ព្រះវិហារបរិសុទ្ធ ព្រះដំណាក់នៃព្រះអម្ចាស់កសាងច្រើននៅទូទាំងផែនដី
នៅពេលបងប្អូនមកកាន់ដំណាក់ដ៏បរិសុទ្ធដោយភាពសក្ដិសម និងការអធិស្ឋាន នោះបងប្អូននឹងបំពាក់ដោយព្រះចេស្ដាទ្រង់ ។
តើអ្នកមិនស្រឡាញ់ពាក្យដែលយើងទើបតែច្រៀងទេឬអី ? « យើងនឹងពង្រឹងអ្នក យាងមកជួយនិងចម្រើនកម្លាំង ជួយគាំទ្រអ្នកឲ្យឈរ… យើងលើកអ្នកដោយព្រះហស្តដ៏សុចរិត ដ៏អស្ចារ្យ » ។១ ព្រះអម្ចាស់កំពុងតែពង្រឹងរាស្ត្របរិសុទ្ធរបស់ទ្រង់គ្រប់វ័យ នៅពេលពួកគេមកកាន់ដំណាក់ដ៏បរិសុទ្ធរបស់ទ្រង់ ។ ពី គីនស្សាសា ទៅ ហ្សូលីខូហ្វីន ដល់ ហ្វូគូអូកា ដល់ អូកលែន យុវវ័យកំពុងមកកកកុញពេញអាងជ្រមុជទឹក ផ្តួចផ្តើមចេញមកពីគំនិតផ្ទាល់ខ្លួនពួកគេ ។ កន្លងមក អ្នកធ្វើពិធីបរិសុទ្ធជាទីស្រឡាញ់ភាគច្រើនសុទ្ធតែសក់ល្បាយអាចម៍ខ្លា—ប៉ុន្ដែឥឡូវមិនដូច្នោះទៀតទេ ។ ពួកអ្នកផ្សព្វផ្សាយសាសនាពេញម៉ោង ពួកអ្នកផ្សព្វផ្សាយសាសនាផ្នែកសេវាកម្ម និងពួកអ្នកត្រឡប់មកពីបេសកកម្មវិញ គឺឈរនៅគ្រប់ជ្រុង ។ យើងមានអារម្មណ៍ឲ្យទៅកាន់ព្រះដំណាក់របស់ព្រះអម្ចាស់កាន់តែខ្លាំងនៅទូទាំងពិភពលោក ។
មួយឆ្នាំកន្លងទៅ មិត្តដែលមានវ័យ ៩៥ ឆ្នាំជាទីស្រឡាញ់របស់គ្រួសារយើង រស់នៅឆ្នេរខាងកើតនៃសហរដ្ឋអាមេរិក ដែលធ្លាប់បានបង្រៀនដោយអ្នកផ្សព្វផ្សាយសាសនាកាលពី ៧០ ឆ្នាំមុន បាននិយាយទៅកូនស្រីគាត់ថា « ម៉ាក់ចង់ទៅព្រះវិហារបរិសុទ្ធជាមួយកូន » ។
កូនស្រីគាត់បានឆ្លើយថា « បើអ៊ីចឹងមែន ម៉ាក់ត្រូវទទួលបុណ្យជ្រមុជទឹកជាមុនសិន » ។
គាត់តបថា « អូខេ អ៊ីចឹង ម៉ាក់ចង់ជ្រមុជទឹក » ។ គាត់បានទទួលបុណ្យជ្រមុជទឹក ។ ពីរបីថ្ងៃក្រោយមក គាត់បានចូលក្នុងអាងជ្រមុជទឹកនៃព្រះវិហារបរិសុទ្ធដោយគារវភាព ។ ហើយកាលពីជាងមួយខែមុន គាត់បានទទួលអំណោយទានពិសិដ្ឋ និងការផ្សារភ្ជាប់របស់គាត់ផ្ទាល់ ។ « តម្រិះ និងព្រះចេស្តានៃព្រះរីកសាយវិសុទ្ធ ស្បៃគ្របដណ្តប់ផែនដីចាប់ផ្តើមរសាត់ទៅ » ។១
តើបងប្អូនធ្លាប់ឆ្ងល់ទេថា ហេតុអ្វីព្រះអម្ចាស់ដឹកនាំព្យាការីរបស់ទ្រង់ឲ្យសង់ព្រះវិហារបរិសុទ្ធរបស់ទ្រង់ យ៉ាងច្រើននៅពេញផែនដី នាពេលឥឡូវនេះដូច្នេះ ?៣ ហេតុអ្វី នៅពេលដ៏ជាក់លាក់នេះទ្រង់ប្រទាននូវភាពចម្រុងចម្រើនដែលចាំបាច់ដល់ប្រជាជននៃសេចក្ដីសញ្ញារបស់ទ្រង់ ដើម្បីតាមរយៈដង្វាយមួយភាគក្នុងដប់ដ៏ពិសិដ្ឋរបស់ពួកគេ នោះយើងអាចសាងសង់ព្រះដំណាក់របស់ព្រះអម្ចាស់បានរាប់រយដូច្នេះ ?
