Au na Vakaukauwataki Iko; Kau na Vukei Iko

Sa cakacaka sara tiko vagumatua o Setani me na valuta na matavuvale. E dau tukuna o koya ni sega ni bibi na vakamau, ni sega ni gadreva na tamadra kei na tinadra o ira na gone, ka sega ni bibi me qaqaco vinaka tu na veimatavuvale. E tukuna o koya ni yavunibula savasava e ka ni gauna makawa ka ka lialia. Ena gauna era yaco mai kina na bolebole, ena kaya mai o Setani me da biuta laivi na noda vakabauta vakalotu ka muria ga na veika sa muria tiko o vuravura. Ena dau bacani keda ena veika dokai kei na iyau levu ka tukuna vei keda me da muria ga na bula e rawarawa. Ena valuta o koya na noda vakabauta na Kalou ka na tovolea talega me vakayalolailaitaki ira na veimatavuvale era sa qaqaco vinaka tu kei ira era tiko veilomani vinaka. E dau marau o Setani ni da sa dau yalolailai mai—vakalailai mada ga.

O ira na lewe ni dua na matavuvale ituvaki vinaka era kila se o cei o ira, ka ra kila tiko na vanua era mua tiko kina kei na veika era gadreva me ra yacova. Na matavuvale e luluqa tu e sega ni ra kila se o cei o ira, e sega na nodra ituvatuva, sega na kena ivakadei, ka sega tu na iusutu ni yavunibula se ivakatagedegede me ra mua kina.

Eso vei ira na itubutubu ni veimatavuvale era luluqa era a vakavulici taumada mai ena yavunibula vinaka ia era a gole tani ki na sala ni gunu alakaolo, waigaga, se veivakatotogani tale eso ka kauta laivi sara ga na nodra digidigi dodonu kei na nodra rawa ni vakatulewa vinaka. Ena dua na matavuvale ka ituvaki vinaka tu, era dau veivakavulici ena ivakaraitaki o ira na itubutubu lomani ka sega ni ra dau tukuna tikoga vei ira na gone ka me ra vakayacora. Era cakava vata ka vakaraitaka saraga na kena icakacaka vei ira.

Me nanumi tiko, ni sa iyau talei o ira na gone. Era luvena vakayalo na Kalou. Au sa raica na bula vinaka totolo mai ni yalo ni tamata me ramase mai ena gauna au dau vakataroga kina na nona bula rawa tiko vakacava e dua na gone.

Kemuni na taciqu lomani, ni lomani ira ka karoni ira na luvemuni. Tukuna vei ira ni ko lomani ira. Mo dau mokoti ira. Na veivinakati e vakaraitaki ena ivukivuki ena dau cakamana. Dau vosataka na veivosa ni loloma. Vakaraitaka na iwalewale ni kena vakayacori e dua na ka. Vakavulici ira me ra dau masu. E kaya vakaoqo o Peresitedi James E. Faust, “Na masu vata vakamatavuvale e kauti keda vata mai. Era na vulica rawa na gone lalai na masu ni ra rogoca na nodra masu o ira na nodra itubutubu kei ira na tuakadra… . Na masu ni tamata yadua kei na masu vakamatavuvale sa ka yaga sara ki na bula marau ni tamata yadua kei na matavuvale.”¹

Mo dau wilivola vei ira na gone. Mo dau wilika na ivolanikalou. Vukei ira me ra kila ni ivolanikalou ena dusimaki ira ena nodra bula taucoko. Mo ni dau lotu vakamatavuvale vata kei ira na gone. Mo dau tukuna vei ira ni sa ka bibi dina vei iko na nomudou gauna vata vakamatavuvale.

Sa dau nodra itovo na gone me ra dau ciqomi ira tu ga vakarawarawa na nodra itubutubu kei na caka cala era dau cakava na nodra itubutubu. Era dau veivosoti, guilecava na veika, ka toso sara yani ki liu vakatotolo cake mai vei ira na qase. Kakua ni yalo ca. Mo dau kere veivosoti ni ko sa cala. Kerea me vosoti iko o luvemu. Veisautaka na nomu itovo ka toso sara yani ki liu.

Me nanumi tiko ni gadrevi vakalevu na yalovosota ena susugi cake ni dua na gone. Ena gauna vata era ka talei tiko kina, era na dau veivakacudrui, veivakasosataki, ka so na gauna era dau vakatuburarawa. Sa gadrevi eke na yalovosota dina kei na yalomalua me kakua kina ni vakayacori se cavuti kina na veika eda na qai dau veivutunitaka e muri. Ena so na gauna sa gadrevi vei kemuni na itubutubu mo ni laki “vakacagicagi mada” mo ni kakua kina ni cakava e dua na cala bibi. Ena veivuke talega na nomu gole yani ki tautuba me dua ga na miniti mo laki vakalutu icegu kina.

Sa sega tale ni dua na ivakasala vinaka me vakataka na kena e tiko e “Na Matavuvale: Ai Vakaro ki Vuravura Raraba.”² Mo wilika. Ka vulica. Mo taura me ivakatagedegede ni nomu matavuvale. Me dau ulu tiko ni veivosaki ena so na nomudou lesoni ena lotu vakamatavuvale me kakua kina ni dua na lewe ni matavuvale e sega tiko ni kila na ituvatuva ni nomuni matavuvale.

Sa dina sara, ni sa imatai ni nodra ilesilesi na itubutubu o ya me ra vakavulici ira na gone ka vaqaqacotaka na matavuvale. Ia, sa tu talega e vuqa me ra na veivuke mai. Erau a vinaka sara na noqu itubutubu ia erau a sega ni cakava ga vakataki rau.

