Cakava Sara Ga Oqo

Ena gauna a se yabaki 11 tiko kina na luvei keirau ulumatua (ka sa tamadratou tiko e tolu na gone ena gauna oqo ka maliwai keda tiko ena soqoni oqo ni matabete ena yakavi nikua), a soli vata vua e dua na itavi, kei ira tale eso na lewe ni kalasi ono ena nona koronivuli, me vakarautaka e dua na icakacaka ni kakana totoka ni nodratou matavuvale. Me vaka ga ni oqo na nodra itavi ki na basa levu ni vulaitubutubu, era na vakarautaka tiko kina na kalasi ono oqo e dua na ivola ni cakacaka ni kakana me na veikauyaki yani ki na itikotiko raraba o ya. Ena gauna sa lesia kina o qasenivuli na cakacaka oqo ka me na vakasokomuni ni oti e dua na macawa mai na siga Vakaraubuka o ya, sa nanuma sara o Brett na luvei keirau ni se vo levu tu na gauna me qai caka kina na itavi oqo ka mani guilecava sara. Ena itekivu ni macawa ka tarava, sa baci tukuna tale o qasenivuli vei ira na gonevuli na ka me na kau mai ena siga Vakaraubuka, sa baci nanuma tale o Brett ni na rawa ni cakava ga ena bogi ni Lotulevu ka me cakava mada eso tale na ka e talei vakalevu cake vua.

Ni sa mataka ni siga Vakaraubuka o ya, sa kerea sara o qasenivuli vei ira na gonevuli me ra solia mai na nodra icakacaka ni kakana ki na desi e liu. Na nona lokuyara o Brett sa laki vakavuna me guilecava na nona itavi o ya ka sega sara tu ga ni cakava e dua na ka. Ena nona taqaya, a vuki yani vua e dua na itokani gonevuli e yasana ka tukuna vua na nona leqa. Ena nona via veivuke, a kaya mai na gonevuli o ya “E tiko oqo e dua tale na icakacaka ni kakana, kevaka o vinakata, taura yani e dua oqo.” A kovea totolo o Brett na pepa o ya, vola kina na yacana ka solia yani, ka nanuma ni sa drotani rawa mai na revurevu ni nona sega ni vakavakarau.

Ena dua na yakavi ni oti toka e vica na macawa, au a lesu mai na cakacaka ka meu laki sili ka qai gole yani ki na noqu bose ni Lotu. Ni bera o ya e vica na siga sa oti au a kacivi meu peresitedi ni iteki ni oti e vica na yabaki na noqu veiqaravi vaka-bisopi. Keitou kilai tu ena neitou itikotiko me keitou dau lewe ni Lotu gugumatua ena kena ivakavuvuli. “Mo mai raica mada oqo” a kaya mai o Diane, na watiqu niu curu yani e katuba. A vakaraitaka vei au e dua na ivola ka ra nabataki tu na kena draunipepa. Keirau raica na kena ulutaga Noelani School’s Favorites—1985, au cega sara na draunipepa e vakatakilakilataki toka ka wilika “Matavuvale nei Hallstrom, Kakana Talei—Keke Bacardi Rum.”

E vuqa vei keda eda dau vakatara na veika eso e dau vakavuna na veika e ca vakalevu cake sara mai na noda vakamaduataki, baleta ni da lokuyarataka tiko me da saumaki mai ki na kosipeli i Jisu Karisito. Eda sa kila tu na ka dodonu, ia eda vakawalena na noda soli bula vakayalo ena vuku ga ni noda vucesa, rere, vakaiulubale, se lailai ni vakabauta. Eda dau kaya tikoga “au na cakava ga ena dua na siga.” Ia, e vuqa vei keda “ena dua na siga” o ya ena sega ni yaco mai, ka vakakina kivei ira era sa qai laki veisau e muri, ena sega ni lesu mai na veigauna vivinaka sa oti ka dau toso talega na veika e torosobu.

