បញ្ជីមួយអំពីការណ៍ទាំងឡាយដែលខ្ញុំបានឃើញ ហើយបានឮ
ពុំមានពេលណាល្អជាងគ្រានេះឡើយ ដើម្បីធ្វើជាសមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
បន្ទាប់ពីខ្ញុំបានបញ្ចប់ការសិក្សានៅសាលាច្បាប់ ភរិយាខ្ញុំ ម៉ាសៀ និងខ្ញុំបានជ្រើសរើសចូលរួមក្នុងក្រុមហ៊ុនច្បាប់មួយដែលយកជំនាញផ្នែកច្បាប់ជំនុំជម្រះ ។ នៅពេលខ្ញុំចាប់ផ្ដើមការហ្វឹកហ្វឺនការងារ ខ្ញុំបានចំណាយពេលភាគច្រើនរៀបចំសាក្សី ទៅធ្វើសាក្សីនៅអង្គជំនុំជម្រះ ។ ខ្ញុំបានដឹងភ្លាមថា សេចក្ដីពិតត្រូវបានកំណត់នៅក្នុងបន្ទប់សវនាការ ពេលដែលសាក្សីបានថ្លែងបន្ទាល់អំពីការពិតទាំងស្រុងនៃអ្វីដែលពួកគេបានឃើញ និងឮ នៅក្រោមសម្បថ ។ ពេលសាក្សីថ្លែងសក្ខីភាព ពាក្យសម្តីរបស់ពួកគេត្រូវបានកត់ត្រា និងរក្សាទុក ។ សារសំខាន់នៃសាក្សីគួរឲ្យទុកចិត្ត គឺតែងតែជាអាទិភាពនៃការរៀបចំរបស់ខ្ញុំ ។
ខ្ញុំដឹងភ្លាមថាពាក្យដែលខ្ញុំប្រើជារៀងរាល់ថ្ងៃក្នុងនាមជាមេធាវី ក៏ជាពាក្យដែលខ្ញុំប្រើក្នុងការសន្ទនាអំពីដំណឹងល្អផងដែរ ។ « សាក្សី » និង « សក្ខីភាព » គឺជាពាក្យដែលយើងប្រើ នៅពេលយើងចែកចាយចំណេះដឹង និងអារម្មណ៍យើងអំពីសេចក្ដីពិតនៃដំណឹងល្អរបស់ព្រះយេស៊ូវគ្រីស្ទ ។
នៅពេលខ្ញុំត្រូវបានគាំទ្រជាពួកចិតសិបនាក់ប្រចាំតំបន់ថ្មី ខ្ញុំបានបើកព្រះគម្ពីរដើម្បីរៀនពីកាតព្វកិច្ចរបស់ខ្ញុំ ហើយ គោលលទ្ធិ និងសេចក្តីសញ្ញា ១០៧:២៥ដែលចែងថា « ពួក ៧០ នាក់ ត្រូវបានហៅ … ធ្វើជាពួកសាក្សីពិសេសដល់ពួកសាសន៍ដទៃ និងនៅពេញសព្វក្នុងពិភពលោក » ។ ដូចដែលបងប្អូនអាចស្រមៃឃើញ ភ្នែកខ្ញុំផ្ដោតទៅនឹងពាក្យ « សាក្សីពិសេសៗ » ។ វាច្បាស់ចំពោះខ្ញុំថា ខ្ញុំមានទំនួលខុសត្រូវក្នុងការធ្វើជាសាក្សី ដើម្បីថ្លែងសក្ខីភាពអំពីព្រះនាមព្រះយេស៊ូវគ្រីស្ទ នៅគ្រប់កន្លែងណាដែលខ្ញុំធ្វើដំណើរទៅក្នុងពិភពលោកនេះ ។
មានឧទាហរណ៍ជាច្រើននៅក្នុងព្រះគម្ពីរអំពីពួកសាក្សីផ្ទាល់ភ្នែក និងអ្នកថ្លែងសក្ខីភាពអំពីអ្វីដែលពួកគេបានទាំងឃើញ និងឮ ។
