Peresitedi Henry B. Eyring
iKarua ni Daunivakasala ena Mataveiliutaki Taumada

Ena gauna a mai vakasamataka tiko kina o Peresitedi Henry Bennion Eyring na veisau vakasauri ni gaunisala sa mai muataki kina na nona bula, e marautaka o koya ni sa mai kila kina ni Kalou sa dau vakayacora na veika mana ki na nodra bula na Luvena ena gauna mada ga ni nodra bula rerere se veilecayaki.

Na kila o ya e vakavurea mai vua na kaukauwa ni vakasamataka na ka e vakatoka o koya me “ilesilesi cecere” sa mai dregati vata ki na nona kacivi oqo ki na Mataveiliutaki Taumada. Sa mai vakatawana oqo o Peresitedi Eyring na itutu sa mai lala toka ena vuku ni nona sa mai takali o Peresitedi James E. Faust ena ika 10 ni Okosita, 2007.

Ena nona sa mai kakavaki tiko kina oqo me na cakacaka vagumatua sara vata kei Peresitedi Gordon B. Hinckley kei Peresitedi Thomas S. Monson, sa na dau nanumi Peresitedi Faust tikoga kina o koya.

“Au na tovolea meu kakua ni nanuma meu sa na mai tautauvata sara kei na ivakatagedegede cecere ni veiqaravi nei Peresitedi Faust baleta ni na sega ni rawa o ya,” a kaya o koya. “O koya e dua na iKarua ni Daunivakasala ena Mataveiliutaki Taumada e duatani na nona vakarautaki ka vakataucokotaki. E tu vua na isolisoli cecere sara.”

Ena dua na soli itukutuku raraba ni oti toka ga mai na nona sa kacivi ena ika 6 ni Okotova, e nanuma lesu o Peresitedi Eyring na nona a kacivi yani ki na valenivolavola nei Peresitedi Faust ni oti na nona sa kacivi ki na Kuoramu ni iApositolo Le Tinikarua ena 1 ni Epereli, 1995. Au a namaka tiko me laki vosa vakayaloqaqataki au, ia e a dusi cake ki lomalagi o Peresitedi Faust, dredre, ka kaya mai, “Kua ni vosa mai vei au. Mo vosa yani Vua.” A vakamacalataka o Peresitedi Eyring, “Ia a sega mada ga ni saga me walia na noqu leqa taucoko vakacakacaka, a muataki au ga o koya vua na Kalou. E tu vua na isolisoli me kila na veika kece ka dau yalololoma—o koya e a dua na nomu itokani talei dina ka dauniveituberi vinaka duadua.”

Ena nona vakaraitaka tiko na nona vakavinavinaka vua na Turaga ena vuku ni Nona veivakabauti vua ka vakakina kivei Peresitedi Hinckley me baleta na nona sa nuitaki tiko, a kaya kina vakaoqo o Peresitedi Eyring, “Sa qai dua dina na … madigi cecere oqo meu mai qaravi ira kina na tamata au lomana ka tokoni ira ni ra sa parofita, daurairai, ka dauvakatakila ka ra sa iApositolo dina ni Turaga o Jisu Karisito.”

Ena nona sa mai vakavinavinakataka tiko na liga veitokoni ni Turaga, e kuria kina vakaoqo, “sa dau kaya tikoga vakaoqo o Peresitedi Hinckley, ‘Era na laki vinaka ga mai.’ Sa tu talega vei au na vakabauta o ya niu sa mai tadrava tu oqo na ilesilesi cecere oqo.”

E a sucu o koya ena ika 31 ni Me, 1933, mai Princeton e New Jersey, ka ikarua mai na tolu na gonetagane a sucu vei rau o Henry kei Mildred Bennion Eyring. E turaga kilai levu o tamana, ni dua na daunikemesi kilai e vuravura raraba, ka dau vakayaloqaqataki iratou na luvena tagane me ratou rawata na kila ka vakadauvakadidike. A rawata rawa o Peresitedi Eyring na nona ivola ena fisiki(physics), ia ni oti na nona laki vakaitavi ena Mataivalu ni Vuka ni Amerika ena rua na yabaki, a laki curu ki na Koronivuli ni Bisinisi e Harvard Graduate, ka laki vakoroi sara ena liutaki ni bisinisi.

