Na Cava na Vuna Eda Lewena Tiko Kina na Lotu Dina Duadua?

“Raica, sa vutuniyau sara ko koya sa rawata na bula tawamudu.” (V&V 6:7)

Keitou a sega ni vutuniyau niu se gone. Keitou matavuvale lewe lima: o ya o tamaqu kei na va na gone—e a mai leqa o tinaqu niu se qai yabaki lima. Na ilavo lailai sara e dau rawata mai o tamaqu sa mai isau tu ga ni kakana; e sega kina ni rawa me na dau voli na neitou isulu.

Ena dua na siga, niu lomatarotaro voli, au a gole yani vei tamaqu ka kaya vua, “Tata, e rawa ni o volia na noqu ivava? Raica mada qo; e sa ca sara ga ka rawa ni ko raica talega na itaukuku ni yavaqu ena kalamu ni noqu ivava.”

“Me na qai cula,” a kaya mai, ka boro loaloa vinaka sara ka mani taliva toka yani na noqu ivava. Ni oti o ya a kaya mai o koya, “Luvequ, sa caka oti.”

“E sega,” au a sauma yani, “se rawa tikoga ni laurai na itaukuku levu ni yavaqu.”

“Me sa na caka talega,” a kaya mai o tamaqu. A taura tale mai na iboro, ka boroya na taukuku ni yavaqu, ni oti o ya sa taliva talega na yavaqu me vaka ga na noqu ivava. Au vulica kina ena noqu se gone ni bula marau e sega ni vakatau ena ilavo.

Ni toso tiko na gauna, erau a vakavulica vei keitou e rua na daukaulotu na iyau levu ni kosipeli vakalesuimai, ena ivakavuvuli ni yavu ni veivakabulai, kei na kena tawamudu na matavuvale. Keitou a mani papitaiso, kei na gauna sa mai kacivi kina o tamaqu me peresitedi ni tikina, sa imatai sara ga ni nona ituvatuva me gole ki na valetabu ka me vakalougatataki mai kina ena vuku ni nona solibula o ya. E a 15 na siga na lako o ya, ka rauta ni 4,800 miles [7,725 km], oqo e dua na ilakolako e sotavi kina na dredre kei na veika e veivakataotaki, e ca sara vakalevu na sala, na basi era logaloga ca, ka sega mada ni kila na sala me muri, ia e vakanuinui tikoga vakalevu ki na cakacakatabu vakalotu keitou na vakaitavi kina.

Ni keitou yaco yani ki na siti o Mesa, e Arizona, keitou gole sara ki na mua e ra ni dua na gaunisala ka keitou sa raica na Vale ni Turaga, ena kena makualiliva tu mai ka totoka dina. Au sega ni guilecava na levu ni neitou marau; keitou a lagasere ka vakacaucau, ka drodro sobu e baludra na wai ni matadra e vuqa na yalododonu.

Ni oti o ya, ena loma ni valetabu, keitou a tekiduru vakamatavuvale ka rogoca na veiyalayala totoka me baleta e dua na matavuvale tawamudu, ka keitou vakadeitaka, ni dina ga ni yali e kea o tinai keitou, sa yaco o koya me tinai keitou tawamudu, ka keitou vakila na vakacegu e yaco mai ni keitou sa kila ni sa yaco me tawamudu na neitou matavuvale.

Na veiyalayalati ni bula tawamudu sa yaco kina me keitou vutuniyau tawamudu! “Raica, sa vutuniyau sara ko koya sa rawata na bula tawamudu” (V&V 6: 7).

Na Lotu i Jisu Karisito e lotu ni bete, “a matabete vakaturaga, a matanitu yalosavasava …” (1 Pita 2:9)

Na Lotu vakalesuimai ena vakatikora ki na matavuvale yadua e dua e lewena na matabete kei na kaukauwa ni Kalou me veivakalougatataki kina. E sa vuqa sara na gauna au sa rogoca rawa ena noqu vuvale na voqa malumu, ka kamikamica ni dua na gone lailai ni kaya cake mai, “Tata, e rawa ni ko masulaki au?” kau tabaka na buradelana e ligaqu ni sotava tiko na mosi kei na rarawa ka’u cavuta na masu ni veivakacegui kei na veivakabulai ka sarava kina na cakacaka yaco ni kaukauwa ni matabete, kau rogoca na domo lailai o ya ena siga ka tarava, “Vinaka, Tata, au moce sara ga vakavinaka ena bogi.” E sega ni gadrevi me da lako tale yani ki vua tale “e dua na tamata” e tiko vua na kaukauwa o ya—sa tiko sara ga vei keda! E dua na kalougata levu me da vakavulica na ivakavuvuli oqo kivei ira na luveda! Oqo na Lotu duadua ga e vuravura e vakarautaka na veivakalougatataki vakaoqo ki na matavuvale.