នៅពេលដែលព្យាការីមរមនពីបុរាណចាប់ផ្ដើមបញ្ជីរបស់លោក លោកសរសេរថា « ហើយឥឡូវនេះ ខ្ញុំ មរមនធ្វើបញ្ជីមួយអំពីការណ៍ទាំងឡាយ ដែលខ្ញុំបានឃើញ ហើយបានឮ ហើយបានហៅថា គម្ពីរមរមន » ។១
សាវករបស់ព្រះអង្គសង្គ្រោះ ពេត្រុស និងយ៉ូហាន បានប្រោសបុរសម្នាក់ដោយនូវព្រះនាមព្រះយេស៊ូវគ្រីស្ទនៃណាសារ៉ែត ។២ កាលត្រូវបានបញ្ជាមិនឲ្យនិយាយនៅក្នុងព្រះនាមព្រះយេស៊ូវ នោះពួកលោកបានឆ្លើយតបថា ៖
« បើគួរគប្បីនៅចំពោះព្រះ ឲ្យយើងខ្ញុំស្តាប់តាមលោករាល់គ្នា ជាជាងស្តាប់តាមព្រះ នោះសូមពិចារណាចុះ ។
« ដ្បិតយើងខ្ញុំនឹងលែងនិយាយពីការដែលយើងខ្ញុំបានឃើញ ហើយឮ ពុំបានទេ » ។៣
សក្ខីភាពដ៏គួរឲ្យចាប់អារម្មណ៍មួយទៀតគឺមកពីពួកបរិសុទ្ធក្នុងព្រះគម្ពីរមរមន ដែលបានឃើញការយាងមករបស់ព្រះអង្គសង្រ្គោះព្រះយេស៊ូវគ្រីស្ទ ។ សូមស្ដាប់ការពិពណ៌នាអំពីសាក្សីរបស់ពួកគេ ៖ « ហើយពួកគេបានធ្វើបន្ទាល់តាមរបៀបនេះថា ៖ ភ្នែកមិនដែលឃើញសោះ ឯត្រចៀកក៏មិនដែលបានឮរឿងដ៏មហិមា និងអស្ចារ្យ ដូចយើងបានឃើញ ហើយបានឮព្រះយេស៊ូវ ទ្រង់មានព្រះបន្ទូលទៅកាន់ព្រះវរបិតាឡើយ » ។៤
បងប្អូនប្រុសស្រី ថ្ងៃនេះ ខ្ញុំសូមប្រកាសទីបន្ទាល់ខ្ញុំ ហើយធ្វើបញ្ជីមួយអំពីអ្វីដែលខ្ញុំបានទាំងឃើញ និងឮ អំឡុងពេលធ្វើការងារបម្រើដ៏ពិសិដ្ឋរបស់ខ្ញុំ ក្នុងនាមជាពួកចិតសិបនាក់របស់ព្រះអម្ចាស់ព្រះយេស៊ូវគ្រីស្ទ ។ ក្នុងការធ្វើដូច្នេះ ខ្ញុំសូមថ្លែងទីបន្ទាល់ដល់បងប្អូនអំពីព្រះវរបិតាសួគ៌ និងព្រះរាជបុត្រាទ្រង់ គឺព្រះយេស៊ូវគ្រីស្ទ ដែលបានរងទុក្ខ សុគត និងមានព្រះជន្មរស់ឡើងវិញ ដើម្បីប្រទានជីវិតដ៏នៅអស់កល្បជានិច្ចដល់បុត្រាបុត្រីព្រះ ។ ខ្ញុំសូមថ្លែងទីបន្ទាល់អំពី « ការណ៍មួយយ៉ាងអស្ចារ្យ ហើយចម្លែក »៥ ហើយថាព្រះអម្ចាស់បានដាក់ព្រះហស្ដរបស់ទ្រង់ស្ដារដំណឹងល្អរបស់ទ្រង់ឡើងវិញនៅលើផែនដី តាមរយៈព្យាការី និងសាវកដែលនៅរស់របស់ទ្រង់ ។៦ ខ្ញុំសូមថ្លែងទីបន្ទាល់ដោយផ្អែកលើអ្វីដែលខ្ញុំបានទាំងឃើញ និងឮថា គ្មានពេលណាល្អជាងសព្វថ្ងៃនេះឡើយ ដើម្បីធ្វើជាសមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនោះ ។ ខ្ញុំដឹងការណ៍នេះតាមចំណេះដឹងផ្ទាល់ខ្លួន ពុំមកពីប្រភពផ្សេងៗឡើយ ដោយសារអ្វីដែលខ្ញុំបានទាំងឃើញ និងឮ ។