Ena nona a vuli tiko e Harvard ena vulaikatakata ni 1961, a sotavi Kathleen Johnson kina, ka a tiko mai Boston me laki vuli tiko ena gauna ni vulaikatakata. Erau sa mai veitau sara tiko yani ena vulaikatakata o ya, ka rau veivolavolai tiko ni sa lesu tale o Kathleen ki nodratou e California, ka rau mani vakamau sara ena Valetabu e Logan Utah ena Julai ni 1962. Ena yabaki vata tikoga o ya a lesi o Peresitedi Eyring me ivukevuke ni parofesa ena Koronivuli ni Bisinisi e Stanford Graduate, ka veivakatavulici tiko kina mai na 1962 ki na 1971.

E vakatokai watina o Peresitedi Eyring me dua e “gadreva sara meu yaco me dua na tamata e uasivi sara.” E a mai vakavotukanataki na ituvaki oqori ena dua na lomaloma ni bogi ena 1971 ni a vakayadrati koya o watina ka taroga vua, “E vavei sai koya sara beka ga oqo na ka dodonu mo cakava ki na nomu bula?” A qai taroga vei au ke sa donu beka na noqu cakacaka vata tiko kei Neal A. Maxwell, ka a taura tiko ena gauna o ya na itutu ni Komisina ni iVakarau ni Vuli ni Lotu (CES).

E dau taleitaka sara o Peresitedi Eyring na veivakavulici e Stanford, ni volekata tikoga na itikotiko ni vuvale nei watina, ka sa bisopi tiko ni iMatai ni Tabanalevu o Stanford, ia sa qai dau masulaka tiko na taro o ya nei watina. Erau se bera tiko ni kilai Komisina Maxwell na Eyring, ia ena loma ga ni vica na siga a qiri mai ka sureti Peresitedi Eyring yani ki Salt Lake City, ka laki kerei koya me sa peresitedi ni Ricks College, ka sa veisau tu oqo me BYU–Idaho. A ciqoma na ilesilesi oqo o Peresitedi Eyring ka tokitaka yani na nona matavuvale ki Rex e Idaho—ena gauna oqo sa 4 na luvedrau tagane, 2 na yalewa, ka 25 na makubudrau.

Ni oti e ono na yabaki a lesi sara me sa ivukevuke ni komisina ni iVakarau ni Vuli ni Lotu ka oti ga e tolu na yabaki sa soli vua na itutu me sa Komisina ni VVL me yacova sara ni sa laki kacivi me iMatai ni Daunivakasala ena Matabisopi Vakatulewa ena Epereli 1985. Ena Sepiteba ni 1992 a taura tale o koya na itutu ni Komisina ni VVL, ka taura vata tiko na itutu o ya kei na ilesilesi vaka-lewe ni iMatai ni Kuoramu ni Vitusagavulu, ka a kacivi kina o koya ni oti toka ga e dua na vula.

Ea kilai levu tu o Peresitedi Eyring, ena nona vunau dau veilauti ka dau luluvu rawarawa, a kaya kina vakaoqo me baleta na 12 na yabaki ni nona veiqaravi tu ena Kuoramu ni iApositolo Le Tinikarua ni sa vakavulica dina vua e dua na lesoni bibi me baleta na nodra dau lomani na luvena na Tamada Vakalomalagi.

“Ena vuku ga ni veika au sa vulica rawa mai na noqu ilesilesi ena Le Tinikarua, au sa yalonuidei kevaka mada ga me da sa vakadodonutaki keda ki na veika sa gadreva vei keda na Tamada Vakalomalagi kei na iVakabula, ena yaco me da gugumatua cake sara mai na veika eda na cakava rawa,” a kaya o koya. “Na Kalou ena tara vakalevu cake na nodra bula na tamata ni vakayagataki keda ka da sega ni bau namaka tu, ka na vakasaututaka vakalevu o Koya na noda bula ena kena eda sega mada ni bau tadra vakadua.”

A tomana tale o koya, ni gauna mada ga ni noda bula rerere kei na veilecayaki, ena dusimaki keda tiko kina na Tamada Vakalomalagi. “Kevaka mo na toso tikoga yani ki liu ena vakabauta ka yalomalumalumu, ko na rogoca Na domona,” e kaya o koya.