Ni Oti Na Veika Kece Eda Rawa Ni Cakava

iVakatakilakila

Au sa rogoca oti ni se bera ni dua e bau mate ena gauna e vosa tiko kina ena Koniferedi Raraba. Ia kevaka me na yaco nikua, au sa kerea na nomuni veivosoti.

Ena gauna au a veiqaravi tiko kina ena mataivalu e Argentina, au a wilika e dua na ivola, kau sega ni kila o cei a vola. A kaya: “Au sa digitaka oqo meu kakua ni tamata wale tu ga; sa noqu dodonu meu dua na tamata e uasivi sara, ke’u rawata rawa.”

Ni da gadreva me da tamata uasivi sara, sa kena ibalebale me da rawa ka, cecere, ka duatani sara.

Na malanivosa o ya e se tu vinaka sara tu ga ena noqu vakasama kei na yaloqu. Na noqu nanuma taumada kei na kena oqo, me vaka ni da sa lewe ni Lotu i Jisu Karisito, eda sa digitaka me da kakua ni tagane se yalewa wale tu ga. Na iotioti ni vosa o ya ‘keu rawata rawa’ e tukuna vei au ni se sega sara ni rauta na noda sa mai papitaiso ka vakadeitaki, ia sa gadrevi me da vakayacora ka doka na veiyalayalati eda a cakava vata kei na Turaga ena siga talei o ya.

E kaya o Liai ena nona vakavulici Jekope na luvena: “A ra sereki na tamata kecega ena bula vakayago, ka sa soli vei ira na ka kecega sa yaga vua na tamata. Era sa sereki me ra digitaka na galala kei na bula tawamudu ena vuku i koya na Dauveisorovaki ni tamata kecega, se me ra digitaka na tiko vakabobula kei na mate me vaka na nona veivakabobulataki kei na nona inaki na tevoro; raica sa segata ko koya me ra rarawa na tamata kecega me vakataki koya” (2 Nifai 2:27).

E sega ni vakabekataki ni bula galala kei na bula tawamudu sai koya na veika eda sa vakasaqara tiko. Eda rere vakalevu ni da vakasamataka na siga ni noda mate ka laki vesuki tu vua na tevoro.

Sa vakavulici keda vakamatata o Nifai ena veika me da na cakava. A kaya kina vakaoqo, “Ia eda sa kila ni da sa vakabulai ena loloma walega, ka segai ena vuku ni cakacaka” (2 Nifai 25:23).

Au vakabauta ni imatai ni ka me da nanuma tiko ni “veika kece eda rawa ni cakava” o ya me da veivutunitaka na noda ivalavala ca. Ena sega ni rawa me da yacova na noda ivakatagedegede vakalou kevaka me da bula tikoga ena noda ivalavala ca.

Au se nanuma vinaka tikoga oqo na siga totoka o ya ni noqu papitaiso niu se qai yabaki walu. E a vakayacori ena Tabana o Liniers, na isevu ni vale ni Lotu a tara e Sauca Amerika. Ni oti na noqu papitaiso kau sa lesu yani ki vale, vata kei na noqu matavuvale, ka sa tekivu qito mai o tuakaqu, ni nona ivakarau ga o ya. Au a kaya vua “Kua ni tarai au, au sega ni via ivalavala ca!” Ni toso tiko na gauna, au sa qai kila ni sega ni rawa meu ivalavala dodonu tikoga ena noqu bula taucoko.

Sa rui ka dredre me da vosota na veika rarawa eda sotava, ia na rarawa dina ena bula oqo sai koya na rarawa ena yaco vei keda ena vuku ni noda malumalumu kei na ivalavala ca eda vakayacora ena noda bula.

E dua walega na sala me da drotani rawa mai na veivakararawataki oqo. O ya na sala ni veivutuni dina. Au sa vulica rawa ni kevaka meu na lako vua na Turaga ena yalo raramusumusu kei na yalo bibivoro, ka rarawataka vakalou na noqu ivalavala ca, ka meu yalomalua, veivutunitaka na noqu caka cala, sa qai rawa Vua ena Nona solibula veisorovaki me bokoca laivi na noqu ivalavala ca ka sega tale ni nanuma.

E dua na dauniserekali mai Argentina, o José Hernández, a vola vakaoqo ena nona ivola rogo levu, na Martín Fierro:

Kevaka ena sega ni yaco vei keda na rarawa vakalou ena vuku ni noda ivalavala ca se caka cala, ena sega ni rawa me da tikoga ena nodra salatu na tamata uasivi sara.