អំឡុងឆ្នាំចុងក្រោយនៅវិទ្យាល័យ ដើម្បីបញ្ចប់ការសិក្សាពីថ្នាក់សិក្ខាសាលា ខ្ញុំត្រូវតែស្គាល់ព្រះវិហារបរិសុទ្ធទាំង ១៥ របស់សាសនាចក្រ ។ រូបភាពនៃព្រះវិហារបរិសុទ្ធនីមួយៗគឺដាក់នៅខាងមុខថ្នាក់យើង ហើយខ្ញុំត្រូវតែដឹងពីទីតាំងនៃព្រះវិហារបរិសុទ្ធនីមួយៗ ។ ឥឡូវនេះ អស់ជាច្រើនឆ្នាំក្រោយមក វាលំបាកខ្លាំងណាស់—ដើម្បីស្គាល់ព្រះវិហារបរិសុទ្ធនីមួយៗ—ព្រោះព្រះវិហារបរិសុទ្ធមានចំនួន ៣៣៥ ដែលកំពុងប្រតិបត្តិការ ឬត្រូវបានប្រកាស ។ ខ្ញុំបានឃើញដំណាក់របស់ព្រះអម្ចាស់ជាច្រើនដោយផ្ទាល់ ហើយសូមថ្លែងទីបន្ទាល់ថា ព្រះអម្ចាស់កំពុងប្រទានពរជ័យ និងពិធីបរិសុទ្ធរបស់ទ្រង់ដល់បុត្រាបុត្រីទ្រង់កាន់តែច្រើននៅទូទាំងពិភពលោក ។
មិត្តភក្តិខ្ញុំនៅកម្មវិធីស្រាវជ្រាវក្រុមគ្រួសារ បានបង្រៀនខ្ញុំថា ពួកគេបន្ថែមឈ្មោះថ្មីជាងមួយលានឈ្មោះទៅក្នុងកម្មវិធីស្រាវជ្រាវក្រុមគ្រួសារជារៀងរាល់ថ្ងៃ ។ ប្រសិនបើបងប្អូនមិនបានរកឃើញជីដូនជីតាកាលពីម្សិលមិញ ខ្ញុំសូមអញ្ជើញបងប្អូនឲ្យមើលម្តងទៀតនៅថ្ងៃស្អែក ។ នៅពេលនិយាយដល់ការប្រមូលសាសន៍អ៊ីស្រាអែលនៅឯម្ខាងទៀតនៃវាំងនន គ្មានពេលណាល្អជាងសព្វថ្ងៃនេះឡើយ ដើម្បីធ្វើជាសមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនោះ ។
ដោយបានចិញ្ចឹមកូនៗនៅទីក្រុងធ្វីនហ្វល រដ្ឋអៃដាហូ នោះទស្សនៈរបស់យើងអំពីសាសនាចក្រទូទាំងពិភពលោកគឺមានកម្រិត ។ នៅពេលខ្ញុំត្រូវបានហៅឲ្យធ្វើជាអ្នកមានសិទ្ធិអំណាចទូទៅ ម៉ាសៀ និងខ្ញុំត្រូវបានចាត់ឲ្យបម្រើនៅតំបន់ប៉ាស៊ីហ្វិក ជាកន្លែងមួយដែលយើងមិនធ្លាប់បានទៅពីមុនទេ ។ យើងសប្បាយចិត្តដែលរកឃើញស្តេកតាំងពីផ្នែកខាងលើទៅដល់ផ្នែកខាងក្រោមនៃប្រទេសនូវែលសេឡង់ ដែលមានព្រះវិហារបរិសុទ្ធមួយបានឧទ្ទិសឆ្លងនៅឆ្នាំ ១៩៥៨ ។ វាជាព្រះវិហារបរិសុទ្ធមួយក្នុងចំណោមព្រះវិហារបរិសុទ្ធទាំង ១៥ ដែលខ្ញុំត្រូវទន្ទេញចាំនៅក្នុងថ្នាក់សិក្ខាសាលា ។ យើងបានរកឃើញព្រះវិហារបរិសុទ្ធនៅគ្រប់ទីក្រុងធំៗនៃប្រទេសអូស្ត្រាលី ដែលមានស្តេកនៅទូទាំងទ្វីបនោះ ។ យើងមានការចាត់តាំងឲ្យទៅកោះសាម័រ ជាកន្លែងដែលមានស្តេកចំនួន ២៥ និងតុងហ្គា ដែលមានចំនួនប្រជាជនជិតពាក់កណ្តាលគឺជាសមាជិកនៃសាសនាចក្រ ។ យើងមានការចាត់តាំងមួយឲ្យទៅកោះគីរីបាទី ដែលទីនោះមានស្តេកចំនួនពីរ ។ យើងមានការចាត់តាំងឲ្យទៅទស្សនកិច្ចស្តេកទាំងឡាយនៅអ៊ីបេនៅកោះម៉ាស្សែល និងដារូនៅឯ ប៉ាពួ ញូវ ហ្គីណេ ។
បន្ទាប់ពីការបម្រើរបស់យើងនៅកោះប៉ាស៊ីហ្វិក យើងត្រូវបានចាត់តាំងឲ្យបម្រើនៅប្រទេសហ្វីលីពីន ។ ខ្ញុំភ្ញាក់ផ្អើលណាស់ សាសនាចក្រនៃព្រះយេស៊ូវគ្រីស្ទនៅប្រទេសហ្វីលីពីនកំពុងរីកចម្រើនខ្លាំងជាងអ្វីដែលខ្ញុំបានដឹង ។ បច្ចុប្បន្នមានស្តេកចំនួន ១២៥ បេសកកម្មចំនួន ២៣ និងព្រះវិហារបរិសុទ្ធចំនួន ១៣ ដែលកំពុងដំណើរការ ឬត្រូវបានប្រកាស ។ ខ្ញុំបានឃើញព្រះវិហារមួយដែលមានសមាជិកជាង ៨៥០,០០០ នាក់នៅក្នុងប្រទេសនោះ ។ តើខ្ញុំខកខានចំពោះការស្ថាបនាសាសនាចក្ររបស់ព្រះគ្រីស្ទនៅទូទាំងពិភពលោកដូចម្ដេចទៅ ?
បន្ទាប់ពីរយៈពេលបីឆ្នាំនៅក្នុងប្រទេសហ្វីលីពិន ខ្ញុំបានសុំឲ្យបម្រើនៅក្នុងការិយាល័យអ្នកផ្សព្វផ្សាយសាសនា ? ការចាត់តាំងរបស់ខ្ញុំបាននាំយើងឲ្យទៅកាន់បេសកកម្មនៅទូទាំងពិភពលោក ។ ទស្សនៈរបស់ខ្ញុំអំពីសាសនាចក្រនៃព្រះអង្គសង្គ្រោះទូទាំងពិភពលោកបានពង្រីកយ៉ាងទូលំទូលាយ ។ ម៉ាសៀ និងខ្ញុំត្រូវបានចាត់ឲ្យទៅធ្វើទស្សនកិច្ចបេសកកម្មទាំងឡាយនៅទ្វីបអាស៊ី ។ យើងបានរកឃើញមជ្ឈមណ្ឌលស្តេកដ៏ស្រស់ស្អាតមួយនៅកណ្ដាលប្រទេសសិង្ហបុរី ដែលមានសមាជិកស្មោះត្រង់ដ៏អស្ចារ្យ ។ យើងបានទៅសួរសុខទុក្ខសមាជិក និងពួកអ្នកផ្សព្វផ្សាយសាសនានៅក្នុងសាលាប្រជុំមួយនៅកូតាគីណាបាលូ ប្រទេសម៉ាឡេស៊ី ។ យើងបានជួបនឹងពួកអ្នកផ្សព្វផ្សាយសាសនានៅទីក្រុងហុងកុង ហើយចូលរួមក្នុងសន្និសីទស្តេកដ៏អស្ចារ្យមួយជាមួយពួកបរិសុទ្ធដ៏លះបង់ និងដ៏ស្មោះត្រង់ ។
