Na Kaukauwa Vakalou Sa Dau Vakatakilai Mai ena Valetabu ni Kalou

iVakatakilakila

Kemuni na taciqu kei na ganequ lomani, e dua vei ira na ka au sa dau vakavinavinakataka kina na Tamaqu Vakalomalagi o ya, na gauna au mai cakacaka tu kina vaka-vunivola me 15 na yabaki ena Valetabu e Mexico City. Ena vanua tabu oqo, me vaka ga ena veivaletabu taucoko, e vakayacori kina na nodra cakacakatabu vakalotu na mate kei ira era se bula tiko ena kaukauwa ni matabete. Ena 1832, e a ciqoma kina o Parofita Josefa Simici e dua na ivakatakila me baleta na matabete:

“Raica sa lesi na matabete levu me vakayacora na cakacaka kecega vakalotu ia sa tu kina na kaukauwa me vakatakila na veika vuni ni matanitu, kei na kaukauwa me kilai kina na loma ni Kalou.

“Ia na ilesilesi oqo sa vakatakilai mai kina na kaukauwa va-Kalou” (V&V 84:19–20).

Au sa sotava oti na veika totoka ena loma ni valetabu ka sa vakadinadinataka na veika oqo.

Ena 1993, ni oti toka na noqu veiqaravi vaka-peresitedi ni Kaulotu ena México Tuxtla Gutierrez, keitou a gole yani vakamatavuvale me keitou laki sikovi rau na noqu itubutubu ka rau vakaitikotiko ena Vualiku kei Mexico. Ni keitou sa gole yani, keitou a veivosakitaka sara tiko na marau ni neitou qarava na Turaga ka raica na veisau ni nodra bula na tamata era sa ciqoma na kosipeli ena loma ni tolu na yabaki ni neitou ilesilesi. Keitou a talanoataki ira tiko era sa papitaiso, vakadeitaki, ka ciqoma na matabete, kei ira keitou kila era sa curuma na valetabu ka ra vauci tawamudu vakamatavuvale.

E a qai taro o luvequ tagane gone duadua ka vakavuna meu vakasamataka sara: “Ta, o sa vauci beka vei rau na nomu itubutubu?” Au a qai kaya vua me baleta ga ni a sa luluqa tu ena lotu o tamaqu ena vuqa na yabaki, e a sega ni vauci kina vei tinaqu ena valetabu. Ena nona vukei me lesu tale ki lotu, au a vakasamataka kina e dua na ituvatuva. Eratou sa na okati kina na luvequ ka tukuna vei iratou na veika me keitou na cakava: Ena vei-Sigatabu e dau yadra sara vakamataka o tamaqu me kauti tinaqu kei ganequ ki lotu, ka lesu tale mai vale, ka waraka me oti na lotu, ka qai lesu me laki kauti rau mai. Oti o ya au sa mani talaki iratou na luvequ me ratou lako yani vei koya ka tukuna vua, “Tukaqu, e rawa ni ko vukei keitou mada?” Au sa kila tu na cava ena tukuna mai, “Dua ga na ka sa rawa, kemudou na luvequ.” Oti eratou a qai kerei koya ke rawa ni lako vata kei iratou ki lotu ka lotu vata kei iratou me rogoca kina na nodratou ivakadinadina. O ya na imatai ni Sigatabu ni vula o ya. Au sa kila talega ni na vakaiulubale o tamaqu me kakua ni lako, kau sa mani navuca meu na curu yani ki na rumu meu tokoni iratou na luvequ me vakauqeti koya.

Sa yaco mai na gauna me sa vakayacori kina. E a gole yani o Susana na luvequ yalewa, ka kerei koya. E sega na leqa, e a tukuna o tamaqu vua ni na vakayacora ga na ka sa rawa vei iratou. E sa sureti sara o koya me laki lotu, me vaka ga keitou sa kila tu, a vakaiulubale vakaoqo o koya: “E sega ni rawa baleta niu se bera tu ni sili.” Na gauna oqori keirau sa qolouvaka yani vakaveiwatini mai na daku ni katuba: “Keitou na waraki iko!”

Ena gauna keitou sa kila kina ni sa sega ni tukuna mai e dua na ka, keirau a curu yani ka keitou kaya vata kei iratou na gone: “Sili! Sili!” E a qai yaco na ka keitou a namaka tiko. E a qai lako vata kei keitou o tamaqu, a lotu talega o koya, a vakarorogo ki na nodratou ivakadinadina na luvequ, sa malumu na yalona, ka vakatekivu mai na Sigatabu o ya e sega tale ni bau calata na lotu. Ni oti toka e vica na vula ni sa yabaki 78, erau a qai vauci kei tinaqu, ka vauci o keitou na luvena vei rau.

Au sa vakavinavinaka ki na kaukauwa vakalou sa vakatakilai mai ena cakacakatabu vakalotu ena valetabu, niu sa kila oqo niu sa rawa ni cokoti vata tale kei rau na noqu itubutubu, ki na bula tawamudu, ni oti sara mada ga na mate.

Ena vuqa na gauna eda sega sara ni kila na bibi ni taucoko ni cakacakatabu vakalotu kevaka eda sega ni sotava mai e dua na ka rarawa se lako curuma na veika e a rawa ni vakararawataka sara vakalevu na yalo ke da sega ni kila na yavu ni veivakabulai.

