Lub Tuam Rooj Sab Laj
Xav txog tej Yam Xilethi-aus!
Kaum Hli Ntuj xyoo 2023 lub tuam rooj sab laj

Xav txog tej Yam Xilethi-aus!

Los ntawm Thawj Tswj Hwm Russell M. Nelson

Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg

Tej yam uas nej xaiv yuav hloov qhov uas nej yuav nyob qhov twg mus ib txhis li, nej yuav muaj ib lub cev zoo li cas thaum nej sawv rov los, thiab nej yuav nrog leej twg nyob tas mus li.

Kuv cov kwv tij thiab cov muam, kuv zoo siab heev vim kuv yuav hais lus rau nej hnub no. Thaum yus laus li kuv, txhua hnub yeej ua rau yus xav tsis thoob thiab kuj muaj tej teeb meem tshiab thiab. Peb lub lim tiam tas los, ua rau kuv txoj leeg ntawm nraub qaum mob. Yog li ntawd, txawm kuv tau sawv thaum kuv hais 100 tawm zaj lus hauv lub tuam rooj sab laj, hnub no kuv xav tias kuv yuav tsum zaum. Kuv thov kom tus Ntsuj Plig yuav coj kuv zaj lus nkag hauv nej lub siab hnub no.

Tsis ntev tas los yog kuv hnub yug thib 99 ces twb pib xyoo 100 ntawm kuv lub neej. Muaj neeg coob nug kuv seb yuav ua li cas kom nyob ntev li kuv. Ib lo lus nug zoo dua yog “Kuv tau kawm dab tsi los ntawm kev ua neej yuav luag ib puas xyoo?”

Hnub no tsis muaj sij hawm teb tag nrho, tiam sis kuv xav qhia txog ib yam tseem ceeb uas kuv tau kawm.

Kuv tau kawm tias Leej Txiv Saum Ntuj Ceeb Tsheej txoj hau kev rau peb yeej zoo kawg nkaus, thiab tej yam peb ua hauv lub neej no yeej muaj nqis heev, thiab tus Cawm Seej txoj Kev Theej Txhoj yog qhov uas ua kom muaj raws li peb Leej Txiv txoj hau kev.1

Thaum kuv raug mob sab heev, ua rau kuv ris Yexus Khetos txiaj thiab zoo siab vim muaj lub txiaj ntsim uas yog Nws txoj Kev Theej Txhoj. Cia li xav txog qhov no! Tus Cawm Seej tau raug “raug tej kev mob thiab tej kev txom nyem”2 Nws thiaj li muaj peev xwm nplij peb lub siab, kho peb zoo, cawm peb dim thaum peb xav tau.3 Yexus Khetos piav txog lub sij hawm thaum Nws nyob hauv Khexemanes thiab Khaulakhauthas li no: “Txoj kev raug txom nyem uas tau ua rau kuv, uas twb yog Vajtswv, tus zoo tshaj plaws ntawm tag nrho sawv daws, kom tshee hnyo vim yog txoj kev mob, thiab los ntshav ntawm txhua lub qhov hws.”4 Kuv txoj kev raug mob ua rau kuv xav mus xav los txog “Ixayees tus Dawb Huv tej kev tshav ntuj.”5 Thaum kuv tseem rov zoo tuaj, tus Tswv tau qhia rau kuv txog Nws lub hwj chim los ntawm kev kaj siab lug thiab tej yam uas ua rau kuv paub tias yog Nws ua.

Vim Yexus Khetos tau theej peb lub txhoj nyob mus ib txhis li, peb Leej Txiv Saum Ntuj Ceeb Tsheej txoj hau kev yog ib txoj hau kev zoo tag nrho! Qhov uas peb to taub Vajtswv txoj hau kev zoo kawg nkaus ua rau peb paub tias peb yuav tsum ua dab tsi thiab yav tom ntej yuav zoo li cas. Ua rau pebtxhua tus xaiv tau hais tias peb yuav ua li cas thaum nyob hauv lub ntiaj teb thiab peb yuav nyob qhov twg tas mus li. Lub tswv yim uas hais tias peb yuav tau “yeej meem noj, yeej meem haus, thiab cia li zoo siab, vim tag kis peb yuav tuag; thiab yuav zoo rau peb”6 yeej yog ib txoj kev dag kev ntxias txaus luag tshaj.

