Kakua ni Bokoca na Yalotabu Sa Dau Vakabula na Yalo ni Tamata

iVakatakilakila

Ena 1 Cesalonaika wase 5, e vunauci ira na lewenilotu o Paula me ra bulataka na itovo sa vakataki ira na Yalododonu. E vakamatatataka talega kina o koya na yavunibula dina kei na kena itovo. Ena tikina e 19 e veivakasalataki kina o Paula ena [ono] na vosa e rawarawa sara: “Kakua ni bokoca na Yalotabu.”

E veivakurabuitaki, ni vo toka e 500 na yabaki me a volavola o Paula, e a saga o Jekope e dua na parofita ena iVola i Momani me vakavulica na kosipeli i Jisu Karisito ki na dua na ilawalawa tamata talaidredre. E a doudou na nona tarogi ira vakaoqo: “Dou na beca na nodra vosa na parofita, … dou na beca na itukutuku vinaka i Karisito, … kei na isolisoli ni Yalo Tabu, dou na bokoca na Yalo Tabu?”¹

Ena noda gauna oqo, ni oti o Paula vata kei Jekope, ena vica na senijiuri sa oti, sa dodonu me da qarauna me da kakua ni vakataotaka, vakawalena, se bokoca na Yalotabu mai na noda bula.

Mai na veika ni veirawai kei vuravura ena saga me vagolea laivi na noda vakasama mai na gaunisala sa rabalailai ka qiqo. Sa cakacaka vakaukauwa sara tiko na vunimeca me vakamalumalumutaka na noda kidava rawa na veivakauqeti ni Yalotabu, ena gauna ni noda itabagone, itabagone qase cake, se tagane se yalewa uabula. Na ilesilesi ni Yalotabu na Yalo Tabu, sa ka bibi sara ki na veidraki kece ni noda bula e vuravura.

Mai na ivakatekivu sa yalataka tu mai na Tamada kivei ira yadua na luvena tagane kei na yalewa ni cakacaka walega ni Veisorovaki kei na Tucaketale ni Luvena Lomani, sa rawa kina vei keda kece sara me da lesu ki na itikotiko ni Kalou ka taukena na veivakalougatataki ni bula tawamudu ena ivakatagedegede cecere ni matanitu vaka-silesitieli.

Oi keda vakayadua eda sa kila tiko ni na balavu sara na ilakolako ki na bula vakalou, ka dredre, ni ena so na gauna eda na galili, ia eda sa kila tale tikoga ni da sega ni lako duadua voli. Ena vakarautaka na Tamada Vakalomalagi na Yalo Tabu me itokani kivei ira kece era tekivu ena vakabauta, veivutuni, kei na papitaiso me salavata ka dusimaki ira.

Na salatu ki na bula tawamudu e sega ni bucabuca tu ga. Ia, e veilutuyaki, ka mua tikoga ki liu ka cabe cake. O koya gona, sa gadrevi kina e dua na kila-ka e torocake vakayalo kei na kaukauwa me da yacova na kena ivakatagedegede. Ena vuku ga ni toso tikoga na veivakarusai nei Setani, sa qai ka bibi dina sara me da vakararamataki tikoga mai vua na Yalo Tabu. Me da kakua sara ni vakataotaka, vakawalena, se bokoca laivi na veivakauqeti ni Yalotabu. Ia ena gauna eda gadreva kina na veivakauqeti kei na veivakalougatataki e sovaraki mai vua na Yalo Tabu, “eda na rawata ga vakalailai.”²

Ena Mataniciva Talei a vola kina o Mosese ni a papitaisotaki o Atama ka ciqoma na Yalo Tabu, ka sa “vakaukauwataki sara kina ko koya.”³

Ena gauna eda sureta kina na Yalo Tabu me curuma na yaloda ena rarama kei na kila ka, ena “vakaukauwataki keda,” o Koya, ka sa kena ibalebale, me vakararamataka ka vakabulabulataka na yalona e dua na tagane se yalewa.⁴ Sa qai yaco kina me da raica ki na noda bula e dua na veisau levu. Eda na vakaukauwataki, ka vakasinaiti ena vakacegu kei na reki. Eda na taukena na kaukauwa kei na maqusa vakayalo, ka na vakatorocaketaka na noda gugumatua. Eda na rawa ka vakalevu cake mai na kena eda rawata ga vakaikeda. Eda na gadreva me da tamata ivalavala dodonu cake.

Ko gadreva li mo kila na veika vivinaka e dau soli tiko ni da ciqoma oti na Yalo Tabu? Na kena isau e sega ni kilai taumada se dua ga na kena ivakarau; ia, sa na vakatau sara tikoga vei keda yadua.

Kevaka mo na vakarautaka rawa na kemu isau, ka sa nomu sasaga, e lailai sobu, ena rairai sega ni rawa mo taukena na veika taucoko ena solia vei iko na Yalotabu. O na rawa sara mada ga ni bokoca na Yalotabu! Ia, kevaka mo na vakalevutaka na nomu soli ka, ko na tamusuka kina na isolisoli levu mai vua na Yalotabu. Na isau au tukuna tiko oqo e sega ni ilavo; ia oqo e dua na cakacaka cecere ka vakaitavi ena sasaga kei na itovo ni bula vakayalo.

