រីករាយនៅក្នុងអំណោយទាននៃកូនសោបព្វជិតភាព
កូនសោបព្វជិតភាពគ្រប់គ្រងរបៀបដែលបព្វជិតភាពនៃព្រះអាចត្រូវបានប្រើប្រាស់ ដើម្បីធ្វើឲ្យគោលបំណងរបស់ព្រះអម្ចាស់បានសម្រេច ហើយផ្ដល់ពរដល់អស់អ្នកដែលទទួលយកដំណឹងល្អដែលបានស្ដារឡើងវិញនេះ ។
បងប្អូនប្រុសស្រីជាទីស្រឡាញ់របស់ខ្ញុំ ថ្ងៃនេះគឺជាថ្ងៃដ៏ប្រវត្តិសាស្ត្រសម្រាប់ប្រធាន ដាល្លិន អេក អូក និងខ្ញុំ ។ កាលពី ៤០ ឆ្នាំមុន នៅថ្ងៃទី ៧ ខែ មេសា ឆ្នាំ ១៩៨៤ ជាពេលដែលយើងត្រូវបានគាំទ្រឲ្យបម្រើក្នុងកូរ៉ុមនៃពួកសាវកដប់ពីរនាក់ ។១ យើងបានរីករាយនៅអំឡុងសន្និសីទទូទៅនីមួយៗ ចាប់តាំងពីពេលនោះមក រួមទាំងសន្និសីទនេះផងដែរ ។ យើងបានទទួលពរជ័យជាថ្មីម្តងទៀតដោយមាននូវព្រះវិញ្ញាណដ៏ពិសិដ្ឋយ៉ាងបរិបូរ ។ ខ្ញុំសង្ឃឹមថា បងប្អូននឹងសិក្សាសារលិខិតពីសន្និសីទនេះម្តងហើយម្តងទៀតនៅខែក្រោយៗនេះ ។
ពេលខ្ញុំកើត២ មានព្រះវិហារបរិសុទ្ធដែលដំណើរការចំនួនប្រាំមួយនៅក្នុងសាសនាចក្រ—ព្រះវិហារបរិសុទ្ធមាននៅកន្លែងដូចតទៅនេះ សេន ចច, ឡូហ្គិន, ម៉ានតៃ និងទីក្រុងសលត៍ លេក រដ្ឋយូថាហ៍ ក៏ដូចជានៅ ខាតស្តុន អាល់ប៊ើរតា ប្រទេសកាណាដា និង ឡាអ៊ីអេ រដ្ឋហាវ៉ៃ ។ ព្រះវិហារបរិសុទ្ធពីរកាលពីជំនាន់មុននេះ បានដំណើរការមួយរយៈខ្លីនៅទីក្រុងខឺតឡង់ រដ្ឋអូហៃអូ និងនៅទីក្រុងណៅវូ រដ្ឋអិលលីណោយ ។ កាលដែលសមាជិកសាសនាចក្រភាគច្រើនបានផ្លាស់លំនៅទៅទិសខាងលិច នោះពួកបរិសុទ្ធត្រូវបានបង្ខំឲ្យចាកចោលព្រះវិហារបរិសុទ្ធទាំងពីរនោះ ។
ព្រះវិហារបរិសុទ្ធណៅវូត្រូវបានបំផ្លាញចោលដោយអ្នកបង្កអភ្គីភ័យម្នាក់ ។ ព្រះវិហារបរិសុទ្ធនេះត្រូវបានសាងសង់ឡើងវិញ រួចហើយបានឧទ្ទិសឆ្លងដោយប្រធាន ហ្គរដុន ប៊ី ហ៊ិងគ្លី ។៣ ពួកសត្រូវនៃសាសនាចក្របានបង្ខូចភាពស័ក្ដិសិទ្ធនៃព្រះវិហារបរិសុទ្ធខឺតឡង់ ។ ក្រោយមក Community of Christ ទទួលបានព្រះវិហារបរិសុទ្ធខឺតឡង់ ហើយបានកាន់កាប់ព្រះវិហារបរិសុទ្ធនេះអស់រយៈពេលជាច្រើនឆ្នាំ ។
