Kakua ni Laiva Ki na Siga ni Mataka Na Veika o Rawa ni Cakava Nikua

iVakatakilakila

Ena ika 23 ni Sepiteba, 1995, eratou a vakaraitaka raraba kina na Mataveiliutaki Taumada kei na Kuoramu ni iApositolo Le Tinikarua ki na Lotu kei na lewe i vuravura e dua na itukutuku e vakatokai “Na Matavuvale: Ai Vakaro ki Vuravura Raraba.” Meu na cavuta mada na parakaravu ka tukuna tiko vakaoqo “Sa rui ka vakamareqeti ki na nodrau itavi na tagane kei na yalewa vakawati me rau dauveilomani ka veikauwaitaki vakaveiwatini ka vakakina vei ira yadudua sara na luvedrau.”¹ Eda bula donuya tiko e dua na siga kei na gauna ka sa ka bibi dina kina na ivakasala oqo. E levu na itubutubu era kaya ni sega na nodra gauna galala me baleta na nodra matavuvale. Na kena sa rui-totolo na ivakarau ni bula ena gauna oqo kei na osososo vakacakacaka sa vagolea na nodra vakasama na itubutubu mai na veika e bibi ka dodonu me ra vakaliuca: solia nodra gauna, vakayagataki ira ki na nodra matavuvale.

Sa vakavulica vei keda na Turaga ni sa nona itavi na tamata yadua me qarava na nona matavuvale,² ia e sega ni kena ibalebale walega o ya me vakavutuniyautaka na nona matavuvale ena kakana kei na veika tale eso e gadrevi se vinakati. Sa dodonu talega me tiko na gauna me da vakavulica kina na noda matavuvale. Na cava beka me da na vakavulica?

E vakavulica vei keda na Tamada ni sa nodra ilesilesi na itubutubu me ra vakavulica na kosipeli vei ira na luvedra.³ E a kila vakavinaka tu o Liai na parofita na nona ilesilesi me vakavulici iratou na luvena. E a kaya o Nifai ni a dau vakavulici o koya “ena ivakavuvuli kece [nei] tamana.”⁴

E sa vakasalataki keda na Turaga ena sala me da qarava kina na noda matavuvale ena Nona kaya vei keda mai vei ira na Nona parofita ena ivakaro ki vuravura raraba: “Sa nodrau itavi bibi na itubutubu me rau susugi ira cake na luvedrau ena loloma kei na bula dodonu, me rau vakarautaka na veika vakayago ka vakakina na veika vakayalo era gadreva, me rau vakavulici ira me ra dauveilomani ka veirairaici vakataki ira, me ra dau muria na ivakaro ni Kalou ka me ra lewenivanua vinaka ena veivanua cava ga era tiko kina.”⁵

Eda kila ni sa vakavulica vei keda na Kalou ena veisinijiuri na sala me da karona ka qarava kina na noda matavuvale. Eda sa kila talega ka raica rawa ni sa valuta tiko na meca na noda matavuvale. Oqo na gauna me da vakavulica kina na ivakavuvuli kece o ya. Oqo na gauna me da vakayacora kina na noda ilesilesi va-Kalou me baleta na matavuvale.

Ea vakaraitaka vei keda o Peresitedi James E. Faust e tolu na ka bibi me da vakayacora me da taqomaka ka vaqaqacotaka kina na noda matavuvale:

1. Masu vakamatavuvale: Me ra vakavulica na itubutubu vei ira na luvedra ni ra sa luve ni Kalou, ka sa gadrevi kina me ra masu Vua ena veisiga.

2. Lotu vakamatavuvale: Me vaka a vakavulica o Peresitedi Faust, ni lotu vakamatavuvale sa baleti keda kece sara se cava ga na yabaki ni bula eda sa tiko kina. Me na dau vagalalataka na veisiga Moniti mai na veioga kece sara ka rawa ni vakataotaka na sota vakamatavuvale oqo.

3. Vulici yadudua kei na vulici vakamatavuvale ni ivolanikalou: Sa gadrevi me da vukei ira na luveda me ra vaqaqacotaka na nodra vakabauta kei na ivakadinadina ena sala rawarawa oqo.⁶

Ni da vakamuria na ivakasala vuku nei Peresitedi Faust, eda sa taqomaka tiko kina na lewe ni matavuvale mai na ravuravu nei Setani ka vakakina na kena vaqaqacotaki na nodra vakabauta kei na nodra ivakadinadina me baleta na Turaga o Jisu Karisito.

