Au sa Vakabulai Li?

A kerei au ko Rachel na noqu itokani kevaka e rawa niu lako vata kei koya ki lotu. E dau bulabula sara ko koya ena nodratou lotu, kau mani gadreva meu kila se duidui vakacava mai na noqu lotu na nodratou. Au a kerea vei rau na noqu itubutubu ke rawa ni keirau lako vata. Erau kaya me vaka ni duidui na gauna ni neitou lotu, e rawa niu lako.

E vuqa na ka me baleta na ivakarau ni nodratou sokalou e sega ni matata vei au: na sere kei na masu e duidui; e matalia talega na veika e tukuna na dauvunau. Ni soli mai na peleti ni soli ka, au a sega ni kila na ka meu cakava.

E muri sara, sa qai taroga na dauvunau kevaka e dua vei keimami na tiko e se bera ni bau ciqomi Jisu Karisito me nona iVakabula me lako mai ki liu. A vakasolokakana o Rachel ka vakauqeti au meu lako. Au a lomalomarua. Ena neitou tabanalevu e se bera vakadua ni bau kerea e dua, na bisopi meu lako yani ki liu ka ciqoma na Karisito e matadra na lewe levu. Au sega ni kila na ka meu cakava. E rairai au se bera beka ni cakava e dua na ka bibi me baleta na noqu vakabulai. Au a biuta na soqoni o ya ena veilecayaki.

Niu qai vakasamataka ena dua na gauna e muri na veika oqo, au qai kila niu a sa ciqomi Jisu Karisito oti me noqu iVakabula e matadra na lewe vuqa. Au sa papitaiso mai vua e dua ka tu vua na dodonu ni lewa ni matabete nei Jisu Karisito. Na noqu papitaiso sai koya na veiyalayalati vata kei Tamada Vakalomalagi niu na taura na yaca i Jisu Karisito ka yaco me nona tisaipeli. Au yalataka niu na muria na Nona ivunau ka tovolea meu vakataki Koya. Era a tiko ena noqu papitaiso na matabete ka ra ivakadinadina kina, ka vakakina o ira na lewe ni matavuvale kei na tabanalevu.

Me tekivu mai na noqu papitaiso ka vakadeitaki, au sa dau vakaivotavota ena vei-Sigatabu kece ena sakaramede ka vakadinadinataka tale vei Tamada Vakalomalagi niu na taura na yaca i Karisito.

Ena so na gauna era na taroga beka eso na vakabauta Vakarisito mai na veimatalotu tale eso na taro vata a taroga na nona dauvunau na noqu itokani, ena veisau beka ga vakalailai na kena vosa. Era na taroga beka kevaka eda sa vakabulai. Sa vukei keda me da kila ka sauma na taro oqo ko Elder Dallin H. Oaks, e dua na lewe ni Kuoramu ni iApositolo Le Tinikarua: “Ena so na gauna era dau vakaibalebaletaka vakatani eso na tamata vakabauta Vakarisito eso na vosa ni kosipeli bibi me vaka na vakabulai se na veivakabulai. Kevaka me da sauma me vaka na ibalebale ni nona taroga tiko o koya e taro kevaka eda sa ‘vakabulai,’ e dodonu me noda isau ni taro na ‘io.’”¹

Au se qai tara cake tiko na noqu ivakadinadina kei Jisu Karisito ena gauna au a lako kina ki na nona lotu na noqu itokani. Me tekivu mai na gauna o ya au raica ni levu ga ni noqu vulica na kosipeli kei na nodra vosa na parofita bula, na levu ni noqu sa vakarau ka yalodei meu tu ka ivakadinadina ni Kalou ena veigauna kecega (raica Mosaia 18:9).