Kev Txo Hwj Chim Txais Tau thiab Coj Raws Li Yexus

Nyob rau hauv Amas tshooj tsib, ib nqe lus noog tias: “Yog Vajtswv hu nej kom cia li tuag lub sij hawm no, nej puas muaj cuab kav hais tau nyob hauv nej lub siab hais tias, nej twb txo hwj chim txaus nkaus lawm?”¹ Los lus ntawd txhais tias txoj kev txo hwj chim yog ib qhov uas peb yuav tsum muaj kom thiaj li npaj tau rov qab mus nyob rau ntawm Vajtswv lub xub ntiag.

Peb sawv daws yeej xav tias peb twb txo hwj chim txaus nkaus lawm tiam sis, muaj tej lub sij hawm hauv peb lub neej uas ua rau peb pom tias tib neeg txoj kev ua neeg muab hlob ntawm sab cev nqaij daim tawv yog ib qho uas nyob hauv peb.

Ntau xyoo tas los, thaum wb ob tug ntxhais tseem nyob tom tsev, kuv txiav txim siab cia nkawd thiab kuv tus poj niam mus pom kuv lub chav ua hauj lwm uas kuv yog tus nais tom kuv qhov chaw hauj lwm.

Kuv lub ntsiab cai yog kom cia lawv pom ib qhov chaw uas thaum kuv hais kom ua dab tsis, lawv ua tam sim ntawd, tsis zoo li tom kuv tsev. Thaum peb los txog lub qhov rooj laj kab uas ntau zaus cia li qhib thaum kuv lub tsheb los ze, ua rau kuv xav tsis thoob thaum lub qhov rooj laj kab tsis qhib zaum no. Ib tug tub ceev xwm uas kuv tsis tau pom dua los rau ntawm lub tsheb thiab nug kom kuv muab kuv qhov chaw hauj lwm daim ID rau nws pom.

Kuv qhia nws tias txhua zaus kuv tsav tsheb tuaj, kuv tsis tau siv kuv daim ID thiab kuv khav theeb hais lus rau nws tias: “Koj puas paub koj nrog leej twg tham?”

Ces nws teb kuv tias, “Es, vim koj tsis muaj koj daim ID, kuv tsis muaj peev xwm paub koj yog leej twg, thiab thaum kuv nyob zov lub qhov rooj laj kab no koj yuav nkag tsis tau qhov chaw no yog koj tsis muaj daim ntawv raws kev cai uas qhia tias koj yog leej twg.”

Kuv twb xav tias ntsia daim iav kom pom tau tom qab tsheb tiam sis kuv yeej paub tias kuv ob tug ntxhais tam sim ntawd zoo siab heev! Kuv tus poj niam ntawm kuv ib sab co nws lub taub hau tsis pom zoo rau kuv tus cuj pwm. Ces thaum kawg kuv tau hais rau tus tub ceev xwm ntawd tias kuv thov txim uas kuv tau tsis ua zoo rau nws. Nws hais tias, “Kuv zam txim rau koj, tiam sis yog koj tsis muaj koj qhov chaw hauj lwm daim ID koj nkag tsis tau hnub no!”

Kuv tau rov qab tsav tsheb mus tsev mus nqa kuv daim ID, thiab tau kawm ib qho tseem ceeb: Thaum peb xaiv tsis txo hwj chim, peb yuav raug txaj muag.

Nyob hauv Paj Lug peb nrhiav, “Kev khav theeb yuav ua rau koj poob ntsej muag, tiam sis yog koj txo hwj chim luag yuav hwm koj.”² Yog peb xav txo hwj chim ntxiv, peb yuav tsum to taub tias txo hwj chim txhais li cas nyob hauv txoj moo zoo.

Tej tib neeg xav yuam kev thaum lawv xav tias kev txo hwj chim zoo li lwm yam ib yam li piv txwv tias, kev pluag. Tiam sis yeej muaj ntau tus uas pluag thiab muab hlob thiab ntau tus uas nplua nuj thiab txo hwj chim. Lwm cov uas txaj muag los sis tsis saib lawv tus kheej rau nqi zoo nkaus muaj kev txo hwj chim sab nraud tiam sis hauv lawv lub siab lawv muab hlob heev.

