Sokalou ena Serenilotu
Sa rawa ni da toro voleka yani vua na noda iVakabula ena ivakatagi.
Au diva mada ga ke rawa niu dau lagasere me vakataki Sisita Schneider. Au diva mada ga ke rawa niu dau taba piano me vakataki Baraca Menendez. Eda sa rogoca beka vakavica se vakasamataka na veika oqo? Ena so na gauna eda dau vakasamataka na veitaledi ni ivakatagi era isolisoli ka nodra walega na tani, e dua na taledi totoka eda dau vakamalekata ia eda nanuma ni sega ni tu vei keda.
E Na Lotu i Jisu Karisito ni Yalododonu Edaidai, na ivakatagi kei na lagasere e baleti keda kece. Mai na serenilotu, sa rawa ni da vakaraitaka kina na noda vakavinavinaka kei na noda vakacaucau,vulica nai kosipeli vakalesui mai ni noda iVakabula, nanuma na Nona Veisorovaki, ka yalataka mo muri Koya.
Vakaraitaka na Vakavinavinaka kei na Vakacaucau
Ni sereki mai Ijipita ko ira na Isireli ena gauna e liu, “ia ko Mosese kei ira na Isireli, era sa qai seretaka vei Jiova na sere oqo” (Lako Yani 15:1). Ni ra kosova na wasawasa na Jeretaiti, “era sa ia na sere ni vakavinavinaka vua na Turaga” (Ica 6:9). Ia ni ra sa vakatabuya na Yalododonu Edaidai na Valetabu e Kirtland, era a lagata na sere vou nei William W. Phelps, “Na Yalo ni Noda Kalou.”1 Ena vetabagauna kece vakosipeli, era sa dau laveta na domodra na luve ni Kalou me ra vakacaucautaki Koya ena sere.
E vuqa na noda serenilotu nikua e wasea na yalo vata ni reki kei na vakacaucau oqo. Me kena ivakaraitaki e dua tale na sere lomani nei William W. Phelps e tukuna vakaoqo:
Na noda iVakabula,
Vu ni marau,
Me tou na vukei mai vua,
Veibogi veisiga
Tuberi keda,
Tui dau veisereki tu ga!2
Na serenilotu talega e rawa ni vakavoqataka na noda vakavinavinaka me baleta na veivakalougatataki, me vaka e vakamacalataki ena tikina kilai levu oqo:
Turaga keitou vuabale, parofita ni sa lewa
Kosipeli sa solia mai.
Cilavi keimami edai.
Ni da lagata na veiserenilotu oqo, eda sa muria tiko kina na ivakaro “Ia kevaka ko sa marau, mo ia na sere ni vakavinavinaka vua na Turaga, mo ia ena ivakatagi kei na meke, … io vakacabora vua na masu ni vakacaucau kei na vakavinavinaka” (V&V 136:28).
Vulica na Nona Kosipeli
Me ikuri ni kena vakaraitaki na vakavinavinaka kei na vakacaucau, e solia talega vei keda na serenilotu na gauna vinaka me da vulica kina na kosipeli i Jisu Karisito. Me kena ivakaraitaki, na nodra sere kilai oqo na gonelalai e vakamacalataka vakarawarawa sara ka vakavinaka na noda isema ni veiwekani kei Tamada Vakalomalagi:
Na veiserenilotu tale eso e vakaraitaka vei keda na ivakarau me da bulataka kina na ivakavuvuli ni kosipeli, me vaka na serenilotu taleitaki oqo, ka a volai ena itabagauna e se qai tauyavu tiko kina na Lotu:
Dou gole mai na itavi me rawai;
Lako ena marau.
Dredre ni toso dou sotava tu,
Dou lomani tu ga.
’Vinaka me tou vaqara
Ka biuta noda itovo ca;
Tou qai marau ka matalau—
Cegu tu! Cegu tu!5
Eso na noda sere dau taleitaki vakalevu e vakavulici keda me da dau muri ira na italai nei Karisito, o ira na Nona parofita digitaki ena noda gauna oqo. “Praise to the Man,” e vakaoqo, e vukei keda me da dau nanuma na bibi ni nona itavi na Parofita o Josefa Simici ena Vakalesui mai ni kosipeli:
Praise to the man who communed with Jehovah!
Jesus anointed that Prophet and Seer.
Blessed to open the last dispensation,
Kings shall extol him, and nations revere.6
Ni vakasamataki na sere oqo kei na kena tale eso kei na vulici ni idusidusi ni ivolanikalou e volai tu ena serenilotu ena vukei keda me da vulica na kosipeli ka dau nanuma na iVakabula ena noda bula ena veisiga.
Nanuma na Nona Veisorovaki
E dua na sala bibi duadua eda na dau nanuma kina na iVakabula sai koya me da vakaivotavota ena sakaramede e veimacawa yadua. Ena noda vakavakarau ki na soqoni tabu oqo, eda dau lagata e dua na serenilotu. Na serenilotu ni sakaramede e dau kauta lesu mai ki na noda vakanananu na isoro sa mai cabora na Karisito kei na kena ibalebale vei keda:
Ligana sa dra tu me saumi noqu dinau.
Loloma vuabale, na dinau sa kila?
Meu qaravi koya ena itutu sa dokai,
Yacova niu cuva e yavai Karisito.9
Kevaka e lagati ena vakasama titobu kei na masumasu, na qaqa ni sere ni sakaramede e vukei keda me da vakanamata vua na iVakabula. Era vakarautaki keda me vakaibalebale na noda vakaivotavota ena sakaramede ka yalayala tale me da taura vei keda na yaca i Karisito, me da dau nanumi Koya tikoga, ka muria na Nona ivunau.
Yalayala mo Muri Jisu Karisito
Na yalayala me da muria na iVakabula e vakamacalataki ena vuqa sara na noda veiserenilotu. Ni da lagata na veiserenilotu oqo, eda vakadinadinataka vua na Tamada Vakalomalagi ni da gadreva me da muria na Luvena. Me kena ivakaraitaki, vakasamataka mada na qaqana eso oqo:
Tamai keimami tou sa matalau
Nomuni dau veituberi dokai.
Keitou marau, lagasere talei!
Marau, marau, muri koya tu.10
Na serenilotu “Au Lako ke ko ni Lewa” e tauci kina na mataqali itukutuku vata ga:
Au vakanuinui vei kemuni,
Lomani au mai Jisu,
Tudei dina vei kemuni:
Me yaco nomuni lewa.11
Na noda sere—se ka ni vakacaucau, vakavinavinaka, kila ka, ivakananumi, se yalayala—era sa ka talei vua na Turaga. Sa kaya ko Koya, “Raica au sa rekitaka sara na sere sa lagati ena yalodina; io, na nodra sere na yalododonu sa nodra masu vei au, kau na vakalougatataki ira kina” (V&V 25:12).
E kalougata ni sega ni kaya na Turaga, “Na sere rogorogo vinaka ga e masu vei au,” se, “Au na rogoca ga na sere e sala vata kei na ivakatagi.” Na noda sere me vaka ga ena noda bula, e kauwaitaka o koya na ituvaki ni yaloda ka sega ni veika eda rawata.
Se cava ga na ivakatagedgede ni noda maqosa, e rawa kece ni da vakaitavi ena ivakatagi ena kena lagati na serenilotu. Ia ni da lagasere mai vu ni yaloda, eda sa lako mai vei Karisito ena serenilotu.