ព្រះរាជបំណងរបស់ព្រះគឺដើម្បីនាំបងប្អូនទៅផ្ទះវិញ
អ្វីៗទាំងអស់អំពីផែនការរបស់ព្រះវរបិតាសម្រាប់បុត្រាបុត្រីជាទីស្រឡាញ់របស់ទ្រង់គឺត្រូវបានរចនាឡើងដើម្បីនាំមនុស្សគ្រប់រូបត្រឡប់ទៅផ្ទះវិញ ។
ខ្ញុំសូមថ្លែងអំណរគុណចំពោះការអធិស្ឋានរបស់បងប្អូន នៅពេលខ្ញុំបានចាប់ផ្ដើមសម្របខ្លួនទៅនឹងការហៅ តាមរយៈប្រធាន ណិលសុន ដើម្បីបម្រើជាសាវករបស់ព្រះអម្ចាស់ ព្រះយេស៊ូវគ្រីស្ទ ។ បងប្អូនអាចនឹងស្រមៃឃើញយ៉ាងច្បាស់ថាអារម្មណ៍រាបទាបយ៉ាងណា ហើយវាជាគ្រាមួយដ៏រំជើបរំជួលខ្លាំង និងជាពេលពិនិត្យមើលខ្លួនឯងយ៉ាងហ្មត់ចត់ ។ ពិតណាស់ វាជាកិត្តិយសដ៏អស្ចារ្យក្នុងការបម្រើព្រះអង្គសង្រ្គោះ ក្នុងគ្រប់សមត្ថភាពដើម្បីចូលរួមនឹងបងប្អូនក្នុងការចែកចាយដំណឹងល្អនៃសេចក្ដីសង្ឃឹមរបស់ទ្រង់ ។
លើសពីនេះ មានពាក្យស្លោកមួយចែងថា នៅពីក្រោយសាវកថ្មី គឺមានម្តាយក្មេកដ៏ភ្ញាក់ផ្អើលម្នាក់ ។ ខ្ញុំមិនដឹងថា វាចែងបែបនេះឬអត់ទេ ប៉ុន្តែក្នុងករណីនេះ វាអាចនិយាយបែបនេះ ។ ហើយខ្ញុំគិតថា ម្ដាយក្មេកខ្ញុំនៅតែភ្ញាក់ផ្អើល ទោះជាគាត់បានចែកឋានទៅហើយក្ដី ។
ប៉ុន្មានខែកន្លងទៅ ពេលភរិយាខ្ញុំ និងខ្ញុំបានទៅលេងប្រទេសមួយផ្សេងទៀតដើម្បីបំពេញកិច្ចការផ្សេងៗក្នុងសាសនាចក្រ ខ្ញុំបានភ្ញាក់ពីព្រលឹម ហើយមើលទៅខាងក្រៅបង្អួចសណ្ឋាគារទាំងស្រពិចស្រពិល ។ នៅលើផ្លូវថ្នល់ខាងក្រោមដ៏មមាញឹក ខ្ញុំបានឃើញថាមានប៉ូលិសម្នាក់បិទផ្លូវ ហើយបញ្ជាឲ្យរថយន្តបត់ទៅក្រោយវិញពេលមកដល់របាំងការពារ ។ ដំបូងឡើយ មានតែរថយន្តមួយចំនួនប៉ុណ្ណោះដែលបានធ្វើដំណើរតាមផ្លូវនោះ ហើយបត់ថយក្រោយវិញ ។ ប៉ុន្តែយូរៗទៅមានរថយន្តជាច្រើននៅបន្តកន្ទុយគ្នា ។
ខ្ញុំបានមើលតាមបង្អួចឃើញប៉ូលិសម្នាក់នោះហាក់ដូចជារីករាយក្នុងការប្រើអំណាចគាត់ដើម្បីបញ្ឈប់រថយន្តទាំងនោះ ហើយប្រាប់ឲ្យបត់ទៅក្រោយវិញ ។ ពិតណាស់ គាត់ហាក់ដូចជាមានកម្លាំងដើរ ហើយក៏ចាប់ផ្ដើមរាំខ្លះៗផងដែរ នៅពេលរថយន្តនីមួយៗបានមកដល់របាំងការពារនោះ ។ បើអ្នកបើកបរម្នាក់មួរម៉ៅចំពោះការឃាំងផ្លូវនោះ ប៉ូសិសម្នាក់នោះហាក់ដូចជាគ្មានជួយអីសោះ ឬពុំអាណិតអាសូរឡើយ ។ គាត់គ្រាន់តែងក់ក្បាលដដែលៗ ហើយចង្អុលឲ្យបត់ទៅក្រោយវិញ ។