Ces kev txo hwj chim yog dab tsi? Raws li phau Qhia Kuv txoj Moo Zoo, txhais tias “kev txaus siab ua raws li tus Tswv lub siab nyiam. … Yog kev txaus siab mloog lus. … Kev txo hwj chim yog lub hauv paus tseem ceeb ntawm yus sab ntsuj plig txoj kev muag zog.”³

Yuav muaj ntau lub cib fim rau peb sawv daws siv Khetos qhov cwj pwm no kom zoo dua. Kuv xav hais ua ntej peb tau txo hwj chim li cas, yuav tsum txo hwj chim li cas tom ntej, thaum peb ua raws li peb tus yaj saub tej lus ntuas. Tej zaum txoj kev tshuaj ntsuam peb tus kheej kuj hais zoo li no:

• Peb puas siv lub Koom Txoos lub npe tag nrho thaum peb nrog lwm tus tham? Thawj Tswj Hwm Nelson hais tias, “Dab Ntxwg Nyoog yog tus uas kov yeej thaum tib neeg tshem tus Tswv lub npe tawm ntawm tus Tswv lub Koom Txoos.”⁴

• Peb puas cia Vajtswv yeej hauv peb lub neej los ntawm kev txais peb tus yaj saub tej lus caw uas meej? “Hnub no kuv hais kom peb cov mej zeej nyob txhua qhov chaw coj kev rau txhua tus kom muab lawv tej kev xav thiab tej yam lawv ua los ntawm kev xaiv ntsej muag tso tseg.”⁵

• Peb puas kov yeej lub ntiaj teb, tso siab rau Khetos cov lus qhuab qhia dua li tso siab rau tib neeg lub tswv yim, ib yam li peb tus yaj saub tau qhia?⁶

• Peb puas tau los ua cov uas ua rau neeg nyob sib haum xeeb thaum peb hais lus zoo rau thiab txog tib neeg? Lub tuam rooj sab laj tas los, Thawj Tswj Hwm Nelson tau hais tias: “Yog hais tias muaj tej yam dab tsi uas tsim txiaj, ntxim hlub, los yog muaj moo zoo los yog txaus qhuas” uas peb hais tau txog lwm tus—tsis hais tim ntsej tim muag los sis thaum nws tsis nyob—ces kev hais li ntawd yeej yog peb txoj kev cai hais lus.”⁷

Tej lus qhia no yooj yim tiam sis muaj hwj chim. Nco ntsoov, yog tias Mauxes cov tib neeg ntsia tus nab tooj uas nws tsa, lawv tus mob yuav raug kho.⁸ Tiam sis “vim txoj kev ntawd yooj yim, los sis vim txoj kev ntawd tsis nyuaj, muaj coob leej tau piam sij.”⁹

Nyob hauv lub rooj sab laj no, peb tau hnov thiab yuav hnov peb cov yaj saub thiab cov thwj tim tej lus ntuas. Yog ib lub sij hawm zoo txo hwj chim thiab tso tseg peb tej kev xav hauv lub siab los ntseeg tias tus Tswv yeej hais lus rau peb los ntawm cov thawj coj no.

Thaum peb txoj kev txo hwj chim loj hlob tuaj peb yuav tsum to taub thiab txaus siab lees tias peb yuav tsis muaj peev xwm kov yeej los sis hloov los ua neeg zoo tag nrho peb tus kheej xwb. Tej neeg hais lus muaj tswv yim, tej ua sau ntawv, tej kws qhia cov kws xyaum txuj tes thiab tej influencers thoob plaws lub ntiaj teb, tiag tiag nyob hauv digital platforms, yuav hais tias txhua yam tsuas los ntawm peb thiab tej yam peb ua xwb. Lub ntiaj teb ntseeg tib neeg lub hwj chim.

