Mai na Veika Lalai

Mabuhay mai vei ira na lewenivanua vinaka ka totoka mai na Filipaini

E dua na taro makawa sara ka kilai levu ena ivolatukutuku kei vuravura, ka vakurabui, a taroga o Keni ni sauma na nona taro na Kalou me baleta na nona a vakamatei Epeli na tacina. “Koi au beka na ivakatawa i taciqu?”¹ Na taro oqo e gadrevi me ra raica sara vakayalomatua o ira era saga tiko me ra vakayacora na loma ni Turaga. E dua vei ira na kena isau e tiko ena ivakavuvuli nei Alama:

“ Ia oqo, me vaka dou sa gadreva mo dou curu ki na lomanibai ni Kalou, ka vakatokai me nona tamata, ka sa lomamudou mo dou veivuketaka na nomudou i colacola me mamada kina;

“Io ni sa lomamudou mo dou tagi vata kei ira sa tagi; ka vakacegui ira sa rarawa.”²

Ni da sa tisaipeli ni Turaga o Jisu Karisito, ka sa tu oqo na noda ilesilesi me da veivukei ka qaravi ira na tacida kei na ganeda. Ena nona vosa vakatautauvata me baleta na kai Samaria dauloloma, e a sega walega ni vunauci ira na kena meca o Jisu Karisito ia a vakavulica talega e dua na ivakavuvuli levu kivei ira kecega era saga me ra vakamuri Koya. Sa gadrevi me da vakarabailevutaka na vanua ni noda veiqaravi. Na noda veiqaravi oqo e dodonu me baleti ira kece sara na kawatamata yadua, dui kaikai, ituvaki ni bula, se veimaliwai cava ga. Me vaka ga, na vunau me da “vukei ira sa malumalumu, vakaukauwataka na liga sa wadamele, kei na duru sa malumalumu”³ e sega ni lavaki kina e dua na kila ka vakavuku.

E vuqa era vakabauta kevaka me na vakaibalebale cake vakalevu na veivuke e dodonu me tiko kina e dua na parokaramu vakaituvatuva ka tiko e dua na kena komiti. E dina ga ni veivukei e vuqa vei ira na veiqaravi vakaoqo, ia e vuqa sara na veivukei era gadrevi tu e vuravura edaidai e tu sara ga ena noda veimaliwai vakaikeda ena veisiga. Eda dau raica ni levu sara e gadrevi me vakayacori ena noda loma ni vuvale, itikotiko raraba, kei na tabanalevu.

Na ivakasala oqo mai vei Screwtape na dauveivakaisini kivei Wormwood na vugona ena ivola nei C.S. Lewis o ya na The Screwtape Letters, e vakamacalataki tiko kina e dua na malumalumu levu sa tu e vuqa vei keda edaidai: “Cakava ga na ka o gadreva, ena yaco eso na ka vinaka, ka vakakina eso na ka ca, ki na tamata oqori. Na ka cecere o ya mo vagolea na nona ca kivei ira na wekana voleka era dau sota ena veisiga ka drutia laivi na nona vinaka ki vanua tani, kivei ira na tamata e sega ni kilai ira. Sa na yaco na ka ca oqo me ka tudei ka me sa balolo ga ni vakanananu na ka vinaka.”⁴

Na qaqani dua na sere kilai levu e tukuna tiko na kena iwali vinaka duadua:

Na veika era a yaco oqo au kalougata niu a sotava ka sa vakavulica vei au ni veiqaravi lalai sa rawa me vukei keda kei ira talega eda na vakayarayarataki ira.E dau biuti ira tu na tamata dauloloma na Tamada Vakalomalagi ena noda veigauna dredre me ra vukei keda me da kakua kina ni biu tu ena iyaloyalo ni mate. O ira na tagane kei na yalewa oqo era veivuke ena ivakaraitaki ena vosota kei na loloma. Oqori na veika au sa sotava mai.

Au nanuma lesu e dua na gauna bibi ni noqu vakatulewa—o ya meu na gole ena kaulotu tudei. Au a mai vakasamataka tu ena dua na gauna balavu na veika meu vakatulewa kina. Ena noqu saga voli meu digitaka na sala meu sa na muria, eratou a lako mai na noqu matavuvale, noqu itokani, iliuliu ni matabete me ra mai tokoni au. Era a vakayaloqaqataki au ka soli bolebole ka masumasu vakavuqa ena vukuqu. A volavola tikoga mai o ganequ daukaulotu tudei ka sega sara ga ni guilecavi au.