Nov yog txoj moo zoo ntawm Vajtswv txoj hau kev: tej yam uas ua rau nej muaj lub neej zoo tshaj hauv lub ntiaj teb yeej yog tib yam uas yuav ua rau nej muaj lub neej zoo tshaj nyob mus ib txhis li thiab! Hnub no, xwv kom pab nej ua neej tsim nyog txais tau cov koob hmoov ntau nplua mias uas Leej Txiv Saum Ntuj Ceeb Tsheej muaj rau nej, kuv caw nej cia li “xav txog tej yam xilethi-aus”!7 Kev xav txog tej yam xilethi-aus txhais tias yus muaj lub siab nyiam sab ntsuj plig. Peb kawm los ntawm tus yaj saub Yakhauj hauv Phau Ntawv Maumoos tias, “kev muaj lub siab nyiam sab ntsuj plig yog txoj sia nyob mus ib txhis.”8

Lub neej no yeej zoo li ib zaj lus qhia peb kom kawm xaiv tej yam zoo tshaj plaws uas muaj nqis mus ib txhis li. Tib neeg coob dhau ua neej no zoo li tsuas muaj lub neej no xwb. Tiam sis, los ntawm tej yam uas nej xaiv hauv lub neej no thiaj paub peb qhov txog yav tom ntej: nej yuav nyob qhov twg mus ib txhis li, nej yuav muaj ib lub cev zoo li cas thaum nej sawv rov los, thiab nej yuav nrog leej twg nyob tas mus li. Yog li ntawd, xav txog tej yam xilethi-aus.

Nyob hauv kuv zaj lus thib ib tom qab kuv yog tus Thawj Tswj Hwm ntawm lub Koom Txoos, kuv tau hais kom nej xav txog qhov kawg thaum nej pib. Qhov no txhais tias nej cuab lub hom phiaj kom mus rau lub nceeg vaj xilethi-aus ces ua tib zoo xav nej tej kev txiav txim thaum nyob hauv lub ntiaj teb no yuav ua li cas kom nej nyob qhov twg hauv lub neej tom ntej.9

Tus Tswv tau qhia meej tias tsuas yog cov txiv neej thiab cov poj niam uas ua kev sib khi ua ib nkawm niam txiv hauv lub tuam tsev, thiab ua raws li nkawd tej kev khi lus, yuav nyob ua ke mus ib txhis li. Nws hais tias: “Txhua txoj kev khi lus, kev cog lus, kev sib pom zoo, kev yuav tsum ua, kev lav lus, kev lav ris, kev ua kev cai, kev sib txuas, kev sib koom, los yog kev zeem tos, uas tsis yog ua thiab muab khi tseg cia los ntawm tus Ntsuj Plig Dawb Huv ntawm kev cog lus, … yuav muaj qhov kawg thaum neeg tas sim neej.”10

Yog li ntawd, yog peb tsis muaj tswv yim thiab xaiv ua raws li tej kev cai thilethi-aus tam sim no, peb xaiv kom sawv rov los muaj ib lub cev thilethi-aus. Peb xaiv kom tsis nyob nrog peb tsev neeg tas mus li.

Yog li ntawd, kuv cov kwv tij thiab cov muam, nej xav ua li cas thiab nyob qhov twg thiab nrog leej twg tas mus li? Nej yuav tsum xaiv.11

Thaum nej xaiv, kuv caw nej saib qhov ntev—saib mus ib txhis li. Cia li tsom ntsoov rau Yexus Khetos ua ntej txhua yam, vim nej txoj sia nyob mus ib txhis nyob ntawm nej txoj kev ntseeg Nws thiab Nws txoj Kev Theej Txhoj.12 Kuj nyob ntawm nej txoj kev ua raws li Nws tej kev cai. Kev mloog lus yeej qhib kev rau ib lub neej zoo siab hnub no thiab ib lub nqi zog loj uas nyob mus ib txhis li tag kis.

Thaum nej raug teeb meem, cia li xav txog tej yam xilethi-aus! Thaum nej raug kev ntxias, cia li xav txog tej yam xilethi-aus! Thaum lub neej no los yog cov neeg uas nej hlub ua rau nej poob siab, cia li xav txog tej yam xilethi-aus! Thaum ib tug neeg tuag ntxov, cia li xav txog tej yam xilethi-aus! Thaum ib tug raug mob uas kav ntev, cia li xav txog tej yam xilethi-aus! Thaum lub neej no nyuaj rau nej, cia li xav txog tej yam xilethi-aus! Thaum nej tab tom zoo rov los tom qab raug xwm txheej, ib yam li kuv ua tam sim no, cia li xav txog tej yam xilethi-aus!

