Tus Ntsuj Plig tej Kev Tshoov Siab

Los ntawm Txwj Laug Gary E. Stevenson

Ntawm Pawg Kaum Ob tug Thwj Tim

Lub txiaj ntsim muaj tus Vaj Ntsuj Plig Dawb Huv nrog nraim peb nyob yog ib lub txiaj ntsim zoo tshaj plaws thib ob uas Tsoom Haiv Neeg Ntseeg hauv Hnub Nyoog Kawg txais tau.

Lus Cev

Tsis ntev tas los neeg coob tau saib 2023 FIFA cov Poj Niam Thoob Ntiaj Teb txoj Kev Sib Tw Ncaws Pob uas ua nyob hauv Audaliyas thiab New Zealand. Cov kws txuj tes taw nyob thoob plaws lub ntiaj teb los ntawm 200 tawm lub teb chaws tau qhia tias lawv rau siab thiab muaj txu ci npaum li cas thaum lawv sib tw kom tau nqi zog siab tshaj plaws rau kev ncaws pob.

Peb xav tsis thoob txog cov kws txuj tes taw thiab cov uas yog cov zoo tshaj plaws rau lwm yam txuj ci. Peb hais txog tej txuj ci los yog tej txiaj ntsim uas Vajtswv tau muab rau lawv. Muaj cov uas muaj txuj ci seev cev, dhia nrig nphau, hu nkauj, kos duab, ua yeeb yam, kawm lej, science, thiab ntxiv. Txhua tus neeg no qhia tias muaj tej lub txiaj ntsim uas Vajtswv muab rau lawv ces lawv khwv ua hauj lwm, kawm, thiab xyaum kom tas lawv lub neej kom siv tej lub txiaj ntsim ntawd. Vajtswv muab txiaj ntsim kom muaj tib neeg uas txawj ua tej yam no.

Kev Siv tej Txiaj Ntsim ntawm Sab Ntsuj Plig

Nyob hauv txoj moo zoo, Vajtswv muab ntau yam txiaj ntsim ntawm sab ntsuj plig rau Nws cov me nyuam, lawv thiaj li txawj ua tej yam ntawm sab ntsuj plig. Lub Koom Txoos cov mej zeej uas ua raws li lawv tej kev khi lus muaj tej lub txiaj ntsim los ntawm tus Ntsuj Plig, xws li lub txiaj ntsim ua tim khawv txog Yexus Khetos uas yog peb tus Cawm Seej, lub txiaj ntsim Vaj Ntsuj Plig Dawb Huv, lub txiaj ntsim uas yog kev ntseeg kho mob thiab txais kev kho mob, lub txiaj ntsim ntawm kev paub, lub txiaj ntsim txais tej txuj ci tseem ceeb, thiab lub txiaj ntsim tswv yim thiab kev txawj ntse.¹ Tus Tswv caw peb rau siab nrhiav tej lub txiaj ntsim zoo tshaj plaws, tsis hais tej txiaj ntsim ntawm sab ntsuj plig. Nws muab tej txiaj ntsim ntawm sab ntsuj plig rau peb kom foom koob hmoov rau peb thiab muab rau peb siv kom foom koob hmoov rau lwm tus.²

Kuv rov qab hais txog zaj lus piv txwv txog cov neeg uas muaj txiaj ntsim siv lawv tej txuj ci, es yeej tseem ceeb kom nco ntsoov tias txawm muaj ib lub txiaj ntsim los yus tseem tsis yog ib tug uas muaj txuj ci. Txawm yog ib txhia ib txwm muaj txuj ci los, yeej yog vim lawv mob siab khwv ua hauj lwm thiab xyaum ua lawv qhov txuj ci lawv thiaj li ua tau zoo tshaj lwm tus. Muaj tej khoom plig uas tom qab tau txais thiab tev ntawv lawm ces “yuav tsum muab sib dhos” kom siv tau.

