Au Kila ni Bula Tiko na Noda iVakabula

Ena imatai ni noqu yabaki ena Brigham Young University– Idaho (ka se Ricks College ena gauna o ya), au sa dau vakananumi iratou vakalevu na noqu matavuvale. Ia ni oti ga e vica na vula ni vuli, au sa matau sara ki na bula e koronivuli kau sa taleitaka sara. Ni yaco mai na qiri, au a tiko ena noqu rumu kau vuli lesoni tiko.

“I Christy, e dua na itukutuku rogo ca au kauta mai vei iko,” e kaya mai na tinaqu, e cacavukavuka na domona. “Sa mai takali ena bogi nikua o tamamu ena dua na mate ni uto ca sara.”

E luvuci vakalevu na lomaqu niu tovolea meu vakasamataka na veika au rogoca o ya. Au a se qai raici tamaqu ga ena vica walega na siga ni bera o ya, ia au sega vakadua ni bau vakabauta ni sa na kena iotioti ni gauna o ya. E tatara sara vakaca ki na neitou matavuvale taucoko na nona mate na tamai keitou; e tarai ira talega vakaca na lewe ni neitou tabanalevu. Se qai yabaki 53 walega na tamaqu, ka neitou bisopi tiko.

Na veisiga e tarava o ya e levu sara na veisiko kei na talevoni mai vei ira na matavuvale, na itokani, lewe ni tabanalevu, kei ira na lewe ni itikotiko. Keitou vakila na sovaraki ni loloma mai vei ira era tu vakavolivoliti keitou. Ena veibulu vei Ta, era wasea kina na lewe ni matavuvale na bula keimami wasea vata kei koya, ka keimami vakadinadinataka na yavu ni veivakabulai kei na bula ni sa oti na mate.

O Ta e dua na tagane vakawati yalodina, e dua na Yalododonu Edaidai dina, e dua e dau vakaitavi vakalevu ena sikauti, ka tama vakasakiti. Era vakalougatataki e vuqa na tamata ena vuku ni bula a bulataka. Ni sa oti na veibulu a vakatabuya na tuakaqu qase duadua na ibulubulu, keitou tucake vata tu vakamatavuvale ka lagata ena tagi “Au Luve ni Kalou” (Serenilotu, naba 58).

Ni oti ga na veibulu au sa lesu tale ki vuli ena siga ka tarava. Au sega soti ni marautaka na noqu sa lesu tale ki vuli, ia au kila ni dodonu meu tosoya tikoga na noqu bula ka qarava vakavinaka na noqu itavi. E rawarawa cake eso na siga mai na so tale. Au dau vakananuma vakalevu na tamaqu, kau vakararavi ga ena veika au kila me baleta na ituvatuva ni veivakabulai kei na noqu vakabauti Jisu Karisito me vukei au ena noqu sotava na veika au bolei kina kei na noqu taro.

Ni oti e rua na macawa mai na nona sa takali na tamaqu, au a kauta na noqu ivolaniveisiga ki na dua na valenilotu e koronivuli kau vola na veika au vakila kei na veika a yaco ena gauna e mate kina o Ta. Niu volavola tiko, au vakila sara vakaukauwa na Yalotabu kau vakila e dua na veivakadeitaki kaukauwa ni lomani au na Tamada Vakalomalagi, ka sa tu na ituvatuva ka baleti au vakatabakidua, ka vakakina niu na sega ni biu duadua tu. Ni oti na noqu volavola, sa taqiri mai ena gusu ni vosavosa ena nodra vanua ni qito na gonevuli ka koto voleka na serenilotu “Au sa Kila ni Bula Tu” (Serenilotu, naba 38). E basika mai ki noqu vakasama ena gauna vata oqori na qaqa ni sere:

Au kila dina ni bula tiko na noqu iVakabula, kau kila ni lomani au. Ni sa tucake tale mai na mate, au kila ni na bula tale na tamaqu kei ira kece na noda daulomani era sa liu yani vei keda. Sa dua na vakacegu levu na noda kila na veika dina oqo.