Oqo na Kena Gauna

iVakatakilakila

Ena gauna e tukuna kina o Peresitedi James E. Faust vei au kei watiqu, ni keirau sa na lesi tiko ki Lima, Peru, keirau sega ni kila ni ena ika 15 ni Okosita, 2007, oti toka ga e vica na siga na neirau yaco yani, keirau na donumaka e dua na uneune vakaitamera. Sivia e 52,000 na vale e a vakarusai ena kena kaukauwa. Ka ca sara vakalevu, ni sivia na 500 na tamata era a mate kina. E lewe ciwa vei ira oqori era lewe ni Lotu. Era sotava na lewenilotu ena iteki e Ica kei Pisco kei na tikina o Canete kei Chincha na vakacaca ni sa dau oti na uneune.

Totolo sara na nona vakarautaka na Lotu na veivuke vei ira na lewe ni lotu kei ira era lewe ni vakabauta tale eso. Ena mataka ka tarava ni oti na uneune, era sa tekivu ciqoma na veivuke ni kakana kei na isulu na lewenilotu ka ra vakaitikotiko ena vanua ka vakacacani ka bera na vakasigalevu era sa ciqoma na veivuke raraba vakamatatamata mai na Lotu o ira na lewe ni veitaqomaki vakamatanitu. Era lewe levu na lewe ni Lotu ka sa vakacacani na nodra vale era sa mai vakavaletaki ena veivalenilotu. E dina ga ni vakasauri na kena yaco na leqa, ia a cakacaka sara vakavinaka na soqosoqo ni matabete me ra vukei na vakaleqai.

Ni oti ga e vica na miniti na kena vakacaca na uneune era sa yavala na peresitedi ni iteki kei na tikina kei ira na bisopi me ra sa laki vukei ira na lewenilotu. Na ca ni veika e yaco tiko e yacova sara yani na nodra lomasoli na iliuliu ni matabete me ra sa lako curuma yani na dredre me vaka: na kena sa bogi tu; boko tu na cina; sa levu sara na vakacaca; ka se yavavala tu ga na delai vuravura. O ira na iliuliu ni matabete veivakurabuitaki oqo era sa maroroi ira vinaka tu yani na nodra matavuvale ka curuma yani na buto ni bogi, vei ira na tamata era veitagicaki tu ena maliwa ni veivale ka ra sa vakacacani. O ya na ituvaki ni vanua era lako curuma yani na noda iliuliu ena bogi kei na veisiga ka tarava mai, era tadrava yani na yavavala ni dela ni qele ni dau oti na uneune kei na ivakaro ni ualoka. Era vaqaqara ena veivale ka ra sa kasura tu, ena maliwa ni veilecayaki, ena nodra sasaga me ra yacovi ira yani na lewenilotu ka ra sega ni kauwaitaka na nodra bula. Tukuna vakaoqo e dua na bisopi, “Au sega tale ni qai vakasama vakarua niu sa cici yani ka vakasaqarai ira na tuakaqu kei na ganequ kei ira na iliuliu lewe ni Lotu.” E a qai kunei ira. E vaka o ya na nona lako curuma yani na bogi.

Na cava e yavalati ira na iliuliu oqo me ra lako yani ka vukei ira na tani, ka sega ni bau kauwaitaka na nodra bula? E ka dina kece ni nodra vakabauta na iVakabula kei na Nona Lotu. Vakakina na nodra kila na nodra ilesilesi vakailiuliu ni matabete. Vakakina na ivakavuvuli ni kosipeli ka sa ceuti tu ena nodra bula ni bera na uneune, sega ni gauna ni leqa—sega ni ceuti ena wainivolavola ia ena bukawaqa ni Yalotabu ki na viciko ni vatu rabaraba ni yalodra (raica 2 Korinica 3:3).

