E DUA NA VEISAU KAUKAUWA VAKAYALO

Ni oti na vuli nasi, au laki cakacaka ena vanua ni veiqaravi bibi ena dua na valenibula ni gone. Au gadreva meu vuli ka kila na cakacaka, meu vakadinadinataki au. Au sega vakadua ni bau raitayaloyalotaka, ni na dredre sara—vakayago ka vakayalo talega. Au sega ni vakasamataka rawa se cava sa rui ca kina na vuravura, ko ira mada ga na itubutubu era vakayacora na ca e sega ni vakavinakataki rawa vei ira na luvedra dina. Au sega talega ni vakasamataka rawa se cava na vuna e vakatara kina na Kalou me ra mate na gone. Ni oti e dua na yabaki na noqu cakacaka, sa oca na yaloqu.

Au qai kila ni ratou sa veitalanoa tiko kei ira na daukaulotu ni Yalododonu Edaidai na noqu matavuvale. Au dau cakacaka bera vakalevu ka sega ni rawa niu dau tiko e vale ena gauna ni veitalanoa oqori. Sega ni dede erau sa papitaiso na taciqu kei na tinaqu. Ka vaka niu sa biu duadua tu vata kei na noqu lomatarotaro kei na leqa ka sega tu na kena iwali. E dina ni ratou segata na noqu matavuvale me ratou veivosakitaka na noqu veitalanoa vata kei rau na daukaulotu, au sa sega ni vinakata meu raici rau. Ia ena dua na gauna ni rau veisiko mai ko Sisita Johnson kei Marchuk, au a tiko ena veitalanoa. Ena gauna ka tarava erau a vakavulica vei au e dua na vakasama vakayalo, kau sa kunea na isau ni taro kau dau lomatarotarotaka tu ena dua na gauna balavu. Sega ni dede au sa papitaiso ka vakadeitaki.

Me tekivu mai na gauna au lewena kina na Lotu i Jisu Karisito ni Yalododonu Edaidai, sa dau vakaukauwataki au na noqu vakabauti Jisu Karisito. Au sa vakila vakavuqa na kaukauwa ni masu ka vakila niu sa lako tani mai na butobuto ki na rarama. Na ono na yabaki ena Lotu sa solia vei au na veivakadeitaki ni ko Jisu Karisito na noqu iVakabula. Ia ena vukui Jisu Karisito, sa rawa kina vei au ena gauna oqo meu voleka cake vei Tamada Vakalomalagi.