មិត្តខ្ញុំអើយ យើងជាពួកសិស្សដើរនៅលើផ្លូវនៃជីវិតរមែងស្លាប់ ផែនការរបស់ព្រះវរបិតាយើងល្អណាស់ គឺជាផែនការ « ដ៏អស្ចារ្យ »១ ត្រូវបានរៀបចំឡើងដើម្បីនាំបងប្អូនទៅផ្ទះវិញ ពុំមែន ឲ្យបងប្អូននៅខាងក្រៅផ្ទះនោះទេ ។២ គ្មាននរណាម្នាក់ដាក់របាំងបិទផ្លូវ ហើយឈរនៅទីនោះដើម្បីដេញបងប្អូនឲ្យថយទៅក្រោយវិញឡើយ ។ តាមពិត វាផ្ទុយស្រឡះ ។ ព្រះខិតខំឲ្យមានទំនាក់ទំនងជាមួយបងប្អូនដោយឥតឈប់ឈរ ។ ទ្រង់ « សព្វព្រះទ័យចង់ឲ្យបុត្រាបុត្រីទ្រង់ជ្រើសរើសត្រឡប់ទៅកាន់ទ្រង់វិញ »៣ ហើយទ្រង់បង្កើតគ្រប់វិធានការតាមដែលអាចធ្វើទៅបានដើម្បីនាំបងប្អូនឲ្យត្រឡប់មកវិញ ។
ព្រះវរបិតាជាទីស្រឡាញ់បានត្រួតពិនិត្យការបង្កើតផែនដីនេះសម្រាប់គោលបំណងដ៏ធំក្នុងការផ្ដល់ឱកាសដល់បងប្អូន និងខ្ញុំដើម្បីដកពិសោធន៍ការលូតលាស់ និងការកែលម្អនៃជីវិតរមែងស្លាប់ ឱកាសប្រើសិទ្ធិជ្រើសរើសរបស់យើង ដែលព្រះបានប្រទានឲ្យដើម្បីជ្រើសរើសទ្រង់៤ ដើម្បីរៀន រីកចម្រើន ធ្វើកំហុស ប្រែចិត្ត ស្រឡាញ់ព្រះ និងអ្នកជិតខាងយើង ហើយនៅថ្ងៃមួយត្រឡប់ទៅជួបទ្រង់វិញ ។
ទ្រង់បានចាត់បុត្រាសំណព្វដ៏ស្ងួនភ្ងារបស់ទ្រង់មកកាន់ពិភពធ្លាក់ចុះនេះ ដើម្បីរស់នៅក្នុងបទពិសោធន៍ដ៏ពេញលេញនៃជីវិតមនុស្សលោក ដើម្បីផ្ដល់គំរូមួយដល់បុត្រាបុត្រីទ្រង់ផ្សេងទៀត ព្រមទាំងធ្វើដង្វាយធួន និងប្រោសលោះ ។ អំណោយទាននៃដង្វាយធួនដ៏អស្ចារ្យរបស់ព្រះគ្រីស្ទបានដករាល់ឧបសគ្គនៃសេចក្ដីស្លាប់ខាងរូបកាយ និងខាងវិញ្ញាណដែលនឹងបំបែកយើងមិនឲ្យត្រឡប់ទៅផ្ទះដ៏អស់កល្បជានិច្ចរបស់យើង ។
អ្វីៗទាំងអស់អំពីផែនការរបស់ព្រះវរបិតាសម្រាប់បុត្រាបុត្រីជាទីស្រឡាញ់របស់ទ្រង់គឺត្រូវបានរចនាឡើងដើម្បីនាំមនុស្សគ្រប់រូបត្រឡប់ទៅផ្ទះវិញ ។
តើសារទូតរបស់ព្រះ ដែលជាព្យាការីរបស់ទ្រង់ ហៅផែនការនេះក្នុងបទគម្ពីរដែលបានស្ដារឡើងវិញថាជាអ្វីទៅ? ពួកលោកហៅវាថា ផែនការនៃសេចក្ដីប្រោសលោះ៥ ផែនការនៃសេចក្តីមេត្តាករុណា៦ ផែនការនៃសុភមង្គលដ៏មហិមា៧ និងផែនការនៃសេចក្ដីសង្គ្រោះដល់មនុស្ស « តាមរយៈព្រះលោហិតនៃព្រះរាជបុត្រាបង្កើតតែមួយរបស់យើង » ។៨
គោលបំណងនៃផែនការនៃសុភមង្គលដ៏មហិមារបស់ព្រះវរបិតាគឺជា សុភមង្គលរបស់បងប្អូននៅទីនេះ នាពេលនេះ និងក្នុងភាពអស់កល្ប ។ វាពុំមែនដើម្បីរារាំងសុភមង្គលបងប្អូន ហើយធ្វើឲ្យបងប្អូនព្រួយបារម្ភ និងភ័យខ្លាចនោះឡើយ ។
