Na Cakacaka ni Veisorovaki

Au a lewena Na Lotu i Jisu Karisito ni Yalododonu Edaidai ena 1992 e Netherlands. Ia a sega ni curu na watiqu ka sega ni vakatara vei rau o Alex kei Petra, na luvei keirau, me rau papitaiso (sa veisautaki na yaca). Ia, keitou dau lako ga ki lotu ka lotu vakamatavuvale ena veigauna eso.

A vinaka tu na ka taucoko ena vica vata na yabaki, me yacova na gauna sa tukuna kina ko Alex, sa yabaki 13 ena gauna o ya, ni sa sega tale ni vinakata me laki lotu se na lotu vakamatavuvale. Ni sa qase cake mai, sa qai torosobu tikoga na kena ca. Sa dredre sara vei au meu tiko voleka ga vei Alex, baleta ni sega walega ni sa tekivu gunu ka kana tavako, ia sa lasu talega ena vuku ni nona ivalavala. Sa vakamosia na yaloqu, kau sa tagi kina vakalevu ka cabora e levu na masu ni vakatakekere vei Tamada Vakalomalagi me vukea na luvequ.

Ena dua na bogi niu dabe vakadigagalu tiko ena valetabu, au raica ena noqu vakasama e dua na iyaloyalo. Au raica e dua na cauravou ni solia tiko na sakaramede. E vaka ni taleva tiko vei au na Turaga me baleta na dina kei na kaukauwa ni Nona Veisorovaki, ka vakauqeti au meu lomana na luvequ ka tikoga e yasana.

Ia, ni toso na gauna, sa vaka me qai voravora cake ga na bula. Ni oti na neirau sa veisere kei tamai Alex, sa veilecayaki sara vakalevu o Alex. Au kila ni gadreva na veivuke, ia e sega ni gadreva na noqu veivuke ka sega ni vakarorogo niu tovolea meu vosa vua.

Ena dua na bogi a kerea o peresitedi ni neitou tabana kevaka e rawa ni mai vosa mada vei Alex. A sosa o Alex ia a vakadonuya me rau veivosaki. Ni oti na nodrau veivosaki a cudruvi koya na peresitedi ni tabana o Alex ni vakauqeti koya me laki kaulotu, e kaya vakaoqo, “Kevaka e tamata dina ni Kalou o koya na peresitedi ni tabana, ena kila na ka e dodonu me caka. Ena kila ni sega niu kilikili kaya na laki kaulotu—ia na cava ga me vakasosataki au tiko kina?” Ena bogi o ya au kila ni tiko e dua na nona ituvatuva na Turaga.

Sa tekivu me vakavotukana na ituvatuva ena dua na sala sega ni namaki ena noqu ciqoma e dua na qiri mai na siteseni ni ovisa. Sa vesu ko Alex. Keirau a daramaka na neirau kote kei na watiqu vou ka keirau laki kauti Alex mai na siteseni ni ovisa ena bogilevu. Keirau a sega ni bau cudruvi Alex, ia keirau sega soti ni vosa vakalevu kei tamana vakacabecabe.

Ni keitou yaco yani ki vale, a talanoataka vei keirau o Alex na veika a yaco ena nodrau butakoca e dua na motopai vata kei na dua na nona itokani. Sa dua na ka na nona veivutunitaka na veika sa yaco. Au raica kina ena imatai ni gauna e dua na cauravou sa kavoro tu.

Na nona vesu sa yaco me itekitekivu ni nona lesu mai o Alex ni sa qai tekivu me kila na isau ni nona ivalavala kei na vanua sa gole tiko kina na nona ilakolako. Mai na siga o ya ka lako yani sa tekivu me yaco mai vei keitou na veivakalougatataki.

Ena siga ka tarava e tukuna vei keitou o Alex ni kerea vua na ovisa me qiriti keitou baleta ni kila ni keitou lomani koya. Sa qai vakila talega na levu ni nona sa vakamavoataka na yaloi keirau, ka taleitaka na neirau malumu tu ga.