កាលពីខែមុន យើងបានប្រកាសថា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបានទិញព្រះវិហារបរិសុទ្ធខឺតឡង់ រួមជាមួយនឹងទីតាំងប្រវត្តិសាស្ត្រសំខាន់ៗជាច្រើននៅទីក្រុងណៅវូ ។ យើងមានអំណរគុណយ៉ាងខ្លាំងចំពោះការពិភាក្សាដ៏ជិតស្និទ្ធ និងមានប្រយោជន៍ជាមួយគ្នា ដែលយើងបានមានជាមួយនឹងថ្នាក់ដឹកនាំមកពី Community of Christ ដែលបាននាំឲ្យមានកិច្ចព្រមព្រៀងនេះឡើង ។
ព្រះវិហារបរិសុទ្ធខឺតឡង់មានសារៈសំខាន់មិនធម្មតាទេក្នុងការស្តារឡើងវិញនៃដំណឹងល្អរបស់ព្រះយេស៊ូវគ្រីស្ទ ។ ព្រឹត្តិការណ៍មួយចំនួនដែលបានកើតឡើងនៅទីនោះ ត្រូវបានព្យាករសម្រាប់សហស្សវត្ស ហើយចាំបាច់សម្រាប់សាសនាចក្រដែលបានស្ដារឡើងវិញរបស់ព្រះអម្ចាស់ ដើម្បីបំពេញបេសកកម្មនៅថ្ងៃចុងក្រោយរបស់ខ្លួន ។
ព្រឹត្តិការណ៍សំខាន់បំផុតក្នុងចំណោមព្រឹត្តិការណ៍ទាំងនេះ បានកើតឡើងនៅថ្ងៃអាទិត្យបុណ្យអ៊ីស្ទើរ ថ្ងៃ អាទិត្យ ទី ៣ ខែ មេសា ឆ្នាំ ១៨៣៦ ។៤ នៅថ្ងៃនោះ យ៉ូសែប ស្ម៊ីធ និង អូលីវើរ ខៅឌើរី បានដកពិសោធន៍នូវការយាងមកជួបដ៏អស្ចារ្យជា បន្តបន្ទាប់ ។ ដំបូង ព្រះអម្ចាស់ព្រះយេស៊ូវគ្រីស្ទបានបង្ហាញព្រះអង្គទ្រង់ ។ ព្យាការីបានកត់ត្រាថា « ព្រះនេត្ររបស់ទ្រង់ដូចជាអណ្ដាតភ្លើង ព្រះកេសារបស់ទ្រង់ស ដូចជាហិមៈសុទ្ធ ព្រះភក្ត្ររបស់ទ្រង់ភ្លឺជាងពន្លឺថ្ងៃ ហើយសំឡេងរបស់ទ្រង់ ដូចជាសូរនៃទឹកច្រើន » ។៥
អំឡុងពេលការយាងមកជួបនេះ ព្រះអម្ចាស់បានបញ្ជាក់ពីអត្តសញ្ញាណរបស់ទ្រង់ ។ ទ្រង់បានមានព្រះបន្ទូលថា « យើងជាដើម ហើយជាចុង យើងជាអង្គដែលមានព្រះជន្មរស់នៅ យើងជាអង្គដែលត្រូវបានស្លាប់ យើងជាព្រះគាំទ្ររបស់អ្នកជាមួយព្រះវរបិតា » ។៦
បន្ទាប់មក ព្រះយេស៊ូវគ្រីស្ទបានប្រកាសថា ទ្រង់បានទទួលយកព្រះវិហារបរិសុទ្ធនេះជាដំណាក់ របស់ទ្រង់ ហើយបានធ្វើការសន្យាដ៏អស្ចារ្យនេះថា ៖ « យើងនឹងសម្ដែងកាយយើងដល់រាស្ត្ររបស់យើងនៅក្នុងដំណាក់នេះដោយសេចក្ដីមេត្តាករុណា » ។៧
ការសន្យាដ៏សំខាន់នេះអនុវត្តចំពោះ គ្រប់ ព្រះវិហារបរិសុទ្ធដែលបានឧទ្ទិសឆ្លងសព្វថ្ងៃនេះ ។ ខ្ញុំសូមអញ្ជើញបងប្អូនឲ្យពិចារណាពីអត្ថន័យនៃការសន្យារបស់ព្រះអម្ចាស់សម្រាប់ខ្លួនបងប្អូនផ្ទាល់ ។