Thaum nej tsom ntsoov rau kev xav txog tej yam xilethi-aus, yeej yuav tsum paub tias yuav raug kev tawm tsam.13 Ntau xyoo tas los, ib tug kws ua hauj lwm cem kuv vim kuv muaj “lub tuam tsev ntau dhau” nyob hauv kuv, thiab muaj ob peb tug thawj coj uas rau txim rau kuv vim kuv ntseeg Vajtswv. Tiam sis kuv xav tias, kev xav txog tej yam xilethi-aus twb pab kuv txoj kev ua hauj lwm.

Thaum nej xav txog tej yam xilethi-aus, nej lub siab yuav hloov zuj zus. Nej yuav xav thov Vajtswv ntxiv thiab mob siab thov. Tsis txhob thov Vajtswv zoo li nej xav mus yuav khoom. Tus Tswv lub zeem muag yeej loj dua li nej lub tswv yim. Nws tej lus teb nej thaum nej thov Vajtswv los tej zaum yuav ua rau nej xav tsis thoob thiab pab nej xav txog tej yam xilethi-aus.

Cia li xav txog tus Tswv tej lus teb Joseph Smith thaum nws thov kom txais kev pab hauv lub Tsev Kaw Liberty. Tus Tswv tau qhia tus Yaj Saub tias qhov uas nws raug kev tsim txom yuav muab kev kawm rau nws, thiab yuav zoo rau nws.14 Tus Tswv tau cog lus tias, “Yog koj ua tib zoo nyiaj mus, Vajtswv yuav tsa koj mus nto ntuj.”15 Tus Tswv qhia Joseph kom xav txog tej yam xilethi-aus thiab ntsia ntsoov ib lub nqi zog mus ib txhis li tsis txhob tsom ntsoov rau tej yam nyuaj kawg nkaus hnub no. Peb yuav tsum sib tham nrog peb Leej Txiv Saum Ntuj Ceeb Tsheej thaum peb thov Nws.

Thaum nej xav txog tej yam xilethi-aus, nej yuav xav tiv thaiv kom txhob raug ib yam dab tsi uas ua rau nej tsis muaj kev ywj siab xaiv. Tej kev muaj yees twg—tsis hais kev ua si, twv txiaj, tshuav nuj nqi, tshuaj phem, cawv, kev chim siab, saib duab liab qab, kev pw ua ke, los yog noj zaub mov ntau—ua rau Vajtswv tu siab. Vim li cas? Vim qhov nej ntshaw yuav los ua nej tus vaj tswv. Nej ntsia qhov ntawd, tsis ntsia Nws, kom muaj kev nyab xeeb. Yog nej muaj yees, cia li nrhiav kev pab ntawm sab ntsuj plig thiab cov kws muaj txuj ci pab. Thov nej tsis txhob cia kev ntshaw ua rau nej tsis muaj kev ywj siab ua raws li Vajtswv txoj hau kev zoo kawg.

Kev xav txog tej yam xilethi-aus yuav pab nej ua raws li txoj kev cai coj dawb huv. Tsis muaj ntau yam uas yuav ua rau nej lub neej nyuaj tshaj qhov uas nej ua txhaum txoj kev cai no. Rau nej cov uas tau khi lus nrog Vajtswv, kev coj tsis tsim txiaj yeej yog ib txoj kev sai kom poob nej zaj lus tim khawv.

Tus yeeb ncuab tej kev haub kev ntxias uas phem tshaj yeej yog kev ntxias tib neeg ua txhaum kev cai coj dawb huv. Lub hwj chim tsim neeg yog ib lub sam xeeb ntawm kev ua zoo li Vajtswv uas Leej Txiv Saum Ntuj Ceeb Tsheej cia Nws cov me nyuam hauv lub ntiaj teb siv. Yog li ntawd, Vajtswv tau tsim tej lus qhia meej kom siv lub hwj chim no. Kev pw ua ke yeej yog qhov uas pub ib tug txiv neej thiab ib tug poj niam uas tau sib yuav ua xwb.

Neeg coob hauv lub ntiaj teb no tsis ntseeg qhov no, tiam sis cov pej xeem tej kev xav yeej tsis qhia peb tias qhov tseeb yog dab tsi. Tus Tswv tau qhia tias tsis muaj ib tug neeg uas tsis coj dawb huv yuav nkag hauv lub nceeg vaj xilethi-aus. Yog li ntawd thaum nej txiav txim siab txog lub neej no, cia li xav txog tej yam xilethi-aus. Yog tias nej tsis coj dawb huv, kuv thov kom nej hloov siab lees txim. Cia li los cuag Khetos thiab txais Nws tej lus cog tseg txog kev zam txim tag nrho thaum nej hloov siab lees txim rau nej tej kev txhaum.16