ព្រឹកនេះ ប្រធាន ដាល្លិន អេក អូក បានបង្ហាញនូវរូបភាពព្រះវិហារបរិសុទ្ធដ៏ស្រស់ស្អាត ដែលកំពុងសាងសង់នៅទូទាំងពិភពលោក ។ ខេធី និងខ្ញុំបានទៅប្រទេសហ្វីលីពីននាពេលថ្មីៗនេះ ។ សូមគិតអំពីអព្ភូតហេតុនេះ ៖ ព្រះវិហារបរិសុទ្ធម៉ានីលត្រូវបានឧទ្ទិសឆ្លងនៅឆ្នាំ ១៩៨៤ ។ វាមានរយៈពេល ២៦ ឆ្នាំ មុនពេលព្រះវិហារបរិសុទ្ធទីពីរនៅទីក្រុងសេប៊ូ បានសាងសង់រួចរាល់ក្នុងឆ្នាំ ២០១០ ។ ឥឡូវនេះ ១៤ ឆ្នាំក្រោយមក ព្រះវិហារបរិសុទ្ធចំនួន ១១ កំពុងសាងសង់ រចនាឡើង ឬរៀបចំសម្រាប់ការឧទ្ទិសឆ្លង ។ ពីទិសខាងជើងទៅខាងត្បូង ៖ ឡៅអា ធូហ្គូហ្គារ៉ៅ សានទីអាហ្គោ អ៊ូដានេតា អាឡាបាង ណាហ្គា ថាក្លូបានស៊ីធី អ៊ីឡូអ៊ីឡូ បាខូឡូដ ខាហ្គាយ៉ានដឺអូរ៉ូ និង ដាវ៉ៅ ។ វាអស្ចារ្យណាស់ដើម្បីឃើញកិច្ចការដ៏មហិមារបស់ព្រះ !
នៅទូទាំងពិភពលោក ព្រះដំណាក់របស់ព្រះអម្ចាស់កំពុងខិតមកកាន់តែជិតយើង ។ ហេតុអ្វីនៅជំនាន់យើង ?
ថ្ងៃចុងក្រោយ
ព្រះអម្ចាស់បានព្រមានយើងថា នៅថ្ងៃចុងក្រោយ នឹងមានការទាស់ទែងគ្នាក្នុងចំណោមប្រជាជាតិ៤មនុស្សនឹង « ស្រឡាញ់តែខ្លួនឯង »៥គ្រប់ទាំងអស់ [ នឹង ] នៅក្នុងស្ថានភាពចលាចល »៦ដួលក្នុងព្យុះនៃការភាន់ច្រឡំ៧ហើយ « មនុស្សលោក [ នឹង ] ស្រយុតចិត្ត » ។៨ យើងពិតជាបានឃើញថា បុរស និងស្ត្រីស្រយុតចិត្តមែន ៖ ការទាក់ទាញពីពិភពលោក ការរំខាននៃសំឡេងដ៏ល្បួង ការធ្វេសប្រហែសមិនបានបីបាច់ខាងវិញ្ញាណ ភាពនឿយហត់ពីការទាមទារនៃភាពជាសិស្ស ។៩ ប្រហែលជាបងប្អូនសោកសៅ នៅពេលបងប្អូនឃើញនរណាម្នាក់ដែលបងប្អូនស្រឡាញ់ ធ្លាប់បាននិយាយដោយស្មោះត្រង់អំពីសេចក្ដីជំនឿរបស់គាត់លើព្រះយេស៊ូវគ្រីស្ទ ធ្លាប់ធ្វើជាសាក្សីអំពីព្រះគម្ពីរមរមន ហើយអន្ទះសាចង់ជួយកសាងនគរនៃព្រះ ដែលឥឡូវនេះចាកចេញពីជំនឿខ្លួនមួយរំពេច ទៅរកភាពអសកម្មក្នុងសាសនាចក្រ ។ ដំបូន្មានរបស់ខ្ញុំទៅកាន់អ្នកគឺ កុំអស់សង្ឃឹមឡើយ ! គ្រប់យ៉ាងគឺស្រួលទាំងអស់ ។ គ្មានការអ្វីដែលព្រះទ្រង់ធ្វើពុំបាននោះទេ ។១០