បន្ទាប់ពីការយាងមកជួបរបស់ព្រះអង្គសង្គ្រោះ លោកម៉ូសេបានបង្ហាញខ្លួន ។ លោកម៉ូសេបានប្រគល់ទៅឲ្យ យ៉ូសែប ស្ម៊ីធ នូវកូនសោសម្រាប់ការប្រមូលសាសន៍អ៊ីស្រាអែល និងការវិលត្រឡប់នៃពូជអំបូរទាំងដប់ ។៨
នៅពេលដែលការនិមិត្តនេះបានបញ្ចប់ « លោកអេលីយ៉ាសបានលេចមក ហើយបានប្រគល់គ្រាកាន់កាប់ត្រួតត្រានៃដំណឹងល្អរបស់លោកអ័ប្រាហាំ » ទៅ យ៉ូសែប ស្ម៊ីធ ។៩
បន្ទាប់មក លោកអេលីយ៉ា ជាព្យាការីបានលេចមក ។ ការបង្ហាញខ្លួនរបស់លោកបានបំពេញតាមការសន្យារបស់ម៉ាឡាគីដែលថា មុនពេលការយាងមកជាលើកទីពីរ ព្រះអម្ចាស់នឹងបញ្ជូនអេលីយ៉ាទៅ « បង្វែរចិត្តពួកឪពុកមកឯកូន និងចិត្តកូនមកឯឪពុកវិញ ក្រែងយើងមកវាយផែនដីដោយសេចក្តីបណ្តាសា » ។១០ លោកអេលីយ៉ាបានប្រគល់កូនសោនៃអំណាចផ្សារភ្ជាប់ទៅ យ៉ូសែប ស្ម៊ីធ ។១១
សារៈសំខាន់នៃការប្រគល់កូនសោទាំងនេះមកផែនដីវិញ ដោយសារទូតសួគ៌ាបីអង្គនៅក្រោមការដឹកនាំរបស់ព្រះអម្ចាស់ គឺមិនអាចបំផ្លើសបានទេ ។ កូនសោបព្វជិតភាពបង្កើតជាសិទ្ធិអំណាច និងអំណាចនៃគណៈប្រធាន ។ កូនសោបព្វជិតភាពគ្រប់គ្រងរបៀបដែលបព្វជិតភាពនៃព្រះអាចត្រូវបានប្រើប្រាស់ ដើម្បីធ្វើឲ្យគោលបំណងរបស់ព្រះអម្ចាស់បានសម្រេច ហើយផ្ដល់ពរដល់អស់អ្នកដែលទទួលយកដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ ។
វាសំខាន់ណាស់ដើម្បីកត់សម្គាល់ថា មុនពេលការរៀបចំសាសនាចក្រ សារទូតសួគ៌ាបានប្រគល់បព្វជិតភាពអើរ៉ុន និងម៉ិលគីស្សាដែកទៅឲ្យព្យាការី យ៉ូសែប ហើយបានប្រគល់កូនសោនៃបព្វជិតភាពទាំងពីរនេះដល់លោក ។១២ កូនសោទាំងនេះបានផ្តល់សិទ្ធិអំណាចដល់ យ៉ូសែប ស្ម៊ីធ ដើម្បីរៀបចំសាសនាចក្រនៅឆ្នាំ ១៨៣០ ។១៣
