Na Noqu Kanamagiti ni Siganimate Sega ni Namaki

E dau gauna ni vakacagicagi namaki vei au na Siganimate ena gauna au se qai tubu cake tiko kina. Ni oti na lotu erau dau vakavulica vei keitou na lewe ni matavuvale e dua na lesoni me baleta na Veisorovaki kei na Tucaketale oi rau na noqu itubutubu; ena yakavi a qai dua na kanamagiti. E vakavuqa ni ra dau mai duavata kei keitou ena ivakayakavi ko ira na itokani, sa dau ka marautaki ka levu na kakana vinaka. Ena vuku ni ivalavala oqo sa yaco kina me noqu gauna ni vakacagicagi taleitaki duadua na Siganimate—na gauna bibi ki na matavuvale me keimami marautaka kina na Nona Tucaketale na iVakabula.

Ena dua na yabaki niu vuli voli mai Lodoni, au raica niu tiko duadua voli ga ena Siganimate. E qai tekivu sara na lotu ena neitou tabanalevu ena yakavi, sa tu kina e mataqu na mataka taucoko o ya. Au vakananumi iratou na noqu matavuvale eratou tu sara yani vakayawa, eratou marautaka tiko na siga o ya kau sega ni tiko kina, e lala na yaloqu kau rarawa.

Taumada au vinakata meu sa vakalomalomani au tikoga, ia vakalailai sa tekivu meu vakasamataka na veika au rawa ni vakayacora me vakaibalebale kina na siga o ya. E gole na noqu vakasama vei ira na tamata au dau lakosiviti ira e veisiga ena ikelekele ni sitimanivanua osooso. Me vaka na kena ivakarau ena veikoro lelevu kecega, sa dau nodra itikotiko na sega tu na nodra vale na ikelekele ni sitimanivanua ka ra waraka tu kina na veika e rawa ni soli vei ira. Sa dau yavalati vakalevu na yaloqu ena vuku ni nodra gagadre, kau qai vakila ni sega ni o au duadua ga e Lodoni au tiko duadua voli ena Siganimate. Na sala vinaka duadua meu vakaraitaka kina na noqu vakavinavinakataka na vei-Siganimate au dau marautaka ena noqu gauna ni gone sai koya meu vukei ira na tani.

Au cakava e vica vata na ivakarau ivakasigalevu ka tiko e loma na seniwiji, dua na vuanikau, bisikete, kei na wainimoli. Au qai gole yani ki na ikelekele ni sitimanivanua, kau vaqarai ira na tamata au dau levei ira tu ena so na gauna. E vuqa era sa vakavinavinaka sara vakalevu ena vuku ni kakana. Au kaya vei ira yadua, “Me Siganimate Marautaki!”

Ni sa vo ga e dua na ivakasigalevu, au donumaka yani e dua na tamata ka sa rairai vakaloloma dina sara ga. E dukaveluvelu na nona isulu, e kune na ivakatakilakila ni rarawa e matana, ka rairai e yaloka ni matana na yaluma titobu. Niu solia yani vua na kena ivakasigalevu, a raici au cake mai ena kurabui.

“Na cava oqo?” e taroga.

“Na ivakasigalevu, kemuni,” au sauma yani.

“Vinaka, vinaka vakalevu sara,” e kaya mai. E veisau vakasauri ki na marau kei na vakavinavinaka na irairai ni matana. E taura na taga kakana ena vakanuinui, ka mai kukuva toka yani me vaka beka e dua na iyau talei.

“E ka ni marau,” Au kaya, ni tarai au na irairai ni matana. “Me Siganimate Marautaki, kemuni.”

“Me Siganimate Marautaki!” e sauma mai.

Niu taubale yani ki vale au nanuma lesu na vosa nei Penijamini na Tui: “Raica eda sa sega li ni dravudravua kecega?” (Mosaia 4:19). Au vakila ni kevaka e sega na iVakabula, eda na vakasavi tani koi keda kecega, eda na vakaloloma, ka galili. Ia na iVakabula e yacovi keda mai ka solia vei keda e dua na ka eda gadreva vakaidina sara: na vakanuinui ni rawa me da savasava sara, ni da na bula tale, ni da na lesu tale Vua ena dua na siga.

Ni da veiqaravi tu vata kei na ivalavala ca kei na mate, au tu talega e matana na iVakabula me vaka e dua na dau kerekere. E dolele mai vei au, ka solia mai na loloma vakalou. Ena dua na siga niu na tu e matana ena vakaraitaki mai mataqu na vakavinavinaka levu, kau sa raica vakalailai, e matana na tamata yalomalumalumu oqo.

Niu taubale ki vale, sa tekivu meu tagi. Sa yali na noqu galili, ka vakaisosomitaki ena reki kei na noqu kila vakatitobu cake na vosa nei Penijamini na Tui kei na nona loloma cecere na iVakabula. Au vakavinavinaka lo vua na Turaga ena nona isolisoli sega ni namaki na turaga oqo. Au a solia vua e dua na ivakasigalevu rawarawa ga; sa vakalesuya mai vei au ko koya e dua na magiti dina ni Siganimate.