Thaum nej xav txog tej yam xilethi-aus, nej yuav saib tej kev sim siab thiab kev tawm tsam txawv li qub. Thaum ib tug neeg uas nej hlub tawm tsam qhov tseeb, cia li xav txog tej yam xilethi-aus, thiab tsis txhob ua xyem xyav txog nej zaj lus tim khawv. Tus Thwj Tim Povlauj hais tias “yav tom ntej yuav muaj qee leej tso Vajtswv tseg. Lawv yuav mus mloog dab tej lus dag thiab ua raws li dab qhia.”17

Tus yeeb ncuab tej kev ntxias tsis paub kawg. Thov nej npaj zoo. Tsis txhob mloog cov uas tsis ntseeg tej lus ntuas. Cia li nrhiav tej lus qhia los ntawm cov uas nej ntseeg tau—los ntawm cov yaj saub, cov pom tau, thiab cov txais kev tshwm sim thiab los ntawm tus Vaj Ntsuj Plig Dawb Huv tej lus ntxhi, uas “yuav qhia rau nej txhua yam uas nej yuav tsum ua.”18 Thov nej kom nej ua hauj lwm ntawm sab ntsuj plig kom nej haj yam muaj peev xwm txais kev tshwm sim.19

Thaum xav txog tej yam xilethi-aus, nej txoj kev ntseeg yuav loj tuaj. Thau kuv yog ib tug ua neeg xyaum hauj lwm hluas, kuv tau nyiaj $15 txhua hli xwb. Muaj ib hmo, kuv tus poj niam Dantzel nug seb kuv puas them ib feem kaum. Kuv tsis tau them. Kuv hloov siab lees txim sai sai thiab pib muab $1.50 txhua lub hli kom them ib feem kaum.

Puas tau pab lub Koom Txoos vim wb them ib feem kaum ntxiv? Yeej tsis tau pab hlo li. Tiam sis, qhov uas kuv yog ib tug them ib feem kaum tag nrho twb hloov kuv lub siab. Kuv tau kawm tias kev them ib feem kaum yog los ntawm kev ntseeg, tsis yog los ntawm cov nyiaj. Thaum kuv tau them ib feem kaum tag nrho, twb qhib lub ntuj ceeb tsheej rau kuv. Kuv xav tias kuv twb tau tej lub cib fim ua hauj lwm tom qab ntawd vim wb tau rau siab ntseeg them ib feem kaum.20

Yuav tsum muaj kev ntseeg kom them ib feem kaum, thiab txhawb yus txoj kev ntseeg Vajtswv thiab Nws Leej Tub.

Nej yuav txhawb kev ntseeg yog nej xaiv kev ua neej coj dawb huv hauv ib lub ntiaj teb uas nyiam pw ua ke thiab sib cav xaiv tog.

Kev siv sij hawm hauv lub tuam tsev txhawb kev ntseeg. Thiab nej tej hauj lwm thiab kev teev tiam hauv lub tuam tsev yuav pab nej xav txog tej yam xilethi-aus. Lub tuam tsev yog ib qhov chaw uas tib neeg txais kev tshwm sim. Nyob haud nej kawm kom paub ua zoo zuj zus thiaj ua neej xilethi-aus. Nyob ntawd nej nyob ze dua tus Cawm Seej thiab txais tau Nws lub hwj chim ntxiv. Nyob ntawd nej txais tej lus qhia kom kho tau teeb meem hauv nej lub neej, tsis hais nej tej teeb meem uas nyuaj kho los yog.

Cov kab ke thiab tej kev khi lus ntawm lub tuam tsev yeej tseem ceeb mus ib txhis li. Peb tseem yuav ua cov tuam tsev ntxiv kom nej muaj tej yam dawb ceev no nyob hauv nej lub neej. Peb zoo siab tshaj tawm txog peb txoj kev npaj ua ib lub tuam tsev nyob hauv 20 qhov chaw no.

  • Savai’i, Samoa

  • Cancún, Mexico

  • Piura, Peru

  • Huancayo, Peru

  • Viña del Mar, Chile

  • Goiânia, Brazil

  • João Pessoa, Brazil

  • Calabar, Nigeria

  • Cape Coast, Ghana

  • Luanda, Angola

  • Mbuji-Mayi, Democratic Republic of the Congo

  • Laoag, Philippines

  • Osaka, Japan

  • Kahului, Maui, Hawaii

  • Fairbanks, Alaska

  • Vancouver, Washington

  • Colorado Springs, Colorado

  • Tulsa, Oklahoma

  • Roanoke, Virginia

  • Ulaanbaatar, Mongolia

Tus Tswv coj peb ua cov tuam tsev no kom peb xav txog tej yam xilethi-aus. Vajtswv muaj sia nyob. Yexus yog tus Khetos. Twb tau muab Nws lub Koom Txoos txum tim rov qab los kom foom koob hmoov rau tag nrho Vajtswv cov me nyuam. Kuv ua tim khawv li no los ntawm Yexus Khetos lub npe dawb ceev, amees.

