Peb tus Khub Tas Mus Li

Kuv cov kwv tij thiab cov muam, hauv lub rooj sab laj no peb tau koob hmoov vim muaj kev tshwm sim ntau kawg. Tus Tswv Yexus Khetos cov tub qhev tau hais lus thiab yuav hais cov lus tseeb, kom txhawb nqa peb, thiab coj peb kev.

Tej zaj lus tim khawv hauv lub rooj sab laj no twb raug kuv lub siab tias tus Tswv hais lus ncaj qha rau peb dhau los ntawm tus Vaj Ntsuj Plig Dawb Huv. Thaum peb thov Vajtswv thiab ua raws li tus Ntsuj Plig tej kev tshoov siab, peb haj yam to taub thiab tau koob hmoov ntxiv uas yuav coj peb mus dhau tej kev nyuaj siab uas nyob tom peb hauv ntej.

Peb twb rov qab hnov Thawj Tswj Hwm Russell M. Nelson cov lus ceeb toom hais tias, “Hauv tej hnub uas tseem yuav los, peb sab ntsuj plig yuav tsis txawj ciaj yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv.”¹

Txoj kev ceeb toom ntawd ua rau kuv xav seb kuv yuav qhia kuv cov me nyuam, cov xeeb leej xeeb ntxwv, thiab sawv daws li cas txog kev coj qhia ntawd rau tej hnub nyuaj kawg uas tseem yuav los rau lawv.

Yog li ntawd, nov yog ig tsab ntawv me me rau kuv cov xeeb leej xeeb ntxwv uas yuav pab lawv thaum kuv tsis nyob yav tom ntej. Kuv xav kom lawv yuav paub txog tej uas kuv kawm paub lawm uas yuav pab tau lawv.

Kuv haj yam to taub hais tias lawv yuav tsum ua li cas thiaj muaj tau tus Vaj Ntsuj Plig Dawb Huv nrog lawv nyob hauv lub caij nyoog uas peb nyob no. Ces kuv tau kev tshoov siab kom hnub no kuv raug xwm zoo li cas lawm vim kuv tau caw tus Vaj Ntsuj Plig Dawb Huv los nrog kuv nyob, thiab ua kuv tus khub tas mus li. Kuv thov Vajtswv kom kuv yuav yaum tau lawv los ua ib yam li ntawd thiab.

Kuv yuav xub kom lawv yuav xav txog thiab thov Vajtswv txog Hilamas ob tug tub, Nifais thiab Lihais, thiab lwm cov tub qhe uas nrog nkawd ua hauj lwm. Lawv raug tsim txom ntau. Lawv ua hauj lwm hauv ib qho chaw phem thiab raug kev dag kev ntxias. Kuv ua siab loj thaum kuv nyeem ib nqe vaj lug kub hauv Hilamas hais tias:

“Thiab nyob hauv xyoo xya caum cuaj pib muaj kev sib ceg ntau. Tiam sis tau muaj tias Nifais thiab Lihais, thiab coob leej ntawm nkawd cov kwv tij uas paub txog tej ntsiab cai tseeb ntawm txoj lus qhuab qhia, vim lawv tau txais kev tshwm sim ntau txhua hnub, yog li ntawd lawv tau qhuab qhia rau cov neeg, lawv thiaj ua rau txoj kev sib cav sib ceg nyob rau tib xyoos ntawd tsum.”²

Zaj no ua rau kuv muaj siab loj, thiab tej zaum yuav txhawb pab nej thiab Hilamas ob tug tub tau kev qhia thiab kev cob vim tus Vaj Ntsuj Plig Dawb Huv twb pab lawv ntau zaus. Qhov no ua rau kuv paub tias tus Ntsuj Plig yuav qhia peb thiab peb yuav kawm ib nqe lus ntxiv rau ib nqe lus, txais tej uas peb xav tau, thiab thaum uas peb xav tau, ces peb mam li txais ntxiv.