Kuv kuj tau pom tias yuav tsum kawm thaum siv tej txiaj ntsim ntawm sab ntsuj plig. Yuav tsum xyaum kom paub siv tej txiaj ntsim ntawm sab ntsuj plig thiab. “Yuav tsum ua hauj lwm ntawm sab ntsuj plig kom muaj tus Vaj Ntsuj Plig Dawb Huv coj koj lub neej. Yuav tsum sib zog thov Vajtswv thiab kawm cov vaj lug kub txhua hnub Koj kuj yuav tsum ua raws li koj tej kev khi lus thiab coj raws li Vajtswv cov lus txib. … Yuav tsum tsim nyog txais lub cim nco txog txhua lub lim tiam.”³

Lub nqi zog ntawm kev siv tej txiaj ntsim ntawm sab ntsuj plig yog dab tsi. Yog tej kev tshoov siab los ntawm tus Ntsuj Plig uas pab peb txhua hnub thiab qhia peb paub ua li cas thiab hais li cas thiab cov koob hmoov uas yog kev kaj siab lug thiab kev nplij siab. Thaum peb mloog thiab ua raws li tej kev tshoov siab ntawm sab ntsuj plig, tus Vaj Ntsuj Plig Dawb Huv ua kom peb muaj zog thiab txuj ci tshaj qhov uas peb ua taus peb tus kheej xwb. Tej lub txiaj ntsim ntawm sab ntsuj plig no yuav pab peb ua txhua yam hauv peb lub neej.⁴

Lub txiaj ntsim muaj tus Vaj Ntsuj Plig Dawb Huv nrog nraim peb nyob yog ib lub txiaj ntsim zoo tshaj plaws thib ob uas Tsoom Haiv Neeg Ntseeg hauv Hnub Nyoog Kawg txais tau.

Lub txiaj ntsim no tseem ceeb npaum li cas? Thawj Tswj Hwm Russell M. Nelson tau teb lo lus nug no tag nrho thaum nws hais tias “hauv tej hnub uas tseem yuav los, peb sab ntsuj plig yuav tsis txawj ciaj yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv.”⁵

Kev Nrhiav thiab Kev To Taub tus Ntsuj Plig tej Kev Tshoov Siab

Thaum kuv ua hauj lwm qhuab qhia, kuv tau kawm tias txhua tus xav paub nrhiav thiab to taub tus Vaj Ntsuj Plig Dawb Huv tej kev tshoov siab. Muaj ntau txoj kev uas tus Ntsuj Plig tej kev tshoov siab los rau tib neeg. Tiam sis peb tau koob hmoov vim peb muaj cov yaj saub tej lus, thaum ub thiab niaj hnub no, uas ua rau peb muaj tswv yim txog kev paub txais tus Vaj Ntsuj Plig Dawb Huv tej lus qhia.

Cia kuv hais txog plaub lub ntsiab cai uas tej zaum yuav pab nej nrhiav thiab to taub tus Ntsuj Plig tej kev tshoov siab.

Sawv hauv tej Qhov Chaw Dawb Huv

Qhov thib ib yog sawv hauv tej qhov chaw dawb huv.⁶ Tsis ntev tas los kuv kuv tau koom kev qhib tsev rau lub Tuam Tsev Tokyo Japan. Twb tau xa ntawv thov neeg coob uas tshaj tawm xov xwm thiab cov neeg qhua tseem ceeb es muaj coob tshaj qhov xav. Neeg coob tau koom tej kev coj neeg saib lub tuam tsev. Cov neeg qhua nyiam saib qhov uas lub tuam zoo nkauj heev, tsis hais cov qauv thiab tej lub cim uas los ntawm cov Nyijpooj kab lig kev cai. Qhov chob siab heev yog tej yam uas cov neeg qhua xav thaum peb piav txog cov kab ke uas ua rau cov poj koob yawm txwv nyob hauv tej chav uas yuav ua cov kab ke ntawd. Tiam sis tej yam uas ua kom tib neeg kaj siab tshaj yog tus Ntsuj Plig tej kev tshoov siab.

Kuv nco ntsoov ib lub sij hawm li ntawd nrog ib tug nom tswv tseem fwv. Tom qab tau nyob ntsiag to rau ib pliag hauv chav xilethi-aus, nws txais kev tshoov siab heev, nws thiaj li ntxhi lus rau kuv, “Nyob hauv chav no, txhua yam txawv, tsis hais kuv txoj kev ua pa.” Kuv to taub tias nws sim piav txog qhov uas tus Ntsuj Plig Dawb Huv nyob, tus uas yeej nyob hauv tej qhov chaw dawb huv. Yog tias nej xav hnov tus Ntsuj Plig, cia li nyob hauv ib qho chaw uas tus Ntsuj Plig nyob tau.

