Vunautaka na Noqu Kosipeli—na iYaya ni Cakacaka me ra Duavata kina na Lewenilotu Kei Ira na Daukaulotu

iVakatakilakila

Ena dua na gauna sa oti, keitou a sureti rau na goneyalewa daukaulotu ki na dua na vakasigalevu. Ni sa oti na neitou vakasigalevu, keitou a kerei rau me dua na nodrau ivaqa vakayalo vei keitou. Erau vakavakarau toka mai vakavinaka ka rau vakaraitaka na kena dau wiliki na ivolanikalou kei na kena makataki. Erau a vakarautaka e dua na ilavelave vou ni iVola i Momani kei na penikau ni makamaka. Keitou a ciqoma na nodrau veisureti na daukaulotu. Mai na gauna o ya, sa veisau sara na ivakarau ni neitou dau wilika vakamatavuvale na ivolanikalou. Ena veiwase yadua, keitou sa makataka ena roka tale eso na veivosa e baleti Jisu Karisito ni keitou sa raica kina e dua. Ena veigauna kece, na veika lalai vakaoqo keitou dau nanumi ira kina na daukaulotu.

Ena nodrau a vakatakila mai na daukaulotu na cakacaka oqo ni vulici ni ivolanikalou keitou sa kila sara ni sa vakaturi tiko ena Vunautaka na Noqu Kosipeli. Vakamatavuvale, keitou sa vakavinavinaka ki na iyaya ni cakacaka cecere ka kaukauwa ni kaulotu oqo.

Sa ikatolu ni yabaki oqo na nodra sa vakayagataka tiko mai na daukaulotu na Vunautaka na Noqu Kosipeli e vuravura taucoko. Sa vakatorocaketaka sara vakalevu na cakacaka ni kaulotu. Sa mai vakavotukana oqo na rai cecere nei Peresitedi Hinckley: O ira na daukaulotu era “sa kenadau ni vakavulici ni kena lesoni.” Era “vakavulica na ivakavuvuli ena nodra vosa ga ena veidusimaki ni Yalotabu” (“Missionary Service,” Soqoni ni Vuli ni Veiliutaki e Vuravura Raraba, 11 ni Janu., 2003, 19).

Ni ra vulica vagumatua na daukaulotu na Vunautaka na Noqu Kosipeli, era vulica ka bulataka na ivakaro kei na ivakavuvuli bibi ka yaco kina me ra tamata yaco ena nodra ilesilesi bibi oqo. E dina oqo, ia era se gadreva tikoga na noda veivuke kei na veitokoni kece sara. Na noda duavata ga ena rawa me vakavotukana kina na ilesilesi cecere ka a soli vei ira na iApositolo ena gauna makawa kei na gauna oqo: “Dou lako yani ki vuravura taucoko, ka vunautaka na itukutuku vinaka kivei ira na tamata kecega” (Marika 16:15).

Ena kena gadrevi me mana na noda sasaga oqo, e dodonu me da duavata kei ira na daukaulotu, ka me da veikilai yalo sara vakavinaka. O sa kila tiko beka na yalodrau na daukaulotu? Au sega ni tukuna tiko na nodrau ivosavosa, ia na nodrau iwalewale ni kaulotu. Eda dau raica ka vakadikevi ira ena nodra sureti ira na tamata me ra vakarorogo ki na nodra itukutuku. Era vakavulica na ivakavuvuli ni kosipeli ka sureti ira era sa gadreva me veisau na nodra bula ka papitaiso ka vakadeitaki me ra lewe ni Lotu.

Kevaka me da kilai ira vakavinaka ka vukei ira na daukaulotu, sa dodonu me da vakabauta tiko me vakataka ga na nodra vakabauta, me da vakasama tiko me vakataka ga na nodra vakasama na daukaulotu ka gagadre me vaka na nodra gagadre na daukaulotu. Eda na rawata beka vakacava na veika oqo?

