Qhuas tus Txiv Neej

Cov kwv tij thiab cov muam, kuv zoo siab vim kuv nrog nej nyob tag kis no. Kuv thov kom tus Tswv yuav foom koob hmoov rau kuv.

Kuv ob lub qhov muag tsis zoo li yav tas los lawm. Kuv tau mus ntsib tus kws kho qhov muag, thiab kuv hais tias, “Kuv pom tsis tau daim txaij uas sau kuv tej lus lawm.”

Ces nws hais tias, “Koj ob lub qhov muag yeej laus heev. Nws yuav tsis hloov mas.”

Ces kuv mam li ua zoo npaum li kuv ua tau.

Kuv xav qhia nej txog ob peb yam uas nyob hauv kuv paj hlwb. Tau ob peb hlis no tus Yaj Saub Joseph nyob ruaj nrees hauv kuv lub paj hlwb. Kuv tau zaum thiab xav txog nws txoj hauj lwm tseem ceeb uas nws tau los ua tus yaj saub rau lub caij no, uas yog lub caij nyoog uas puv txhua lub caij.

Kuv xav tias peb cov uas ua mej zeej hauv Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg muaj kev ris txiaj ntau rau Joseph Smith, uas yog ib tug tub hluas uas xav tau kev zam txim, nws thiaj ua siab loj mus hauv ib koog ntoo ze nws lub tsev hauv Palmyra, New York, ces nyob ntawd nws txhos caug thov Vajtswv thiab—raws li nws hais—thov Vajtswv hais lus nrov thawj zaug (saib Joseph Smith—Zaj Keeb Kwm 1:14).

Lub sij hawm ntawd, thaum Joseph txhos caug hauv Koog Ntoo Dawb Ceev, lub ntuj ceeb tsheej txawm qhib plho. Ob tug neeg, uas ci ntsa iab tshaj lub hnub, tshwm los rau nws pom. Ib tug hais lus rau nws thiab hais tias-- “[Joseph] tus no yog Kuv tus Tub uas Kuv Hlub. Cia li mloog Nws hais!” (Joseph Smith—Keeb Kwm 1:17). Yog li ntawd thiaj tau pib muab Yexus Khetos txoj moo zoo uas muaj txhij txhua Txum Tim Rov Qab Los.

Vim Yexus, peb tus Cawm Seej thiab peb tus Txhiv Dim, hais lus rau tus tub hluas Joseph thiab tau qhib lub caij nyoog uas peb nyob no, peb thiaj hu nkauj hais tias, “Qhuas tus txiv neej uas sib tham nrog peb tus Tswv!” (“Qhuas tus Txiv Neej,” Cov Nkauj Qhuas Vajtswv, zaj 13). Peb ua tus Tswv tsaug rau Joseph Smith thiab vim nws ua siab loj mus hauv koog ntoo ntawd thaum xyoo 1820, ze nws lub tsev hauv Palmyra, New York.

Kuv tau xav txog tej yam tseem ceeb heev uas peb paub thiab txhua yam uas peb muaj. Kuv cov kwv tij thiab cov muam, kuv zaj lus tim khawv rau nej tag kis no yog qhia tias peb sawv daws muaj hmoov kawg vim peb paub txhua yam uas peb paub rau qhov peb muaj Joseph Smith, tus yaj saub rau lub caij nyoog kawg no.

Peb to taub lub ntsiab rau lub neej no, seb peb yog leej twg tiag.

Peb paub Vajtswv yog leej twg; peb paub tus Cawm Seej yog leej twg, vim peb muaj Joseph, tus uas thaum tseem ua ib tug tub hluas tau mus hauv ib koog ntoo, nrhiav kev zam txim rau nws tej kev txhaum.

Kuv xav tias ib yam loj thiab tseem ceeb heev uas tib neeg hauv ntiaj teb paub tau yog—qhov uas peb Leej Txiv Saum Ntuj Ceeb Tsheej thiab tus Tswv Yexus Khetos tau tshwm Nkawd tus kheej pom hauv lub caij nyoog kawg no thiab tias Joseph raug tsa los muab tag nrho Yexus Khetos txoj moo zoo txum tim rov qab los.

Peb muaj Phau Ntawv Maumoos. Phau Ntawv Maumoos yog ib qho txiaj ntsim loj thiab tseem ceeb rau cov mej zeej hauv lub Koom Txoos. Nws yog ib zag lus tim khawv ntxiv, lwm zaj lus tim khawv tias Yexus yog tus Khetos. Peb muaj phau no vim Joseph ua neeg tsim nyog txais cov phiaj, tau kev tshwm sim los saum ntuj los nws thiaj txhais lus tau vim muaj Vajtswv lub txiaj ntsim thiab lub hwj chim kom muab tau phau no rau lub ntiaj teb.