បន្ទាប់មក នៅក្នុងព្រះវិហារបរិសុទ្ធខឺតឡង់ ក្នុងឆ្នាំ ១៨៣៦ ក៏មានការប្រគល់ កូនសោបព្វជិតភាពទាំងបីនេះបន្ថែមទៀត—ពោលគឺកូនសោនៃការប្រមូលសាសន៍អ៊ីស្រាអែល កូនសោនៃដំណឹងល្អរបស់អ័ប្រាហាំ និងកូនសោនៃអំណាចផ្សារភ្ជាប់—គឺចាំបាច់ណាស់ ។ កូនសោទាំងនេះបានអនុញ្ញាតឲ្យ យ៉ូសែប ស្ម៊ីធ—និងប្រធានសាសនាចក្ររបស់ព្រះអម្ចាស់បន្តបន្ទាប់ទាំងអស់—ដើម្បីប្រមូលសាសន៍អ៊ីស្រាអែលនៅទាំងសងខាងនៃវាំងនន ដើម្បីផ្ដល់ពររបស់អ័ប្រាហាំដល់កូនចៅក្នុងសេចក្ដីសញ្ញាទាំងអស់ ដើម្បីបញ្ជាក់តាមរយៈពិធីបរិសុទ្ធនិងសេចក្ដីសញ្ញាបព្វជិតភាព ហើយដើម្បីផ្សារភ្ជាប់ក្រុមគ្រួសារជារៀងរហូត ។ អំណាចនៃកូនសោបព្វជិតភាពទាំងនេះគឺនិរន្តរ ហើយអស្ចារ្យណាស់ ។
សូមពិចារណាពីរបៀបដែលជីវិត របស់បងប្អូន នឹងមានភាពខុសគ្នាយ៉ាងណា ប្រសិនបើកូនសោបព្វជិតភាពមិនបានស្តារឡើងវិញនៅលើផែនដីនេះទេ ។១៤ បើគ្មានកូនសោបព្វជិតភាពទេ បងប្អូនមិនអាចទទួលអំណោយទានពិសិដ្ឋដោយព្រះចេស្ដាពីស្ថានលើបានឡើយ ។១៥ បើគ្មានកូនសោបព្វជិតភាពទេ សាសនាចក្រអាចបម្រើត្រឹមតែជាអង្គការបង្រៀន និងអង្គការមនុស្សធម៌ដ៏សំខាន់មួយប៉ុណ្ណោះ ប៉ុន្តែគ្មានអ្វីលើសពីនេះនោះទេ ។ បើគ្មានកូនសោបព្វជិតភាពទេ នោះគ្មាននរណាម្នាក់អាចទទួលបានពិធីបរិសុទ្ធ និងសេចក្ដីសញ្ញាដ៏ចាំបាច់ ដែលភ្ជាប់យើងទៅនឹងមនុស្សជាទីស្រឡាញ់របស់យើងដ៏នៅអស់កល្បជានិច្ច ហើយអនុញ្ញាតឲ្យយើងរស់នៅជាមួយព្រះនៅទីបំផុតឡើយ ។
កូនសោបព្វជិតភាពញែកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយចេញពីអង្គការផ្សេងទៀតនៅលើផែនដី ។ អង្គការជាច្រើនទៀត អាច និង ធ្វើ ឲ្យជីវិតរបស់បងប្អូនកាន់តែប្រសើរឡើងក្នុងជីវិតរមែងស្លាប់នេះ ។ ប៉ុន្តែ គ្មានអង្គការណាផ្សេងទៀត អាច ហើយ នឹង មានឥទ្ធិពលលើជីវិតរបស់បងប្អូនបន្ទាប់ពីស្លាប់នោះទេ ។១៦
កូនសោបព្វជិតភាពផ្ដល់សិទ្ធិអំណាចដល់យើងក្នុងការផ្ដល់ពរជ័យទាំងអស់ដែលបានសន្យាដល់អ័ប្រាហាំទៅឲ្យបុរស និងស្ត្រីគ្រប់រូបដែលគោរពតាមសេចក្ដីសញ្ញា ។ កិច្ចការព្រះវិហារបរិសុទ្ធធ្វើឲ្យពរជ័យដ៏ថ្លៃថ្លាទាំងនេះមានដល់បុត្រាបុត្រីរបស់ព្រះ ទាំងអស់ ដោយមិនគិតពី កន្លែង ឬ ពេល ណាដែលពួកគេបានរស់នៅ ឬកំពុងរស់នៅឥឡូវនេះទេ ។ ចូរយើងរីករាយដែលកូនសោបព្វជិតភាពមាននៅលើផែនដីម្ដងទៀត !