E dua na kena sala bibi, o ya, me da lako vata kei ira na daukaulotu ka raica na veika era vakayacora tiko. Ia e dua tale na sala o ya me da kila sara vakavinaka na Vunautaka na Noqu Kosipeli ka vulica vakalevu na cakacaka ni daukaulotu. Mai na gauna a kaya kina vakaoqo o Peresitedi McKay “Na lewenilotu yadua e daukaulotu,” (ena Conference Report, Epe. 1959, 122), era sa gugumatua tiko na lewenilotu me ra vakaitavitaki ira vakalevu ena kena kaburaki na kosipeli. Na Vunautaka na Noqu Kosipeli sa noda idusidusi totoka me veivuke ki na noda vakamuria na veisureti oqo. Na noda vulica vakaikeda yadua na Vunautaka na Noqu Kosipeli ena sega walega ni vakatorocaketaka na noda kila, ka marautaki ira na noda daukaulotu ia ena vukei keda sara ga ena noda bula ena veisiga.

O iratou yadua na lewe ni noqu matavuvale eratou yadua tu na ilavelave ni Vunautaka na Noqu Kosipeli.” Na kena vulici na idusidusi oqo sa tokona sara ga na kena vaqaqacotaki e dua na ivakadinadina. Ena vukea na kena kilai vakavinaka na veivakavuvuli ni kosipeli bibi kei na yalo ni gagadre ni veiqaravi. Au kerea meu vakamatatataka mada eso na iulutaga mai na Vunautaka na Noqu Kosipeli ko na qai kila kina vakavinaka:

Eda wilika:

“Au na kidava ka kila vakacava na Yalotabu?”

“Me vakaevei na noqu vakarau vakavinaka ni laki veivakavulici?”

“Na cava meu vulica ka vakavulica?”

“Na cava na itavi ni iVola i Momani?”

“Au na vakatorocaketaka vakacava na ivakarau Vakarisito?”

E sega beka ni o koya oqori na veika eda gadreva kece me da vulica? Kivei keda kece sara eda gadreva me da lewenilotu daukaulotu gugumatua cake ka vinakata me da kila na sala me da vukei ira kina na daukaulotu, na Vunautaka na Noqu Kosipeli sa umani tu kina na veivakasama kei na veituberi e kaukauwa sara. Eda sa vulica oqo na sala me da vukei ira kina na daukaulotu me ra raici ira rawa na tamata me ra vakavulica kei na noda veitauriligataka vata yani na lewenilotu kei na daukaulotu na nodra vukei o ira era vakataroga tiko na Lotu. Eda sa vulica me da kila na vuni kena bibi na noda kerei me da vakaitavi ena vakatorocaketaka ni vakabauti Jisu Karisito kei na sala me da tucake vata kina kei ira na noda itokani era sega ni lewenilotu ka ra sa kovuti tiko ena cakacaka ni bula veisau ni saumaki mai.

Era vulica na daukaulotu ena veisiga na ivolanikalou vata kei na Vunautaka na Noqu Kosipeli. Era sa vulica vakakina na ivakavuvuli kei na kila ka ena nodra bulataka. Vakatabakidua ena nodra vulica me ra dusimaki mai vua na Yalotabu ena nodra cakacaka. Kevaka eda gadreva me da vuli vakataki ira na daukaulotu, sa dodonu me da vulica talega vakavinaka na Vunautaka na Noqu Kosipeli ka vuli mai vei ira na daukaulotu ena veisiga.

Ena ivakamacala taumada ni Vunautaka na Noqu Kosipeli eda wilika kina vakaoqo: E baleti ira na daukaulotu tudei ni Lotu na “Vunautaka na Noqu Kosipeli. Ia, na veivakavuvuli kei na veivunau e vakavulici eke era vakayagataka talega na daukaulotu ni tabanalevu kei na iliuliu ena nodra vakasaqara na kena tara cake na matanitu ni Turaga. Na kena vakavulici vakawasoma na ivola vakarau oqo ena rawa kina vei ira me ra vakayacora na nodra itavi me vaka e dua na lewenilotu daukaulotu ka na vakauqeta na duavata kei ira na daukaulotu tudei” (xi).