គោលបំណងនៃផែនការនៃសេចក្ដីប្រោសលោះរបស់ព្រះវរបិតាគឺដើម្បី សេចក្ដីប្រោសលោះរបស់បងប្អូន ហើយបងប្អូនត្រូវបានសង្គ្រោះតាមរយៈការរងទុក្ខ និងការសុគតរបស់ព្រះយេស៊ូវគ្រីស្ទ៩ ដែលរំដោះយើងពីការជាប់ឃុំឃាំងនៃអំពើបាប និងសេចក្ដីស្លាប់ ។ គឺពុំមែនដើម្បីទុកឲ្យបងប្អូននៅដដែលនោះទេ ។
គោលបំណងនៃផែនការនៃសេចក្ដីមេត្តាករុណារបស់ព្រះវរបិតាគឺដើម្បី ផ្ដល់សេចក្ដីមេត្តាករុណា នៅពេលបងប្អូនត្រឡប់ទៅរកទ្រង់វិញ ហើយគោរពសេចក្ដីសញ្ញានៃភាពស្មោះត្រង់របស់បងប្អូនចំពោះទ្រង់ ។ វាពុំមែនបដិសេធសេចក្តីមេត្តាករុណា ហើយធ្វើឲ្យមានការឈឺចាប់ និងទុក្ខសោកនោះឡើយ ។
គោលបំណងនៃផែនការនៃសេចក្ដីសង្គ្រោះរបស់ព្រះវរបិតាគឺដើម្បីឲ្យបងប្អូនបាន សេចក្ដីសង្គ្រោះ នៅក្នុងនគរសិរីល្អសេឡេស្ទាលនៅពេលបងប្អូនទទួលបាន « ទីបន្ទាល់ពីព្រះយេស៊ូវ »១០ ហើយថ្វាយព្រលឹងបងប្អូនទាំងមូលចំពោះទ្រង់ ។១១ គោលបំណងនោះគឺពុំមែនដើម្បីបង្ខាំងបងប្អូនពីនគរសិរីល្អសេឡេស្ទាលនោះទេ ។
តើនេះមានន័យថាអ្វីគ្រប់យ៉ាងទៅស្របនឹងរបៀបដែលយើងរស់នៅក្នុងជីវិតរបស់យើងឬ ? របៀបដែលយើងជ្រើសរើសប្រើសិទ្ធិជ្រើសរើសរបស់យើងមិនសំខាន់ទេឬអី ? យើងអាចយក ឬចាកចេញពីបទបញ្ញត្តិរបស់ព្រះឬ ? អត់ទេ គឺអត់ទេ ។ ពិតណាស់ ការអញ្ជើញ និងការអង្វរដ៏ខ្ជាប់ខ្ជួនបំផុតមួយអំឡុងការងារបម្រើក្នុងជីវិតរមែងស្លាប់របស់ព្រះយេស៊ូវ គឺថាឲ្យយើងផ្លាស់ប្ដូរ និងប្រែចិត្ត ហើយមករកទ្រង់ ។១២ ជាមូលដ្ឋាននៃការបង្រៀនទាំងអស់របស់ទ្រង់ គឺឲ្យរស់នៅតាមក្រមសីលធម៌ខ្ពស់១៣ គឺជាការអំពាវនាវឲ្យមានការរីកចម្រើនផ្ទាល់ខ្លួន ឲ្យផ្លាស់មកជឿលើព្រះគ្រីស្ទ ឆ្ពោះទៅកាន់ការផ្លាស់ប្ដូរដ៏ធំនៅក្នុងដួងចិត្ត ។១៤
ព្រះចង់ឲ្យយើងតម្រង់ទិសនៃភាពអត្មានិយម និងសេចក្តីឆ្មើងឆ្មៃ សម្រាតភាពខាងសាច់ឈាម ចេញ១៥ ឲ្យយើង « ទៅចុះ តែកុំធ្វើបាបទៀតឡើយ » ។១៦
បើយើងជឿលើបំណងនៃផែនការរបស់ព្រះវរបិតាសម្រាប់មនុស្សទាំងអស់ គឺដើម្បីសង្គ្រោះយើង ប្រោសលោះយើង ផ្ដល់សេចក្តីមេត្តាករុណាដល់យើង និងនាំឲ្យយើងមានសុភមង្គល តើព្រះរាជបុត្រាមានព្រះរាជបំណងអ្វីខ្លះតាមរយៈផែនការដ៏ធំនេះ ?