ក្នុងការចលាចល និងការឥតជំនឿដែលបានព្យាករទុកនៅក្នុងពិភពលោកនេះ ព្រះអម្ចាស់បានសន្យាថា នឹងមានរាស្ត្រនៃសេចក្ដីសញ្ញា ជាមនុស្សដែលកំពុងរង់ចាំការយាងត្រឡប់មកវិញរបស់ទ្រង់ដោយអន្ទះសា មនុស្សដែលឈរនៅក្នុងទីបរិសុទ្ធ ហើយមិនបានរើខ្លួនឡើយ ។១១ ទ្រង់មានបន្ទូលអំពីប្រជាជនសុចរិតមួយ ដែលទប់ទល់នឹងការបញ្ឆោតរបស់ពួកមារសត្រូវ ដែលមានវិន័យលើសេចក្ដីជំនឿរបស់ពួកគេ គិតដល់សេឡេស្ទាល និងទុកចិត្តទាំងស្រុងលើព្រះអង្គសង្គ្រោះ ព្រះយេស៊ូវគ្រីស្ទ ។
ហេតុអ្វីព្រះអម្ចាស់កំពុងនាំព្រះវិហារបរិសុទ្ធរបស់ទ្រង់រាប់រយមកកាន់តែជិតយើងនៅពេលឥឡូវនេះ ? មូលហេតុមួយគឺថា នៅក្នុងចំណោមចលាចល និងការល្បួងក្នុងលោកិយ ទ្រង់បានសន្យាថានឹងពង្រឹង និងប្រទានពរដល់ពួកបរិសុទ្ធនៃសេចក្ដីសញ្ញារបស់ទ្រង់ ហើយសេចក្ដីសន្យារបស់ទ្រង់កំពុងតែត្រូវបានបំពេញ ។
សេចក្តីសន្យាទាំងឡាយមកពីព្រះវិហារបរិសុទ្ធខឺតឡង់
តើព្រះដំណាក់ដ៏បរិសុទ្ធទាំងនេះពង្រឹង លួងលោម និងការពារយើងយ៉ាងដូចម្តេច ? យើងរកឃើញចម្លើយមួយនៅក្នុងការអង្វរកររបស់ព្យាការី យ៉ូសែប ស្ម៊ីធ នៅក្នុងការឧទ្ទិសឆ្លងព្រះវិហារបរិសុទ្ធ ខឺតឡង់ ។ គឺនៅក្នុងព្រះវិហារបរិសុទ្ធនេះឯងដែលពួកបរិសុទ្ធបានច្រៀងជាលើកដំបូងថា « យើងច្រៀងហើយយើងនឹងស្រែកទ្រហោនឹងពលស្ថានសួគ៌ » ។១២ ព្រះអង្គសង្គ្រោះផ្ទាល់ទ្រង់បានបង្ហាញព្រះកាយ ហើយពួកព្យាការីជំនាន់ដើមបានត្រឡប់មកវិញ ផ្ដល់កូនសោនៃបព្វជិតភាពបន្ថែមមកកាន់ដំណឹងល្អដែលបានស្ដារឡើងវិញ ។១៣
នៅក្នុងឱកាសដ៏ពិសិដ្ឋនោះក្នុងព្រះវិហារបរិសុទ្ធខឺតឡង់ ព្យាការីបានអធិស្ឋានថា នៅក្នុងព្រះដំណាក់ដ៏បរិសុទ្ធរបស់ព្រះអម្ចាស់ ពួកបរិសុទ្ធនឹងប្រដាប់ដោយព្រះចេស្ដារបស់ទ្រង់ ថាព្រះនាមរបស់ព្រះយេស៊ូវគ្រីស្ទដាក់នៅលើពួកគេ ថាពួកទេវតារបស់ទ្រង់ថែរក្សាពួកគេ ហើយថាពួកគេអាចបានធំឡើងក្នុងទ្រង់ ហើយ« ទទួលនូវភាពពោរពេញនៃព្រះវិញ្ញាណបរិសុទ្ធ » ។១៤ ការអង្វរករដ៏មានអានុភាពទាំងនេះត្រូវបានបំពេញនៅក្នុងជីវិតយើង នៅពេលយើងថ្វាយបង្គំដោយស្មោះត្រង់នៅក្នុងព្រះដំណាក់របស់ព្រះអម្ចាស់ ។
