav, pub rau cov poj ntsuag, thiab nplij cov tub ntsuag thiab cov raug txom nyem lub siab, tsis hais nyob hauv lub Koom Txoos no, los yog lwm lub koom txoos, los yog tsis nyob hauv ib lub koom txoos, nyob qhov twg uas [peb pom] lawv” (nyob hauv “Editor’s Reply to a Letter from Richard Savary,” Times and Seasons, Peb Hlis Ntuj 15, 1842, 732).
Thaum lub sij hawm ntawd, peb twb nrhiav cov neeg tshaib plab thiab cov neeg txom nyem nyob hauv ib thaj av qhuav thiab muaj plua av es peb tau pom lawv qhov muag uas thov kom peb pab. Peb twb mob siab heev thiab nyuaj siab kawg (saib Yauhas 11:33), tiam sis peb tau txais kev nplij siab thaum peb pom lub Koom Txoos cov mej zeej txoj kev khuv leej thaum lawv pub rau cov neeg tshaib plab noj, pub pab rau cov poj ntsuam, nplij cov txom nyem thiab so lawv tej kua muag.
Thov kom peb yuav saib xyuas lwm tus thiab qhia los ntawm tej yam peb hais thiab ua hais tias peb “ib leeg txaus siab ris ib leeg tej nra” (Mauxiyas 18:8), kom “khi tuav cov uas muaj lub siab puas tag” (Lus Qhuab Qhia thiab Kev Khi Lus 138:42), thiab ua raws li Yexus Khetos txoj lus txib tseem ceeb kom “hlub [nej] tej kwv tij zej zog” (Malakaus 12:31). Los ntawm Yexus Khetos lub npe, amees.