ព្រះរាជបុត្រាទ្រង់បានប្រាប់យើងដោយផ្ទាល់ថា ៖ « ព្រោះខ្ញុំបានចុះពីស្ថានសួគ៌មក មិនមែននឹងធ្វើតាមចិត្តខ្ញុំទេ គឺតាមបំណងព្រះហឫទ័យនៃព្រះវិញ ដែលទ្រង់ចាត់ឲ្យខ្ញុំមក » ។១៧
ព្រះទ័យរបស់ព្រះយេស៊ូវ គឺជាព្រះទ័យដ៏សប្បុរសរបស់ព្រះវរបិតា ! ទ្រង់ចង់ធ្វើឲ្យបុត្រាបុត្រីរបស់ព្រះវរបិតាសួគ៌គ្រប់រូបទទួលបានគោលបំណងដ៏ខ្ពង់ខ្ពស់នៃផែនការនេះ —គឺដើម្បីទទួលបានជីវិតដ៏អស់កល្បជានិច្ចនៅជាមួយទ្រង់ទាំងទ្វេ ។ គ្មាននរណាម្នាក់ត្រូវបានដកចេញពីសក្តានុពលនៃព្រះនេះឡើយ ។
បើសិនបងប្អូនឆាប់បារម្ភថា បងប្អូននឹងពុំស័ក្ដិសម ឬថាដង្វាយធួនជានិរន្ដរ៍របស់ព្រះគ្រីស្ទប្រកបដោយព្រះគុណមានសម្រាប់តែអ្នកដទៃ តែពុំមែនសម្រាប់បងប្អូន នោះបងប្អូនយល់ខុសហើយ ។ និរន្ដរ៍ មានន័យថា គ្មានទីបំផុត ។ និរន្ដរ៍ មានចំពោះបងប្អូន និងអស់អ្នកដែលបងប្អូនស្រឡាញ់ ។១៨
នីហ្វៃបានពន្យល់សេចក្តីពិតដ៏ស្រស់ស្អាតនេះថា ៖ « ទ្រង់មិនធ្វើការណ៍ណាឡើយ លើកលែងតែការណ៍នោះមានប្រយោជន៍ដល់មនុស្សលោក ដ្បិតទ្រង់ស្រឡាញ់មនុស្សលោកដល់ម៉្លេះ បានជាទ្រង់ប្ដូរព្រះជន្មទ្រង់ផ្ទាល់ ដើម្បីទ្រង់អាចទាញមនុស្សទាំងអស់មករកទ្រង់ ។ ហេតុដូច្នោះហើយ ទ្រង់មិនដែលបញ្ជាដល់អ្នកណាម្នាក់ថា គេនឹងមិនគួរទទួលយកសេចក្ដីសង្គ្រោះរបស់ទ្រង់នោះឡើយ » ។១៩
ព្រះអង្គសង្រ្គោះជាអ្នកគង្វាលល្អបានទៅស្វែងរកចៀមដែលបាត់របស់ទ្រង់រហូតដល់ទ្រង់រកឃើញចៀមទាំងនោះ ។២០ ទ្រង់ « មិនចង់ឲ្យអ្នកណាមួយវិនាសឡើយ » ។២១
« ដៃនៃសេចក្ដីមេត្តាករុណារបស់យើងសន្ធឹងទៅរកអ្នក ហើយអស់អ្នកណាដែលមក អ្នកនោះហើយដែលយើងនឹងទទួល » ។២២
« តើនៅក្នុងចំណោមអ្នករាល់គ្នាមានអ្នកណាឈឺទេ ? ចូរនាំអ្នកទាំងនោះមកទីនេះចុះ ។ តើមាននរណាខ្វិន ឬខ្វាក់ ឬគ ឬបាក់ដៃបាក់ជើង ឬឃ្លង់ ឬស្ពឹកស្រពន់ ឬថ្លង់ ឬក៏ត្រូវរងទុក្ខ ដោយហេតុណាផ្សេងទៀត ? ចូរនាំពួកគេមកទីនេះចុះ ហើយយើងនឹងប្រោសឲ្យពួកគេបានជា ដ្បិតយើងមានចិត្តអាណិតអាសូរដល់ពួករាល់គ្នា » ។២៣