Edaidai mada ga, era se vukei au tikoga o ira na turaga kei na marama dauloloma. Au vakabauta ni yaco tiko vei keda kece. Oqo na veika sa yaco tale tikoga ena noda sa veivukei tiko vakaikeda me da lesu rawa ki na noda itikotiko vakalomalagi.

Na kena wasei yani na kosipeli sa dua na sala e veivakalougatataki me da veiqaravi yani kina vei ira eda sega ni vakabauta vata. Au nanuma sara e dua na tamata au sotava niu se gone, kau na kacivi koya me ko Momo Fred.

Niu sa yabaki ono tiko, sa dua na tamata au dau rerevaka vakalevu o Momo Fred. E tiko tikivi keitou ka dau mateni tu ga. E dua na ka e dau vakayacora o koya o ya me dau virilaka tiko na neitou vale ena vatu.

Ena vuku ga ni dau mesamesa toka nei tinaqu na vakasaqa, sa dau nodra igadigadi tu ga na itabagone qase cake ni neimami tabana lailai na neitou vale. Ena dua na siga a bula vinaka tu o Momo Fred, ka ra laki veikilai sara o ira na lewenilotu oqo kei koya ka sureti koya ki neitou vale. Au a leqa sara vakalevu ena veisureti oqo. Sa sega tale ni tiko e tuba o koya sa tu sara ga ena loma ni neitou vale. Sa qai yaco tiko na ka oqo me yacova, ni ra sa qai vakauqeti Momo Fred rawa me rogoci rau na daukaulotu. A ciqoma na kosipeli ka papitaiso sara. A laki kaulotu tudei o koya, ka lesu mai ena rogorogo vinaka, lesu tale ki vuli, ka vakamau sara ena valetabu. Sa yaco oqo me dua na turaga vakawati, tama, ka iliuliu ni matabete yalododonu. Niu raici Momo Fred tu edai, e dredre me dua e vakabauta ni a dau vakarerea voli e liu e dua na gone yabaki ono. Me da yaco me da dau raica na veigaunisala kecega ni kena wasei yani na kosipeli.

O tinaqu e dua na ivakaraitaki cecere ni dua e dau vukei ira na tamata ena veika era dau gadreva. E dau vakavulica vei keitou e vuqa sara na veivakavuvuli bibi. E dua na ivakavuvuli e dau tara tu ga na noqu bula o ya me dau gadreva me vukei ira era mai kere veivuke e neitou vale. Au dau lomaleqa niu raica e vuqa na tamata era dau mai kauta na keitou kakana, isulu, ka vakakina na neitou ilavo. Ena vuku beka ga niu se gone ka keitou dravudravua tu, au sega ni taleitaka kina na veika e yaco tiko o ya. E rawa vakacava me soli ka vei ira na tamata oqo ena gauna mada ga keitou leqa tiko kina? E cala beka me keitou qaravi keitou mada ga e liu? E sega beka ni dodonu me keitou bula vinaka tiko mada ga?

Ena vica na yabaki au dau lomatarotarotaka tu na ka oqo. Ni toso tiko na gauna, au sa qai kila rawa na ivakavuvuli oqo nei Tinaqu. Ena gauna mada ga e tauvimate bibi tu kina o koya, e sega ni muduka na nona dau vukei ira era vakaleqai tu.

“Ia dou kakua ni oca ena cakacaka vinaka; raica dou sa tura tiko e dua na yavu ni cakacaka levu. Ia ena tubu mai na veika lalai na veika lelevu.”⁶ Na noda vukei ira na tani e sega ni gadreva me tekivu mai na dua na ka vakaitamera. E laurai vakalevu, ni dau yaco ga ena noda bula ena veisiga ni da veivakacegui, veilaveti cake, veivakayaloqaqataki, veitokoni, ka vakamarautaki ira na tani.

Sa noqu masu me da dau sotava tiko mada ga na veimadigi vakaoqo me da veiqaravi yani kina, ena yaca i Jisu Karisito, emeni.