Kuv tau kev txhawb siab tib yam li ntawd thaum kuv nyeem zaj dab neeg uas Nifais raug txib kom rov qab mus nqa cov phiaj ntawm Lanpas hauv Yeluxalees teb. Nej nco qab tias nws txiav txim li cas. Nws hais tias, “Kuv yuav mus thiab ua tej uas tus Tswv tau txib kom ua.”³

Nifais tau tus Vaj Ntsuj Plig Dawb Huv txoj kev pab thaum mus ua txoj hauj lwm no es qhov ntawd pab kuv ua siab loj ntau zaus thaum kuv pib ua tej hauj lwm uas kuv paub tus Tswv tab tom txib kuv mus ua tiam sis yog tej yam uas kuv tsis tau ua dua thiab yeej paub hais tias kuv tsis muaj peev xwm ua.

Nej nco qab hais tias Nifais hais txog qhov no hais tias: “Thiab yog lub sij hawm tsaus ntuj; thiab kuv kom [kuv cov kwv tij] mus nkaum nyob sab ntsa loog nraud. Thiab tom qab lawv tau nkaum tas lawm, kuv, Nifais, nkag ntsiag to mus rau hauv nroog thiab mus rau tom Lanpas lub tsev.”

Nws hais ntxiv tias, “Tus Ntsuj Plig tau coj kuv kev, kuv tsis paub ua ntej txog tej uas kuv yuav ua.”⁴

Kuv tau kev txhawb siab vim kuv paub tias Nifais tau tus Ntsuj Plig kev cob qhia ib na this dhau ib na this hmo uas nws mus ua tus Tswv txoj hauj lwm.

Peb xav, thiab nej yuav xav, kom tus Vaj Ntsuj Plig Dawb Huv yuav ua peb tus khub tas mus li. Nim no, peb xav kom muaj li ntawd, tab sis mas peb paub hais tias nyuaj nyuaj ua li ntawd. Peb sawv daws yeej xav thiab hais thiab ua tej yam txhua txhua hnub uas ua rau tus Ntsuj Plig tu siab.

Thaum ua li ntawd, es yeej yuav ua, ces peb yuav xav tias tus Tswv tsis pom zoo rau peb. Ces peb yuav xav tias peb nyob peb ib leeg xwb. Thaum ntawd tseem ceeb heev rau peb nco qab txog kev cog lus uas peb txais txhua txhua lim piam thaum peb hloov siab lees txim thiab noj lub cim nco txog uas hais tias, “xwv kom peb yuav muaj nws tus Ntsuj Plig niaj hnub nrog peb nyob.”⁵

Yog tias hnub no nej tau hnov tus Vaj Ntsuj Plig Dawb Huv tej kev tshoov siab, ces nej yuav tsum to taub hais tias txoj Kev Theej Txhoj tab tom ua hauj lwm hauv nej lub neej ntag.

Xws li Txwj Laug Jeffrey R. Holland hais lawm tias: “Thaum twg peb muaj kev nyuaj siab li no, peb yuav tsum tsis txhob ntshai hais tias Vajtswv tau tso peb tseg los yog hais tias Nws tsis hnov peb tej lus thov. Nws yeej hnov peb. Nws yeej pom peb. Nws yeej hlub peb.”⁶

Cov lus ntawd yeej pab kuv lawm. Thaum kuv xav tias kuv nyob nrug deb Vajtswv, thaum zoo nkaus li kuv tsis tshua tau lus teb rau kuv tej lus thov, kuv tau kawm hais tias kuv yuav tsum ua raws li Thawj Tswj Hwm Nelson cov lus ntuas kom kuv yuav tau tshab xyuas kuv lub neej seb puas muaj tej yam uas kuv yuav tsum hloov siab lees txim rau. Nws qhia peb tias, “Kev hloov siab lees txim txhua hnub yog txoj kev rau peb ua neeg huv, thiab kev ua neeg huv ua rau peb muaj hwj chim.”⁷

Yog koj txawm pom hais tias nyuaj rau koj hnov tus Vaj Ntsuj Plig Dawb Huv lawm, ces tej zaum koj yuav tsum xav seb puas muaj dab tsi koj yuav tsum hloov siab lees txim thiab txais kev zam txim rau.⁸ Koj mam li muaj kev ntseeg thov Vajtswv seb yuav tsum ua li cas kom ua tau neeg dawb huv ces koj thiaj tsim nyog tau tus Vaj Ntsuj Plig Dawb Huv ua koj tus khub.

