Lako Mai vei Karisito

E yaga me da dau vakasamataka vakatitobu na veigauna eso ena noda bula era vakarorogo kina na tamata. Vei au, au sa raica e dua na iwalewale ena nodra ciqoma na tamata na veisureti. Ena veikisi yadua sa vakatakila na Yalo Tabu vei ira, kevaka e lailai e tolu na dina. Na veika ena sotavi ena sega ni dau yaco mai ena kena ituvatuva au na tuva yani, ia era na yaco kece ki yalodra era sa lako vakaidina mai vei Karisito.

iMatai, ena yaco me ra vakila ni sala duadua ga era na rawata kina na marau era vinakata vakalevu duadua ena bula oqo kei na bula sa bera mai e vu mai vei Jisu Karisito. Sa yaco me ra vakabauta na veimalanivosa oqo mai na iVola i Momani: “Io raica au sa kaya vei kemudou, me vaka ni sa dina na veika kece oqo ka sa bula na Turaga na Kalou, sa sega sara e dua tale na yaca sa soli e rukui lomalagi, ia na yaca i Jisu Karisito duadua ga kau sa tukuna era na bula rawa kina na tamata.”³

Na veivakadeitaki oqori e dredre ni da vakila ena dua na vuravura ka ra tukuna kina e vuqa na domo ni sega na Kalou, ni sega na ivalavala ca, ka vakakina ni kune na marau ena lasa vakavuravura. Ia e rawa ni kaukauwa cake na domoda kevaka eda rawata na isolisoli me da solia e dua na ivakadinadina dei ni Karisito ko Jisu ka iVakabula kei vuravura. Na ivakadinadina oqori ena yaco mai vakaukauwa cake sara ena veika sara ga o vakila vakataki iko ena Veisorovaki i Jisu Karisito ni cakacaka ena nomu bula. Kevaka o dau vakananuma vakalevu na ivakarau sa veisautaki iko kina na Nona Veisorovaki ka kevaka o dau vakavinavinaka vakawasoma, o na raica ni na vakaukauwataki na nomu ivakadinadina me baleti Koya me tara na yalodra na tani. Ena gauna era vakila kina o ira o sureti ira mai ena vuku ni nomu ivakadinadina na ivakadinadina o ya, ena yaco me ra ciqomi Koya me nodra Turaga ka iVakabula. Ia na veiciqomi oqori ena gauna e yaco mai kina, ena ragita na yalodra kei na nomu.

Kena ikarua, o ira au kilai ira era sa lako vakaidina mai ki Vua era sa veiyalayalati me ra talairawarawa ka muri Koya. E rawa ni tekivu ena kena rokovi na veiyalayala rawarawa, me vaka na wiliki ni iVola i Momani se na lako ki na soqoni ni sakaramede. E dodonu me yaco mai ena nodra vakabauta ni Karisito ko Jisu ka iVakabula. Ni ra rokova na yalayala ena vakabauta o ya, era na vakila e dua na ka. Era na sega beka ni rawa ni vakamacalataka vakavosa na yalo o ya, ia era na lomavinaka. Na talairawarawa ena veika lalai sara mada ga, ena kauta mai na veivakalougatataki o ya mai vua na Kalou. Ia ena yaco mai na gauna me ra vakila e dua na yalo veivutuni ka na sala vata mai kei na gagadre me ra veiyalayalati ena papitaiso, me ra taura na yaca ni iVakabula me nodra, ka vakasavasavataki mai na ivalavala ca.

Era dau vakayacora na digidigi bibi oqo na tamata ena vuqa na inaki. Taumada e sega ni raica rawa e dua na tamata eda vakavulica ni dodonu me papitaiso. Ia, sa dau tovolea me vinaka ena nona bula taucoko. E sega ni cakava e dua na ivalavala ca bibi. Sa papitsio oti ena gauna e se gone kina ena dua tale na lotu. Ia e qai yaco mai ki na nona vakasama e rua na ka. E dua oya ni a papitaiso na iVakabula ena nona talairawarawa, ka sega ni bau ivalavala ca. Na kena ikarua oya ni vinakata me yalataki koya vua na iVakabula ena dodonu ni matabete dina, me vaka ga na nona lako vei Joni na iVakabula me papitaiso.

E dua tale na cauravou keirau a vakavulica a digitaka me papitaiso ena vuku ni kavoro ni yalona ena rarawa a vakila me baleta na nona ivalavala ca. Ni mata cake mai na wai ni papitaiso, a biuta na ligana e domoqu, ni drodro tu vakayauyau na wainimatana, ka kaya ki daligaqu, “Au sa savasava. Au sa savasava.”

Na nodra digitaka me ra veiyalayalati ena papitaiso e vu mai na dua na vakabauta. Era kila ni kevaka era rokova na veiyalayalati me ra talairawarawa ki na Nona ivakaro na iVakabula, ena rokova o Koya na Nona veiyalayalati vei ira me tuberi ira ki na bula tawamudu. Era sa vakarau tu me ra lako yani Vua me rawa ni ra veisautaki ka liutaki mai Vua, ka na yaco mai na gauna, era na yaco me vakataki Koya.