ប្រដាប់ដោយព្រះចេស្តា
នៅក្នុងដំណាក់របស់ទ្រង់ យើងពិតជាទទួលបានអំណាចសួគ៌ាមែន ។១៥ សេចក្ដីជំនឿរបស់យើងទៅលើព្រះយេស៊ូវគ្រីស្ទ និងសេចក្ដីស្រឡាញ់របស់យើងចំពោះទ្រង់ ត្រូវបានបញ្ជាក់ និងការពារ ។ យើងទទួលបានការធានាខាងវិញ្ញាណអំពីអត្តសញ្ញាណដ៏ពិតរបស់យើង និងគោលបំណងនៃជីវិតនេះ ។១៦ កាលយើងមានចិត្តស្មោះត្រង់ នោះយើងទទួលបានពរជ័យនៃការការពារពីការល្បួង និងការរំខានទាំងឡាយ ។ យើងទទួលអារម្មណ៍នៃសេចក្ដីស្រឡាញ់របស់ព្រះអង្គសង្រ្គោះនៅពេលទ្រង់លើកយើងចេញពីការលំបាករបស់យើង ។ យើងប្រដាប់ដោយព្រះចេស្ដារបស់ទ្រង់ ។
ព្រះនាមរបស់ទ្រង់នៅក្នុងពួកយើង
នៅក្នុងដំណាក់ដ៏បរិសុទ្ធរបស់ទ្រង់ យើងលើកដាក់មកលើខ្លួនយើងនូវព្រះនាមរបស់ទ្រង់កាន់តែពេញលេញ ។ នៅពេលយើងជ្រមុជទឹក យើងបង្ហាញពីជំនឿរបស់យើងទៅលើទ្រង់ និងឆន្ទៈរបស់យើងដើម្បីកាន់តាមព្រះបញ្ញត្តិទាំងឡាយរបស់ទ្រង់ ។ នៅក្នុងព្រះវិហារបរិសុទ្ធ យើងធ្វើការសន្យាដ៏ពិសិដ្ឋតាមរយៈសេចក្ដីសញ្ញារបស់យើងដើម្បីធ្វើតាមទ្រង់ជារៀងរហូត ។
យុវវ័យនៃសាសនាចក្រនេះគឺអស្ចារ្យណាស់ ។ នៅក្នុងពិភពលោកដ៏ពិបាកមួយ ពួកគេលើកដាក់មកលើខ្លួនគេនូវព្រះនាមនៃព្រះគ្រីស្ទ ។ នៅទីក្រុងហ៊ីបើរ រដ្ឋយូថាហ៍ ការប្រជុំជាសាធារណៈមួយបានធ្វើឡើងដើម្បីពិភាក្សាអំពីព័ត៌មានលម្អិតនៃព្រះវិហារបរិសុទ្ធ ដែលគ្រោងនឹងសាងសង់ ។ យុវវ័យចំនួនបីរយនាក់បានឈរពេញសួននៅក្បែរនោះ ដើម្បីបង្ហាញការគាំទ្ររបស់ពួកគេចំពោះព្រះវិហារបរិសុទ្ធដែលបានស្នើឡើងនេះ ។ យុវជនម្នាក់ ថ្លែងទៅកាន់ថ្នាក់ដឹកនាំរដ្ឋាភិបាលលើវេទិកាបើកចំហមួយ ដោយពន្យល់យ៉ាងក្លាហានថា « ខ្ញុំសង្ឃឹមថានឹងរៀបការនៅក្នុងព្រះវិហារបរិសុទ្ធនេះ ។ [ ព្រះវិហារបរិសុទ្ធនឹងជួយ ] ខ្ញុំឲ្យរក្សាខ្លួនបានស្អាតបាត និងបរិសុទ្ធ » ។ យុវជនម្នាក់ទៀតបានរៀបរាប់ថា ព្រះវិហារបរិសុទ្ធជានិមិត្តរូបនៃពន្លឺ និងសេចក្តីសង្ឃឹម ។ យុវជន និងយុវនារីនៃសាសនាចក្រនៅទូទាំងពិភពលោកកំពុងបង្ហាញពីបំណងប្រាថ្នារបស់ពួកគេក្នុងការឱបក្រសោបព្រះនាមរបស់ព្រះយេស៊ូវគ្រីស្ទ ។១៦