Ena kaukauwa oqo, au sa rawa ni tabaki iratou yadua kina na luvequ tagane ki na matabete ka solia vei iratou na kaukauwa ni Kalou me ra qarava kina na Nona cakacakatabu vakalotu.

O koya gona, ni oqo talega na vuna au sa mai lewena kina na Lotu oqo, baleta ni sa vakatikori tiko ena gauna oqo e vuravura na matabete ka sa vakatikori sara ena noda dui vuvale.

Na kaukauwa ka iyau levu duadua e rawa me da taukena sai koya na kena vakamareqeti e dua na ivakadinadina yadua ni noda Turaga o Jisu Karisito kei na kaukauwa ni Nona Veisorovaki.

Eda na taukena e dua na ivakadinadina ni da bula kilikili tiko ka vakasaqara ena masumasu. “Raica ena soli vei kemudou na Yalo Tabu ni dou sa kerea ena vakabauta” (V&V 42:14), e a veivakasalataki na Turaga vei Parofita Josefa.

Ena gauna se yabaki 6 tiko kina o Daniel na luvequ tagane, e dau raica o koya niu dau leqataka meu tiko ena koniferedi ni iteki, kau sega ni vakadeitaka rawa na cava meu vakavulica vei ira na Yalododonu. A gole mai ka kaya vei au, “Tata, e rawarawa tu ga.”

E vakaoqori na veika era dau raica na gone.

“Me daru raica mada, luvequ,” au a kaya vua, “me vaka ni rawarawa tu ga, tukuna mai na veika meu laki kaya vei ira.”

“Tukuna vei ira na veika me baleta na masu,” a kaya vei au o koya.

“Oqori e dua na iulutaga vinaka,” au a kaya vua, “ia era sa rogoca vakavuqa o ira na veika me baleta na masu, na ka vou cava meu tukuna vei ira?”

“E rawarawa talega oqori, Tata. Tukuna e liu vei ira, ‘Ni bera ni ko vosa vua na Tamada Vakalomalagi, vakasamataka mada na veika ko na via tukuna Vua.’”

“Oqori e dua na vakasama totoka,” au a kaya yani, “ni oti o ya?”

“Ia, ni ko sa vakasamataka rawa, tukuna sara Vua! Ni sa oti, wawa vakalailai ka raica ke na tukuna mai o Koya e dua na ka vei iko.”

Io, ena noda masu, ena vosa ki na yaloda na Yalotabu ka vakadinadinataka vei keda ni sa bula dina tiko na noda iVakabula.

Au kurabui ka galu ena vuku ni loloma e vakaraitaka na noqu iVakabula o Jisu Karisito ena Nona lako sobu mai na itikotiko vakalomalagi ka tadu mai ki na dua na vuravura era lewevuqa sara era sega ni ciqoma kina na Nona itukutuku ka dina ga ni sega vei ira na dodonu me ra vakamatei Koya, era a totogitaki Koya me laki mate. Sa mai sorovaka na Karisito na noqu ivalavala ca, na noqu mate kecega, rarawa, kei na yaluma. E a sega ni vakamacalataki rawa na nona mosi; a vakamacalataka ga vakaoqo o Luke ni “nona buno sa vaka na titiri ni dra ni sa lutu ki na qele” (Luke 22:44).

Me kena isoqoni kece, sai koya oqo na vuna au sa mai lewena kina na Lotu oqo: baleta sa curuma sara na yaloqu mai loma na Yalotabu ka sa vakatakila vei au ni sa bula dina tiko na Karisito, ni sai Koya na noqu iVakabula, ni sa sorovaka o Koya na noqu ivalavala ca, ka sa vakarautaka o Koya e dua na sala ni kevaka au na bula voli ena Nona vunau, au na rawa ni marautaka na veivakalougatataki tale eso sa yalataki tu.

Ena vica na macawa sa oti, sa mai leqa talega kina na tamaqu, ka sa dua na ka na noqu marau vakalevu cake ki vua na noqu Kalou me baleta ni sa iyau levu ka totoka dina na Nona vunau.

Me baleta ga ni na rawa ni laki tomani yani na bula vakamatavuvale ni oti na mate. Baleta ni sa vakalesuimai ki vuravura na matabete vakaturaga. Baleta ga ni sa vosa e yaloqu na Yalotabu, ka sa vakadinadinataka vei au ni sa bula dina tiko na noqu iVakabula o Jisu Karisito ka mai na Nona veivakameautaki sa rawa kina vei au, me vaka niu sa yalodina tikoga, meu laki bula vata kei Koya. Ena vuku ni veika oqo, kei na veika tale beka eso, au sa lewena tu oqo na Lotu dina duadua ga e vuravura, ka sa tawamudu kina na noqu vakavinavinakataka na veika oqo. Ena yaca i Jisu Karisito. emeni.