Lus Cim

  1. Saib Yauhas 6:38.

  2. Amas 7:11.

  3. Saib Amas 7:12.

  4. Lus Qhuab Qhia thiab Kev Khi Lus 19:18.

  5. 2 Nifais 9:40.

  6. 2 Nifais 28:7.

  7. Tej zaum kev hloov siab lees txim thiab ua zoo zuj zus ntawm sab ntsuj plig thaum peb nyob no, thaum peb tus ntsuj plig koom peb lub cev, yuav yooj yim dua thaum peb nyob hauv lub neej tom ntej tom qab qab tuag thiab ua ntej peb sawv rov los. Ib yam li Amulej qhia cov Neeg Xaulas uas tau tso qhov tseeb tseg, “Lub neej no yog lub caij … rau tib neeg npaj mus ntsib Vajtswv” (saib Amas 34:32–35).

  8. 2 Nifais 9:39.

  9. Saib Mauxiyas 4:30, thaum Vaj Ntxwv Npeyamis qhuab ntuas nws cov neeg, “Yog nej tsis xyuas nej tus kheej, thiab nej tej kev xav, thiab nej tej lus, thiab tej uas nej ua, thiab ua raws li Vajtswv tej lus txib, thiab yeej meem ntseeg … , nej yeej yuav piam sij.”

  10. Lus Qhuab Qhia thiab Kev Khi Lus 132:7; ntxiv qhov uas ntawv qaij.

  11. Nej txoj kev ywj siab xaiv yeej tswj tsis taus lwm tus txoj kev ywj saib xaiv thiab tej xwm txheej uas raug. Kuv yeej xav ua kev sib khi nrog kuv niam kuv txiv. Tiam sis, kuv yuav tsum tos mus txog thaum nkawd xaiv ua nkawd vaj txiaj ntsim thaum nkawd laus li 80 xyoo tawm. Ces nkawd tau ua kev cai sib khi ua txij ua nkawm, thiab tau muab peb cov me nyuam khi rau nkawd.

  12. Cov vaj lug kub ua tim khawv ntau zaus tias lub txiaj ntsim txoj sia nyob mus ib txhis los tsuas muaj dhau los ntawm tus Cawm Seej Yexus Khetos tej hauj lwm, kev hlub tshua, thiab kev tshav ntuj (saib, ua piv txwv, Maulaunais 7:41; kuj saib 2 Nifais 2:6–8, 27).

  13. Saib 2 Nifais 2:11.

  14. Saib Lus Qhuab Qhia thiab Kev Khi Lus 122:7.

  15. Lus Qhuab Qhia thiab Kev Khi Lus 121:8.

  16. Saib Yaxayas 1:16–18; Lus Qhuab Qhia thiab Kev Khi Lus 58:42–43.

  17. 1 Timautes 4:1. Nqe tom qab ntawd hais tias, “Tej lus qhia ntawd yog tej lus dag uas cov neeg siab phem qhia ntxias sawv daws. Lawv cov ntawd lub siab zoo li cov neeg uas tuag lawm lub” (nqe 2). Povlauj kuj qhia tias tag nrho cov uas “ntseeg Yexus Khetos txhua tus uas xav ua lub neej kom Vajtswv tau ntsej muag, lawv yeej raug kev tsim txom” (2 Timautes 3:12).

  18. 2 Nifais 32:5; ntxiv qhov uas ntawv qaij. yog peb thov, peb yuav “txais kev tshwm sim ntxiv rau kev tshwm sim, kev txawj ntse ntxiv rau kev txawj ntse” (Lus Qhuab Qhia thiab Kev Khi Lus 42:61).

  19. Saib Russell M. Nelson, “Kev Tshwm Sim rau lub Koom Txoos, Kev Tshwm Sim rau Peb lub Neej,” Liyahaunas, Tsib Hlis Ntuj 2018, 96.

  20. Qhov no tsis txhais tias yus them ces yeej yuav tau zoo li no xwb. Ib txhia uas yeej tsis them ib feem kaum tau cib fim ua hauj lwm, es ib txhia uas them ib feem kaum tsis tau. Twb cog lus tias tej qhov rais ntawm ntuj ceeb tsheej yeej yuav qhib rau tus uas them ib feem kaum. Cov koob hmoov uas Vajtswv foom los yeej yuav sib txawv.