Ena noda saga me da liaci keda mada me baleta na noda bula vakayalo, na cava beka na noda nanuma ni da laki tiko ena soqoni ni Lotu? O ya beka me da “kila ka io ena vuli kei na vakabauta” (V&V 88:118) ena yaco me da cakava ga na veika eda sa vulica mai? Se me da kaya “au sa rogoca oti na ka kece oqori” na ivosavosa ka dau sogota na curu mai ni Yalotabu ki na noda vakasama kei na lomada ka vakatara na lokuyara me sa tiki levu ni noda bula?

Me baleti koya e dua na dauvakatataro taumada ki na Lotu vakalesuimai, ka a yalataka me na vakamuria na ivakaro kecega ni Turaga e soli vua, e tukuni kina vakaoqo “A sa vakabauta vakaidina na noqu vosa, ia sa temaki koya kusarawa ko Setani; … a sa sega ni muria na noqu vosa ni sa rerevaka na nodra veivakacacani na tamata” (V&V 40:2). E duidui mai na ivakasala ni Turaga: “Raica ko koya sa nanuma na noqu ivakaro ka talairawarawa kina, sa noqu tisaipeli” (V&V 41:5).

A vakaraitaka o Alama mai na vu ni yalona taucoko, “Oi kemudou na wekaqu; au sa nanumi kemudou sara vakalevu; io au sa vakaroti kemudou kina mo dou muria na vunau ka muduka na nomudou ivalavala ca; ia mo dou veivutuni sara ga oqo ka kakua ni lokuyara tiko” (Alama 13:27).

Na itokani vakaivakavuvuli nei Alama o Amuleki, a vakamatatataka talega na itukutuku ena nona kaya,

“Raica me vakarautaki koya na tamata ena bula oqo me na lesu tale vua na Kalou; io oqo na bula me kitaka kina na tamata na nona cakacaka kecega.

“Raica, dou sa rogoca oti e vuqa na ivakadinadina, kau sa vakaroti kemudou mo dou kakua ni lokuyarataka na gauna mo dou veivutuni kina“ (Alama 34:32–33).

Ena gauna au sa yacova kina na yabaki ni ivakavuvuli ena Matabete i Eroni, sa vaka me mataka kecega ni veisiga Vakarauwai ena veivula meu dau vakayadrati tiko ena nona cakacaka tiko vakavoleka o tamaqu ena yasa ni noqu katubaleka. (E a taura sara e dua na gauna balavu meu kila rawa kina na vuna e dau laki tekivu cakacaka mai ena yasa ni noqu katubaleka.) Ena noqu dau saga tiko meu kakua ni malele ki na rorogo, au dau gole ga yani ka laki vukei tamaqu ena cakacaka ena veimacawa meu vukei koya me samaki vinaka tu ga kina na neitou lomanibai.

Ena vuku beka ga ni vica na mataka niu sega ni yadra vakatotolo, se ena vuku ni ka tale eso ena gauna e dau gadrevi kina na veivakauqeti nei tamaqu ni bera niu laki veivuke, ena dua na siga keirau a dabe vata toka ka vakaraitaka vei au e dua na itaba levu ni dua na manumanu qasi, ka dau vucesa tu ga. Oti sa qai cega na Vunau kei na Veiyalayalati ka meu wilika, “Raica sa sega ni kilikili meu veivakaroti tikoga ena veika kecega; ia ko koya sa waraka ga me kitaka na ka e tukuni vua, sa tamata lialia ka vucesa; io ena sega na kena isau” (V&V 58:26; vakamatatataki). Tekivu mai na siga o ya, sa yaco kina me dua na iyau levu ni noqu bula na iyaloyalo o ya kei na kena ivakavuvuli.

E dua vei ira na veivakauqeti mana nei Peresitedi Spencer W. Kimball o ya na malanivosa: “Cakava.” E muri a qai vakuria vakaoqo “Cakava Sara Ga Oqo” me vakamatatataki kina na bibi ni vakayagataki ni gauna.