Yog koj xav kom tus Vaj Ntsuj Plig Dawb Huv ua koj tus khub, koj yuav tsum muaj tej ntsiab cai zoo kom muaj li ntawd. Koj lub hom phiaj yuav tsum yog ua raws li tus Tswv lub hom phiaj. Yog koj ua rau koj tus kheej xwb, yuav nyuaj rau koj hnov thiab txais tus Ntsuj Plig tej kev tshoov siab.

Qhov tseem ceeb rau kuv thiab nej yog kom peb yuav xav tau tej yam uas tus Cawm Seej xav tau. Peb yuav tsum muaj tej hom phiaj uas yog ua raws li Khetos txoj kev hlub dawb paug. Peb tej kev thov yuav tsum yog kom “Kuv tsuas xav tau qhov uas Koj xav tau. Ua raws li koj siab nyiam xwb.”

Kuv sim nco qab txog tus Cawm Seej txoj kev txi thiab Nws txoj kev hlub rau kuv. Ces, thaum kuv thov Leej Txiv Saum Ntuj Ceeb Tsheej ua nws tsaug, kuv hnov kev hlub thiab paub tseeb hais tias nws hnov kuv tej lus thov thiab kuv yuav txais qhov uas tsim nyog tshaj plaws. Qhov ntawd ntxiv zog rau kuv zaj lus tim khawv.

Ntawm txhua yam tsav uas tus Vaj Ntsuj Plig Dawb Huv ua tim khawv txog, qhov tseem ceeb tshaj plaws rau peb yog qhov uas nws qhia tias Yexus yog tus Khetos, Vajtswv Tib Leeg Tub uas muaj sia nyob. Tus Cawm Seej cog lus tseg hais tias: “Tus Pab yog Vaj Ntsuj Plig, nws los qhia Vajtswv zaj uas yog qhov tseeb thiab yog Leej Txiv txib nws los. Kuv yuav kom Leej Txiv txib nws los, thiab nws yuav qhia kuv zaj rau nej.”⁹

Ntau xyoo tas los lawm, ib leej niam uas nyuaj siab heev hu xov tooj tuaj rau kuv. Nws qhia kuv tias nws tus ntxhais tsiv mus deb ntawm lawv tsev. Txawm nkawd tsis tau sib tham ntau nws xav tias muaj ib qho teeb meem loj rau nws tus ntxhais. Nws taij thov kom kuv yuav pab nws.

Kuv nrhiav seb tus qhia tom tsev rau nws tus ntxhais tsev yog leej twg. Thaum hnov lo lus ntawd nej paub tias twb muaj li no thaum ub xwb. Kuv hu mus rau tus txiv neej ntawd. Nws tseem hluas. Tab sis mas nws qhia kuv tias nws thiab nws tus khub ob leeg tsim los thaum nruab hmos vim nkawd txhawj txog tus ntxhais ntawd thiab tau kev tshoov siab hais tias tus ntxhais tab tom yuav txiav txim ua tej yam uas yuav coj kev tu siab thiab kev txom nyem los. Txawm tsuas muaj tus Ntsuj Plig kev tshoov siab ntawd nkaus xwb, nkawd txawm mus saib nws.

