Keitou Vakadinadinataki Jisu Karisito

Ko Jisu ga sai koya na Jiova cecere ena Veiyalayalati Makawa, ka a biuta mai na itikotiko vakatui nei Tamana mai lagi ka siro sobu mai ki vuravura ka mai sucu vakatamata ena dua na vanua lolovira. Sa tukuna taumada na nona sucu ko Aisea, ka a kacivaka kina vakaparofisai, “ni sa sucu mai e dua na gone me noda, sa soli mai vei keda e dua na gonetagane: ena vakatau ki vei koya na lewa; ena vakatokai na yacana ko Veivakurabuitaki, na iVakavuvuli, na Kalou kaukauwa, na Tama ni gauna tawamudu, na Tui ni Sautu” (Aisea 9:6).

O Jisu Karisito o koya keitou vakadinadinataka sai koya, me vaka e kacivaka ko Joni na Dauvakatakila, “na dautukutuku yalodina, na ulumatua vei ira era sa tucake tale mai na mate, na nodra Turaga na tui e vuravura. Sa lomani keda ka savai keda mai na noda ivalavala ca ena nona dra dina, a sa qisi keda me da tui ka bete vua na Kalou kei Tamana, sa ia vei Koya na vakarokoroko kei na lewa ka tawamudu” (Ai Vakatakila 1:5–6).

E luvei Koya sa Cecere Sara ka se luvena tikoga ena gauna oqo. Sai Koya duadua ga e sa taucoko sara na nona vinaka me mai bula voli ena dela ni vuravura. A vakabulai ira na tauvimate ka vakavuna me ra lako na gera, rai na mataboko, rogo na didivara. E vakaturi ira na mate. Ia a solia na Nona bula ena dua na cakacaka ni veisorovaki, na kena cecere eda na sega ni vakasamataka rawa.

E vola ko Luke ni sa vakaitamera sara na yaluma oqori o koya “na nona buno sa vaka na titiri ni dra ni sa lutu ki na qele” (Luke 22:44), e dua na ivakatakilakila vakayago ka vakadeitaki ruarua ena iVola i Momani kei na Vunau kei na Veiyalayalati (raica Mosaia 3:7; V&V 19:18). Na vakararawataki mai Kecisemani ka vakakina ena kauveilatai mai Kalivari, e vica ga na drau na mita na kena yawa mai Kecisemani, e tiko ruarua kina na “veivakatovolei, … na rarawa ni yago, … na viakana kei na viagunu, kei na oca, vakayago ka vakayalo talega, o koya sa sega ni vosota rawa na tamata,” e kaya ko Penijamini na Tui, “me yaco sara ki na mate” (Mosaia 3:7).

Ni oti na rarawa mai Kecisemani sa qai yaco mai na, Nona vesu, Nona lewai, Nona vakacacani, kei na mosi sega ni tukuni rawa ni Nona mate ena kauveilatai, ka muria yani na Nona laki bulu ena ibulubulu nei Josefa kei na nona Tucaketale mai ena qaqa. O Koya, na gone lolovira mai Peceliema ka a lakova na veisala kuvuniqele mai na Vanua Tabu ena rua na milenia sa oti, sa yaco me Turaga sa Kaukauwa Sara, na nodra Tui na tui. O Koya sa Solia na veivakabulai ki na tamata kecega. E sega ni dua e rawa ni kila sara vakavinaka na ukucavu tu ni Nona bula, na vakaturaga ni Nona mate, na raraba ni Nona isolisoli ki na kawatamata. Keitou sega ni lomalomarua ena neitou kacivaka vata kei koya na sotia ko ya ka a kaya ena gauna sa mate kina ko Koya, “Sa dina ga sa Luve ni Kalou ko Koya oqo” (Marika 15:39).

E vakaoqori na ivakadinadina ni veiyalayalati ni Vuravura Makawa, na iVola Tabu. Ka tiko e dua tale na domo, na domo ni veiyalayalati ni Vuravura Vou, na iVola i Momani. Eke e vakamacalataka kina na Luvena sa tucaketale, na Tamana, ka kacivaka kina, “Raica oqo na noqu Gone ni Toko kau sa dau vinakata vakalevu, sai Koya sa dau vakacaucautaki kina na yacaqu” (3 Nifai 11:7). Na veivakatakilai vakalou oqo sa idola ni itukutuku ni nona veiqaravi na iVakabula ena kedra maliwa na Nona “sipi tani tale eso” (Joni 10:16) ni oti na nona Lakocake mai Jerusalemi. Na itukutuku ena iVola i Momani ena kena levu taucoko me baleta na vakalou kei Jisu Karisito kei na veivakalougatataki tawamudu e rawa ni yaco mai vei ira kece na luvena tagane kei na yalewa na Kalou ena vuku ni Nona loloma veivueti. Ena nona vosa e dua vei ira na parofita ni iVola i Momani:

“Ia eda sa cakacaka vagumatua me da vola na veika oqo, me da vakauqeti ira kina na noda kawa kei ira talega na wekada me ra vakabauti Karisito, ka veivinakati tale kei na Kalou, ia eda sa kila ni da sa vakabulai ena loloma walega, ka segai ena vuku ni cakacaka… .