Au a tiko ena loma ni Valecavu ena isevu ni gauna a kaburaka raraba kina o Peresitedi Hinckley na ivakaro raraba ni matavuvale ena Soqoni Raraba ni iSoqosoqo ni Veivukei ena Sepiteba ni 1995. O ya e dua na gauna talei. Au a vakila na dina ni itukutuku o ya. Au a nanuma sara kina ni: “Oqo e dua na idusidusi cecere vei ira na itubutubu. Sa dua talega na itavi levu vei ira na itubutubu.” Au nanuma kina ni sega ni na yaga sara vei au ena vuku ga niu sega tu ni vakamau ka sega na luvequ. Ia a totolo sara na noqu vakasama: “Ia sa baleti au talega. Sai au na lewe ni dua na matavuvale. Au luvena yalewa, au tacina, au nei, au tatacina, au vugona, kau makubuna yalewa e dua. Era tiko na noqu ilesilesi—kei na veivakalougatataki—baleta niu lewe ni dua na matavuvale. Kevaka mada ga meu sa iotioti ni lewe ni noqu matavuvale e bula tiko, au se lewe tikoga ni matavuvale ni Kalou ka sa tiko na noqu ilesilesi meu vaqaqacotaki ira tiko na matavuvale tale eso.”

A kaya vakaoqo o Elder Robert D. Hales, “Na kena vaqaqacotaki na matavuvale sa noda itavi vakalou oi keda na itubutubu, gone, wekada vakadra, iliuliu, qasenivuli, kei keda na lewe ni Lotu yadudua.”³

Oi keda na marama lewe ni iSoqosoqo ni Veivukei sa rawa me da veivukei ena kena vaqaqacotaki na matavuvale. Sa noda madigi me da veiqaravi ena veisala e vuqa. Ena so na gauna eda na sotavi ira kina na gonelalai kei na itabagone era gadreva sara tikoga na veika sa tu me da solia. Oi kemuni na marama sa tu vei kemuni na veivakasala vivinaka kei na kila mo ni wasea yani vei ira na marama tina goneyalewa. Ena so na gauna ena rawa ni dau cauraka mai e dua na iliuliu ni Goneyalewa se qasenivuli ni Lalai na veika sara ga e gadrevi me vaqaqacotaki kina na ka e via vakavulica tiko e dua na itubutubu. E dina o ya ni sega sara ni gadrevi me da vakaitutu vakalotu me da qai laki veivuke yani kivua e dua na itokani se dua e tiko tikivi iko.

Na veivuke levu ga sa tu vei keda me da vaqaqacotaka kina na veimatavuvale eso sai koya na noda kila ka bulataka tiko na ivakavuvuli nei Karisito ka vakararavi ga Vua me na vukei keda. E vakavuqa, niu dau vukei ira na veimatavuvale era vakaleqai tu, au dau diva me ra kila mada ga na veimatavuvale o ya na iVakabula ka vakavulici ira tiko na luvedra ena ivakavuvuli nei Jisu Karisito.

“Ia sa uasiviti ira na tamata ko Koya ena nona vosota na veivakatovolei, ena rarawa ni yago, na viakana, na viagunu kei na oca me yaco sara ki na mate.”⁴

Sa sotava oti na Karisito na rarawa kece sara eda rawa ni vakasamataka rawa. Sa kila vakavinaka tu o Koya na lomada. E kilai keda. Ena vukei keda o Koya.

Sa sinai tu ena ivolanikalou na ivakaraitaki ni nona veivuke na Karisito ka na vakayacora tikoga. Oqo na kena eso au dau taleitaka:

“Dou lako mai vei au, koi kemudou vakaadua ga sa oca, ka colata na icolacola bibi, ia kau na vakacegui kemudou.”⁵

“Ko ira kecega sa vakabauta na Kalou sa dau vukei ira ko Koya ena nodra leqa, ka vakacegui ira mai na nodra rarawa, ia era na laveti cake ena siga mai muri.”⁶

“Ia mo yalomalumalumu; raica ena tubera na ligamu na Turaga na nomu Kalou, ka vakayacora na nomu kerekere.”⁷

“Raica ko sa daumasuti au ka sa vakacegui iko kina na noqu Yalo Tabu.”⁸

“Mo yalodina ka gumatua ni muria sara na vunau ni Kalou, ia au na ovici iko ena noqu loloma.”⁹

A kaya o Peresitedi Gordon B. Hinckley, “Mo totolo sara mo kakua ni vakawalena na nomu matavuvale. E sega tale ni tiko e dua na ka e talei cake vakalevu… . Ena veika sa mai cauraki ka vakayacori, sai koya ga na isema vakamatavuvale oqo ena kauti keda yani ki na bula e tarava mai.”¹⁰

Me da nanuma na loloma cecere ni noda iVakabula. E kaya kina o Koya ena Aisea 41:10: “Kakua ni ko rere, niu sa tiko vata kei iko: Kakua ni ko taqaya, niu sa nomu Kalou: kau na vakaukauwataki iko; io, kau na vukei iko.” Ena tikina e 13 a kaya tale kina o koya, “kau na vukei iko.” Ka tokaruataka tale o koya ena tikina e 14, “kau na vukei iko.”

Mo vakabauta na iVakabula. Ena vukei iko o Koya. E lomani keda o Koya. E gadreva o Koya me da bula marau.

Au vakadinadinataka ni sa bula dina tiko na noda Turaga ka iVakabula. Au sa vakadinadinataka ni na vukei keda dina o Koya. E sa vukei au oti vakavuqa o Koya, ka na vukei iko o Koya. Oqo niu kila. Ena yaca i Jisu Karisito, emeni.