Ena ivakaro ni matavuvale eda vulica talega kina ni “Sa lewa vakalou me ra veiliutaki ena yalololoma na tama ena nodra dui matavuvale ena loloma kei na ivalavala dodonu ka sa nodra itavi talega na kena vakarautaki na veika me ra bula ka ra taqomaki kina na nodra matavuvale. Sa nona itavi vakatabakidua na tina na nodra susugi cake na gone. Ena vuku ni veitavi bibi oqo, era sa vakaitavitaki kina na tama kei na tina me ra dauveivukei me vaka ni sa nodrau icolacola vata.”⁷

Ena loma ga ni vuvale ena vulica ka bulataka kina na matavuvale na ivakavuvuli ni kosipeli. Sa gadrevi kina na loloma uasivi me na vakavulici ka dusimaki kina e dua na matavuvale. O ira na tama kei na tina dauloloma era na vakavulici ira na luvedra me ra qarava na Kalou ena loma ni nodra vuvale. Ena gauna sa solegi kina e dua na vuvale ena yalo ni sokalou, na itovo ni yalo vakaoqori ena dewava yani na nodra bula yadua na lewe ni matavuvale. Oqo ena vakarautaki ira ki na solibula cava ga e gadrevi me ra lesu ki na itikotiko ni Kalou ka sema vata tiko yani vakamatavuvale ki na bula tawamudu.

Na ivakaro ki na matavuvale e vukei keda me da kila vakavinaka e vuqa na loloma e tukuna tiko na iVakabula ena Nona kaya vei keda ni sa dodonu “me da veilomani.”⁸ E a solia vei keda na ivakaraitaki cecere ni loloma ena Nona a kaya. “Sa sega na nona loloma levu e dua na tamata me uasivi cake ena ka oqo, me solia na nona bula ena vukudra na wekana.”⁹ E a qai sorovaka na noda ivalavala ca kecega, ka solia na Nona bula ena vukuda kecega.

Sa rawa me da solia na noda bula ena vukudra eda sa daulomana ka sega ni mate ena vukudra, ia me da bula tiko ena vukudra—solia na noda gauna, ka dau tiko voli ga kei ira, qaravi ira, veikaroni, dauloloma, ka vakaraitaka na loloma dina kivei ira na noda matavuvale, kei ira na tamata kecega—me vaka e a vakavulica na iVakabula.

Eda sega ni kila na cava ena yaco vei keda ni mataka, oqori gona na vuna ni sa gauna vinaka ga nikua me da tekivutaka kina na noda loloma ena veika lalai me vakataka na veimoko, kei na vosa “au lomani iko” kivei nomu itokani kei iratou na gone, kei ira era tiko vakavolivoliti iko.

Au se qai wilika oti toka ga oqo e dua na ivola ka vakamacalataka tiko na kena gadrevi sara me kakua ni laivi ki na mataka na veika o rawa ni cakava nikua. Ena Julai ni yabaki oqo e a sotava kina o Brazil e dua na vakacalaka levu ni voca ni waqavuka ena kena ivola itukutuku taucoko e se bau kilai. Era lewe 199 taucoko na tamata era a mate kina ka oka kina o ira na pasidia, vakailesilesi ni waqavuka, kei ira era tu ena vanua a laki voca kina. Na ivola au a tukuna tiko o ya e tukuni tiko ni vakau ki na matabose ni veiqaravi ni itukutuku mai vua e dua na turaga watina e dua vei ira na marama veiqaravi ena waqavuka ka a mate ena vakacalaka o ya. E volai toka vakaoqo na kena iulutaga “E Sega ni Yaco Mai Ni Mataka” ka a yavutaki mai ena dua na serekali nei Norma Cornett Marek.

Me da vakaraitaka tiko vei ira na watida kei na luveda ni da lomani ira, kei ira na ganeda kei na tacida edaidai. Au kila ni bula tiko na Kalou. Au kila ni sa Karisito ko Jisu, sa noda iVakabula ka Dauveivueti. Au kila ni sa parofita ni Turaga o Josefa Simici kei Gordon B. Hinckley sa parofita bula ni Kalou e vuravura edaidai. Ena yaca i Jisu Karisito, emeni.