Lub Tuam Rooj Sab Laj
Vajtswv tej Zaj Lus Qhia rau cov Niam Tsev Txiv Tsev
Kaum Hli Ntuj xyoo 2023 lub tuam rooj sab laj

Vajtswv tej Zaj Lus Qhia rau cov Niam Tsev Txiv Tsev

Los ntawm Txwj Laug Valeri V. Cordón

Ntawm Pawg Xya Caum

Cov niam tsev txiv tsev koom tes nrog lawv Leej Txiv Saum Ntuj Ceeb Tsheej coj lawv cov me nyuam uas muaj nqis heev rov qab mus saum ntuj ceeb tsheej.

Nej puas tau puag ib tug me nyuam mos liab? Muaj ib txoj kev kaj uas ci ntsa iab los ntawm txhua tus me nyuam tshiab, ua rau cov niam tsev txiv tsev lub siab muaj kev hlub puv npo.1 Ib tug kws sau ntawv Mev sau hais tias, “Kuv tau kawm tias thaum ib tug me nyuam mos liab nyem nws txiv tus ntiv tes, nws ntes nws txiv lub siab tas mus li.”2

Kev ua niam tsev txiv tsev yeej yog ib yam ntawm lub neej no uas zoo kawg nkaus. Cov niam tsev txiv tsev koom tes nrog lawv Leej Txiv Saum Ntuj Ceeb Tsheej coj lawv cov me nyuam uas muaj nqis heev rov qab mus saum ntuj ceeb tsheej.3 Hnub no kuv xav qhia nej txog kev ua niam tsev txiv tsev raws li hais nyob hauv cov vaj lug kub thiab cov yaj saub qhia kom pab peb ua tej yam uas cov me nyuam yuav nco ntsoov.

Nce Mus Siab rau Thaj Av ntawm Txoj Moo Zoo Kab Lig Kev Cai

Peb yuav tsum nce mus siab rau thaj av ntawm txoj moo zoo kab lig kev cai nrog peb tsev neeg. Thawj Tswj Hwm Russell M. Nelson hais tias: “Tsim nyog uas Vajtswv yuav coj tej tsev neeg kev. Cov niam tsev txiv tsev cob qhia tsis tau cov me nyuam txaus los ntawm lawv lub neej, kev ntshai, los yog kev pab lawv tu siab.”4

Txawm yog peb txoj kab lig kev cai, txoj kev cob qhia cov me nyuam, thiab lub neej muaj nqis rau peb ua niam tsev txiv tsev, tej yam no yeej tsis txaus kom pab peb cov me nyuam rov qab mus saum ntuj ceeb tsheej. Peb yuav tsum txais tau “tej kev cai thiab … tej kev xyaum ua”5 ib txoj kab lig kev cai ntawm kev hlub thiab kev cia siab, uas peb nrog peb cov me nyuam sib tham “raws li ib txoj kev uas siab dua, thiab dawb huv dua li qub.”6 Thawj Tswj Hwm Dallin H. Oaks piav tias txoj moo zoo kab lig kev cai yog “ib txoj kev ua neej, tej kev cai thiab tej yam uas yuav tsum ua thiab tej kev xyaum ua. … Txoj kev ua neej no los ntawm txoj kev cawm seej, Vajtswv tej lus txib, thiab cov lus qhia los ntawm cov yaj saub uas nyob niaj hnub nim no. Txoj kab lig kev cai no muaj hauv peb txoj kev cob qhia peb tsev neeg thiab peb lub neej.”7

Yexus Khetos yog lub plawv ntawm txoj moo zoo kab lig kev cai. Peb yuav tsum tsim txoj moo zoo kab lig kev cai nyob hauv tsev neeg kom tsim tau ib qho chaw rau lub noob ntawm kev ntseeg loj tuaj. Xwv kom nce mus rau thaj av siab dua, Thawj Tswj Hwm Oaks caw peb kom “muab tej kab lig kev cai los yog tej kev xyaum ua tso tseg yog tias tsis yog raws li Yexus Khetos lub Koom Txoos tej lus qhia.”8 Cov niam tsev txiv tsev, yog peb ntshai tsim txoj moo zoo kab lig kev cai ces tej zaum peb yuav cia tus yeeb ncuab muaj chaw nkag hauv peb tsev neeg, los yog, qhov phem tshaj, nkag hauv peb cov me nyuam lub siab.