Thaum xub thawj, nws tsis xav qhia nkawd seb muaj dab tsi. Raws li txoj kev tshoov siab hais, nkawd taij thov kom nws yuav hloov siab lees txim thiab xaiv txoj kev uas tus Tswv xav kom nws yuav taug. Nws txawm pom, es kuv ntseeg tias tus Ntsuj Plig tshoov nws siab, ces nws paub tias nkawd tsuas paub txog nws lub neej ntawd vim yog Vajtswv twb qhia rau nkawd paub. Ces ib leej niam txawm muab nws tej kev txhawj xeeb rau ib Leej Txiv Saum Ntuj Ceeb Tsheej thiab rau tus Cawm Seej. Twb txib tus Vaj Ntsuj Plig Dawb Huv rau ob tug mus qhia tom tsev vim nkawd kam ua hauj lwm pab tus Tswv. Nkawd tau ua raws li cov lus ntuas thiab lus cog tseg uas nyob hauv Phau Lus Qhuab Qhia thiab Kev Khi Lus uas hais tias:

“Cia nej lub siab muaj kev hlub tshua rau tib neeg sawv daws, thiab rau txoj kev rau siab ntseeg, thiab cia li xav txog kev tsim txiaj tsis tu ncua; ces nej txoj kev tso siab yuav muaj zog nyob ntawm Vajtswv lub xub ntiag; thiab tej lus qhuab qhia ntawm lub pov thawj hwj yuav nyob rau hauv nej lub siab ib yam li cov lwg uas los saum ntuj ceeb tsheej los,

“Tus Vaj Ntsuj Plig Dawb Huv yuav ua koj tus khub tsis tu tsis tseg, thiab koj tus cwj vaj yog tus cwj vaj ntawm kev ncaj ncees thiab kev tseeb uas tsis hloov li; thiab koj txoj kev kav yuav yog txoj kev kav uas kav ib txhis, thiab koj txoj kev kav yuav ntws los rau koj mus ib txhiab thiab ib txhis tsis muaj kev quab yuam.”¹⁰

Kuv hais lus tim khawv tias tus Tswv tau ua raws li Nws cog tseg lawm. Yeej xa tus Vaj Ntsuj Plig Dawb Huv mus rau Yexus Khetos lub Koom Txoos cov mej zeej uas rau siab ntseeg ua raws li lawv tej kev khi lus. Nej nyias muaj nyias zaj, thiab tus Ntsuj Plig yuav coj nej kev kom tsim nyog nej txoj kev ntseeg thiab lub peev xwm uas txais tau kev tshwm sim rau nej thiab rau cov uas nej hlub thiab ua hauj lwm pab. Kuv rau siab ntso thov kom nej haj yam yuav ua siab loj.

Kuv ua tim khawv tias Vajtswv Leej Txiv muaj sia nyob. Nws hlub nej. Nws hnov nej txhua zaj lus thov. Yexus Khetos twb thov kom Leej Txiv yuav xa tus Vaj Ntsuj Plig Dawb Huv los coj kev, nplij siab, thiab ua tim khawv txog qhov tseeb rau peb. Leej Txiv thiab Nws Tib Leeg Tub tau tshwm los rau Joseph Smith pom hauv ib koog ntoo. Tus Yaj Saub Joseph Smith txhais Phau Ntawv Maumoos dhau los ntawm Vajtswv lub hwj chim thiab lub txiaj ntsim.

Cov tub txib saum ntuj tau muab lub pov thawj hwj cov yuam sij coj rov qab los. Thawj Tswj Hwm Russell M. Nelson yog Vajtswv tus yaj saub rau tag nrho lub ntiaj teb.

Ua ib tug neeg tim khawv txog Yexus Khetos, kuv paub tias Nws muaj sia nyob thiab yeej coj kav Nws lub Koom Txoos. Koj thiab kuv muaj cib fim muaj tus Vaj Ntsuj Plig Dawb Huv ua peb tug khub tas mus li thiab paub tau tej qhov tseeb no thaum uas peb nco txog thiab hlub tus Cawm Seej, es hloov siab lees txim thiab thov kom Nws txoj kev hlub yuav nyob rau hauv peb siab ntsws. Kuv thov kom hnub no thiab txhua hnub hauv peb lub neej peb yuav txais txoj koob hmoov ntawd thiab yuav muaj tus Vaj Ntsuj Plig Dawb Huv ua peb tus khub. Kuv hlub nej. Los ntawm Yexus Khetos lub npe dawb ceev, amees.