Peb cov tuam tsev thiab lub tsev yeej yog tej qhov chaw dawb ceev tshaj plaws. Nyob haud peb nrhiav tau thiab to taub tus Ntsuj Plig. Lwm qhov chaw dawb huv yog tej tsev sib ntsib, tej tsev seminary thiab institute, thiab tej qhov chaw ntawm lub Koom Txoos keeb kwm thiab chaw tos txais cov neeg qhua. Cia li sawv hauv tej qhov chaw dawb huv.

Koom Nrog Tib Neeg Dawb Huv

Thib ob, koom nrog tib neeg dawb huv. Kuv yuav hais ib zaj ntxiv kom piav txog lub ntsiab cai thib ob.

Kuv yeej yuav nco ntsoov thaum kuv koom ib txoj kev sib ntsib hawm Vajtswv nyob hauv ib lub qhov chaw thoob thaj saib kev sib tw. Feem ntau qhov chaw thoob thaj no muaj cov neeg coob qw nrov kom txhawb nqa lawv pawg ncaws pob thiab thuam pawg uas lawv tsis nyiam. Tiam sis hmo no yeej txawv heev. Qhov chaw thoob thaj puv txhiab txhiab tub hluas ntxhais hluas uas koom ua ke kom nco txog tus Yaj Saub Joseph Smith lub neej. Lawv nyob tswm seeb, ntsiag to, muaj kev ris txiaj thiab thov Vajtswv hauv lawv lub siab ua rau tus Vaj Ntsuj Plig Dawb Huv puv qhov chaw thoob thaj ntawd. Kuv twb pom hauv lawv lub ntsej muag. Yog lub txiaj ntsim Vaj Ntsuj Plig Dawb Huv, uas pom zoo rau lawv tej zaj lus tim khawv txog Joseph Smith thiab Kev Muab txoj Moo Zoo Txum Tim Rov Qab Los.

Yeej tsis muaj peev xwm txwv tus Ntsuj Plig koom nrog cov neeg dawb huv. Yog tias nej xav hnov tus Ntsuj Plig, cia li nyob hauv ib qho chaw uas tus Ntsuj Plig nyob tau. Tus Tswv hais li no tias, “Rau qhov yog muaj ob los sis peb leeg tuaj nyob ua ke qhov twg tuav kuv lub npe thov, kuv yuav nrog lawv nyob qhov ntawd.”⁷ Rau cov tub hluas ntxhais hluas, cia li xav txog nej txoj kev koom nrog cov neeg dawb huv, tej pawg, FSY thiab seminary, pawg ntseeg thiab ceg txheem ntseeg tej yam ntxim saib ntxim ua—pawg ntseeg tej pawg hu nkauj thiab. Cia li xaiv kom koom nrog tib neeg thiab mus rau tej qhov chaw uas muaj kev ncaj ncees. Nrhiav dag zog ntawm cov neeg ncaj ncees coob. Nrhiav phooj ywg zoo. Cia li ua phooj ywg zoo. Txawm nyob qhov twg los kom ib leeg txhawb nqa ib leeg. Koom nrog tib neeg dawb huv.

Ua Tim Khawv txog tej Lus Tseeb uas Dawb Huv

Thib peb, ua tim khawv txog tej lus tseeb dawb huv ntau npaum li ua tau. Tus Nplij Siab yeej siv Nws lub suab thaum peb siv peb lub suab kom ua tim khawv. Tus Ntsuj Plig ua tim khawv rau tus neeg uas hais lus thiab tus uas mloog lus tib si.

Kuv nco qab thaum kuv caij taxi rau 45 feeb nyob hauv New York City. Kuv twb nrog tus tsav tsheb sib tham txog txoj moo zoo thaum kuv caij mus rau tshav nyab hoom, es kuv tau them tus nqi thiab tab tom yuav tawm lub tsheb. Ces kuv xav tias kuv tsis tau ua tim khawv txog tej yam uas kuv hais rau nws. Kuv siv ib me pliag hais lus tim khawv, uas ua rau tus Ntsuj Plig los, thiab wb ob leeg los kua muag.