Thaum peb xaiv kom tsim txoj moo zoo kab lig kev cai hauv peb tsev neeg, ces los ntawm tus Vaj Ntsuj Plig Dawb Huv lub hwj chim9 yuav hloov, kho, thiab txhawb pab peb tej kab ke, thiab kev ua niam tsev txiv tsev uas muaj tam sim no.

Ua Kom Nej lub Tsev Ua Qhov Chaw Tseem Ceeb rau Kev Kawm txoj Moo Zoo

Thawj Tswj Hwm Russell M. Nelson tau qhia tias peb yuav tsum kho peb lub tsev kom ua “lub hauv paus rau txoj kev kawm txoj moo zoo.”10 Peb txoj kev kawm txog txoj moo zoo ua rau peb “haj yam los ntseeg Leej Txiv Saum Ntuj Ceeb Tsheej thiab Yexus Khetos thiab pab peb rais los mus ua neeg zoo li Nkawd.”11 Cia peb xav txog peb qho uas cov niam tsev txiv tsev lav ris raws li cov yaj saub thiab cov thwj tim piav txog uas yuav pab peb tsim tau txoj moo zoo kab lig kev cai uas siab dua nyob hauv peb tsev.

Qhov thib Ib: Qhib Lug Qhia

Leej Txiv Saum Ntuj Ceeb Tsheej tau qhia Adas txog Yexus Khetos thiab Nws cov lus qhuab qhia. Nws qhia Adas “muab tej yam no qhib lug qhia rau [Adas] cov me nyuam.”12 Los yog hais tias, Leej Txiv Saum Ntuj Ceeb Tsheej tau qhia Adas kom qhib siab thiab ua siab dawb qhia tej yam no tsis txwv ib yam dab tsi li.13 Cov vaj lug kub qhia peb tias “Adas thiab Evas nkawd hwm Vajtswv lub npe, thiab nkawd muab txhua yam qhia rau nkawd tej tub thiab tej ntxhais paub.”14

Peb ua siab dawb qhia peb cov me nyuam thaum peb siv sij hawm uas muaj nqis rau lawv. Peb qhia lawv tsis txwv dab tsi li thaum peb nrog lawv sib tham txog tej yam uas me ntsis nyuaj xws li kev siv sij hawm saib xov tooj ntawm tes, thaum peb siv tej yam pab uas lub Koom Txoos tau ua.15 Peb qhib siab qhia lawv thaum peb siv Los, Nrog Kuv Mus kawm cov vaj lug kub nrog peb cov me nyuam thiab cia tus Ntsuj Plig qhia peb.

Qhov thib Ob: Coj Raws Li cov Thwj Tim

Nyob hauv phau Yauhas, peb nyeem hais tias thaum ob peb tug neeg Yudais cem tus Cawm Seej txog tej yam Nws ua, Yexus tau hais kom lawv tsom ntsoov rau tus uas coj yam ntxwv rau Nws, Nws Leej Txiv. Nws qhia hais tias, “Leej Tub yeej tsis ua ib yam dab tsi raws li nws lub siab; nws tsuas ua tej uas nws pom nws Txiv ua xwb. Tej uas Leej Txiv ua, Leej Tub thiaj ua.”16 Cov niam tsev txiv tsev, peb yuav tsum ua dab tsi kom coj yam ntxwv rau peb cov me nyuam? Kev ua thwj tim.