ខ្ញុំសូមអញ្ជើញបងប្អូនឲ្យពិចារណាដោយប្រុងប្រយ័ត្ននូវសេចក្ដីថ្លែងការណ៍ទាំងបីខាងក្រោមនេះ ៖
-
ការប្រមូលសាសន៍អ៊ីស្រាអែលគឺជាភស្តុតាងដែលបញ្ជាក់ថា ព្រះស្រឡាញ់បុត្រាបុត្រី ទាំងអស់ របស់ទ្រង់នៅគ្រប់ទីកន្លែង ។
-
ដំណឹងល្អរបស់អ័ប្រាហាំគឺជាភស្តុតាង បន្ថែមទៀត ដែលបញ្ជាក់ថា ព្រះស្រឡាញ់បុត្រាបុត្រី ទាំងអស់ របស់ទ្រង់នៅគ្រប់ទីកន្លែង ។ ទ្រង់អញ្ជើញបងប្អូន ទាំងអស់ គ្នាឲ្យមករកទ្រង់—« គឺទាំងខ្មៅ និងស ទាំងបាវគេ និងសេរី ទាំងប្រុស និងស្រី … មនុស្សទាំងអស់ គឺដូចគ្នានៅចំពោះព្រះ » ។១៧
-
អំណាចនៃការផ្សារភ្ជាប់គឺជាភស្តុតាង ដ៏អស្ចារ្យ មួយថា ព្រះស្រឡាញ់បុត្រាបុត្រី ទាំងអស់ របស់ទ្រង់ខ្លាំងប៉ុនណា ហើយមានព្រះទ័យចង់ឲ្យពួកគេ ម្នាក់ៗ ជ្រើសរើសត្រឡប់ទៅផ្ទះទៅកាន់ទ្រង់វិញ ។
កូនសោបព្វជិតភាពដែលបានស្ដារឡើងវិញតាមរយៈព្យាការី យ៉ូសែប ស្ម៊ីធ ធ្វើឲ្យបុរស និងស្ត្រី គ្រប់រូប ដែលគោរពតាមសេចក្ដីសញ្ញា រីករាយនឹងឯកសិទ្ធិខាងវិញ្ញាណដ៏អស្ចារ្យដោយ ផ្ទាល់ខ្លួន ។ ជាថ្មីម្តងទៀត មានអ្វីៗជាច្រើនដែលយើងអាចរៀនពីប្រវត្តិដ៏ពិសិដ្ឋនៃព្រះវិហារបរិសុទ្ធខឺតឡង់ ។
ការអធិស្ឋានឧទ្ទិសឆ្លងព្រះវិហារបរិសុទ្ធខឺតឡង់របស់ យ៉ូសែប ស្ម៊ីធ គឺជាការបង្រៀនអំពីរបៀបដែលព្រះវិហារបរិសុទ្ធផ្តល់អំណាចខាងវិញ្ញាណដល់បងប្អូន និងខ្ញុំ ដើម្បីប្រឈមនឹងឧបសគ្គនៃជីវិតនាថ្ងៃចុងក្រោយនេះ ។ ខ្ញុំសូមលើកទឹកចិត្តបងប្អូនឲ្យសិក្សាអំពីការអធិស្ឋានដែលបានកត់ត្រានៅក្នុង គោលលទ្ធិ និងសេចក្តីសញ្ញា កណ្ឌទី ១០៩ ។ ការអធិស្ឋានឧទ្ទិសឆ្លង ដែល បានទទួលដោយវិវរណៈ បង្រៀនថា ព្រះវិហារបរិសុទ្ធនេះជា « ដំណាក់នៃការអធិស្ថាន ដំណាក់នៃការតមអាហារ ដំណាក់នៃសេចក្តីជំនឿ ដំណាក់នៃការរៀនសូត្រ ដំណាក់នៃសិរីល្អ ដំណាក់នៃរបៀបរៀបរយ ដំណាក់នៃព្រះ » ។១៨
បញ្ជីនៃគុណលក្ខណៈនេះគឺមានលើសពីការពិពណ៌នាអំពីព្រះវិហារបរិសុទ្ធមួយទៅទៀត ។ វាជាការសន្យាមួយអំពីអ្វីដែលនឹងកើតឡើងចំពោះអ្នកដែលបម្រើ និងថ្វាយបង្គំនៅក្នុងដំណាក់របស់ព្រះអម្ចាស់ ។ ពួកគេអាច រំពឹង ថានឹងទទួលបានចម្លើយចំពោះការអធិស្ឋាន វិវរណៈផ្ទាល់ខ្លួន មានសេចក្ដីជំនឿកាន់តែខ្លាំង មានភាពរឹងមាំ មានការលួងលោមចិត្ត បង្កើនចំណេះដឹង និងបង្កើនអំណាច ។