ទ្រង់ពុំបណ្តេញស្ត្រីដែលមានបញ្ហាធ្លាក់ឈាមចេញទេ ទ្រង់ពុំដកព្រះកាយចេញពីបុរសកើតឃ្លង់ ទ្រង់ពុំបដិសេធស្ត្រីដែលធ្វើអំពើផិតក្បត់ ទ្រង់ពុំបដិសេធអ្នកដែលប្រែចិត្ត —មិនថាពួកគេមានអំពើបាបប៉ុនណាទេ ។ ហើយទ្រង់នឹងមិនបដិសេធបងប្អូន ឬមនុស្សដែលបងប្អូនស្រឡាញ់ឡើយ នៅពេលបងប្អូននាំយកដួងចិត្តសង្រេង និងវិញ្ញាណទន់ទាបមកថ្វាយទ្រង់ ។ នោះ ពុំមែន ជាព្រះរាជបំណង ឬការរៀបចំឡើងរបស់ទ្រង់ ក៏ពុំមែនជាផែនការ បំណងប្រាថ្នា ឬក្តីសង្ឃឹមរបស់ទ្រង់ទេ ។
ទេ ! ទ្រង់មិនដាក់របាំងផ្លូវទេ ប៉ុន្តែទ្រង់នឹងដកយកវាចេញវិញ ។ ទ្រង់មិនបណ្ដេញបងប្អូនចេញឡើយ ប៉ុន្តែទ្រង់ស្វាគមន៍បងប្អូនឲ្យចូលមកវិញ ។២៤ ការងារបម្រើទាំងស្រុងរបស់ទ្រង់គឺជាការប្រកាសដ៏រស់រវើកមួយអំពីព្រះរាជបំណងនេះ ។
ពិតណាស់ យើងពិបាកយល់ពីពលិកម្មធួនរបស់ទ្រង់ខ្លាំងណាស់ ព្រោះវាហួសពីការយល់ដឹងរបស់យើងក្នុងជីវិតរមែងស្លាប់នេះ ។ នេះគឺជារឿងសំខាន់ « ប៉ុន្តែ » យើងយល់ដឹងបាន យើងអាចយល់ដឹងអំពីព្រះរាជបំណងជួយសង្គ្រោះដ៏បរិសុទ្ធនៃពលិកម្មធួនរបស់ទ្រង់ ។
វាំងនននៃព្រះវិហារបរិសុទ្ធបានរហែកជាពីរ ពេលព្រះយេស៊ូវបានសុគតនៅលើឈើឆ្កាង ដែលជានិមិត្តសញ្ញាថាការចូលទៅកាន់ទីវត្តមានរបស់ព្រះវរបិតាវិញត្រូវបានបើកទូលំទូលាយ—ដល់មនុស្សទាំងអស់ដែលនឹងបែរមករកទ្រង់ ទុកចិត្តទ្រង់ ដាក់បន្ទុករបស់ពួកគេមកលើទ្រង់ ហើយទទួលយកនឹមរបស់ទ្រង់ដាក់លើខ្លួននៅក្នុងចំណងនៃសេចក្ដីសញ្ញា ។២៥
និយាយម្យ៉ាងទៀតថា ផែនការរបស់ព្រះវរបិតាពុំមែនអំពីការបិទផ្លូវនោះទេ ។ រឿងបែបនេះពុំបាន ហើយនឹងមិនដែលកើតឡើងឡើយ ។ តើមានអ្វីដែលយើងត្រូវធ្វើ បទបញ្ញត្តិដែលត្រូវគោរពតាម លក្ខណៈធម្មជាតិរបស់យើងត្រូវផ្លាស់ប្ដូរដែរឬទេ ? ប្រាកដណាស់ ។ ប៉ុន្តែដោយព្រះគុណរបស់ទ្រង់ យើងមានសមត្ថភាពអាចធ្វើរឿងទាំងនោះបាន ។
នេះជាដំណឹងល្អ ! ខ្ញុំមានអំណរគុណយ៉ាងខ្លាំងចំពោះសេចក្ដីពិតដ៏សាមញ្ញទាំងនេះ ។ ការរៀបចំឡើងរបស់ព្រះវរបិតា ផែនការរបស់ទ្រង់ ព្រះរាជបំណងបំណងប្រាថ្នា និងសេចក្ដីសង្ឃឹមរបស់ទ្រង់គឺដើម្បីព្យាបាលបងប្អូន ប្រទានភាពសុខសាន្តដល់បងប្អូន នាំបងប្អូន និងមនុស្សជាទីស្រឡាញ់ត្រឡប់ទៅផ្ទះវិញ ។ ខ្ញុំសូមថ្លែងជាសាក្សីអំពីការណ៍នេះនៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