E dua tale na ivakavuvuli bibi me da nanuma tiko me baleta na “veika kece eda rawa ni cakava,” o ya me da vakasaqara ka vakatorocaketaka na veimadigi ni bula ena kosipeli e rawa ni yaco vei keda, ka kila tiko ni Turaga sa solia vei keda na veika kece eda sa taukena tu. Sai Koya ga na ivurevure ni veika sa vinaka ki na noda bula.

E dua tale na ka e dodonu me sa noda ilesilesi tudei o ya me da vakayacora “na veika kece eda rawa ni cakava” me da wasea na kosipeli ni marau vata kei ira na kawatamata kecega.

Ena dua na gauna sa oti au a taura kina e dua na ivola mai vei Baraca Rafael Pérez Cisneros mai Galicia e Sipeni, ka vola tiko mai kina na nona saumaki mai. Oqo e dua na tiki ni nona ivola:

“Au a sega tu ni kila e dua na ituvatuva ni inaki ni bula oqo se na yavu dina ni matavuvale. Na gauna au sa sureti rau mai kina na daukaulotu ki na noqu loma ni vale au a qai kaya vei rau, ‘Mo drau tukutuku mada, ia au tukuna vei kemudrau ena sega ni dua na ka ena veisautaka na noqu lotu.’ Ena imatai ni gauna oqo keitou a vakarorogo sara vagumatua kei rau na luvequ kei na watiqu. Sa vaka meu vakatikitiki tani mai vei iratou. Sa vaka meu rere, kau sega ni kila niu sa gole yani ki na noqu rumu. Au sogota na katuba ka tekivu meu masu mai na vu ni yaloqu taucoko: ‘Tamaqu, kevaka erau sa Nomuni tisaipeli dina o irau na cauravou oqo ka rau sa mai vukei keitou, ni yalovinaka mo ni vakatakila mai vei au.’ Ena gauna sara ga o ya au sa tekivu tagi me vaka e dua na gonelailai. E drodro vakayauyau na wainimataqu kau vakila na marau e se bera mada ni bau yacovi au. Au sa mai solegi tu ena dua na yalo ni reki kei na marau e curuma sara ga na utoqu. Au sa kila vakavinaka e kea ni sa sauma mai na Kalou na noqu masu.

“Eratou a papitaiso kece sara na noqu matavuvale ka keitou kalougata me keitou laki vauci ena Valetabu e Switzerland, a yaco kina meu tamata mamarau duadua e vuravura.”

Au vakabauta ni italanoa oqo e dodonu me vakauqeti keda me da vakayacora “na veika kece eda rawa ni cakava” me da wasea vata kina na veivakalougatataki ni bula marau e yaco mai ena kena bulataki na kosipeli ni marau.

Na iotioti ni vakasama au gadreva meu wasea o ya e dodonu me da vakayacora “na veika kece eda rawa ni cakava” me yacova sara ni sa cava na noda bula vakatovolei oqo. E sega ni vakabekataki ni ra sa tu na ivakaraitaki bula me vakataki Peresitedi Gordon B. Hinckley kei na vuqa tale na turaga kei na marama, era yalodina tikoga ena nodra itavi ena nodra yabaki ni bula ka so era nanuma ni sa veicalati.

Ena gauna au a veiqaravi tiko kina vaka-peresitedi ni Kaulotu e Spain Bilbao au a kurabui ena nodra bula vakayalo na lewenilotu kei ira na daukaulotu au a sotava, era muataka ki liu na cakacaka oqo ena gugumatua kei na loloma, me vakataki ira ga e vuqa na lewe ni Lotu ena veiyasai vuravura taucoko. Kivei ira kece sara, au sa doka ka taleitaki ira.

E kaya na Turaga ni sa “ka ni marau meu vakalagilagi ira era sa qaravi au ena yalo sa dina ka dodonu me yacova na ivakataotioti.

“Ia ena levu sara na kedra isau, io ena tawamudu na nodra lagilagi” (V&V 76:5–6).

Me sa tikoga ena noda vakasama kei na yaloda na vosa nei Nifai:

“Mo yadra mai, na yaloqu! Mo kakua tale ni vakaocai iko ena ivalavala ca… .

… Io na yaloqu ena rekitaki kemuni, na noqu Kalou, kei na uluvatau kau sa bula kina” (2 Nifai 4:28, 30).

Sa noqu masu malumalumu me na vakalougatataki keda na Turaga “me da vakayacora, na veika kece e rawa ni da cakava” mai na sala ni “dua na tamata e uasivi sara” eda sa digitaka, kau vakadinadinataka ni sa dina, ena yaca i Jisu Karisito, emeni.