Sa Kalougata Ko Ira Kecega Sa Yalo Savasava

iVakatakilakila

Ena neirau a taubale tiko ena dua na baravi ena Caribbean ena dua na mataka ni cila vinaka tu na siga ena vica na yabaki sa oti, keirau a raica sara vakaveiwatini eso na waqa lalai ni qoli era sa laki tavo tu e nuku. Ni keirau tu ka sarava na waqa lalai oqo, au vulica rawa kina e dua na ka me baleta na qoli kau se sega mada ni guilecava. Ena nodra a sega ni vakayagataka na lawa, wa ni siwa, se bati ni siwa, era a vakayagataka na gonedau e kea na dai e rawarawa tu ga ka caka mai na waya talitali. Na dai yadua oqo e buli vaka na kisi. Era kotiva vakadodonu na gonedau na babana kece me walu na idi na kena balavu ka ra qai loveca yani ki loma na tikina sa kotivi, ka me laqa toka ga vakalailai me ra curu rawa kina ki loma na ika.

Sa rawa beka ni o kila oqo na kena cakacaka na dai. Era na kauta yani na gonedau ki wai levu na dai oqo sa bacani tu ka tukuca ki boto ni wai. Ni sa gole yani e dua na ika levu veirauti kei na ivakayakavi ki na yasa ni dai, ka boica na baca, ena raica na laqa ena baba ni dai ka curu sara yani kina, ena nona vakaraviravi ga e yasa ni waya koti. Ia ena gauna sa vinakata kina na ika sa tacori tu o ya me curu mai tuba, sa kila tiko o koya ni a vakaraviravi ga mai ena yasa ni waya me curu mai loma ni dai, ia ena dua tani tale na ka me na curu ravita yani na waya gata era sa udu tu mai o ya me curu ki tuba—sa tacori na ika. Ni sa lesu mai o gonedau, era dreta mai wai na dai ka tiko e loma na ika bulabula o ya me ivakayakavi.

E dua na italanoa ena Veiyalayalati Makawa me baleta e dua a tacori talega ena mataqali dai vakaoqo. O ya o Tevita na Tui qaqa, kei na ka a yaco sa dua dina vei ira na italanoa vakaciriloloma ena ivolanikalou.

“Ia ni sa oti na yabaki … ka sa yaco na gauna era sa dau lako yani kina ki na ivalu ko ira na tui, sa talai Joapi ko Tevita, kei ira vata kaya na nona tamata, kei ira kecega na Isireli; a ra sa [valuti Amoni]. A sa tikoga mai Jerusalemi ko Tevita.

“Ia ena yakavi, sa tucake ko Tevita mai na nona imocemoce, ka laki gade e dela ni vale ni tui: a sa raica ko koya mai na dela ni vale e dua na yalewa sa sisili tiko; a sa matavinaka sara na yalewa” (2 Samuela 11:1–2).

Sa laki kila o Tevita ni yaca ni yalewa o Pacisepa. E wati Uraia, e dua na sotia, e gole tu ki na buca ni ivalu vata kei na mataivalu me laki valuti ira na Amoni, na vanua e dodonu me tiko kina o Tevita na nodra tui. Sa qai talatala o Tevita me laki kau mai ki na vale ni tui o Pacisepa. Erau a mai moce vata, ka yaco me bukete o Pacisepa, ka sa rere o Tevita de na kilai na nodrau veimoceri o ya. Ena nona gadreva me kakua ni kilai na nona ivalavala ca, a vakarota o Tevita me laki kau lesu mai ki Jerusalemi o Uraia. Sa laki lesu mai o Uraia, ka sega ni vinakata ena vuku ni lawa ni ivalu me gole kivei watina o Pacisepa. E a qai veretaka o Tevita me laki vakamatei o Uraia ena buca ni ivalu. (raica 2 Samuela 11:3–17) Ni sa yaco na vakatulewa rerevaki vakaoqo sa mate sara kina o Uraia ka kauta mai na rarawa vei Tevita, Pacisepa, ka yaco me robota yani na matanitu taucoko. Na kena kilai vinaka na ka oqo, e kaya kina na iVolatabu, “A sa ca ena mata i Jiova na ka sa cakava ko Tevita” (2 Samuela 11:27).