E a vakavulica talega vakaoqo o Peresitedi Kimball na ivakavuvuli bibi oqo: “Na lokuyara e veimuataki ki na nomu yali mai na bula vakalou.” A tomana vakaoqo, “E dua vei ira na leqa bibi ni tamata ena veitabagauna kecega sai koya na lokuyara, o ya na yalodredre ni kena ciqomi e dua na ilesilesi vaka-tamata yadua ena gauna sara ga oqo… . E vuqa sara era sa soli ira me ra kuitaki ka yaco … me vakatotogani na nodra vakasama kei na bula vakayalo ka ra garova na marau vakavuravura” (Teachings of Presidents of the Church: Spencer W. Kimball [2006], 4–5).

E vuqa vei keda eda vinakata ga na sala e rawarawa tu—na kena e dau sega tu kina na kena cakacaka bibi kei na solibula. Ia au nanuma ga niu sa kunea. Au a draiva yani ena daku ni dua na buca drokadroka ena mua e cake ni siti o Honolulu, au a rai yani ka raica sara kina—Easy Street! Me vaka niu a vakasamataka tu na veika vivinaka ena kauta mai na veika vou au sa raica oqo, au a taura mai na noqu itaba meu tabaka kina na irairai totoka o ya. Niu rai yani ena kena iloilo, ia, sa vaka me makare na veika au sa raica tu vakaiyaloyalo. Au a kilai yaloqu tale ena ivakatakilakila dromodromo ni gaunisala— sa yaco e ke o Easy Street!

Na lokuyara sa vaka me sala e rawarawa cake, ni kena vagalalataki vakalekaleka na cakacaka e gadrevi me rawati kina na iyaunibula. E dau tukuni, ni dau yaco, na lokuyara me dua na icolacola bibi ka talitalitaki tu ena ivalavala ca kei na luluqa sega kina na vakacegu. Ena sega ni vakayacori rawa na veika ni bula oqo ka vakabibi na inakinaki vakayalo ke da lokuyara tiko.

Nikua ga na kena gauna me da cakacakataka noda vakabauta. Nikua ga na kena gauna me da bula savasava kina. Nikua ga na kena gauna me da vakayacora na veika me vakadodonutaki kina na veika eda dau gadreva tu. Nikua ga na kena gauna me da veivinakati kina kei na Kalou ena loma ni cakacaka ni loloma veivueti sa solia mai vei keda na Dauveivueti ni kawatamata.

Keimami sa vakamamasu:

• Kivua e dua sa ciqoma oti na ivakadinadina ni sa dina na kosipeli kei na Lotu i Jisu Karisito ni Yalododonu Edaidai ka se bera ni papitaiso ka vakadeitaki.

• Kivua e dua sa lewe tiko ni Matabete i Eroni se Matabete i Melikiseteki ena vuku ni nona caka cala se vakawelewele voli tu ga ka sa bula saqata tiko kina na nona bubului vakalou kei na kena veiyalayalati (raica V&V 84:33–39).

• Kivua e dua na lewe ni Lotu sa vakaedaumeni oti ka sa sega tiko ni bula kilikili kaya me dua na nona ivolatara ni valetabu.

• Kivua e dua na lewenilotu e a vakacudrui mai vua e dua tale na lewenilotu ka sa sega tale ni via cakava o koya e dua na ka ena loma ni Lotu.

• Kivua e dua e veivakaisini tiko na nona bula ka sa colata tu na icolacola bibi ni ivalavala ca sega ni vakavinakataki rawa.

Sa noqu ivakadinadina ni o iko vata kei keimami kece oqo sa rawa me da veisau ena gauna sara ga oqo. Ena rairai sega ni rawarawa, ia na noda rarawa sa rawa me da “marau ga ena vuku i Karisito” (Alama 31:38). Sa noqu ivakadinadina oqo ena yaca i Jisu Karisito, emeni.