NA NONA VAKABAUTA E DUA NA GONE

Au sa nanuma meu taubale ga ki na koniferedi ni iteki, keirau taubale vata kei na luvequ tagane, se qai yabaki walu ena gauna ko ya, me rauta ni 30 se 40 na miniti. Sa oti e ruasagavulu na miniti au qai kila niu sa sega ni kila na vanua me keirau gole kina. O Elson, na luvequ tagane, e gone dau vosa, a talanoataka tiko vei au na veika e dau yaco mai koronivuli se mai vale. Au kerei koya me vakarorogo mada vakalailai, kau vakamacalataka niu gadreva meu vakasama mada baleta au leqataka de keirau sa lako sese.

Ena gauna oqori e qai vakaraitaka kina vei au na luvequ na nona vakabauta. E kaya me keirau cabora mada e dua na masu. Au a sauma me vaka na vuku kei na kila ka vaqase (ka niu sa vakatotolo tale tikoga ni sa voleka na gauna me tekivu kina na lotu), kevaka e vinakata me masu, ia me vakayacora vakakina—au gadreva meu vakasama mada ga. Au kaya lo e lomaqu, “eso na ka eda sega ni gadreva kina me da vakararavi vua na Turaga; e dua vei ira na noda vaqara na noda sala ki valenilotu.”

E vaka sara ga ni kila na noqu vakasama, a solia vei au ko Elson e dua na lesoni ena yalomalumalumu, ka kaya, “Na cava o dau vinakata tu ga kina mo cakava na ka ena sala kaukauwa?” Ni oti o ya sa mai vagagalu tale yani, kau kila ni sa masu tiko ena nona vakasama kei na yalona. Ena vica na miniti ka tarava keirau sa yaco yani ki valenilotu, kau kila ni sa ciqoma na isau ni nona masu.

Ni da Yalododonu Edaidai, eda kalougata ena noda sa lewena na Lotu i Jisu Karisito. Sa vakalevutaki cake na na noqu ivakadinadina me baleta na dina ni kosipeli vakalesui mai ena noqu kila ni kila na luvequ tagane, e se gone tikoga, me cakacakataka na ivakavuvuli ni vakabauta kei na masu, sa yaco kina me ivakaraitaki vei au ni ivakarau ni kena bulataki na ivakavuvuli i Jisu Karisito.