Sa dau tu ga na dina ni kena dau yaco na uneune. E sega ni dua ena kila na gauna ena yaco kina kei na kena yaco. Ni yaco mai e sa bau vakacaca sara ga. Ia ena veiliutaki ni matabete e a sa qaravi na bolebole ka a sotavi. Ena levu na gauna ni ra sega ni rawata na lewenilotu, e dau veivuke kina na Turaga. Eso na lewe ni lotu era kaya ni ra raica eso na tamata ka ra vakaisulu vulavula tu ni ra lako mai ka veivuke me ra vakabulai ira. Eso tale era rogoca na domo ni veituberi. Na veiyabaki ni qaravi itavi ena loma ni Lotu, sa vaka me koronivuli ni vakavakarau ni kena vakarautaki na veika me ra veivukei kina vakai ira.

Na ka o ya e yaco talega ena noda bula. Eda na sega ni kila se gauna cava ena yavalati keda kina na uneune. Era na sega ni vaka na uneune ka yavalata na vuravura, me vaka a yaco e Peru, ia na uneune ga ni veitemaki, ivalavala ca, se veivakatovolei me vaka na sega tu ni cakacaka se tauvimate bibi. Nikua sara ga na kena gauna me vakarautaki kina na kena yaco mai na mataqali uneune vaka o ya. Oqo na gauna me vakarautaki kina, sega ni gauna e sa yaco kina na leqa. Na cava eda sa cakava tiko nikua me da ceuta kina ena vuni yaloda na ivakavuvuli ni kosipeli ka na maroroi keda ena gauna e sotavi kina na dredre?

Me kena ivakaraitaki, na cava e a teivaka e yalona o Josefa ka a volitaki ki Ijipita me rawa ni kaya kina, “Au na qai cakava rawa vakaevei na ka ca vakaidina oqo, ka ivalavala ca vua na Kalou?” ena nona via drovaka tiko na wati Potifa me kakua ni voroka na lawa ni tiko savasava? Na cava e sa teivaka rawa tu e yalona o Nifai, me vaka ni qai yaco mai vua na ivakaro mai vua na Kalou sa rawa kina vua me a kainaka, “Au na lako ka kitaka … niu sa kila”? (1 Nifai 3:7).

Na ka erau cakava na iliuliu rogo oqo erau laiva vua na Yalotabu me vola ena yalodrau na ivakavuvuli ni kosipeli. Na volavola qo e sega ni ka ga ni dua na bogi. Na kena vakamatautaki ki yaloda na ivakavuvuli ni yalosavasava ena vukea vakalevu sara na noda vakavakarau ki na gauna ni uneune vakayalo. Na ivakaraitaki oqo ena rawa ni vakamatautaki ni vakasamataki ka tagutuvi laivi na veivakayarayarataki ca.

Ni vakawakana e lomada na ivakavuvuli tawamudu ena gauna eda sega walega kina ni tovolea me da dau wilika na nodra ivakavuvuli na parofita kei na ivolanikalou, ia ena gauna talega eda vakananuma kina vagumatua ena yalo ni masumasu. Me vakataki Nifai, o koya e dabe ka qai mai vakasamataka yani. Ni caka vaka o ya, e sa vakamatautaki koya ki na ivakavuvuli talei (raica 1Nifai 11:1). Taura na gauna mo vakayacora kina na ka e gadreva vei keda na Turaga: “Mo dou tugana sara ki lomamudou na veika oqo, ia mo dou nanuma tikoga e lomamudou na veika lagilagi ni bula tawamudu” (V&V 43: 34.). Ena dua na vuravura ka sa dau vinakata vakalevu na noda gauna sa na ganita me da na taura na gauna me da na dau vakananuma kina ena noda veimatavuvale me rawa kina ni da kila na ivakavuvuli vakalou. Me vaka e kaya na iVakabula, “… ia mo dou lako mada ki na nomudou veivale ka vakasamataka e lomamudou na ka au sa tukuna … me rawa ni dou kila ka vakarautaki kemudou vinaka mai mo dou rogoci au tale ni mataka” (3 Nifai 17:3).