E vica tu na itokani nei Alex era lewenilotu, era a vukei koya. E dua a sureti koya ki na itavi qaravi ni Lotu eso. E dua tale e solia vua e dua na iVola i Momani ka bolei koya me wilika. E dina ga ni leqa tu na matana, au dau raici Alex ni wilika tiko ena veigauna eso.

Na veivakalougatataki e tarava—kevaka e rawa niu wilika—sai koya na nona kerea o Alex kevaka e rawa ni keirau volia e dua na nona sutu me vaka ni sa vinakata me lako ki lotu. Au nanuma ni vakaibalebaletaka tikoga o koya na Kirisimasi. Ia au kurabui ni sa tomana tikoga na nona lako ki lotu, ni sa oti mada ga na sereki ni vuli.

Na veivakalougatataki e tarava e dredre sara toka meu vakasamataka rawa. A tukuna o Alex ni sa na papitaiso. A sega ni gadreva na noqu veivuke ka tuvalaka ga na veika kece ena nodra veivuke na nona itokani kei ira na daukaulotu era a vakavulici koya tiko. E voleka niu sega ni vakabauta na ka au raica ena siga ko ya, kau raica na luvequ ni sa vakaisulu vulavula tu ka caka veiyalayalati tabu tiko.

E muri ni qai talanoataka na italanoa ni nona saumaki mai, au qai raica ni a dredre sara na rarawa kei na yaluma a sota kaya o Alex, ia era a vukei koya talega me yalomalumalumu ka dau tekiduru me kerea na veivuke. E vakamacalataka vakaoqo o Alex: “Ena dua na bogi ni sa sega ni rawa niu colata tiko na noqu icolacola ena kena bibi, au qai nanuma na nona vosa e dua na noqu itokani vinaka ka a tukuna vei au ni rawa niu dau masuta na veivuke. Ena bogi ko ya au nanuma meu sa tovolea mada. E sega tale ni dua na katuba a tadola tu vei au, ia me vaka ni dau vakavulici au tiko na tinaqu ena masu, au a tekiduru ka bobo na mataqu. Ni tekivu meu kerea na veivuke, sa lutuki au e dua na yalo vinaka. Au na sega sara ni guilecava na vakanananu o ya; au vakila na loloma savasava i Karisito. Au vakila ni sa kau tani mai vei au na noqu leqa. E sega tale ni se bau lesu mai vei au na yalo nuiqawaqawa a tu vei au, kau sa vakalougatataki ena ivakadinadina kei Jisu Karisito. Sa veisau na yaloqu, kau sa gadreva meu muri Jisu Karisito.”

Ni oti na nona papitaiso, vakadeitaki, ka tabaki ki na matabete, a kerei ko Alex me veivotayaka na sakaramede—na ivakatakarakara tabu ni nona isoro na iVakabula. Sa qai yaco me vakavotukana tu e mataqu na veika au a raica ena valetabu ena vuqa na yabaki sa oti. Au a vakavinavinaka vei Tamada Vakalomalagi ena veika au vakila tiko. Sa dua na gauna bibi vei au.

A rawa ni sa yaco ga e kea na italanoa, ia e kalougata ni sega. Au sa sarava tiko me tekivu mai na gauna ko ya na cakacaka ni Veisorovaki ena nona bula na luvequ tagane. O ni nanuma tiko na neitou peresitedi ni tabana ka a vakauqeti? Sa tubu tikoga na nona ivakadinadina na luvequ, sa yaco me vakavotukana na nona veisureti na neitou peresitedi ni tabana. E se qai lesu mai na kaulotu o Alex. Ena loma ni rua na yabaki a tatara yani ka vukei ira na tani—ni tarai koya tiko na Turaga.

Au vakavinavinaka niu tinai Alex, ia au vakavinavinaka vakalevu cake ena Veisorovaki i Jisu Karisito ka cakacaka tiko ena noda bula taucoko.