Ena kauti keda oqori ki na ikatolu ni ka au sa raica ena nodra bula o ira era sa lako vakaidina mai ki Vua. Era sa segata me ra yaco me ra vakataki Koya. Era sa tekivu me ra tovolea me ra cakava vei ira na tani na veika era kila ni na cakava vei ira ko Koya. E daru sa raica na veika oqori vei ira na tamata yalodina ni oti sara ga na nodra papitaiso kei na nodra ciqoma na Yalo Tabu. Ena dua na gauna, keirau lako kei na noqu itokani daukaulotu me sikova e dua na matavuvale keirau a vakavulica ka papitaisotaka ena vica na macawa yani ki liu. Erau kauti keirau sobu ki na nodratou iwase ni vale e ra koi rau na itubutubu ka rau vakaraitaka vei keirau e dua na rumu. A nona rumu ni moce tu e dua vei rau na luvedrau goneyalewa. Ia sa toki ena gauna oqo me rau rumu vata kei na tacina. Sa sinai tu na rumu sa vakalala o ya ena veika kece ena gadreva na nodratou matavuvale ena dua na gauna ni leqa tubukoso.

Keirau a sega ni vakavulica vei rau e dua na ka me baleta na vakavakarau ki na gauna ni leqa tubukoso. Ni keirau taroga se cava sa rui totolo kina na nodratou cakava e dua na ka dredre vakaoqo, na kena isau o ya ni rau a wilika ena dua na mekesini ni Lotu ni vinakata na Turaga me ra vakarau tu me ra qarava na nodra matavuvale kei ira na tani. Erau kaya, “E sega beka ni o koya oqori na veika era dau cakava na Yalododonu Edaidai?”

Na vakabauta rawarawa o ya a vakavuna me ratou cakava na veika kece eratou nanuma ni vinakata na iVakabula me ratou cakava. A tudei kina na nodratou gagadre me ratou muri Koya. Ka veisautaki iratou. Eratou dau yalovinaka ka tovolea me ratou vukei ira na tani. Ia sa tubu tikoga na nodratou rawata me ratou vakaraitaka na loloma uasivi. Ka sai koya oqori na iwalewale vei ira kece au kila ni ra dau lako tikoga Vua ena nodra bula taucoko.

Eda dau tukuna ena so na gauna na nodra maroroi tiko na lewenilotu me vaka beka ni da tauri ira tiko. E rawa ka dodonu me da itokani vei ira era sa digitaka me ra lako mai Vua. E rawa ni ra yalolailai ni yaco mai na veivakatovolei, me vaka ni dau yaco ga mai na veivakatovolei. Ia e dodonu me da nanuma tiko ni nodra itokani vinaka ka dei duadua o ya, koi rau na iVakabula kei na Tamana, sai Koya talega na Tamadra. Erau na tala mai na Yalo Tabu o Tamada Vakalomalagi kei na iVakabula me vakacegui ira ka vakadeitaka na nodra vakabauta kevaka era sa talairawarawa ena yalomalumalumu. Me vaka beka oqo, ni ko lako ki veisiko se veituberi ni matavuvale vata kei na dua na lewenilotu vou, kevaka ko na solia vua e dua na gauna me masu se veivakavulici se me lokuca na gauna ni veisiko, o sa solia tiko vua eso na kaukauwa ka sega ni ivakaraitaki walega ni loloma. Ena kauta sobu mai na kaukauwa mai lomalagi. Oqori ena laveti ira cake ena gauna ni vakatovolei ka taqomaki ira mai na qaciqacia ni sa yaco mai na veivakalougatataki, me vaka ni na yaco ga mai na veivakalougatataki.

E dua tale na ka talei ena yaco. Ni ko solia na yalomu mo sureti ira na tamata me ra lako mai vei Karisito, ena veisau na yalomu. O na cakava tiko na Nona cakacaka Vua. O na raica ni na rokova ko Koya na Nona yalayala mo drau duavata ena nomu veiqaravi. Ena yaco mo kilai Koya. Ia ni toso tiko na gauna ena yaco mo vakataki Koya, ka “mo dou vinaka kina.”⁴ Ena nomu vukei ira na tani me ra lako mai Vua, o na raica ni o sa lako tiko kina Vua o iko. Kevaka o vinakata mo volekati Koya, mo vakila na Nona vakacegu, ena yaco vakavinaka duadua ena nomu veiqaravi ena Vukuna.

Sai Koya a kaya:

“Dou lako mai vei au, koi kemudou vakaaduaga sa oca ka colata na icolacola bibi, kau na vakacegui kemudou.

“Vakataqara vei kemudou na noqu ivua ka vuli vei au, niu sa yalomalua ka yalomalumalumu, dou na kunea kina na vakacegu ni yalomudou.

“Ni sa rawarawa na noqu ivua ka mamada na noqu icolacola.”⁵

Au vakadinadinataka ni na rokova ko Koya na yalayala ko ya vei ira eda sureta Vua. Ka na rokova na yalayala o ya vei ira era veiqaravi ena Vukuna ena nodra veisureti.