Vim peb yog cov niam tsev txiv tsev, peb qhia tau txog qhov uas yuav tsum ua raws li Vajtswv qhia ua ntej thaum peb hais txog txoj lus txib thib ib, tiam sis peb kuj coj yam ntxwv txog qhov no thaum peb tso tej yam uas tsis muaj nqis hauv lub ntiaj teb tseg thiab hwm Hnub Caiv kom dawb huv txhua lub lim tiam. Peb qhia txog qhov uas tej kev khi lus ntawm lub tuam tsev tseem ceeb npaum li cas thaum peb hais txog cov lus qhuab qhia ntawm kev sib yuav xilethi-aus, tiam sis peb coj yam ntxwv txog qhov no thaum peb ua raws li peb tej kev khi lus, thiab saib taus peb tus khub.

Qhov thib Peb: Caw Lawv Ua tej Yam

Lub ntsiab ntawm peb cov me nyuam zaj lus tim khawv yuav tsum yog kev ntseeg Yexus Khetos, thiab txhua tus me nyuam yuav tsum txais ib zaj lus tim khawv los ntawm kev tshwm sim rau lawv tus kheej.17 Xwv kom pab peb cov me nyuam txhawb nqa lawv zaj lus tim khawv, peb qhia kom lawv siv lawv txoj kev ywj siab xaiv qhov yog18 thiab npaj lawv kom ua raws li Vajtswv txoj kev ua raws li kev khi lus mus tas ib sim neej no.19

Tsim nyog uas peb yuav yaum peb cov me nyuam txhua tus kom ua raws li Thawj Tswj Hwm Nelson tej lus caw lawv lav ris lawv zaj lus tim khawv txog Yexus Khetos thiab Nws txoj moo zoo, khwv ua hauj lwm kom tau, tu kom yuav loj hlob tuaj, pub qhov tseeb, thiab tsis txhob ua kom qias neeg los ntawm kev siv cov txiv neej thiab cov poj niam uas tsis ntseeg tej lub tswv yim cuav.20

Kev Ua Tib Zoo Ua Niam Tsev Txiv Tsev Ncaj Ncees

Peb Leej Txiv Saum Ntuj Ceeb Tsheej lub hom phiaj ntawm nws txoj kev ua peb txiv los twb muab tshwm sim rau Mauxes: “Vim saib seb, qhov no yog kuv txoj hauj lwm thiab kuv lub yeeb koob—ua kom tib neeg tsis txawj tuag thiab kom tau txoj sia nyob mus ib txhis.”21 Thawj Tswj Hwm Nelson tau hais ntxiv tias, “Vajtswv yuav ua txhua yam Nws ua tau, tsuas tsis yuam koj kom tsis muaj kev ywj siab xaiv xwb, kom nej tsis xiam cov koob hmoov zoo tshaj plaws nyob mus ib txhis li.”22

Peb cov niam tsev txiv tsev, peb yog Vajtswv cov neeg sawv cev saib xyuas peb cov me nyuam.23 Peb yuav tsum ua txhua yam peb ua tau kom tsim ib qho chaw uas peb cov me nyuam hnov tau Nws lub hwj huam.

Leej Txiv Saum Ntuj Ceeb Tsheej tsis tau xav kom peb cov niam tsev txiv tsev zaum ntug kev saib peb cov me nyuam seb lawv sab ntsuj plig yuav zoo li cas. Cia kuv hais txog kev ua tib zoo ua niam tsev txiv tsev thaum kuv hais txog ib zaj lus ntawm kuv lub neej. Thaum kuv koom lub Koom Haum Me Nyuam Yaus nyob hauv ib ceg ntseeg me me nyob hauv Guatemala, kuv niam kuv txiv pib qhia kuv txog qhov uas yawg suab txoj koob hmoov muaj nqis heev. Kuv niam siv sij hawm qhia kuv txog lub sij hawm uas nws tau txais nws yawg suab txoj koob hmoov. Nws qhia kuv txog cov lus qhuab qhia ntawm yawg suab cov koob hmoov, thiab nws ua tim khawv txog cov koob hmoov uas Vajtswv cog lus. Nws txoj kev ua tib zoo ua ib tug niam tsev twb tshoov kuv lus siab kom xav txais yawg suab ib txoj koob hmoov.