Ni vakamuri oqo, ka vakatalega kina ke da talairawarawa tiko ki na ivakavuvuli ni Turaga ena veika me baleta na veivakayarayarataki ca, na noda dolavi keda ki na ivunau kei na kena ivakavuvuli ena tomani tiko na kena vakavinakataki. Ena tiko sara ga eso na tamata ka ra na dau vakasesei keda me da na rawai ka qai laurai ni da a sega tu ni vakarau ena gauna e basika mai kina na uneune ka tarava. Ena vuku ni ka oqo, e sa vakarautaka tu vei keda na iVakabula e dua na ki me na vukei keda me da rawa ni vakarau vinaka nikua ena vuku ni veitemaki vakasauri era dau basika mai. E kaya o Koya, “[Ia, kevaka sa vakacalai iko na ligamu, muduka tani; se ke vakacalai iko na tacimu ka sega ni kere veivosoti ka biuta tani, ena muduki tani ko koya]” (iVakadewa nei Josefa Simici Marika 9:40).

Sa dua na ka vinaka, ni iVakabula vakaikoya sara ga e vakavulica ni ibalebale ni musu laivi ni liga. E sega ni vakamavoataki koya ga vakaikoya, ia e baleta na kena kau laivi mai na noda bula eso na ivakarau ka dau vakataotaki keda me da na dau vakavakarau ki na uneune ka na yaco mai ni mataka. Kevaka e tiko na noqu itokani ka sa dau vakavuna meu caka cala, na ivakaro e sa matata sara tu ga: [“… ena vinaka vei iko mo curu ki na bula me kakua na tacimu, mai na nomu na biu vata kei tacimu ki eli… .”] (iVakadewa nei Josefa Simici Marika 9:41.) E a vakayagataka na Turaga na ivakavuvuli oqo ena nona vakaroti Nifai me dro laivi mai vei rau na tuakana ka ni ra sa tekivu me rau itakataka ni veivakayarayarataki ca (raica 2 Nifai 5:5).

Sa muria sara ga mai na veikalikali qo e sega walega ni baleta na itokani, ia na itakataka ni veivakayarayarataki ca kecega me vaka na parokaramu ka sega ni dau logaloga vinaka ena televiseni, itikotiko ni Initaneti, iyaloyalo yavala, ivola ni wilivola, qito, se ivakatagi. Me ceuti e yaloda na ivakavuvuli oqo me na vukei keda me da vorata na veitemaki ka dau vakamalumalumutaki keda ki na veivakayarayarataki ca.

Na noda vakamatautaki keda ki na ivunau kei na ivakavuvuli ena vakavuna me da vakaitutu ena matabete yavutaki vakatitobu tu ena veika bibi ni kosipeli. Eda na vakarautaki vakavinaka cake tu me da dau sotava na yavala ni qele ka na yaco mai vakasauri, ena gauna e sega sara ga ni namaki kina. Ni da vakaitutu ni matabete eda na vakila na yalayala e a soli vei Jeremaia na parofita ena soli talega vei keda, “Ia, koi au, raica kau sa lesi iko ena siga oqo mo koro kaukauwa, ka mo duru kaukamea, ka bai parasa ki na vanua taucoko” (Jeremaia 1:18).

Sa na qai rawa ni da vakaraitaka na noda vakavinavinaka me vakataki Sisita Linda Cruzado mai Ica. Ena nona sotava na dredre ena bogi taucoko, sa qai vola, “Ni cabe mai na rarama ena siga ka tarava, e vakaraitaka mai na Nona loloma na Tamada Vakalomalagi ena kena sa cila mai na matanisiga ka vakakina ena kena bogi ka vakacegui keda ena cila ni veikalokalo.”

Nikua sa noda gauna me da yaloqaqa ka digitaka me da na solia ki na yaloda na vakabibitaki ni vakamuri ni nona ivakavuvuli na iVakabula. Au kila ni bula tiko o Koya, ka ni gauna eda sa cakava kece sara kina na ka e rawa ni da cakava, o Koya e sa na qai vakacokotaka me taucoko. Au vakadinadinataka ena yaca i Jisu Karisito, emeni.