បទពិសោធន៍នេះបានកើតឡើងម្តងហើយម្ដងទៀត នៅពេលដែលយើងបានជួបពួកអ្នកផ្សព្វផ្សាយសាសនា និងសមាជិកនៅទូទាំងទ្វីបអឺរ៉ុប នៅអាមេរិកឡាទីន នៅការ៉ាបៀន និងនៅអាហ្វ្រិក ។ សាសនាចក្រនៃព្រះយេស៊ូវគ្រីស្ទកំពុងតែរីកចម្រើនយ៉ាងខ្លាំងនៅទ្វីបអាហ្វ្រិក ។
ខ្ញុំគឺជាសាក្សីផ្ទាល់ភ្នែកនៃការស្ដារឡើងវិញនៃដំណឹងល្អរបស់ព្រះយេស៊ូវគ្រីស្ទជាបន្ដបន្ទាប់ និងការបំពេញតាមការព្យាកររបស់ព្យាការីយ៉ូសែបស្ម៊ីធថា « សេចក្ដីពិតនៃព្រះនឹងឆ្ពោះទៅមុខដោយក្លៀវក្លា ថ្លៃថ្នូរ និងឯករាជ្យ រហូតទាល់តែវាបានដល់គ្រប់ទាំងទ្វីប គ្រប់តំបន់ គ្រប់ប្រទេស និងបានឮដល់គ្រប់ត្រចៀក រហូតដល់គោលបំណងនៃព្រះនឹងបានសម្រេច ហើយព្រះយេហូវ៉ាដ៏អស្ចារ្យនឹងមានបន្ទូលថា កិច្ចការបានចប់ហើយ » ។៧
ពួកអ្នកផ្សព្វផ្សាយសាសនាដ៏អស្ចារ្យរបស់យើងនៅទូទាំងពិភពលោកឥឡូវនេះមានចំនួន ៧៤,០០០ នាក់ ។ ពេលធ្វើការជាមួយសមាជិក ពួកគេធ្វើបុណ្យជ្រមុជទឹកមនុស្សជាង ២០,០០០ នាក់ជារៀងរាល់ខែ ។ ថ្មីៗនេះមានយុវជន និងយុវនារីអាយុ ១៨- ១៩- ២០- ឆ្នាំ ដែលមានជំនួយពីព្រះអម្ចាស់បានបង្កើតនូវអព្ភូតហេតុដ៏អស្ចារ្យក្នុងការប្រមូលផ្ដុំនេះ ។ យើងរកឃើញយុវនារី និងយុវជនទាំងនេះនៅក្នុងភូមិតូចៗដូចជាភូមិវ៉ានូអាទូ និងទីក្រុងធំៗដូចជាទីក្រុងញ៉ូវយ៉ក ប៉ារីស និងទីក្រុងឡុងដ៍ ។ ខ្ញុំបានមើលពួកគេបង្រៀនអំពីព្រះអង្គសង្គ្រោះ នៅក្នុងក្រុមជំនុំដាច់ស្រយាលក្នុងប្រទេសហ្វីជី និងការប្រមូលផ្តុំដែលធំជាងនៅកន្លែងនានាដូចជារដ្ឋតិចសាស រដ្ឋកាលីហ្វ័រញ៉ា និងរដ្ឋផ្លរីដា សហរដ្ឋអាមេរិច ។
