Vakavulici ena iVakavuvuli ni Kalou

iVakatakilakila

Ena gauna ni noqu cauravou au dau cakacaka vata kei tamaqu kei iratou na taciqu tagane ena susu bulumakau kei na ose ena neitou bainimanumanu ena ceva kei Utah kei na vualiku kei Arizona. A vakavulica vei keitou o tamai keitou, ni ka ga e dodonu me keitou vakayacora ena gauna keitou via toboka ka vodoka kina e dua na ose, sai koya me keitou dau biuta e dua na iluku sorenikau ena dua na vokete ka kureitaka me vica na sekodi. Veitalia sara ke ra tu ena ba se tu vagalala, era na dau cici ga mai me ra mai kana sorenikau. Keitou sa qai dau vesuki ira ena neitou dau daramaka yani vakamalua e uludra na varaile (bridle) ena gauna era kana tiko kina. Au dau kurabuitaka na vakayacori vinaka ni itavi rawarawa oqo.

Ena so na gauna, ni keitou a sega ni via kauta mai eso na sorenikau ena vanua ni mamaroroi, keitou dau biuta ga eso na duka ena vokete ka kureitaka, ena neitou saga me keitou vakaisini ira na ose me ra nanuma ni sa tu vei keitou na sorenikau me kedra. Ena gauna era dau toboka kina na neitou veivakaisini, eso vei ira era dau tu vakamalua tu ga, ia o ira na kena vo era dau veiciciyaki ka dau voleka sara me ra sega ni tobo rawa. E dau taura toka e vica na siga me rawa ni ra qai veivakabauti tale. Keitou vulica kina vakatotolo ni na neitou dau solia na neitou gauna me keitou vakani ira vinaka na neitou ose ena sorenikau ena vakavuna na rawarawa ni nodra veitokoni ka vakakina na nodra dau vakamamautaki ka levu cake kina na kaukauwa era gadreva.

E dina ga ni sa mai sivi yani e vuqa sara na yabaki ena bainimanumanu, na veika au se qai vakamacalataka ga oqo era tuberi au ki na tarogi ni veitaro oqo: Vei keda eda veivakavulici ka veiliutaki tiko ena Lotu eda sa vakarautaka tiko li na veivakamamautaki vakaivunau ka vakayalo vei ira eda sa qaravi ira tiko?

A vakavulica vakaoqo o Elder Jeffrey R. Holland: “E vuqa era sega ni lako ga mai ki Lotu me ra mai kila tale e vica na dina vakosipeli se me ra mai raici ira nodra itokani makawa, e dina ga ni ra ka yaga kece o ya. Ia, era lako mai ena vakasaqarai ni veika vakayalo. Era gadreva na vakacegu. Era gadreva na vakaqaqacotaki ni nodra vakabauta kei na vakavoui ni nodra inuinui. Era gadreva, meu vakalekalekataka, me ra mai vakavulici ena ivakavuvuli ni Kalou, ka vakaukauwataki ena kaukauwa mai lomalagi. Sa noda ilesilesi oi keda eda sa kacivi me da vosa, veivakavulici se veiliutaki me da veivuke ena noda igu taucoko ena vakayacori ni ka oqo.”¹

E sega walega ni vakatavulica vei keda na iVakabula kei iratou na Nona italai na bibi ni nodra vukei na tani ena nodra “vakavulici ena ivakavuvuli ni Kalou” (Moronai 6:4), ia, era sa dau vakarautaka talega na ivakasala veivakauqeti ena nodra rawa ni veivakavulici ka veiliutaki vakavinaka sara. Na Wase 50 ni Vunau kei na Veiyalayalati e dua vei ira na tikina ka soli ivakasala yaga sara. Ni oti na kena vakaraitaka e vica na ka, ka tarai ira tiko eso na veitabana ena Lotu e liu, a vakasalataki ira e dua na ilawalawa iliuliu na iVakabula, ena iwali ni leqa ka ra sotava tiko. A tekivuna na nona ivakasala ena nona taroga na veitaro bibi oqo: “Ia koi au na Turaga au sa tarogi kemudou mada ena taro oqo—a cava na nomudou ilesilesi?” (V&V 50:13). E muri tarava yani na kena isau matau oqo a solia na Turaga ena tikina e 14: “Raica dou sa lesi mo dou vunautaka na noqu i vakavuvuli ena kaukauwa ni Yalo Tabu, io ko koya na Dauveivakacegui sa talai yani me vakatakila vei kemudou na ka dina.”

