Yaco me iVakadinadina kei Karisito

Me da ivakadinadina bula kei Jisu Karisito ena vakasama rawarawa duadua sai koya me da taukena vakataki keda e dua na ivakadinadina dei ni sai Koya na Luvena na Kalou, na iVakabula ka Dauveivueti kei vuravura. Era a kila na iApositolo ni gauna makawa ni o Jisu na Mesaia a yalataki tu ka ra vosa ena veika era sa kila ena Nona a Tucaketale. Ia, e sega ni gadrevi vua na ivakadinadina bula kei Karisito me a sa raici Koya oti se sa curuma oti na Kena iserau. Ni vakadinadina vei Jisu o Pita, “Sai kemuni na Karisito, na Luve ni Kalou bula,” a tukuna kina na Turaga ni kila o ya e yaco vua sega ni baleta na nodrau veivolekati vakayago se na veika erau sa sotava vata kei Jisu ia e baleta ni sa vakatakila vua na Tamana mai Lomalagi (raica Maciu 16:15–17). E vakamatatataka vei Tomasi na Turaga ni na rawa vua e dua me taukena na vakabauta se na ivakadinadina sa ciqoma ko Tomasi ka sega ni bau tarai Koya se raica: “Sa kaya vua ko Jisu, ni ko sa raici au Tomasi ko sa vakadinata: sa kalougata ko ira era sa sega ni raica, ka ra sa vakadinata” (Joni 20:29).

Na noda ivakadinadina me baleti Karisito e tekivu mai na nodra ivakadinadina na tani—mai vei ira na tamata eda kila se da kila na veika e baleti ira ka vakabauti ira. Sa tu vei keda na nodra ivakadinadina volai na iApositolo ni “ko Jisu oqo sa vakatura cake na Kalou, ka sa ivakadinadina ni ka oqo koi keitou kecega” (Cakacaka 2:32). Sa tu vei keda na Veiyalayalati Makawa kei na Ka Vou me baleta na Nona a tabaki taumada, na Nona veiqaravi, kei na Veisorovaki. E tiko vei keda e dua tale na Veiyalayalati, na iVola i Momani, na uto ni kena inaki sai koya me ra “kila [kina] na Jiu kei ira na Matanitu tani ni Karisito ko Jisu, na Kalou Tawamudu, sa vakatakilai Koya vei ira na veimatanitu kecega.”¹ E tu vei keda na nona ivakadinadina na Parofita o Josefa Simici ni a raica ka rogoca na Tamana ni dusi Jisu ka kaya, “Oqo na Noqu Gone ni Toko” (Josefa Simici—Ai Tukutuku 1:17), kei na nodra ivakadinadina e muri na parofita “ia me ikuri ni tukutuku kece ka vakadinadinataki kina ko Koya, keirau sa tukuna oqo na kena iotioti me yacova edaidai: Raica sa bula dina tiko ko Koya! Keirau a raici Koya vakaidina ni sa tiko ena liga imatau ni Kalou; keirau sa rogoca talega na domo sa tukuna ni sai Koya na Le Duabau ga nei Tamana” (V&V 76:22–23). E tu talega na ivakadinadina digitaki eso ni noda gauna era tu maliwai keda ia mai vei ira, ena matada kei na daligada sara ga, eda sa ciqoma na ivakadinadina veivakadeitaki. E vuqa sa vakaikuritaki na nodra kalougata ena nodra rogoca na ivakadinadina mai vei ira na itubutubu, tubudra, kei ira na nodra itokani yalodina.

O ira era sa curuma na veiyalayalati ni papitaiso era sa rawata e dua na edaumeni bibi ni vakabauti Jisu Karisito, ia ena isolisoli ni Yalo Tabu sa vakadinadinataki kina ni dina na ivakadinadina eda sa ciqoma me baleti Karisito. A vakadeitaka o Nifai ni na yaco na veika oqo: “Ia dou sa tu ena sala qiqo ka rabailailai sa basika ki na bula tawamudu; io dou sa curu mai ena matamata ni koro; dou sa muria na ivunau nei Tamada kei na Luvena; dou sa rawata na Yalo Tabu na ivakadinadina ni Tamada kei na Luvena, o koya sa yalataka ni dou na rawata kevaka dou na muria na sala” (2 Nifai 31:18; vakamatatataki).

Oqo e dua na isolisoli vakayalo me da vakabauta na nodra vosa na tani kei na dua tale na isolisoli “sa soli vei ira eso ena cakacaka ni Yalo Tabu me ra kila ni sai Jisu Karisito na Luve ni Kalou, o koya sa vakoti ki na kauveilatai ena vuku ni nodra ivalavala ca na kai vuravura” (V&V 46:13).

