Na Veika Lalai ka Rawarawa

iVakatakilakila

O ira yadua era na bula voli ena kosipeli i Jisu Karisito ena veisiga ka vosota me yacova na ivakataotioti era na rawata na bula tawamudu—sai koya oqo na yalayala ni Turaga.¹ Ena kena bibi, e rawarawa ga ka rawa ni kilai na kosipeli, ka vakavukui rawa kina o ira sa malumalumu.² E tukuna vakaoqo o Alama, na parofita ena iVola i Momani, “Ia mo kakua ni beca na noqu itatau; raica … na ka lalai ka beci, sa tubu mai kina na ka levu; ia … na ka lailai talega sa vakamaduataki ira na vuku, era sa vakabulai kina na tamata.”³

Ena dua na gauna wale tikoga oqo, au a kalougata meu raica e mataqu na ka vakaoqo ena bula nei Stan e dua na taciqu vakalotu, ka sa luluqa tu mai vakalotu ena 45 na yabaki. E totoka tu mai na nona bula ka qaravi watina kei na luvena tagane vakavinaka ena nodrau itavi qaravi me vaka ni rau lewenilotu yalodina ena Lotu. Ia e vaka ga me sega tu ni taleitaka o koya na mai Lotu. Ia, ena veivula e dau ciqomi ira na dauveituberi ni matavuvale ni ra lako yani.

Ena Feperueri ni 2006, sa lesi e rua na dauveituberi vou vei Stan. E a totoka sara na imatai ni nodrau veisiko, ka dina ga ni sega sara ni malele o Stan ki na kosipeli se na veika e tukuni me baleta na bula vakayalo. Na nodrau veisiko e tarava e a lailai sara na ka me rau vakavinakataka cake kina na imatai ni nodrau ituvatuva, ka dina ga ni yalovinaka ka veikauwaitaki sara mai o Stan. Ena ikatolu ni nodrau veisiko, ia, e a kune vakalailai vei Stan e dua na veisau ni kena ituvaki kei na itovo. Erau kidrowa, ena gauna mada ga ni rau vakarau solia tiko na nodrau itukutuku, sa takosovi rau o Stan ena veitaro bibi eso. Ni toso na veivosaki a tukuna talega kina o koya na ka a sotava ena vula sa oti ni rau sa tekivu wilika tiko kina vakaveiwatini e dua na wase mai na iVola i Momani ena veisiga.

E vakamacalataka vakaoqo o Elder Bruce R. McConkie na mataqali veivakayadrati a yaco kivei Stan: “Oqo e dua na tamata sa soli vua e dua na ilavelave ni ivola veivakalougatataki oqo, tekivu me wilika, ka tomana tiko … me yacova, ni sa wilika kece sara, ka sa yaco na yalona sa walokai me vakasinaiti ena madrai ni bula. Sa sega ni rawa vua me biuta vakatikitiki se cakitaka na kena ivakavuvuli. Sa qai vaka na wai ni bula sa dave yani ki na vanua dravuisiga liwalala ni yalona, ka vakasuasuataka na vanua mamaca, ka lala didi ni yalona sai koya a tawasei koya mai vua na nona Kalou.”⁴

E a vakavotui vei rau na dauveituberi ni matavuvale na kaukauwa cecere ni iVola i Momani kei na kena laurai dina na veivakayarayarataki ni Yalo ni Turaga ena gauna eda cereka kina na kena itukutuku vakalou sa volai tu. Erau sa kila vakavinaka talega kina na ka a tukuna o Parofita Josefa Simici, “ni iVola i Momani [sai koya] na ivola sa dodonu sara mai na veivola kecega e vuravura taucoko … ka na yaco na tamata me toro voleka vua na Kalou ni sa vakamuria na kena ivakavuvuli, ka sega mai na dua tale na ivola.”⁵

E a karamaca o Stan me vulica ka kunea rawa tale na kosipeli vakalesuimai ka yaco sara me laki wilika e dua na kena wase ena veisiga, ka salavata tiko na nona liaci koya vakatitobu kei na masumasu ena yalodina. Kivei ira era na lomatarotarotaka tiko ke na sauma dina beka mai na Turaga na nodra masu, ia sa tukuna tale vei keda na iVakabula:

“E dua li vei kemudou na tama ni gone kevaka sa mai kere madrai vei iko na luvemu, ena solia vua e dua na vatu? ia kevaka sa kere ika, ena solia beka vua e dua na gata me isosomi ni ika? …

Ia kevaka dou kila, koi kemudou sa tamata ca, mo dou solia na ka vinaka vei ira na luvemudou: sa qai dina vakalevu cake, ni na solia na Yalo Tabu ko koya na Tamamudou vakalomalagi vei ira sa kerekere vua?”⁶

Na noda parofita lomani o Peresitedi Gordon B. Hinckley, e vakasala talega vakakina: “E sega ni rawa mo cakava duadua ga… . Ko na gadreva na veivuke ni Turaga … kei na kena e vinaka kina o ya ni sa gauna donu oqo mo masu kina, ka nanamaki tiko ni na rogoci na nomu masu ka saumi mai… . Sa tu vakarau o Koya me vukei iko.”⁷

Ena Okosita ni 2006, a veitomani yani o Stan vei watina yalodina ki na ilakolako ki na soqoni ni sakaramede—na nona imatai ena 45 na yabaki. E kea, ena yalo e malumalumu kei na masumasu, a vakarorogo ki na masu ni sakaramede era cavuta na itabagone bete. Ni sa kilai yalona ni sa sega ni kilikili ka vakila ni sa bibi ka titobu na cakacakatabu vakalotu sa vakayacori tiko o ya, a vakasamataka sara vakabibi e yalona ka sega kina ni vakaivotavota ena madrai kei na wai ena vica na macawa.

Ena vuqa na yabaki sa oti a kaya kina o Peresitedi Joseph Fielding Smith, ena nona ivakadinadina, “Ena noqu kila, na soqoni ni sakaramede sai koya na soqoni vakalou cecere duadua, ka sa vakalou vakaidina, ena veisoqoni taucoko sara ni Lotu. Niu vakasamataka na nodratou a soqoni vata yani na iVakabula kei iratou na nona iapositolo ena bogi talei o ya ena nona a tauyavutaka kina na sakaramede … e vakasinaiti na yaloqu ena qoroqoro ka tarai na yaloqu. Au vakatoka na soqoni o ya me dua vei ira na kena e vakalou dina ka totoka mai na ivakatekivu ni gauna.”⁸

Sa tomana kina o Stan na nona vuli ivolanikalou, masumasu, gole ki lotu, ka ciqoma na veivakasalataki kei na veivakayaloqaqataki e vinaka mai vei ira na nona dauveituberi ni matavuvale. Sa qai yaco mai na siga, ni nona marau, me sa na vakarau dedeka yani na ligana me vakaivotavota ena sakaramede totoka. Ena gauna eda kilikili kina me da vakaivotavota ena sakaramede tabu ena kilai yaloda kei na vakarokoroko, eda sa na yaco kina me da “vakaivotavota talega ena veika sa vakalou,”⁹ ena vuku ni Veisorovaki i Karisito kei na kaukauwa ni Yalo Tabu.

Ena nona sa lesu tale o Stan ki na veitaviqaravi ena Lotu, a taura kina e dua na ilesilesi, ka oti toka e vica na vula a tabaki me italatalaqase. Ena Julai 2007, erau a laki tekiduru o Stan kei watina ena icabocabo ni soro ena vale ni Turaga ka rau a vakamau ena bula oqo kei na veigauna tawamudu ena lewa kei na lawa tawamudu ni Kalou.¹⁰

Kemuni na taciqu kei na ganequ, me da kunea vou tale mada na kaukauwa vakalou ni masumasu ena veisiga kei na veivakauqeti dina ni iVola i Momani kei na ivolanikalou tabu. Ena vei-Sigatabu, ni da vakaivotavota ena sakaramede, me da sa vakayacora ena yalodina ni sokalou ki Vua o Koya sa dausolia na veika kecega.¹¹

Ena vuku ni noda vinaka kei na veika lalai eda rawata rawa, kei na vuku ni vinaka tawayalani ni Turaga, ni “ka lalai ka beci sa tubu mai kina,” na “ka lelevu.”

Kena itinitini, ena vuku ni veika vakalou oqo, meu na tomana kina na noqu ivakadinadina kei na veivakadeitaki ena yaca i Jisu Karisito, emeni.