Na isau ni leqa era a sotava tiko na Yalododonu ena 1831 e tautauvata kei na veibolebole eda sotava tiko nikua—sa dodonu me da vunautaka na kosipeli i Jisu Karisito ena kaukauwa ni Yalo Tabu.

Ena Wase 50 eso na tikina bibi ka ra ka ni vuli vei ira era veivakavulici ka veiliutaki. Na imatai ni ka bibi e kunei ena nona ivakasala na iVakabula ki na noda “vunautaka na noqu kosipeli” (V&V 50:14, vakamatatataki). E vakamacalataka vakamatata na ivolanikalou ni sega ni “vuku ena veika vakavuravura” (Mosaia 24:7) na kosipeli me da vunautaka, ia e “ivakavuvuli i Karisito” (2 Nifai 31:21). E dina ga ni ra umani vata tu ena kosipeli i Jisu Karisito na dina taucoko, ia e sega ni tautauvata kece na kedra bibi.² E vakavulica vakamatata na iVakabula ena Nona kosipeli, e sa imatai ka ka bibi duadua, na Nona isoro ni solibula. Ena Nona kosipeli talega sa rawa ni veisureti me da ciqoma na veivakalougatataki ni Veisorovaki ena vakabauti Karisito, veivutuni, papitaiso, ciqoma na Yalo Tabu, kei na vosota ena yalodina me yacova na ivakataotioti.³

Me vaka ga au a vulica ena noqu gauna ni cauravou ni ra marautaka vakalevu cake na ose na sorenikau mai na dua na vokete duka, au vulica talega ni veivakamamautaki cake na sorenikau mai na co madu, ka veivakamamautaki na co madu mai na kau-ni-sila madu, ka rawa vakakina me da na vakania e dua na ose, ia ka sega ni vakamamautaka. Ena noda itutu vakaqasenivuli ka iliuliu sa ka bibi dina sara me da raica ni da sa vakavulici ira tiko eda vakavulica ka liutaka ena noda raica matua na ivakavuvuli kei na ivakaraitaki era tu ena ivolanikalou ka vakakina na nodra vosa na parofita edaidai ka sega ni vakaoti gauna vakamareqeti ena veika sega soti ni bibi.

Ena noqu itutu vakaqasenivuli, au sa vulica rawa ni bibi cake na veitalanoataki ni Veisorovaki i Jisu Karisito, mai na vanua sara ga ka tiko kina na siti makawa o Saraemala ena jiokaravi ni gauna oqo.³ Ena noqu itutu vakailiuliu au vulica rawa ni na yaga vakalevu sara na bose ni veiliutaki, ke noda inaki cecere duadua kina sai koya na veivakacokotaki ni igu ena kena taraicake na vakabauti Karisito kei na vaqaqacotaki ni matavuvale, ka sega ni o koya na kena mai veidutaitaki vata ga na ivolanivula.

Na vosa ni Turaga ena wase 50 e toka kina e dua na ivakaro ni kevaka eda vunau “ena kaukauwa tani tale eso,” sa qai yaco kina na vosa ni Turaga, “sa sega ni mai vua na Turaga” (V&V 50:18). E vakavulici ira era veiqaravi ena Lotu na Turaga me ra dau “vunautaka walega na nodra vosa na parofita kei na i apositolo me vaka sa volai tu; io me vaka sa vakatakila vei ira ko koya na Dauveivakacegui, ena vuku ni nodra masu kei na vakabauta” (V&V 52:9). Sa na kena ibalebale li oqo ni na noda” vunautaka na noqu kosipeli“ ena noda vakamuria tiko na ivakasala ni iVakabula, e yalani ga ena vunautaki ni kosipeli kei na veivutuni ena veikalasi eda vakavulica se veibose eda liutaka?