Tiam sis los ntawm txoj moo zoo peb kawm tias peb yuav tsum tau txais Leej Txiv Saum Ntuj Ceeb Tsheej txoj kev siab dawb siab zoo thiab tus Cawm Seej Yexus Khetos txoj Kev Theej Txhoj, vim “peb paub hais tias twb yog los ntawm txoj kev tshav ntuj uas peb dim, tom qab uas peb ua txhua yam uas peb ua tau.”¹⁰ Vim li ntawd tseem ceeb heev rau peb ua raws li peb tej kev khi lus nrog Vajtswv, kom peb thiaj txais tau Yexus Khetos lub hwj chim uas kho tau mob, thiab zoo tag nrho los ntawm Nws txoj Kev Theej Txhoj.

Peb paub hais tias peb yuav tsum tso siab rau Leej Txiv Saum Ntuj Ceeb Tsheej thiab peb tus Cawm Seej Yexus Khetos thaum txhua lub lim tiam peb mus rau kev sib ntsib txais lub cim nco txog thiab mus rau lub tuam tsev ntau ua tej kab ke thiab khi lus thiab rov qab khi lus. Tej ntawd yuav cia Nkawd lub hwj chim los rau peb lub neej pab peb thaum peb muaj teeb meem thiab thaum kawg yog lub ntsiab peb ua neej nyob.

Tsis ntev tas los muaj ib lub sij hawm kuv tau kawm txog kuv txoj kev txo hwj chim thiab kuv txoj kev to taub tias kuv cia siab rau tus Tswv npaum li cas. Kuv nyob hauv ib luv tsheb taxi mus rau tom tshav nyab hoom yuav ya mus tsis deb rau ib qhov chaw uas muaj ib qhov teeb meem nyuaj kho. Tus txiv neej tsav tsheb taxi ntawd, uas tsis yog ib tug mej zeej ntawm lub Koom Txoos, ntsia kuv ntawm nws daim iav thiab hais, “Kuv pom hais tias hnub no koj tsis xis nyob!”

“Koj pom tau li ntawd los?” Kuv hais.

Nws hais tias “Yog los mas. Ces nws teb hais tias, “Muaj ib yam tsis zoo nyob ib puag ncig koj!”

Kuv qhia rau nws txog kuv qhov teeb meem uas kuv yuav tsum saib xyuas ces nws nug kuv tias, “Koj puas siv tag nrho koj lub zog ua txhua yam uas koj ua tau kom pab qhov teeb meem no?”

Kuv hais rau nws kuv yeej ua txhua yam uas kuv ua tau lawm.

Kuv yeej nco ntsoov nws tej lus uas nws hais rau kuv: “Ces, tso rau Vajtswv txhais tes, thiab txhua yam yuav zoo thaum kawg.”

Kuv lees tias kuv twb xav nug nws, “Koj puas paub koj nrog leej twg tham?” Tiam sis kuv tsis tau ua li ntawd! Thaum kuv caij nyab hoom ib teev ntawd, kuv tau txo hwj chim thiab thov tus Tswv, nug kom tau kev pab. Thaum kuv nqis lub nyab hoom, kuv kawm tias qhov teeb meem ntawd tsis muaj lawm thiab kuv tsis tas mus xyuas lawv lawm.

Cov kwv tij thiab cov muam, txoj lus txib, kev caw thiab kev cog lus los ntawm tus Tswv yeej meej thiab txais kev kaj siab lug “ Peb yuav tsum txo hwj chim; thiab tus Tswv peb tus Vajtswv yuav tuav peb tes coj peb kev, thiab yuav teb peb tej lus thov.”¹¹

Thov kom peb txo hwj chim thiab raws peb cov yaj saub tej lus ntuas thiab tso siab tias tib tug Vajtswv thiab Yexus Khetos thiaj hloov tau peb—los ntawm cov kab ke thiab tej kev khi uas txais hauv Nws lub Koom Txoos—los ua peb tus kheej ua zoo tshaj plaws thiab muaj ib hnub, yuav ua rau peb zoo tag nrho los ntawm Khetos. Los ntawm Yexus Khetos lub npe, amees.