ពេលវេលានៅក្នុងព្រះវិហារបរិសុទ្ធនឹងជួយបងប្អូនឲ្យ គិតដល់សេឡេស្ទាល និងចាប់យកចក្ខុវិស័យថាបងប្អូនជានរណាពិតប្រាកដ បងប្អូនអាចប្រែក្លាយជាយ៉ាងណា និងប្រភេទនៃជីវិតដែលបងប្អូនអាចមានជារៀងរហូត ។ ការថ្វាយបង្គំក្នុងព្រះវិហារបរិសុទ្ធជាទៀងទាត់នឹងអភិវឌ្ឍរបៀបដែលបងប្អូនមើលមកខ្លួនឯង និងរបៀបដែលបងប្អូនចុះចូលក្នុងផែនការដ៏អស្ចារ្យរបស់ព្រះ ។ ខ្ញុំសូមសន្យានឹងបងប្អូនដូច្នោះ ។
យើងក៏បានទទួលការសន្យាផងដែរថា នៅក្នុងព្រះវិហារបរិសុទ្ធយើងអាចនឹង « ទទួលនូវភាពពោរពេញនៃព្រះវិញ្ញាណបរិសុទ្ធ » ។១៩ សូមស្រមៃពីអត្ថន័យនៃការសន្យា នោះ ក្នុងន័យថាស្ថានសួគ៌បើកចំហសម្រាប់អ្នកស្វែងរកសេចក្ដីពិតអស់កល្បជានិច្ចដោយស្មោះ ។
យើងក៏ត្រូវបានណែនាំថា អស់អ្នកដែលថ្វាយបង្គំនៅក្នុងព្រះវិហារបរិសុទ្ធ នឹងប្រដាប់ដោយព្រះចេស្ដានៃព្រះ ហើយពួកទេវតាតាម « ថែរក្សាពួកគេ » ។២០ តើវាបង្កើនទំនុកចិត្តរបស់បងប្អូនប៉ុនណា ក្នុងការដឹងថា ក្នុងនាមជាស្ត្រី ឬបុរសដែលបានទទួលអំណោយទានពិសិដ្ឋប្រដាប់ដោយព្រះចេស្ដារបស់ព្រះ ដែលបងប្អូនមិនចាំបាច់ប្រឈមមុខនឹងជីវិតនេះតែម្នាក់ឯងនោះ ? តើវាផ្ដល់ភាពក្លាហានអ្វីខ្លះដល់បងប្អូន ក្នុងការដឹងថាទេវតាពិតជានឹងជួយបងប្អូនមែននោះ ?
ជាចុងក្រោយ យើងបានទទួលការសន្យាថា « កុំឲ្យបក្សពួកមនុស្សទុច្ចរិត » នឹងឈ្នះលើអ្នកដែលថ្វាយបង្គំនៅក្នុងដំណាក់របស់ព្រះអម្ចាស់ឡើយ ។២១
ការយល់ដឹងពីឯកសិទ្ធិខាងវិញ្ញាណដែលមាននៅក្នុងព្រះវិហារបរិសុទ្ធគឺសំខាន់ចំពោះយើងម្នាក់ៗសព្វថ្ងៃនេះ ។
បងប្អូនប្រុសស្រីជាទីស្រឡាញ់នេះជាការសន្យារបស់ខ្ញុំ ។ គ្មានអ្វីនឹងជួយបងប្អូន ច្រើនជាង ការថ្វាយបង្គំនៅក្នុងព្រះវិហារបរិសុទ្ធជាទៀងទាត់តាមដែលកាលៈទេសៈរបស់បងប្អូនអនុញ្ញាតឲ្យដើម្បីកាន់ដំបងដែកយ៉ាងខ្ជាប់ខ្ជួនជានិច្ច២២ នោះទេ ។ គ្មានអ្វីដែលនឹងការពារបងប្អូន ពេលដែលបងប្អូនជួបនឹងភាពងងឹតនៃពិភពលោក ជាង នេះនោះទេ ។ គ្មានអ្វីដែលនឹងពង្រឹងទីបន្ទាល់របស់បងប្អូនអំពីព្រះអម្ចាស់ព្រះយេស៊ូវគ្រីស្ទ និងដង្វាយធួនរបស់ទ្រង់ ឬជួយបងប្អូនឲ្យយល់ពីផែនការដ៏អស្ចារ្យរបស់ព្រះ ជាង.នេះនោះទេ ។ គ្មានអ្វីដែលនឹងធ្វើឲ្យវិញ្ញាណរបស់បងប្អូនធូរស្រាលក្នុងអំឡុងពេលឈឺចាប់ ជាង នេះនោះទេ ។ គ្មានអ្វីដែលនឹងបើកស្ថានសួគ៌ ជាង.នេះនោះទេ ។ គ្មានទាល់តែសោះ !
