Na Vakabauta nei Emilio
E dua na dikoni a vakaraitaka vei au—na nona bisopi—na kena ibalebale “na vakabauta me ra bula kina.”
Ena vica na vula sa oti, a tauvimate vakasauri o Emilio, e dua na dikoni ena neitou tabanalevu. Era a sega ni raica rawa na vuniwai na mate e tauvi koya. Erau sa taqaya o koya vata kei tinana ni sa malumalumu tikoga ka lutu sobu sara vakatotolo na nona bula. A kauti koya vakavica ki valenibula na tinana ia a sega ga ni dua na macala ni mate e tiko vua.
A kauti koya mai ko tinana ki valenilotu me soli vua e dua na veivakalougatataki vakabete. E dua na lewe ni kuoramu ni italatala qase vata kei au, na nona bisopi, keirau a vakalougatataki koya, ka moce vakavinaka kina ena imatai ni gauna ni oti e vica na bogi ena bogi ko ya.
Ia, ni oti ga e vica na siga sa tukuni vei au ni sa baci yacovi Emilio tale na kena mate ka sa curu tale ki valenibula. Keirau a kusa yani ki valenibula kei na dua tale na turaga, keirau curu rawa sara ki na nona rumu ka sikovi koya. Au nanuma ni sa na yalolailai ko Emilio ena veisau sa mai yaco tale vua, ia au vakayaloqaqataki ena veika a qai yaco ka tarava.
Keitou a veitalanoataki Jisu Karisito, kau vakamacalataka ni tu vua na iVakabula na kaukauwa me vakamalumalumutaka na ka kecega, me vaka na Nona lewa. A tara na yaloi keirau na vosa nei Emilio: “Bisopi, oqo e dua ga na veivakatovolei. Au vakabauta ni na vakalailai ga sa na oti tale yani baleta niu vakabauti Jisu Karisito.” Keirau a vakotora na ligai keirau e uluna ka solia tale vua e dua na veivakalougatataki.
Ni oti na bogi ko ya, e sega ni vakabauti na taucoko ni nona bula cake mai o Emilio. A rawa me lesuva tale na veika e dau vakayacora e veisiga kei na lotu ka sega tale ni dua na kena leqa.
Sa cakacakataka ko Emilio na vakabauta e gadrevi me cakava kina na iVakabula na cakacaka mana vata e dau vakayacora ena Nona a tiko voli e vuravura. Kivei au, ko Emilio e kedra ivakaraitaki ko ira a vosa ena vukudra na iVakabula ka kaya, “Ia sa soli vei ira eso tale na vakabauta me ra bula kina” (V&V 46:19).
Sa dua na ka vakasakiti me noda na galala me da cakacakataka na matabete ki na noda bula ka kila ni tiko e dua na Tamada Vakalomalagi, o koya e lomani keda, ia ena noda vakabauta na Luvena, sa rawa kina ni da vakila na veicakacaka mana ena veisiga e muri oqo.