Ena gauna se qai dua veimama walega kina na yabaki na neirau vakamau kei watiqu, sa voleka talega na gauna me sa vakasucuma kina na neirau ulumatua. Keirau sa veivosakitaka oti me na laki vakasucu ga e Chihuahua Colonies, na vanua a sucu kina. Ena gauna o ya au a cakacaka tiko e Mexico City ka keirau sa duavata me sa gole yani e kea ni se vo tu e dua na vula me vakasucu kina. Au sa nanuma sara meu na qai laki raici koya ga e kea.

Sa yaco mai na siga me sa vakasucu kina. Au a cakacaka tiko ena gauna a qiriti au mai kina o noqu momo. E a itukutuku vinaka: “Octaviano, sa vakasucu o watimu ka sa dua na luvemu yalewa totoka.” Ena vuku ni noqu marau, au sa veitukunitaka yani vei ira na noqu itokani kei ira e vanua ni cakacaka, ka ra kaya mai meu soli jokeliti vei ira me marautaki kina na sucu ni luvequ lailai.

Ena siga ka tarava, au a soli jokeliti yani ki na va na itaba vale ni neitou vale ni cakacaka. Niu yaco ki na ikarua ni itaba vale, au sa taura tale kina e dua na qiri mai vei noqu momo. Sa duatani na itukutuku ena gauna oqo: “Octaviano, sa mamada vinaka o watimu, ia sa mai leqa o luvemu yalewa. Sa na vakayacori tiko nikua na veibulu ka sega sara ni gadrevi mo tiko kina. Na cava o na cakava?” Au a kerea meu vosa vei Rosa na watiqu, ka taroga vua ke sa mamada vinaka. A tukuna mai ni vinaka tiko o koya, ka vakatau ki na ituvaki ni noqu bula. Keirau a qai veivosakitaka na yavu ni veivakabulai, ka keirau nanuma kina na ivolanikalou oqo:

“Ia au sa raica talega ni ra sa rawata na matanitu vakalomalagi ko ira na gone era sa mate ni ra sa bera ni yacova na yabaki walu” (V&V 137:10).

Au a tarogi koya, “O vakabauta beka na veika oqo?” Ka a kaya mai: “Io, au vakabauta.” Au a qai kaya: “E dodonu me daru marau kina. Au lomani iko, kevaka e sa donu vei iko oqo, au na gade tiko ena macawa rua mai oqo, meu gole yani ka me daru qai lesu vata mai ki Mexico.”

Keirau sa kila deivaki tu ni dua na siga keirau na duavata tale kei na luvei keirau yalewa baleta ni keirau a vauci vata ena kaukauwa ni matabete ena valetabu. Sa mai tini na neirau veivosaki ena talevoni ka toso tale na noqu soli jokeliti ena vale ni noqu cakacaka.

Ena nona raici au, e dua keirau cakacaka vata a kurabui sara ka tarogi au seu vakayacora rawa tiko vakacava ni sa tu oqo na itukutuku ni rarawa. Au a qai kaya, “Kevaka o galala me tolu na auwa, sa rawa meu na vakamacalataka vei iko na vuna au sega sara kina ni rarawa vakalevu kei na veika au kila e yaco ni oti na mate.” E a sega ni galala o koya ena gauna o ya, ia a qai galala e muri. E a laki yacova sara na va na auwa na neirau veivosaki. A qai ciqoma o koya na kosipeli ka papitaiso vata kei tinana kei tacina ki na Lotu ni oti na tauri lesoni.

Au sa vakavinavinakataka na kaukauwa vakalou sa vakatakilai mai ena cakacakatabu vakalotu ena valetabu, niu sa vakadeitaka niu na laki kilai na luvequ. Au na mokoti koya, ka keitou na laki tiko vata kei koya ena bula tawamudu, me vaka ga na neirau tiko vata oqo kei iratou na luvei keirau eratou se bula tiko.

Au marau ena vuku ni vosa nei Malakai:

“Raica, au sa talai Ilaija na parofita vei kemudou e liu, ena qai lako mai e muri na siga i Jiova e levu ka rerevaki:

Ia ena vagolea ko koya na lomadra na qase vei ira na gone, kei na lomadra na gone vei ira na nodra qase, deu lako mai ka cudruva na vanua ena veivakarusai“ (Malakai 4:5–6).

Na matabete oqo ena vakayacora me tawamudu na matavuvale. Ena yaco vei au, e dua na gonetagane, meu vagolea na lomaqu kivei tamaqu ka a mate ena yabaki sa oti ka meu yalomalua tiko ena noqu inuinui, ki vua na iVakabula, niu na raici koya tale. Na matabete oqo ena vakayacora vei au, na tama, meu vagolea na lomaqu kivei rau na luvequ erau a sucu mate ka meu yalomalua tiko ena noqu inuinui, ki vua na iVakabula, niu na kilai rau, ka rau na kila niu a tamadrau vakavuravura niu raici rau e mataqu ka tukuna vei rau niu lomani rau. Sai koya oqo na matabete e sa vakatara meu raica rawa kina, ena kena sa vakalou na valetabu, na kena vakatakilai na kaukauwa vakalou kivei ira na tamata kecega—ena nodra sa mai vakabauta na Karisito, veivutunitaka na nodra ivalavala ca, ka vakasaqara vakaidina na bula marau—ka ra lako mai me vakayacora na nodra veiyalayalati tabu vata kei na Tamada Vakalomalagi ka ciqoma na Nona cakacakatabu vakalotu, sa vauci e vuravura, ka vauci talega mai lomalagi.

Au taleitaka na cakacaka ni valetabu. Au kila ni bula tiko na Kalou, ni ko Jisu Karisito sa noqu iVakabula, kei Peresitedi Gordon B. Hinckley e parofita dina. Ena yaca i Jisu Karisito, emeni.