បងប្អូននឹងរកឃើញពួកអ្នកផ្សព្វផ្សាយសាសនានៅគ្រប់ជ្រុងនៃផែនដី និយាយ ៦០ ភាសាផ្សេងៗគ្នា និងកំពុងបំពេញបេសសកម្មដ៏អស្ចារ្យរបស់ព្រះអង្គសង្គ្រោះនៅក្នុង ម៉ាថាយ ២៨ ៖ « ចូរទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យ ដោយនូវព្រះនាមព្រះវរបិតា ព្រះរាជបុត្រា និងព្រះវិញ្ញាណបរិសុទ្ធចុះ » ។៨ ខ្ញុំគោរពដល់ពួកអ្នកផ្សព្វផ្សាយសាសនារបស់សាសនាចក្រ តាំងអតីតកាល និងបច្ចុប្បន្នកាល ហើយសូមរំឭកដល់ជំនាន់ដែលកំពុងពេញវ័យ អំពីការអញ្ជើញរបស់ប្រធាន រ័សុល អិម ណិលសុន ឲ្យមក ហើយប្រមូលសាសន៍អ៊ីស្រាអែល ។៩
ខ្ញុំសូមថ្លែងទីបន្ទាល់នៅថ្ងៃនេះថា ខ្ញុំបានសង្កេតមើលការស្តារឡើងវិញនៃដំណឹងល្អរបស់ព្រះអង្គសង្គ្រោះដ៏ស៊ីជម្រៅ ដោយភ្នែកខ្ញុំផ្ទាល់ ហើយបានឮវាដោយត្រចៀកខ្ញុំផ្ទាល់ ។ ខ្ញុំជាសាក្សីនៃកិច្ចការរបស់ព្រះនៅទូទាំងពិភពលោក ។ គ្មានពេលណាល្អជាងសព្វថ្ងៃនេះ ដើម្បីធ្វើជាសមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយឡើយ ។
អព្ភូតហេតុដ៏បំផុសគំនិតបំផុតនៃការស្តារឡើងវិញដែលខ្ញុំបានឃើញគឺជាបងប្អូន ដែលជាសមាជិកដ៏ស្មោះត្រង់របស់សាសនាចក្រនៅគ្រប់ដែនដី ។ បងប្អូន ពួកបរិសុទ្ធថ្ងៃចុងក្រោយ ដែលត្រូវបានពិពណ៌នានៅក្នុងគម្ពីរនីហ្វៃនៃព្រះគម្ពីរមរមន កាលដែលលោកបានឃើញជំនាន់របស់យើង ហើយបានថ្លែងទីបន្ទាល់ថា « ហើយហេតុការណ៍បានកើតឡើងថា ខ្ញុំនីហ្វៃបានឃើញថា ព្រះចេស្ដានៃកូនចៀមនៃព្រះបានយាងចុះមកសណ្ឋិតលើពួកបរិសុទ្ធក្នុងសាសនាចក្រនៃកូនចៀម ហើយលើរាស្ត្រដែលនៅក្នុងសេចក្ដីសញ្ញានៃព្រះអម្ចាស់ ដែលបានខ្ចាត់ខ្ចាយពាសពេញលើផ្ទៃផែនដី ហើយពួកគេប្រដាប់អាវុធដោយសេចក្ដីសុចរិត និងដោយព្រះចេស្ដានៃព្រះដោយសិរីល្អដ៏អស្ចារ្យ » ។១០
ខ្ញុំសូមថ្លែងទីបន្ទាល់ថា ខ្ញុំបានឃើញដោយផ្ទាល់ភ្នែកនូវអ្វីដែលនីហ្វៃបានឃើញ—គឺជាបងប្អូនពួកបរិសុទ្ធក្នុងសេចក្ដីសញ្ញានៅគ្រប់ដែនដី ប្រដាប់ដោយសេចក្ដីសុចរិត និងព្រះចេស្ដានៃព្រះ ។ កាលខ្ញុំនៅលើវេទិកានៅក្នុងប្រទេសដ៏អស្ចារ្យមួយក្នុងចំណោមប្រទេសទាំងនេះនៅក្នុងពិភពលោក នោះព្រះអម្ចាស់បានប្រទានចំណាប់អារម្មណ៍ក្នុងគំនិតខ្ញុំនូវអ្វីដែលស្តេចបេនយ៉ាមីនបានបង្រៀននៅក្នុង ម៉ូសាយ ២ ក្នុងព្រះគម្ពីរមរមន ។ ប្រ៊ែន « ខ្ញុំចង់ឲ្យអ្នកគិតពិចារណាអំពីស្ថានភាពដ៏មានពរ និងរីករាយនៃអស់អ្នកណាដែលកាន់តាមព្រះបញ្ញត្តិទាំងឡាយនៃព្រះ ។ ដ្បិតមើលចុះពួកគេបានពរគ្រប់យ៉ាងទាំងខាងសាច់ឈាម និងខាងវិញ្ញាណផង » ។១១