A sauma na veitaro vata vakaoqo o Elder Henry B. Eyring ena nona kaya: E sega ni vakakina. Ia e kena ibalebale ni dodonu vei ira na qasenivuli kei ira na vakaitavi me ra dau gadreva me ra kauta mai na Yalo ni Turaga ki na yalodra na lewenilotu ena rumu me rawa ni ra guta na veivutuni ka me ra savasava.⁴

Na ikarua ni ki ena noda vakadeitaki ira eda vakavulica ka liutaka sai koya na nodra “vakavulici ena ivakavuvuli ni Kalou” (Moronai 6:4) ka vakaraitaki talega ena veidusimaki ni iVakabula ena “vunautaka na noqu ivakavuvuli ena kaukauwa ni Yalo- tabu, io ko koya na Dauveivakacegui sa talai yani me vakatakila vei kemudou na ka dina” (V&V 50:14, vakamatatataki). E sega walega ni dusimaki keda tiko na nona vosa na iVakabula me da muria na veiliutaki ni Yalotabu ena noda vakavakarau ka vakakina ena noda veivakavulici, E vakavulica tale tikoga o Koya ni sai koya na Yalotabu sa qasenivuli bibi duadua ena veigauna taucoko.

E vakavulica vakaoqo o Peresitedi Joseph Fielding Smith: “E levu cake na kena yaga kei na kena kilai na dina ena gauna e tukuna yani kina na Yalo ni Kalou mai na kena vakadewataki yani ena kena veisolitaki sara ga kei ira na veika bula ni lomalagi.”⁵

Ena vica na vula sa oti au a tiko ena dua na vuli ka ra vosa kina e vica vei ira na lewe ni Vakaitutu Raraba. Ni oti na nona vosa ena ivakasala uasivi sa qai tau oti, a qai taroga o Elder Bednar, “Na cava tale me da vulica e se bera ni tukuni mai?” E vakamacalataka ni me vaka ga na kena bibi na nodra ivakasala o ira era sa vosa oti se o ira era se bera, sa vakakina na noda dodonu me da dau vakarorogo vagumatua ki na vosa sega ni cavuti mai vua na Yalo Tabu.

Me kena ikuri na ivakasala me baleta na veivakavulici ena Yalotabu, sai koya na itukutuku oqo mai vua na noda parofita lomani, o Peresitedi Gordon B. Hinckley: “Sa dodonu … me da raica me ra vosa mai yalodra na noda qasenivuli ka sega ni mai na nodra ivola, ena nodra vakaraitaka na nodra lomana na Turaga kei na nona cakacaka vakamareqeti, ka na qai yaco kina me kama sara ena yalodra o ira era vakavulici tiko.”⁶

Na vosa ni Turaga ena wase 50 ni Vunau kei na Veiyalayalati e vakaraitaki talega kina e dua na sala veivakauqeti ka rawa ni da kila kina na yaga ni noda veivakavulici, veidusimaki kei na vuli. Eda wilika vakaoqo mai na tikina e 22, “Raica ko koya sa vunau kei koya sa vakabauta, erau sa veikilai yalo; io erau sa veivakavulici ka reki vata.”

Kemuni na taciqu kei na ganequ lomani, sa noqu masu mai na vu ni yaloqu ni da na tovolea vakaikeda o keda vakayadudua sara me da vakavulici ira ka liutaki ira eda vakavulica ena noda vakabulabulataki ira ena madrai ni bula kei na wai ni bula ka kunei ena kosipeli vakalesuimai. Ena yaca i Jisu Karisito, emeni.