Na ivakadinadina oqo e vakavuqa ni dau yaco mai ena veika eda vakila—e raragi, e veivakacegui, e dua na yalo veivakadeitaki, na vakasama veivakararamataki. A solia na Turaga vei Oliver Cowdery e dua na ivakadinadina ni iVola i Momani ena veika vakayalo e vakila ka vakadeitaka “ni sa ka dina na itukutuku ko vola tiko” (V&V 6:17). Sa qai vakuria na Turaga, “Kevaka ko sa gadreva e dua tale na ivakadinadina, mo nanuma lesu ga na bogi ko a masu ka tagica kina vei au mo kila na dina ni veika oqo. Au a sega li ni vakaceguy a kina na yalomu? Ai vakadinadina cava tale ko gadreva, me uasivia na ivakadinadina sa solia na Kalou?” (V&V 6:22–23). Na nona tukuna tiko na vakacegu ki na nona vakasama e dua, na Yalotabu, e sega ni sala duadua ena yaco mai kina e dua na ivakadinadina, Ia ni vu mai Vua na Kalou, e sega tale ni dua me cecere cake mai kina. Me vaka ga na noda kana magiti mai na vosa i Karisito ena ivolanikalou ena rawa kina ni da “tukuna yani ni [dou] sa rogoca na [Domoqu] ka kila na [Noqu] ivakavuvuli” (V&V 18:36), e rawa ni da vakadinadinataka ena veika vakayalo eda vakila mai vua na Kalou ni da kila na Luvena ka ni bula tiko o Koya.

Ena gauna ni Nona veiqaravi ena Ra ni Vuravura, a solia kina na iVakabula na ivakaro oqo: “Dou dulaka cake na nomudou rarama me cilavi vuravura. Raica sai au ga na rarama mo dou dulaka cake me vaka dou sa raica niu a kitaka” (3 Nifai 18:24). E dodonu me rawa ni ra raica vei keda na tamata e dua na ka e vakataki Jisu Karisito. Na noda ivalavala, na vosa, na keda irairai, kei na ivakarau sara mada ga ni noda vakasama me vakaraitaki Koya kei na Nona ivakarau. E vakamacalataka ko Alama ni da sa sucu li vakayalo, sa vakararamataki keda tiko na iserau ni matana (raica Alama 5:14). Ena sala vata oqo, sa vakarota kina na Turaga me da vakataki Koya (raica 3 Nifai 27:27). E dina ni da a sega ni tiko vata kei Koya ena gauna ni Nona veiqaravi, ni da vakasaqaqara ena ivolanikalou, eda raici Jisu kina kei na veika a tukuna ka vakayacora. Ia ni da muria na iwalewale oqori, eda sa Kena ivakadinadina bula kina.

Au nanuma lesu na nona ivakaraitaki e dua na bete ni Katolika keirau a veikilai ena neirau a cakacaka vata ena dua na veiqaravi vakaitikotiko mai Nashville, e Tennessee. O Father Charles Strobel a tauyavutaka e dua na veiqaravi me kauti ira tani kina na tamata ka sega tu na nodra vale mai na veigaunisala, me ya vica ena dua na gauna ki na dua na parokaramu ni veituberi me rawa kina na kila ka eso me ra rawata kina na nodra bula. A solia na veiauwa sega ni kilai me vukei ira na tamata oqo me yaco na veisau tudei ena nodra bula me ra vinaka kina me rawa ni ra bula vakataki ira. Au kurabui niu qai kila ni a vakamatei tinana ena vica na yabaki yani ki liu e dua na tamata sega na nona vale. Na nona loloma Vakarisito o Father Strobel a yacovi ira sara mada ga yani na tamata ka dau tu vata kei ira e dua ka a taura ena ivalavala kaukauwa na nona bula na tinana vakamareqeti.

Na uto ni nodra itukutuku na iapositolo kei na parofita ena veitabayabaki kecega sai koya ni gadrevi na veivutuni me rawa kina na vakabokoci ni ivalavala ca ena vuku ni Veisorovaki i Jisu Karisito. Na noda veivutuni e tukuna na Kena ivakadinadina kei na kaukauwa ni Nona loloma soli wale me da vosoti ka vakasavasavataki kina. E sega ni gadrevi me sa taucoko sara na noda vinaka me qai rawa kina ni da ivakadinadina bula, me da segata tikoga me da veisautaka na noda bula ki na nona ivakatagedegede na iVakabula. E veivakasalataki vakavuku o Peresitedi Ezra Taft Benson (1899–1994) me da dau vosota vakadede ka gugumatua sara ena ivalavala ni bula oqo:

“Me da yaco me vakataki Karisito e sasaga ni gauna taucoko ni bula ka vakavuqa ni dau okati kina na tubu kei na veisau berabera, e voleka ni sega ni dau kilai… .