“Ia eda sa tukuni Karisito, ka rekitaki Karisito, ka vunautaki Karisito, ka parofisaitaki Karisito, eda sa vola na ka sa vakatakilai vei keda, me ra kila kina na noda kawa na sala me bokoci kina na nodra ivalavala ca” (2 Nifai 25:23, 26).

Sa soqoni vata kei na veika kecega oqo na nodra itukutuku na parofita ni gauna oqo: “Ia me ikuri ni itukutuku kece ka vakadinadinataki kina ko Koya, keirau sa tukuna oqo na kena iotioti me yacova edaidai: Raica sa bula dina tiko ko Koya!” (V&V 76:22). Ena Vunau kei na Veiyalayalati, e sega ni lomalomarua ena nona vakadinadinataka na Nona itavi vakalou: “Koi au na Alifa kei na Omeka, na Karisito na Turaga; io koi au na ivakatekivu kei na ivakataotioti, na iVakabula kei vuravura” (V&V 19:1).

E sega ni da raici Koya walega me noda iVakavuvuli ka iVakatawa Vinaka ia ni sa noda iDusidusi cecere, ka sa kaya vei keda, “Kevaka ko sa vinakata mo vinaka sara, … mo lako mai mo muri au” (Maciu 19:21).

Sai koya na vatuivakadei cecere duadua ni Lotu ka vakatokai ena Yacana, Na Lotu i Jisu Karisito ni Yalododonu Edaidai. Sa sega tale ni dua na yaca e soli vei ira na tamata me da vakabulai kina (Cakacaka 4:12). Sai koya sa Vakatekivuna na noda vakabulai, sa Solia na bula tawamudu (raica Iperiu 5:9). E sega e dua sa tautauvata Kaya. A sega mai liu. Ena sega sara ni dua. Me vakavinavinakataki na Kalou ena Nona solia mai na Luvena Daulomani, ka a solia na Nona bula me rawa vei keda na bula, sai koya talega na vatuivakadei cecere, ka sega ni yavalati rawa ni noda vakabauta kei na Nona Lotu.

Eda sega ni kila na veika e waraki keda tu mai liu. Eda bula ena dua na vuravura ni veilecayaki. Eso era na rawata na veika cecere. Eso tale, na rarawa. Vei ra eso, na reki levu kei na yalomarau, na bulabula vinaka, na bula dauloloma. Vei ira eso, de ra na tautauvi mate beka kei na veika rarawa tale eso. Eda sega ni kila. Ia e dua ga na ka eda kila. Me vaka na Kalokalo iVolasiga mai lomalagi, se cava ga e tu mai na vunilagi, e duri tu oqori na Dauveivueti kei vuravura, na Luve ni Kalou, e dei ka dina me vaka ni ikelekele ni noda bula sega ni mate rawa. Sai koya na uluvatu ni noda vakabulai, na noda vu ni kaukauwa, na noda vu ni vakacegu, na vanua sara ga e vakanamata kina na noda vakabauta.

Ena rarama ni siga kei na butobuto eda rai Vua, ka sa tu e kea o Koya me veivakadeitaki ka matadredredre vei keda.

Sai koya e vakanamata kina na noda sokalou. Sai koya na Luvena na Kalou bula, na Ulumatua nei Tamana, na Le Duabau ga ena lewe. Sa “tucake tale mai na mate, … me kedra isevu era sa moce” (1 Korinica 15:20). Sai koya na Turaga ka na lesu tale mai “me mai liutaki ira na nona tamata e vuravura“ (V&V 76:63; raica talega Maika 4:7; Ai Vakatakila 11:15).

E sega ni dua e cecere cake mai vua me sa bau mai bula e vuravura. E sega tale ni dua me sa bau vakayacora e dua na solibula e rawa ni vakatauvatani vua se solia e dua na veivakalougatataki e rawa ni vakatauvatani vua. Sai koya na iVakabula ka Dauveivueti kei vuravura. Au vakabauti Koya. Au sega ni lomalomarua se vakabeka ena noqu tukuna ni Kalou ko Koya. Au lomani Koya. Au cavuta na yaca i Jisu Karisito ena vakarokoroko kei na qoroqoro. Sai Koya na noda Tui, na noda Turaga, na noda iVakavuvuli, na Karisito bula, o koya e tucake tu ena liga imatau i Tamana. E bula tiko! E bula tiko, e totoka ka vakasakiti, na Luvena bula na Kalou bula.