E vakavulica o Elder Richard G. Scott ni sa dodonu vei ira na lewenilotu me ra vulica vakavinaka na Vunautaka na Noqu Kosipeli. A kaya o koya: “E vuqa na veika cecere sa rawati rawa … mai na gauna a tauyavutaki kina na Vunautaka na Noqu Kosipeli, ia na kena e uasivi sara era sa roro tiko mai ena noda sa vaqaqacotaki keda tiko ki na noda vakayagataka na iyaya cecere oqo ni daukaulotu” (“Na Kaukauwa ni Vunautaka na Noqu Kosipeli,” Liaona, Me 2005, 31).

Ena rairai lailai beka na gauna ni noda vulica na veika oqo, o koya gona au gadreva meu vakatututaka mada e vica na ka me na veivuke kina.

• O ira kece na itabagone era vakavakarau ki na kaulotu sa dodonu me ra vulica vakavinaka na Vunautaka na Noqu Kosipeli vata kei na ivolanikalou.

• Sureti ira na daukaulotu ki na nomuni vale. Kerei ira me ra vakavulica vei iko kei na nomu matavuvale e dua na ivakavuvuli se vunau mai na Vunautaka na Noqu Kosipeli.

• Ena so na gauna, me vakayagataki na Vunautaka na Noqu Kosipeli ena gauna ni lotu vakamatavuvale. Solia na gauna vei ira na luvemuni itabagone me ra vakavulica na nomu matavuvale me vaka era dau cakava na daukaulotu. Ena neitou vuvale, eratou a veituberi na luvei keirau mai na so na lesoni e veivakurabuitaki sara. Keitou a qoroya na nodratou maqosa ena vakavulica na ivakavuvuli rawarawa eso oqo. Eso na gauna keitou a sureti ira na itokani eso ki na soli ni veilesoni o ya.

• Sa rawa me ra vakayagataka o ira na qasenivuli ni kosipeli na ivakavuvuli e rawarawa, ia e mana sara na kena era umani tu ena Vunautaka na Noqu Kosipeli, me veitokoni ki na lesoni sa dau vakarautaki tu.

• Sa vakadewataki ka tabaki tu na Vunautaka na Noqu Kosipeli ena vuqa sara na nodra veivosa ni vanua na lewenilotu. Ena veimatanitu se qai tauyavu walega kina na Lotu, sa rawa me vakayagataki vata kei na Vunautaka Na Noqu Kosipeli na ivolanikalou me ivurevure ka yavu ni kena vulici ka vakatavulici na kosipeli.

• E sa veivakayaloqaqataki tiko o Elder Scott kivei ira na noda iliuliu ni Lotu me ra vakayagataka na veivola vakaoqo “… ena bose ni mataveiliutaki, komiti levu ni matabete, kei na matabose ni tabanalevu” (Liaona, Me 2005, 34).

• Me vakayagataki na Vunautaka na Noqu Kosipeli me ivurevure ni vuli, vunau, ivaqa vakayalo, lesoni, yasanibuka kei na vuli ni tamata yadua.

Au sa vakadinadinataka ni ivoladusidusi ni kaulotu oqo sa mai vua na Kalou. Sa dodonu me da vulica sara vakavinaka, me rawa kina ni da kilai ira tiko vakavinaka na noda daukaulotu kei na nodra cakacaka. Na daukaulotu kei na lewenilotu e dodonu me ra vosataka vata edua na vosa. Sa dodonu me da duavata tiko ena noda sasaga ni vunautaki ni kosipeli. Ena yaco me da laki iyaya ni cakacaka ena liga ni Turaga, e kaya kina o Koya, “Raica au na vakasoqoni ira vata mai na noqu tamata digitaki mai na iyalayala vava kei vuravura, io ko ira kecega sa vakabauti au, ka muria na noqu vunau” (V&V 33:6).

Ni da lewe ni Nona Lotu, eda sa namaki tiko me da tiki ni cakacaka levu oqo ni vakasokomuni. Au sa vakadinadinataka ni sa dina na veika oqo, ena yaca i Jisu Karisito, emeni.