Thaum nej nrhiav thiab siv cib fim kom hais lus tim khawv rau lwm tus, nej yuav tsim tej lub sij hawm kom to taub tus Ntsuj Plig nej tus kheej.

Mloog tus Ntsuj Plig Dawb Huv Lus

Lub ntsiab cai kawg yog kev mloog zoo rau tus Ntsuj Plig Dawb Huv. Nws yuav ua peb tus khub tsis tu tsis tseg tiam sis Nws ntxhi lus ntsiag to. Tus yaj saub Eliyas twb kawm tias tus Tswv lub suab tsis nyob hauv cov cua, tsis nyob hauv av qeeg, los sis tsis nyob hauv cov hluav taws tiam sis yog “ib lub suab yau yau.”⁸ Tsis yog “ib lub suab xob quaj,” tiam sis yog “ib lub suab uas meej mos muag kawg nkaus li, zoo li yog ib lub suab ntxhi,” thiab yog “lub suab [uas] chob txog ntua nruab siab.”⁹

Thawj Tswj Hwm Boyd K. Packer hais tias: “Tus Ntsuj Plig tsis qw los yog muab peb co co kom peb tsom ntsoov. Nws ntxhi lus. Nws maj mam hais kom peb yuav tsis hnov hlo li yog tias peb xav ntsoov txog lwm yam.”¹⁰ Kuv twb kawm tias tej lub sij hawm Nws lub suab yau yau heev, los yog kuv xav ntsoov txog lwm yam, ces ib tug uas kuv hlub yuav txais rau kuv. Muaj ntau zaus uas tus Vaj Ntsuj Plig Dawb Huv tej kev tshoov siab los rau kuv dhau los ntawm kuv tus poj niam, Lesa. Cov niam tsev txiv tsev los yog cov thawj coj ncaj ncees txais tau tej lus qhia rau nej.

Tej kev qw nrov thiab kev sib cav sib ceg uas muaj hauv lub ntiaj teb no yuav nrov dhau kom tsis hnov tus Ntsuj Plig Dawb Huv tej kev tshoov siab. Cia li nrhiav ib qhov chaw ntsiag to thiab dawb huv kom nej txais tau tus Ntsuj Plig tej lus qhia.

Tej Lus Ceeb Toom

Thaum nej xav txog tej lub ntsiab cai kom nrhiav thiab to taub tus Ntsuj Plig, cia li xav txog tej lus ceeb toom no.¹¹

Saib seb nej tej kev tshoov siab ntawm sab ntsuj plig puas muaj tseeb. Piv txwv hais tias, tej kev tshoov siab los ntawm tus Ntsuj Plig yeej yuav muaj raws li cov vaj lug kub thiab tej lus qhia los ntawm cov yaj saub uas muaj txoj sia nyob.

Ua tib zoo kom paub tias tej kev xav uas koj txais nrog koj txoj hauj lwm sib haum. Tsuas yog Vajtswv hu koj muab txoj cai yog rau koj, tej kev tshoov siab los ntawm tus Ntsuj Plig yeej yuav tsis qhia kom koj ntuas los yog hais kom lawv hloov.

Yeej yuam tsis taus tej yam ntawm sab ntsuj plig. Koj yeej muaj tau tus cwj pwm thiab ua tej yam uas caw tus Ntsuj Plig los, thiab koj npaj tau koj tus kheej, tiam sis koj qhia tsis tau thaum twg los sis ua li cas tej kev tshoov siab yuav los rau koj. Ua siab ntev thiab ntseeg tias koj yuav txais tej yam uas koj xav tau thaum twg txog lub sij hawm yog lawm.

Siv koj txoj kev txiav txim zoo. Tej lub sij hawm peb xav kom tus Ntsuj Plig coj peb mus ua txhua yam. Tiam sis, feem ntau tus Tswv xav kom peb siv kev txawj ntse uas Vajtswv tau muab rau peb thiab ua tej yam raws li peb to taub. Thawj Tswj Hwm Dallin H. Oaks qhia tias:

“Qhov uas yus xav kom tus Tswv coj yus mus yeej yog ib yam zoo, tiam sis yus kuj yuav tsum to taub tias peb Leej Txiv Saum Ntuj Ceeb Tsheej cia peb txiav txim siab txog ntau yam. … Tib neeg uas cia tus Tswv txiav txim txog txhua yam thiab thov Vajtswv kom txais kev tshwm sim txog txhua yam uas yuav tsum xaiv mas ntshe tsis ntev ces yuav muaj ib lub sij hawm thaum lawv thov Vajtswv coj lawv kev thiab lawv tsis txais tej lus teb. …

“Peb yuav tsum xav hauv peb lub siab. … Ces peb yuav tsum thov Vajtswv kom coj peb thiab ua raws li tej lus ntawd. … Yog peb tsis txais tej lus kom coj peb kev, peb yuav tsum ua raws li peb txoj kev txiav txim zoo.”¹²

Kev Kaw Nrog Kev Caw

Tsoom Haiv Neeg Ntseeg hauv Hnub Nyoog Kawg yuav tsum ua co neeg uas muaj txiaj ntsim ua raws li lawv tej kev khi lus. Txawm yog li ntawd los, peb txhua tus yuav tsum nrhiav kom siv peb tej txiaj ntsim ntawm sab ntsuj plig ces caw thiab kawm kom to taub tus Ntsuj Plig tej kev tshoov siab. Plaub lub ntsiab cai uas pab peb ua qhov tseem ceeb no yog:

Cia li sawv hauv tej qhov chaw dawb huv.
Koom nrog tib neeg dawb huv.
Ua tim khawv txog tej lus tseeb uas dawb huv.
Mloog tus Ntsuj Plig Dawb Huv lus.

Nej txoj kev txawj nrhiav thiab to taub tus Ntsuj Plig tej kev tshoov siab los nej yuav kawm ib qho zuj zus. “Kev kawm kom to taub tus Ntsuj Plig lus yeej zoo li kev kawm ib yam lus tshiab. Yog ib tug txheej txheem uas yuav tsum rau siab ua thiab ua siab ntev ua.”¹³

Rov qab hais zoo li thaum pib, thov nco ntsoov tias vim nej yog Tsoom Haiv Neeg Ntseeg hauv Hnub Nyoog Kawg nej muaj tej txiaj ntsim. Cia li xav txog hnub Sunday uas yoo mov uas ib tug neeg piav rau kuv. ib tug me nyuam yaus, uas sawv saum ib lub rooj tiag taw, tsuas pom nws taub hau me ntsis ntawm sam thiaj. Nws txiv sawv ntawm nws ib sab hais lus txhawb nqa thiab pab nws thaum ntxhi lus hauv nws pob ntseg es nws thiaj hais tias ,“Kuv yog Vajtswv tus me nyuam.”

Ces tom qab ntawd ib tug ntxhais hluas hais lus tim khawv es nws pib hais li no tias: “Kheev lam kuv muaj ib tug neeg uas ntxhi lus rau kuv pob ntseg li ntawd.” Ces nws txais kev tshoov siab kiag thiab ua tim khawv tias, “Kuv yeej muaj ib tug uas ntxhi lus rau kuv pob ntseg li ntawd—tus Vaj Ntsuj Plig Dawb Huv!”

Kuv kaw kuv zaj lus nrog ib txoj kev caw nej txhua tus tiam sis qhov tseem ceeb kuv caw cov tub hluas ntxhais hluas! Nej feem coob pib txhua hnub saib nej tus kheej hauv daim iav. Tag kis, lub lim tiam no, xyoo no, txhua lub sij hawm, ces li nres me ntsis thaum nej saib nej tus kheej hauv daim iav. Cia li xav tias, los yog hais nrov yog nej nyiam, “Saib kuv! Kuv zoo heev! Kuv yog Vajtswv tus me nyuam! Nws paub kuv! Nws hlub kuv! Kuv muaj txiaj ntsim—lub txiaj ntsim Vaj Ntsuj Plig Dawb Huv ua kuv tus khub tsis tu tsis tseg!”

Kuv hais lus tim khawv rau nej cov Neeg Ntseeg hauv Hnub Nyoog Kawg uas muaj txiaj ntsim txog Vajtswv tus uas yog Leej Txiv, Yexus Khetos, thiab tus Vaj Ntsuj Plig Dawb Huv, uas ua tim khawv txog Nkawd. Los ntawm Yexus Khetos lub npe, amees.