O sa raica beka na sala a tacori kina o Tevita? A gade voli o Tevita ena dela ni vale ni tui ka qai rai sobu yani ki na dua na lomanibai ka raica kina e dua na ka e a sega ni dodonu me raica. O ya sara ga na baca nei vu ni ca. Na ivakarau kilikili, na tiko savasava, kei na vakatulewa dodonu e a gadrevi vei Tevita me a vuki tani vakatotolo ka kakua ni raica, ia a sega ni vakayacora e dua na ka oqori. Ia, a vakatara ki na nona vakasama me dreti ki na gagano e sega ni vakatarai, sa laki yaco na vakasama o ya me matanataki, ka yaco na veika o ya me torosobu mai na ca ki na ca sara ki na mate. A tacori o Tevita, ka laki tawamudu na veika ca e sala vata mai.

E tiko edaidai e dua na dai ni bula vakayalo o ya na iyaloyalo vakasisila, ka vuqa na tamata, era temaki ena kedra itukutuku veirawai, ka ra coriti rawa ena dai veivakamatei oqo. Me vaka ga na dai taucoko, e rawarawa na kena curumi ia sa dredre sara na dro bula mai kina. Eso era na vakaiulubale ni sa rawa me ra raica na iyaloyalo vakasisila ka sega ni yaco vei ira e dua na kena revurevu. Era dau kaya taumada, “E sega ni ca oqo,” se “Me vakacava kina? E sega ni dua na ka e yaco,” se “Au via kila ga.” Ia era sa cala kina. Sa vakasala kina na Turaga, “Ia ko koya yadua ena raica na yalewa me dodomo kina, sa cakitaka na lotu, ka na biuti koya na Yalotabu; ia kevaka sa sega ni veivutuni ena muduki tani” (V&V 42:23). Oqori sara ga na ka a yaco vei Tevita: a raica na matai Pacisepa, ka domoni koya, ka lako tani mai vua na Yalotabu. Ena rairai dua tani beka vakacava na vo ni bula nei Tevita kevaka beka me a rai tani.

Me ikuri ni yali ni Yalotabu, mai vei ira era dau sarava na iyaloyalo vakasisila e yaco talega me ra mataboko vakayalo ka veilecayaki. Me vakataki Tevita na Tui, era saga me ra vunitaka na nodra ivalavala ca, ka ra guilecava kina ni raici ira vinaka tiko mai na Turaga (raica 2 Nifai 27:27). Na revurevu ca ena tekivu me veimurimuri mai ena gauna sa yali kina na dokai koya vakaikoya, sa madra mai na veimaliwai vinaka, sa kasere na bula vakamau, ka sa levu sara na tamata vinaka era mavoa kina. Ena nodra raica ni sa oti na gasagasa ni veika era sarava tiko, era sa vakatovolea tale na kena e toso cake sara na kena irairai. Era sa tekivu me ra coriti kina ka ra sega tu mada ga ni kila ni sa yaco tiko se ra cakitaka tiko, me vakataki Tevita, sa torosobu ga mai na nodra itovo ni sa luluqa vei ira na ivakarau sa kilikili.

Ena kena sa yali vakamalua tiko yani na itovo vakamareqeti dodonu e vuravura taucoko, sa tekivu curuma yani na veika vakatani na gacagaca ni itukutuku raraba, veivakamarautaki, volitaki itukutuku, kei na Initaneti. Ia na veika kilai levu ka sa vakayagataka raraba tu ko vuravura sa dua dina na gacagaca rerevaki me vakadeitaki kina na veika sa dodonu se na veika mada ga e sega ni veivakaleqai. Ena rairai kilai levu beka e dua na iyaloyalo se dua na parokaramu ni retioyaloyalo ka ra taleitaka vakalevu e milioni na tamata, ia era vakaraitaki tu kina na iyaloyalo kei na ivukivuki e vakasisila. Kevaka e dua na ivakaraitaki ena dua na iyaloyalo “e vinaka toka,” sa kena ibalebale talega ni se ca toka. O koya gona, kivei ira era sara iyaloyalo se Initaneti e sega ni vinaka sa sega ni dodonu me da vakamuri ira. O ira na lewe ni Matabete e dodonu me vakataka na iVakabula kei na Lotu na nodra ivakarau ni bula, sega ni ivakarau ni bula kei vuravura.

