“Koi Au na Sala”

“Koi au na madrai ni bula: ko koya sa lako mai vei au ena sega ni viakana; ia ko koya sa vakabauti au ena sega ni viagunu tale… . Koi au na madrai ni bula sa lako sobu mai lomalagi: kevaka sa dua e kania na madrai oqo, ena bula ka tawamudu” (Joni 6:35, 51).

Na Kanavata ni Lakosivia sa vakananumi kina na nodra sereki na Isireli mai Ijipita ka dau caka kina na kana madrai sega ni vakaleveni. Ni sa voleka mai na soqo ni marau oqo, a vakayacora ko Jisu e dua na cakamana ena nona vakani ira na lewe 5,000. E vuqa era a raica na cakamana oqo era a muri Koya baleta ni a solia vei ira ko Koya na kakana, sa mani vakavuvulitaka vei ira ko Koya me ra vakasaqara na kakana “sa tu ki na bula tawamdu” (Joni 6:27). Sa qai vakavuvulitaka vei ira ko Koya me baleta na mana, ka tukuna tale vei ira ni a lutu mai lomalagi me ra kana kina na Isireli ena lekutu. E kaya kina, “Koi au na madrai ni bula,” ka tukuna vei ira na veivakani vakayalo sa solia na Tamada Vakalomalagi mai Vua, ka vakakina na yalayala ni bula tawamudu e kauta mai ko Koya.

Ena dua na kanavata ni Lakosivia e muri, a vakayagataka ko Jisu na madrai me ivakatakarakara ni Yagona ena sakaramede. Ni da vakaivotavota ena madrai e veimacawa ena gauna ni sakaramede, eda vakananumi Jisu Karisito—na Nona veisorovaki, na Nona Tucaketale, kei na yalayala ni veivakamamautaki vakayalo ena veitokani ni Nona Yalotabu.

“Koi au na rarama kei vuravura:ko koya sa muri au ena sega ni lako ena butobuto, ena tu ga vei koya na rarama ni bula” (Joni 8:12).

E vakatokai Koya ko Jisu me Rarama kei Vuravura ena Kanavata ni Valecavu. Ena veibogi kece ena gauna ni kana vata oqo ena waqa na cina ni valetabu me ivakatakarakara ni Rarama ni Kalou, sa talai yani ki vuravura. E tukuna ko Joni ni ko Jisu na “Rarama dina, sa lako mai ki vuravura ka vakararamataki ira na tamata kecega” (Joni 1:9). Ia mai vua na Parofita ko Josefa Simici sa vakatakila mai na Turaga na Rarama i Karisito “sa vu mai vua na rarama sa vakararamataki kemudou, io sai Koya na rarama sa vakararamataka na yalomudou ka vakavukui kemudou” io sai koya “na rarama oqo sa tiko ena ka kecega, ka lewa na ka kecega” (V&V 88:11, 13).

Sa vakararamataki na noda vakasama kei na yaloda ena vukui Jisu Karisito. Sa dusimaki na noda sala mai na Nona rarama, ka vukei keda me da kila na vinaka mai na ca ka dusia tiko vei keda na sala ki na bula tawamudu.

“Oi au na vaini koi kemudou na tabaqu: ko koya sa tu vei au, koi au talega vei koya, sa vua vakalevu: ke dou sa tawase tani vei au, dou sa sega ni rawata e dua na ka” (Joni 15:5).

E vakatautauvatataki Koya ko Jisu ki na vu ni vaini ena dua na loga ni vaini. Na vu ni vaini oqo e sega walega ni vakadeitaka tu na vu ni vaini taucoko ki na loma ni qele, ia e vakani ira talega na taba ni vaini lalai, ka ra basoga tani mai vua ka vua. Ko Jisu Karisito na noda ikelekele ni vakanuinui ka noda ivurevure ni kakana vakayalo kei na tubu. Eda rawata na kaukauwa ena Vukuna me da buladodonu kina ka caka vinaka. Sai Koya talega na yavu ni Lotu ka ivurevure ni kena dodonu me vunautaki kina na kosipeli ka takavi vuravura kece yani.

“Koi au na ivakatawa vinaka, ia kau sa kilai ira sa noqu, ia ko ira sa noqu era sa kilai au” (Joni 10:14).

Na nona itavi tudei na ivakatawa sai koya me liutaki ira na sipi ena vanua me ra kune kakana kina kei na wai ka kauti ira lesu ki na nodra itataqomaki ena qele ni sipi. Sa dau taqomaki ira talega na sipi ko koya na ivakatawa mai na veika rerevaki eso me vaka na manumanu kila kei ira na daubutako. Baleta ni kilai ira na nona qele ni sipi, ena kila ni sa yali tiko e dua, ena lako me vakasaqara. Era sa talairawarawa vua na sipi ka vakabauti koya vakadua.

Ko Jisu, na iVakatawa Vinaka, sa kacivi keda tiko ni da sa lako sese, kevaka eda vulica me da rogoca na Domona, ena liutaki keda ko Koya ki na veibuca vinaka ni veivakabulai kei na bula tawamudu, ka taqomaki keda mai na mate kei na ivalavala ca.

“Sa kaya vei ira ko Jisu, e dina, e dina, au sa kaya vei kemudou, ni sa bera ni sucu ko Eparaama au sa bula” (Joni 8:58).

Ena dua na sala, ena nona kaya ga “Koi Au,”sa kaya kina ko Jisu na ka kece. Ena veika oqo, e kaya kina ni o Koya na Dauveibuli ni vuravura ka vakakina ko Jiova, na Kalou ni Veiyalayalati Makawa, ka ibalebale ni yacana na “Koi Au” (raica Lako Yani 3:14).

Ko Jisu na Luve ni Kalou, na Mesaia ka iVakabula, o koya sa vakabulai keda mai na ivalavala ca kei na mate. Sa na rawa vei keda na bula tawamudu ka yaco me vaka na veika sa nakiti me baleti keda ena vukuna kei na veika e cakava ena vukuda.