ខ្ញុំធ្វើជាសាក្សីចំពោះបងប្អូនថា ខ្ញុំបានឃើញរឿងនេះដោយភ្នែកខ្ញុំផ្ទាល់ ហើយបានឮវាដោយត្រចៀកខ្ញុំផ្ទាល់ ដូចដែលខ្ញុំបានជួបបងប្អូន ជាពួកបរិសុទ្ធដ៏ស្មោះត្រង់នៃព្រះនៅទូទាំងផែនដីដែលគោរពតាមបទបញ្ញត្តិទាំងឡាយ ។ បងប្អូនជាបុត្រាបុត្រីក្នុងសេចក្ដីសញ្ញារបស់ព្រះវរបិតា ។ យើងគឺជាសិស្សរបស់ព្រះយេស៊ូវគ្រីស្ទ ។ បងប្អូនក៏ដឹងពីអ្វីដែលខ្ញុំដឹងដែរ ព្រោះបងប្អូនបានទទួលសាក្សីផ្ទាល់ខ្លួនអំពីសេចក្ដីពិតនៃដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ ។ ព្រះអង្គសង្គ្រោះបានបង្រៀនថា « តែអ្នករាល់គ្នាវិញ ភ្នែកអ្នកមានពរហើយ ដ្បិតមើលឃើញ ត្រចៀកអ្នកក៏ដែរ ដ្បិតស្តាប់ឮ » ។១២
ក្រោមការដឹកនាំរបស់ព្រះអម្ចាស់ ព្រមទាំងព្យាការី និងសាវករបស់ទ្រង់ យើងនឹងបន្តរៀបចំពួកអ្នកផ្សព្វផ្សាយសាសនា ធ្វើ និងគោរពតាមសេចក្ដីសញ្ញាដ៏ពិសិដ្ឋ ស្ថាបនាសាសនាចក្ររបស់ព្រះគ្រីស្ទនៅទូទាំងពិភពលោក ហើយទទួលពរជ័យនៅពេលយើងរក្សាបទបញ្ញត្តិរបស់ព្រះ ។ ពួកយើងរួបរួមគ្នា ។ យើងជាបុត្រាបុត្រីរបស់ព្រះ ។ យើងស្គាល់ទ្រង់ ហើយយើងស្រឡាញ់ទ្រង់ ។
ខ្ញុំសូមចូលរួមជាមួយបងប្អូន មិត្តរបស់ខ្ញុំអើយ កាលដែលយើងថ្លែងទីបន្ទាល់រួមគ្នាថា រឿងទាំងនេះពិត ។ យើងធ្វើបញ្ជីមួយអំពីអ្វីដែលយើងបានឃើញ និងបានឮ ។ បងប្អូន និងខ្ញុំជាសាក្សីដែលថ្លែងទីបន្ទាល់ ។ ដោយសារអំណាចនៃសាក្សីរួមគ្នានេះហើយ ដែលយើងបន្តឆ្ពោះទៅមុខដោយសេចក្ដីជំនឿលើព្រះអម្ចាស់ព្រះយេស៊ូវគ្រីស្ទ និងដំណឹងល្អទ្រង់ ។ ខ្ញុំសូមប្រកាសជាសាក្សីថា ព្រះយេស៊ូវគ្រីស្ទមានព្រះជន្មរស់ ។ ទ្រង់គឺជាព្រះអង្គសង្រ្គោះ និងព្រះប្រោសលោះរបស់យើង ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