Thaum kuv muaj 12 xyoo, kuv niam kuv txiv tau pab kuv nrhiav ib tug yawg suab. Yuav tsum ua li no vim tsis muaj ib tug yawg suab hauv koog chaw uas peb nyob. Kuv tau mus rau ib tug yawg suab uas nyob hauv ib ceg txheem ntseeg deb li 156 kilaumev (97 mais). Kuv nco ntsoov thaum tus yawg suab tso tes saum kuv taub hau kom foom koob hmoov rau kuv. Kuv paub los ntawm tus Ntsuj Plig txoj kev pom zoo, tsis xyem xyav hlo li, hais tias kuv Leej Txiv Saum Ntuj Ceeb Tsheej paub kuv.

Rau ib tug me nyuam tub uas muaj 12 xyoos nyob hauv ib lub zos me me, ces qhov no muaj nqis tshaj rau kuv. Kuv lub siab tau tig mus rau kuv Leej Txiv Saum Ntuj Ceeb Tsheej hnub ntawd vim kuv niam thiab txiv txoj kev ua tib zoo qhia kuv, thiab kuv yeej yuav ris nkawd txiaj.

Muam Joy D. Jones, lub Koom Haum Me Nyuam Yaus ib tug Tuam Thawj Tswj Hwm dhau los qhia tias: “Peb tos tsis tau saib peb cov me nyuam puas lam tau lam hloov siab los ntseeg. Qhov uas lam tau lam hloov siab los ntseeg tsis yog ib txoj ntsiab cai ntawm Yexus Khetos txoj moo zoo.”24 Peb txoj kev hlub thiab tej yam uas peb caw lawv ua yeej yuav pab peb cov me nyuam paub siv lawv txoj kev ywj siab xaiv. Thawj Tswj Hwm Nelson qhia tias, “Tsis muaj ib txoj hauj lwm uas tseem ceeb tshaj kev ua niam tsev txiv tsev raws li kev ncaj ncees!”25

Lus Kaw

Cov niam tsev txiv tsev, lub ntiaj teb no muaj tej laj lim tswv yim thiab kab lig kev cai uas yuam kom peb cov me nyuam tsom ntsoov rau tej ntawd. Cov hauv lub tsev loj thiab dav siv tej kev tshaj tawm saum huab cua qhia tias muaj pes tsawg tus mej zeej haud. Tus yaj saub Maulaunais qhia tias, “Tiam sis los ntawm lub txiaj ntsim uas yog nws Leej Tub Vajtswv tau npaj ib txoj kev uas zoo dua.”26

Thaum peb nrog Vajtswv koom tes los ntawm kev khi lus thiab ua Nws cov neeg sawv cev saib xyuas peb cov me nyuam, Nws yuav ua rau peb xav tej yam dawb huv, tshoov peb lub siab thaum peb qhia, thiab pab peb caw lawv kom “peb cov me nyuam yuav paub cia siab rau lub hauv paus twg kom txais kev zam txim rau lawv tej kev txhaum.”27 Los ntawm Yexus Khetos lub npe, amees.

Lus Cim

  1. Saib Phau Ntawv Nkauj 127:3.

  2. Johnny Welch, “The Puppet,” rov qab ua nyob ntawm inspire21.com/thepuppet; kuj saib Johnny Welch, Lo que me ha enseñado la vida (1996).

  3. Tej zaum nej yuav xav tias qhov no yog ib txoj hauj lwm nyuaj heev, tiam sis ib yam li Txwj Laug Jeffrey R. Holland hais tias, “Nrog Leej Txiv Saum Ntuj Ceeb Tsheej txoj kev pab peb yuav tsim tau tej yam uas cov me nyuam nco ntsoov thaum peb ua niam tsev txiv tsev” (“The Hands of the Fathers,” Liyahaunas, Xya Hli Ntuj 1999, 18).