ទេវតានៅជាមួយនឹងពួកយើង
នៅក្នុងព្រះវិហារបរិសុទ្ធ ខឺតឡង់ ព្យាការី យ៉ូសែប បានអធិស្ឋានថា « ពួកទេវតា [ នឹង ] ថែរក្សា [ ពួកបរិសុទ្ធ ] » ។១៨វាគឺជាជំនឿដ៏រឹងមាំរបស់ខ្ញុំថា ពេលវេលាជាបន្តបន្ទាប់នៅក្នុងព្រះវិហារបរិសុទ្ធ ដើម្បីធ្វើពិធីបរិសុទ្ធសម្រាប់បុព្វការីជនរបស់យើង នឹងនាំមកនូវការបញ្ជាក់ដ៏ផ្អែមល្ហែម និងប្រាកដប្រជាថា ជីវិតនៅតែបន្តហួសពីសេចក្ដីស្លាប់ ។
ទោះបីជាបទពិសោធន៍ជាច្រើនរបស់យើងនៅក្នុងដំណាក់របស់ព្រះអម្ចាស់មានលក្ខណៈពិសិដ្ឋខ្លាំង ហើយមិនអាចចែកចាយជាសាធារណៈក្ដី ក៏មានបទពិសោធន៍មួយចំនួន ដែលយើងអាចចែកចាយបានដែរ ។ កាលពីសែសិបឆ្នាំមុន ខណៈរស់នៅរដ្ឋផ្លរីដា ខេធី និងខ្ញុំបានធ្វើដំណើរទៅព្រះវិហារបរិសុទ្ធនៅទីក្រុងអាត្លង់តា រដ្ឋចចចា ។ នៅយប់ថ្ងៃ ពុធ ទី ៩ ខែ ឧសភា ឆ្នាំ ១៩៨៤ នៅពេលយើងបានបញ្ចប់សម័យប្រជុំមួយនៅក្នុងព្រះវិហារបរិសុទ្ធ មានអ្នកធ្វើពិធីបរិសុទ្ធម្នាក់ដើរមករកខ្ញុំ ហើយសួរថា តើខ្ញុំមានពេលដើម្បីធ្វើពិធីបរិសុទ្ធលាងជម្រះមួយបានដែរឬទេ ។ ឈ្មោះរបស់បុគ្គលដែលខ្ញុំតំណាងនោះគឺមិនធម្មតាទេ ។ ឈ្មោះរបស់គាត់គឺ អេលីហ្សឺ សឺស៊ី ។
នៅថ្ងៃបន្ទាប់ ព្រះវិហារបរិសុទ្ធមានពេញទៅដោយពួកបរិសុទ្ធ ។ កាលខ្ញុំត្រៀមខ្លួនដើម្បីធ្វើអំណោយទានពិសិដ្ឋលើកទីពីរនៅថ្ងៃនោះ ខ្ញុំទទួលបានឈ្មោះរបស់បុគ្គលដែលខ្ញុំនឹងតំណាងឲ្យ ។ វាគួរឲ្យភ្ញាក់ផ្អើល ឈ្មោះនេះគឺជាបុគ្គលកាលយប់មិញគឺលោក អេលីហ្សឺ សឺស៊ី ។ ខ្ញុំទទួលអារម្មណ៍ពីព្រះវិញ្ញាណនៃព្រះអម្ចាស់ កាលអំណោយទានពិសិដ្ឋនេះបានបញ្ចប់ទៅ ។ ក្រោយមកនៅរសៀលនោះ ពេលយើងនៅក្នុងព្រះវិហារបរិសុទ្ធ ខេធី បានឃើញមិត្តវ័យចំណាស់ម្នាក់នៃគ្រួសាររបស់យើង ឈ្មោះថា បងស្រី ដូលី ហ្វែណានដេស ដែលបច្ចុប្បន្នរស់នៅទីក្រុងអាត្លង់តា ។ ព្រោះគាត់គ្មានសមាជិកបុរសក្នុងគ្រួសារមកជាមួយនោះគាត់បានសួរថា តើខ្ញុំអាចជួយក្នុងការផ្សារភ្ជាប់ឪពុករបស់គាត់ ទៅនឹងឪពុកម្តាយរបស់ឪពុកគាត់បានដែរឬទេ ។ ខ្ញុំពិតជាមានកិត្តិយសណាស់ ។