Txawm kuv zaj lus yog ib zaj me mem los, nws tog rau hauv kuv lub siab, thiab muaj kev hlub puv npo rau tus Yaj Saub Joseph Smith rau tag nrho txhua tus, kuv cov kwv tij thiab cov muam, uas tau txhawb nqa nws thiab kam txhawb nqa nws thaum nws tseem hluas.

Tag kis no kuv xav qhuas nws leej niam. Kuv ib txwm xav tias nws zoo kawg vim thaum Joseph los tsev ntawm Koog Ntoo Dawb Ceev thiab qhia nws niam seb muaj dab tsi lawm, Lucy Mack Smith yeej ntseeg nws.

Kuv ris nws txiv txiaj thiab nws cov kwv tij thiab cov muam thiab nws tsev neeg, cov uas txhawb nqa nws ua txoj hauj lwm tseem ceeb no uas tus Tswv muab rau nws kom ua tus yaj saub uas yuav muab Yexus Khetos txoj moo zoo uas muaj txhij txhua txum tim rov qab los rau ntiaj teb no dua.

Ces tag kis no kuv zaj lus tim khawv hais tias kuv paub tias Yexus Khetos yog tus Cawm Seej thiab tus Txhiv Dim rau lub ntiaj teb. Kuv kuj paub tias peb Leej Txiv Saum Ntuj Ceeb Tsheej thiab tus Tswv Yexus Khetos tau tshwm los thiab hais lus rau Joseph thiab npaj nws los ua tus yaj saub.

Kuv xav tsis thoob, thiab kuv xav tias nej xav li ntawd thiab, vim peb paub tej uas peb paub txog lub hom phiaj rau lub neej no, yog vim li cas peb nyob no, thiab peb yuav tsum sim ua dab tsi thiab niaj hnub yuav tsum coj li cas. Peb tab tom npaj peb tus kheej, ib hnub dhau ib hnub, kom ua zoo dua, ua siab zoo dua, thiab npaj me ntsis rau hnub ntawd, hnub uas yeej yuav los, thaum peb yuav rov qab mus nrog peb Leej Txiv Saum Ntuj Ceeb Tsheej thiab tus Tswv Yexus Khetos nyob ua ke dua.

Hnub ntawd los ze ze rau kuv. Tsis ntev kuv yuav muaj 95 xyoos. Kuv cov me nyuam qhia kuv tias muaj tej hnub thaum lawv xav tias kuv laus tshaj ntawd, tiam sis tsis ua li cas. Kuv ua zoo npaum li kuv ua tau.

Tiam sis twb yuav yog li 50 xyoo, kuv cov kwv tij thiab cov muam, uas kuv muaj cib fim mus thoob plaws ntiaj teb no ua tej hauj lwm vim kuv ua ib tug Tuam Thawj Coj hauv lub Koom Txoos. Yog ib txoj koob hmoov zoo kawg li. Kuv xav tias kuv tau mus rau hauv yuav luag txhua qhov chaw hauv ntiaj teb no. Kuv tau ntsib lub Koom Txoos cov mej zeej thoob plawv ntiaj teb no.

Auj, kuv hlub nej heev. Yog ib qho zoo kawg nkaus—thaum kuv ntsia nej ntsej muag, nyob nrog nej, thiab hnov nej txoj kev hlub rau tus Tswv thiab rau Yexus Khetos txoj moo zoo uas muab Txum Tim Rov Qab Los lawm.

Nim no thov kom Leej Txiv Saum Ntuj Ceeb Tsheej yuav saib xyuas peb thiab foom koob hmoov rau lub rooj sab laj no. Thiab thov kom tus Tswv tus Ntsuj Plig yuav nyob hauv peb lub siab lub ntsws, thiab thov kom peb txoj kev hlub rau Yexus Khetos txoj moo zoo—peb tus Cawm Seej, tus Tswv Yexus Khetos—yuav loj hlob tuaj mus thaum peb sim ua hauj lwm pab Nws thiab ceev Nws cov lus txib thiab sim rais los mus ua neeg zoo li Nws vim peb tau koom lub rooj sab laj no. Txawm nej nyob qhov twg hauv ntiaj teb no los, thov Vajtswv foom koob hmoov rau nej. Thov kom tus Tswv tus Ntsuj Plig yuav nrog peb nyob. Thov kom peb yuav hnov lub ntuj lub hwj chim thaum peb pe hawm ua ke hauv lub rooj sab laj no.

Kuv hais kuv zaj lus pov thawj thiab lus tim khawv tias kuv paub tias Yexus yog tus Khetos. Nws yog peb tus Cawm Seej, peb tus Txhiv Dim. Nws yog peb tus phooj ywg zoo tshaj plaws. Los ntawm Yexus Khetos lub npe dawb ceev, amees.