E vakavulica na iVakabula, “Sa kalougata ko ira sa yalosavasava, ni ra na raica na Kalou” (3 Nifai 12:8). Na yalayala ni kosipeli e veilaveti ka veivakatataki, ka veivakaloutaki dina . Eda na ciqoma na veiyalayala oqori mai na veiyalayalati e lavaki kina na noda bulataka na itovo sa savasava ka kilikili. Ena gauna eda bula dodonu tiko kina ka saga me savasava na yaloda, eda na toro voleka yani vua na Kalou kei na Yalotabu. Na ituvaki ni yaloda ena raica rawa na veika dina vakalou ena vuravura oqo edaidai ka solia vei keda na dodonu me da kila kina na yalayala o ya ni o ira sa yalo savasava “era na raica na Kalou.” Oi keda ga me da savasava yani. A vola kina vakaoqo o Joni na iApositolo:

“Oi kemudou sa lomani, eda sa qai luve ni Kalou, ia sa sega ni rairai se da na vakaevei mai muri: oqo ga eda sa kila, ni na rairai mai ko koya, eda na tautauvata kaya; ni da na raica na matana dina.

“Ia na tamata yadua sa tu vua na inuinui oqo vei Koya, sa vakasavasavataki koya, me sa savasava ko koya” (1 Joni 3:2–3).

Kevaka o sa tacori tu ena cori ni iyaloyalo vakasisila, oqo na gauna mo sereki iko tani mai kina ena veivuke ni iVakabula. Sa tiko e dua na idrodro, ia ko na gadreva na Nona veivuke mo dro bula kina. Ena vakatau tiko na mavo ni yalomu mai na taucoko ni nomu veivutuni. Nikua sara ga mo lako vei nomu bisopi. Kerea na nona veidusimaki vakalou. Ena vukei iko o koya me vakarautaki iko ki na dua na ituvatuva ni veivutuni ka na vueta cake tale na nomu nuitaki iko ka me lesu tale mai ki na nomu bula na Yalotabu. Ena vuya kece na mavoa ka vakakina na kena oqo na kaukauwa veivakabulai ni Veisorovaki ni Turaga o Jisu Karisito. Kevaka mo na gole yani vua na iVakabula mai na vu ni yalomu taucoko ka vakamuria na ivakasala ni nomu bisopi, ko na kunea na bula ko gadreva tiko. Ena vukei iko na iVakabula mo rawata na kaukauwa mo vorata rawa kina na veitemaki kei na kaukauwa mo valuta kina na veivakaogai ca o ya. Me vaka e vakavulica o Moronai:

“Dou lako vei Karisito, ka taura matua na isolisoli vinaka kecega, ia dou kakua ni taura na isolisoli ca, se na ka sa tawa savasava… .

“Ia dou lako vei Karisito, ka biuta tani na ivalavala sa sega ni vakalotu, mo dou vinaka kina, ia kevaka dou sa biuta tani na ivalavala sa sega ni vakalotu, ka lomana na Kalou ena lomamudou taucoko, kei na yalomudou taucoko, kei na nomudou igu taucoko, sa na qai rauti kemudou na nona loloma, ia na nona loloma dou sa vinaka kina ena vuku i Karisito” (Moronai 10:30, 32).

Me vakalougatataka na Kalou na noda sasaga dina oqo me yaco me savasava na yaloda kei na noda vakanananu “[me] savasava tikoga na [noda] vakasama” (V&V 121:45). Au sa vakadinadinataka na loloma veivueti ni iVakabula kei na kaukauwa veivakasavasavataki ni Nona Veisorovaki, ena yaca i Jisu Karisito, emeni.