នៅពេលខ្ញុំលុតជង្គង់ចុះនៅចុងទីអាសនាសម្រាប់ពិធីបរិសុទ្ធដ៏ពិសិដ្ឋនេះ ខ្ញុំបានឮឈ្មោះនេះម្តងទៀត ដែលឥឡូវនេះ បានឆ្លាក់ជាប់នៅក្នុងចិត្តខ្ញុំ គឺឪពុករបស់គាត់ លោក អេលីហ្សឺ សឺស៊ី ។ ខ្ញុំជឿទាំងស្រុងថា បន្ទាប់ពីជីវិតនេះ ខ្ញុំនឹងជួប ហើយឱបបុរសម្នាក់នេះ ដែលគេស្គាល់ក្នុងជីវិតរមែងស្លាប់របស់គាត់ថាជាលោក អេលីហ្សឺ សឺស៊ី ។
បទពិសោធន៍របស់យើងក្នុងដំណាក់នៃព្រះអម្ចាស់ភាគច្រើន នាំមកនូវភាពសុខសាន្ដដ៏អំណរ និងវិវរណៈដ៏ស្ងប់ស្ងាត់ ច្រើនជាងការអន្តរាគមន៍ ។ ប៉ុន្តែត្រូវបានអះអាងថា ៖ ពួកទេវតាឃុំគ្រងលើយើង !
ភាពពេញលេញនៃព្រះវិញ្ញាណបរិសុទ្ធ
អំណោយទាននៃព្រះវិញ្ញាណបរិសុទ្ធត្រូវបានប្រទានដល់យើង កាលយើងត្រូវបានបញ្ជាក់ជាសមាជិកនៃសាសនាចក្រ ។ ជារៀងរាល់សប្តាហ៍ នៅពេលយើងទទួលទាននំប៉័ង និងទឹកដោយមានភាពស័ក្ដិសម ហើយចងចាំដល់ព្រះអង្គសង្គ្រោះនោះយើងទទួលបានការសន្យាថា ព្រះវិញ្ញាណរបស់ទ្រង់នឹងគង់នៅជាមួយយើងជានិច្ច ។១៩ នៅពេលយើងមកដោយមានដួងចិត្តស្មោះស្ម័គ្រចំពោះព្រះដំណាក់របស់ព្រះអម្ចាស់ ជាទីដ៏បរិសុទ្ធបំផុតនៅលើផែនដីនេះ នោះយើងបានធំឡើងនៅក្នុងព្រះអម្ចាស់ ហើយ « ទទួលនូវភាពពោរពេញនៃព្រះវិញ្ញាណបរិសុទ្ធ » ។២០ តាមរយៈព្រះចេស្ដានៃព្រះវិញ្ញាណបរិសុទ្ធនោះយើងបានពោរពេញទៅដោយភាពសុខសាន្ដ និងអំណរ និងសេចក្ដីសង្ឃឹមដែលពុំអាចពិពណ៌នាបាន ។២១ យើងទទួលបានកម្លាំងដើម្បីបន្ដនៅជាពួកសិស្សរបស់ទ្រង់ នៅពេលយើងនៅខាងក្រៅកន្លែងបរិសុទ្ធ ។
ប្រធាន រ័សុល អិម ណិលសុន បានប្រកាសថា « ព្រះអង្គសង្គ្រោះ និងព្រះដ៏ប្រោសលោះរបស់យើង ព្រះយេស៊ូវគ្រីស្ទ នឹងធ្វើកិច្ចការដ៏អស្ចារ្យបំផុតរបស់ទ្រង់មួយចំនួននៅចន្លោះពេលនេះ និងពេលដែលទ្រង់យាងមកម្ដងទៀត ។ យើងនឹងឃើញការបង្ហាញដ៏អស្ចារ្យថា ព្រះជាព្រះវរបិតា និង …ព្រះរាជបុត្រារបស់ទ្រង់គឺព្រះយេស៊ូវគ្រីស្ទ ធ្វើជាអធិបតីលើសាសនាចក្រនេះដោយភាពរុងរឿង និងសិរីល្អ » ។២២ ការសង់ព្រះដំណាក់របស់ព្រះអម្ចាស់ជាច្រើននៅពេញផែនដីនេះ គឺជាកិច្ចការដ៏អស្ចារ្យ និងជាសូចនាករប្រកបដោយអព្ភូតហេតុមួយ ។២៣