  4. Russell M. Nelson, “Thou Shalt Have No Other Gods,” Ensign, Tsib Hlis Ntuj 1996, 15.

  5. Dallin H. Oaks, “Txoj Moo Zoo Kab Lig Kev Cai,” Liyahaunas, Peb Hlis Ntuj 2012, 22.

  6. Russell M. Nelson, “Xav Tau cov uas Ua rau Neeg Nyob Sib Haum Xeeb,“ Liyahaunas, Tsib Hlis Ntuj 2023, 99.

  7. Dallin H. Oaks, “Txoj Moo Zoo Kab Lig Kev Cai,” 22.

  8. Dallin H. Oaks, “Txoj Moo Zoo Kab Lig Kev Cai,” 22.

  9. Saib Maulaunais 10:5.

  10. Russell M. Nelson, “Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” Liyahaunas, Kaum Ib Hlis Ntuj 2018, 113.

  11. “Kev Hloov Siab Los Ntseeg Yog Peb lub Hom Phiaj,” nyob hauv Los, Nrog Kuv Mus—Rau Ib Leeg thiab Tsev Neeg: Phau Tshiab 2023, v.

  12. Mauxes 6:58.

  13. Saib American Dictionary of the English Language, “freely,” webstersdictionary1828.com/Dictionary/freely.

  14. Mauxes 5:12.

  15. Saib “Siv Txuj Ci Technology” thiab Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv (2022), Txoj Moo Zoo cov Ntawv.

  16. Yauhas 5:19.

  17. Saib “Mathais 16:17–18. Individual Revelation Needed for a Testimony of Jesus Christ,” nyob hauv New Testament Student Manual (2018), 52.

  18. Saib Dale G. Renlund, “Nej Cia Li Xaiv Hnub No,” Liyahaunas, Kaum Ib Hlis Ntuj 2018, 104: “Peb Leej Txiv Saum Ntuj Ceeb Tsheej lub hom phiaj tsis yog kom Nws cov me nyuam ua qhov yog; Nws lub hom phiaj yog kom Nws cov me nyuam xaiv tej yam uas yog thiab thaum kawg hloov los ua neeg zoo li Nws.”

  19. Saib “Ntaub Ntawv Ntxiv tom Kawg: Npaj Koj cov Me Nyuam Taug Vajtswv txoj kev Ua Raws Li Kev Khi Lus Tas Ib Sim Neej,” nyob hauv Los, Nrog Kuv Mus—Rau Ib Leeg thiab Tsev Neeg: Phau Tshiab 2023, Txoj Moo Zoo cov Ntawv.

  20. Saib Russell M. Nelson, “Kov Yeej lub Ntiaj Teb thiab Nrhiav Tau Kev So,” Liyahaunas, Kaum Ib Hlis Ntuj 2022, 97.

  21. Mauxes 1:39. Nyob hauv nqe no, Yexus Khetos sawv Leej Txiv Saum Ntuj Ceeb Tsheej cev hais lus.

  22. Russell M. Nelson, “Choices for Eternity” (kev hawm Vajtswv uas tshaj tawm rau cov neeg hluas thoob ntiaj teb), Tsib Hlis Ntuj 15, 2022, Txoj Moo Zoo cov Ntawv.

  23. Saib Russell M. Nelson, “Salvation and Exaltation,” Liyahaunas, Tsib Hlis Ntuj 2008, 10: “Tsis txhob kav nej cov me nyuam. Tiam sis, mloog lawv, pab lawv kawm txog txoj moo zoo, tshoov lawv lub siab, thiab coj lawv mus rau txoj sia nyob mus ib txhis. Nej yog Vajtswv cov neeg sawv cev uas saib xyuas cov me nyuam uas Nws tau pub rau nej. Cia Nws lub hwj huam nyob hauv nej lub siab thaum nej qhia thiab yaum lawv.”

  24. Joy D. Jones, “Tej Kev Sib Tham Tseem Ceeb,” Liyahaunas, Tsib Hlis Ntuj 2021, 12.

  25. Russell M. Nelson, “Hnub Caiv Yog Ib Hnub Zoo Siab,” Liyahaunas, Tsib Hlis Ntuj 2015, 131.

  26. Ethaws 12:11.

  27. 2 Nifais 25:26.