ព្រះវិហារបរិសុទ្ធ គឺជា ច្រកទ្វារនាំទៅកាន់ពរជ័យដ៏មហិមាបំផុតដែលព្រះមានសម្រាប់យើងម្នាក់ៗ ។ ព្រះវិហារបរិសុទ្ធគឺជាកន្លែងតែមួយគត់នៅលើផែនដីដែលយើងអាចទទួលពរជ័យ ទាំងអស់ ដែលបានសន្យាដល់អ័ប្រាហាំ ។២៣ នោះជាមូលហេតុដែលយើងកំពុងធ្វើអ្វីៗគ្រប់យ៉ាងនៅក្នុងអំណាចយើង ក្រោមការដឹកនាំរបស់ព្រះអម្ចាស់ ដើម្បីធ្វើឲ្យពរជ័យនៃព្រះវិហារបរិសុទ្ធមានកាន់តែច្រើនដល់សមាជិកសាសនាចក្រ ។ ដូច្នេះ យើងរីករាយនឹងប្រកាសថា យើងមានគម្រោងសាងសង់ព្រះវិហារបរិសុទ្ធថ្មីនៅទីតាំងនីមួយៗទាំង ១៥ នេះ ៖
-
យូធូរ៉ូ ប៉ូលីនេស៊ី បារាំង
-
ឈីហួរហួរ ម៉ិចស៊ិច
-
ហ្វ្លរៀនណូពូលីស ប្រេស៊ីល
-
រ៉ូសារីយ៉ូ អាហ្សង់ទីន
-
អេឌីនបឺក ស្កុតឡែន
-
រិសបាន អូស្ត្រាលី តំបន់ខាងត្បូង
-
វីកតូរៀ ប្រេធីស កូឡុំប៊ី
-
យូម៉ា អារីហ្សូណា
-
ហោស្តុន តិចសាស តំបន់ខាងត្បូង
-
ដេស ម៉ីនស៍ អាយអូវ៉ា
-
ស៊ីនស៊ីណាទី អូហៃអូ
-
ហូណូលូលូ ហាវ៉ៃ
-
យ័រដាន់ យូថាហ៍ ខាងលិច
-
លីហៃ យូថាហ៍
-
ម៉ារ៉ាកាបូ វ៉េណេស៊ុយអេឡា
បងប្អូនប្រុសស្រីជាទីស្រឡាញ់ ខ្ញុំសូមថ្លែងទីបន្ទាល់ថា នេះ ជា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ទ្រង់គង់ជាព្រះសិរសានៃសាសនាចក្រនេះ ។ ពួកយើងគឺជាសិស្សរបស់ទ្រង់ ។
ចូរយើង រីករាយ ក្នុងការស្តារឡើងវិញនូវកូនសោបព្វជិតភាព ដែលធ្វើឲ្យបងប្អូន និងខ្ញុំរីករាយនឹង រាល់ ពរជ័យខាងវិញ្ញាណ ពេលយើង មានឆន្ទៈ និងស័ក្ដិសមដើម្បីទទួលនោះ ។ ខ្ញុំសូមថ្លែងទីបន្ទាល់ដូច្នោះ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