មិត្តជាទីស្រឡាញ់របស់ខ្ញុំ បើយើងអាច និងមិនទាន់បានចូលរួមច្រើនក្នុងព្រះវិហារបរិសុទ្ធទេ សូមឲ្យយើងរកពេលបន្ថែមទៀត ដើម្បីថ្វាយបង្គំនៅក្នុងដំណាក់របស់ព្រះអម្ចាស់ឲ្យបានទៀងទាត់ ។ សូមយើងអធិស្ឋានឲ្យព្រះវិហារបរិសុទ្ធដែលត្រូវបានប្រកាសឲ្យយើងអាចទិញបានអចលនទ្រព្យទាំងនោះ ឲ្យរាជរដ្ឋាភិបាលនឹងអនុម័តលើផែនការ ឲ្យអ្នកធ្វើការដ៏មានទេពកោសល្យនឹងឃើញអំណោយទានរបស់ពួកគេរីកចម្រើនឡើង ហើយឲ្យការឧទ្ទិសឆ្លងដ៏ពិសិដ្ឋទាំងនេះនឹងនាំមកនូវការអនុម័តពីស្ថានសួគ៌ និងការយាងមករបស់ពួកទេវតា ។
សេចក្ដីសន្យាទាំងឡាយ
ព្រះវិហារបរិសុទ្ធគឺមានន័យថា ដំណាក់នៃព្រះអម្ចាស់ ។ ខ្ញុំសន្យានឹងបងប្អូនថា កាលដែលបងប្អូនមកកាន់ដំណាក់ដ៏បរិសុទ្ធរបស់ទ្រង់ដោយភាពស័ក្ដិសម និងប្រកបដោយការអធិស្ឋាន នោះបងប្អូននឹងប្រដាប់ដោយព្រះចេស្ដាទ្រង់ ព្រះនាមទ្រង់នឹងលើកដាក់មកលើបងប្អូន ពួកទេវតារបស់ទ្រង់នឹងថែរក្សាបងប្អូន ហើយបងប្អូននឹងធំឡើងក្នុងពរជ័យនៃព្រះវិញ្ញាណបរិសុទ្ធ ។
ព្រះអម្ចាស់បានសន្យាថា « មនុស្សគ្រប់រូបដែលលះបង់ចោលអំពើបាបទាំងឡាយរបស់ខ្លួន ហើយមករកយើង ហើយអំពាវនាវដល់ព្រះនាមរបស់យើង ហើយគោរពតាមសំឡេងរបស់យើង ហើយកាន់តាមព្រះបញ្ញត្តិទាំងឡាយរបស់យើង នោះនឹងបានឃើញព្រះភ័ក្រ្តរបស់យើង ហើយស្គាល់ថាយើងជាព្រះ » ។២៤ មានរបៀបផ្សេងៗជាច្រើនដើម្បីបានឃើញព្រះភ័ក្រ្ដរបស់ព្រះគ្រីស្ទ ហើយគ្មានកន្លែងណាប្រសើរជាងការនៅក្នុងព្រះដំណាក់ដ៏បរិសុទ្ធរបស់ទ្រង់ឡើយ ។២៥
នៅជំនាន់នៃការច្របូកច្របល់ និងការចលាចលនេះ ខ្ញុំសូមថ្លែងទីបន្ទាល់ថា ព្រះវិហារបរិសុទ្ធគឺជាព្រះដំណាក់ដ៏បរិសុទ្ធរបស់ទ្រង់ ហើយនឹងជួយថែរក្សាយើង ការពារយើង ហើយរៀបចំយើងសម្រាប់ថ្ងៃដ៏រុងរឿងនោះ នៅពេលព្រះយេស៊ូវគ្រីស្ទយាងត្រឡប់មកវិញដោយមហិទ្ធិឬទ្ធិ ព្រះចេស្ដា និងសិរីរុងរឿងដ៏អស្ចារ្យ ដោយមានទេវតាដ៏បរិសុទ្ធទាំងអស់មកជាមួយ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