Eda na kila rawa na ivakatagedegede ni noda soli ka yadua ena noda vakadikeva na noda digidigi kei na veika me vakaliuci ena gauna oqo ni da taroga vakaoqo:

1. Au sa vakayagataki gauna vakalevu tiko beka ena veika ni qito ka sega ena soqoni se na ilesilesi Vakalotu?

2. Kevaka au sa galala, au na digitaka beka meu gole ki valetabu se sarasara i tauni?

3. Au na laki qito kompiuta beka se sarasara ena Initaneti ka sega ni laki cakava e dua na veiqaravi e yaga e noqu vale se ena itikotiko raraba?

4. Au dau wilika beka vakaivola ni lotu na niusipepa ena veisiga, ia kau sega ni wilika ena veisiga na ivolanikalou?

Ena so tale tiko beka na nomu vakatataro ko na cakacaka kina ka na vakatakila mai na tuvanaki vakadodonu ni nomu digidigi kei na veika mo vakaliuca.

Se cava ga na ivakatagedegede ni bula vakayalo sa tu vei keda yadua ena gauna oqo, sa tu na veika cecere sara eda rawa ni rawata. Sa iyau levu duadua na gauna. Ena rawa beka mo na vakayagataka vakalevu cake na nomu gauna ena veika sa tawamudu me rawa kina ni kilikili me na dau veitokani tikoga kei iko na Yalo Tabu ka vakaiyautaki vakalevu mai na Nona veivakayarayarataki?

Kevaka mo na sauma ena io, na imatai ni isau ni kena sasagataki na bula vakayalo titobu sai koya na gagadre e vakalevutaki me ciqoma na veivakauqeti e cecere cake, ka yaco mo ivalavala dodonu cake. Ni sa vakasinaiti na lomada ena gagadre oqo, eda na tosoya cake kina na isau eda na sauma me baleta na veivuke vakalomalagi.

Na noda cau e tarava ena sasaga oqo sai koya me da vakani keda tikoga vakalevu ena vosa i Karisito kei ira na parofita. Ni da vakarabailevutaka na noda vuli, ena toro cake vakakina na veivakayarayarataki ni Yalotabu ki na noda bula. Me da vakasaqara na ivolanikalou ka taura tiko na peni, ka volai na veika vou sa kilai ka volai na veivakauqeti vakayalo. Ni oti o ya, me da maqusa yani ka bulataka na veika eda sa vulica rawa ki na noda bula yadua. Ena vakaukauwataka na yaloda mai loma na Yalotabu; ka ra yaco mai na kila vakavinaka mai na vunau ena vunau.

Ena noda vakadeitaka me da na kakua ni bokoca na Yalotabu, ka me da sureta ga na Nona veisobuti, e sa tiko tale e dua na sala me da muria. Me da dau masu ena veigauna ka me vakaidina. Na Nona yalayala loloma ka matata sara na iVakabula sa toqai tu ena Vunau kei na Veiyalayalati:

• “Dou toro voleka mai vei au kau na qai toro voleka yani vei kemudou.”

• “Dou vakasaqarai au vagumatua dou na qai kunei au.”

• “Dou na kerekere ka na soli vei kemudou.”

• “Dou tukituki ka na dolavi vei kemudou.”

• “Ia na ka kecega dou sa kerea vei Tamaqu ena yacaqu sa soli vei kemudou me vaka sa ganiti kemudou.”⁵

Ni raica vinaka na ituvatuva o ya oi kemuni na taciqu kei na ganequ. Eda sa volekata yani na Turaga ni da muria vakadodonu tiko na Nona ivakaro. Eda dau kerekere vua na Kalou ena yaca i Karisito. Ia, ena veivakauqeti ni Yalo Tabu, eda na ciqoma kina na veidusimaki vakalou kei na yalo ni kila vinaka.

Ni da lolo, vakavoui na noda veiyalayalati ena gauna ni sakaramede, ka curuma na valetabu, ena dau tiko vakalevu cake kei keda na Yalotabu. Ena ituvatuva oqo ena rawa ki na Yalo Tabu me na vakaraitaka na Nona veivakayarayarataki ena kaukauwa e cecere sara.

Na valetabu sa dua na vanua totoka me da laki rawata mai kina na noda ivakatakila yadua. Ena gauna eda curu wasoma kina ka vakarorogo matua sara, ka da tugana na yalayala kei na inuinui lagilagi ka baleta tiko na veika tawamudu, eda na lesu vata kei na dua na kila vinaka e cecere me baleta na ituvatuva nei Tamada Vakalomalagi me baleti keda. Na Yalo Tabu ena vakararamataka cake na noda rai ka vakatara na ituvatuva tawamudu o ya me vakayarayarataka na noda vakatulewa eda vakayacora ena noda bula ena veisiga.

Kevaka me da maqusataka na sasaga oqo ka sega ni bokoca na Yalotabu, ena vakaukauwataki na yaloda mai loma. Ni da toso tikoga ki liu, sa na waraki keda na bula tawamudu. O koya gona, eda na sega ni rawa me da bokoca na Yalotabu ena noda talaidredre se vakawalena. Ia, me da “sa bula ena Yalo Tabu”⁶ ka vakarabailevutaka ki na noda dui bula yadua na Nona ilesilesi tabu ka bibi na Yalo Tabu. Au vakadinadinataka ni kevaka eda na vakasaqara vakaidina na Yalotabu, eda na vakaiyau vakalevu cake mai na cakacaka rogo malua, ka bibi ni Yalo Tabu. Ena yaca i Jisu Karisito, emeni.