“… Me baleti ira na Paula yadua, na Inosi, kei na Tui Lamonai yadua, e drau ka udolu na tamata era raica ni ivalavala ni veivutuni e malumu, ka so na gauna e sega ni dau kilai. Era toro voleka vua na Turaga ena veisiga yadua, ka ra sega ni vakila ni ra sa tara tiko e dua na bula vakalou. Era bulataka na bula tawakilai ni vinaka, na veiqaravi, kei na yalodina. Era vakataki ira na Leimani, ka a kaya na Turaga ena vukudra ‘era a papitaisotaki ena bukawaqa kei na Yalotabu ia era a sega ni kila’ (3 Nif. 9:20; vakamatatataki).”²

E taleva vakaoqo ko Nifai ena marau, “Eda sa tukuni Karisito ka rekitaki Karisito, ka vunautaki Karisito ka parofisaitaki Karisito; ia eda sa vola na ka sa vakatakilai vei keda, me ra kila kina na noda kawa na sala me bokoci kina na nodra ivalavala ca” (2 Nifai 25:26). Sa rawa vakakina ni da vakaitavi ena nodra vukei na tani, vakauasivi o ira na luveda, me ra lako mai vei Karisito.

Na malanivosa nei Nifai “eda sa tukuni Karisito” e vakatura tiko me da kakua ni lomalomarua ena noda veitalanoataka na lomada me baleta na iVakabula ena gauna ni noda veivosaki kei na veigauna tale eso. E vakavuqa ni dau yaco oqo ena veigauna ni sota yadua ka da rawa ni veitalanoataka kina se o cei o Koya kei na veika a vakayacora ka vakavuvulitaka, ka da vakauqeti ira kina na tani me ra lomani Koya ka dau muria.

“Eda rekitaki Karisito” e kena ibalebale ni da bula ena dua na bula mamarau ka vakaraitaka na noda vakabauti Karisito. Eda kila ni “sa na qai rauti keda na nona loloma” me da vueti kina mai na mate kei na ivalavala ca ka me da vakavinakataki kina mai Vua (raica Moronai 10:32–33). Ni da rarawa tiko se sota kei na leqa lelevu, eda kila ena Vukuna ga, sa vakadeitaki kina na noda marau tawamudu. Ni cila yani na noda vakabauti Jisu Karisito, eda sa vakaraitaka kina vei ira na tani o ira era “oca ka colata na icolacola bibi” na sala me ra kunea kina na vakacegu Vua (raica Maciu 11:28–30).

“Eda vunautaki Karisito” e baleta na cakacaka ni daukaulotu tudei kei ira na lewenilotu me baleta na kaulotu ia e okati talega kina na veika eda vakayacora ena noda sokalou, na kalasi ni Matawilivola ni Sigatabu, kei na veigauna tale eso vakaoqori ka dau iulutaga kina ni vuli kei na veidusimaki o Koya. Na noda vakaitavi ni da qasenivuli ka vakakina ni gonevuli sa tiki ni noda vakadinadinataki Koya, kei na vuli yadua e tokona na vakaitavi oqori e vakuria na ivakadinadina ni noda vakabauta.

“Eda parofisaitaki Karisito”e kena ibalebale na noda vakaraitaka na noda ivakadinadina me baleti Koya ena kaukauwa ni Yalotabu (raica 1 Korinica 12:3). “Na itukutuku kei Jisu na yalo ni parofisai” (iVakatakila 19:10). Me vakataki ira era a parofisai ena gauna makawa me baleta na imatai ni Nona lako mai, keimami sa vakadeitaka talega kina ena vosa kei na ivalavala na parofisai me baleta na iKarua ni Nona lako mai. Ena noda vakayacora na papitaiso kei na veicakacakatabu vakalotu tale eso ena vukudra na tubuda ena kaukauwa ni matabete sa vakalesui mai vei Ilaija ena noda vakavakarau ki na “siga sa levu ka rerevaki ni Turaga” (Malakai 4:5–6; raica talega V&V 2; 128:17–18), eda vakadinadinataka ni na lesu tale mai na Karisito ia na yaloda me vegolei vei ira na noda qase me vakarautaki kina na Nona lako mai (raica Malakai 4:6; V&V 2:2).

“Eda vola na veika sa vakatakilai vei keda” e vakaturi kina na yalomatua ena kena caka e dua na ivola tudei ni noda ivakadinadina kei Karisito. Eda kila ni ivakadinadina eda wasea “sa volai mai lomalagi me ra dikeva na agilosi; io era sa rekitaki kemudou” (V&V 62:3). Me ra raica o ira na noda kawa kei ira tale eso na noda ivakadinadinataki Karisito ka volai se katoni tu me yaga vei ira ni se bera sara mada ga ni sucu eso vei ira.

Ni o sa vakila na ivakadinadina ni Yalo Tabu ena Vukuna, ni sa vakadeitaka ka vakadeitaka tale ki yalomu ena vuqa na sala kei na gauna, ena nomu segata mo dulaka cake tu na rarama ni Nona ivakaraitaki ena nomu bula ena veisiga yadua, ka vakakina ena nomu wasea na nomu ivakadinadina vei ira na tani ka vukei ira me ra vulica ka muri Koya, o iko e dua na ivakadinadina bula kei Jisu Karisito. Sa solia vei iko na Kalou na gagadre ni yalomu mo duavata kei ira “era rogoca na itukutuku kei Jisu ka vakabauta na yacana” (V&V 76:51) ka yalodina tiko na ivakadinadina oqori ena gauna taucoko ni nona bula (raica V&V 138:12).