Tokoni ʻOku Fakafiemālié

Naʻá ne hū mai ki ha kiʻi loki ako ʻi he ʻOtu Filipainí ke ʻinitaviu ko e teuteu ke ne maʻu ʻa e Lakanga Taulaʻeiki Faka-Melekisētekí. Naʻe ʻikai ke u ʻilo pe naʻe taʻu fiha, ka naʻe aʻu ki he kāingalotu motuʻa taha he kiʻi koló naʻa nau ui ia ko Tatay (tamai).

ʻI he taimi naʻá ku ʻeke ange ai pe ʻe mahino ki ai ʻeku lea faka-Pilitāniá, naʻá ne malimali fiefia mo tali lelei mai, “ ʻIo, ʻe mahino pē kiate au.”

Hili ʻema ʻinitaviú naʻá ku ʻeke ange leva pe ʻoku ʻi ai ha faʻahinga ʻuhinga ʻoku totonu ai ke ʻoua naʻa fakanofo ia ki he lakanga fakataulaʻeikí. Hili ha kiʻi taimi siʻi naʻá ne pehē mai leva, “Mahalo ʻoku ʻikai totonu ke u maʻu ʻa e lakanga fakataulaʻeikí.”

Naʻá ku ʻohovale, peá u ʻeke ange, “Ko e hā hoʻo ʻuhingá?”

Naʻá ne tali mai, “ ʻOku taha pē hoku foʻi nifó. ʻOku ou ʻilo ʻoku ʻikai ke u fuʻu matamatalelei fēfē ke maʻu ʻa e lakanga fakataulaʻeikí. ʻE sai pē ia kapau te ke talamai he ʻikai ke u lava ʻo maʻu ʻa e lakanga fakataulaʻeikí.”

Naʻá ma tangutu ʻi ha kiʻi taimi nounou lolotonga ʻeku fakalaulauloto ki heʻene leá, ne kamata ke u fakatēloʻimata. Naʻá ku hili leva hoku nimá ʻi hono nimá ʻo u talaange kuó u ʻosi mamata ʻi ha kau maʻu lakanga fakataulaʻeiki lelei tokolahi kuo ʻosi honau louʻulú, ka ʻokú ne maʻu ʻe ia ha louʻulu matolu, ʻuliʻuli lelei mo fakaʻofoʻofa. Naʻá ku toe talaange ki ai fekauʻaki mo ha kau maʻu lakanga fakataulaʻeiki ʻoku taha pē honau telingá pe matá, ka ʻokú ne kei maʻu hono ongo matá mo hono ongo telingá fakatouʻosi.

Hili iá, naʻá ku fakamatala ange fekauʻaki mo haku kaungāmeʻa naʻe tuʻusi hono nimá he kanisaá. Ko e taimi naʻe lotu ai ʻa e tangatá ni ʻi homau ʻapí ʻo kole ki he Tamai Hēvaní ke tāpuakiʻi hoku uaifí mo e fānaú, naʻá ku ʻiloʻi ko ha tamaioʻeiki lelei ia ʻa e ʻEikí. Naʻá ku fakamatala ange ki he tamaí ni ʻa e hilifaki ʻe hoku kaungāmeʻá ni hono nima pē tahá ki he ʻulu ʻo ha kiʻi taʻahine ke tāpuakiʻi he naʻe meimei mate pea naʻá ku ongoʻi ʻa e mālohi ʻo e lakanga fakataulaʻeikí he ʻaho ko iá.

Naʻe malimali leva ʻa e tokotaha Filipino toulekeleká ni mo pehē mai, “ ʻOku ou fakatauange ʻe tali mo ʻeku ngāue ki he ʻOtuá.”

ʻOku tau tōnounou kotoa ʻi ha ngaahi meʻa lahi, pea ʻoku tau ʻilo kotoa ʻa e ongoʻi taʻe-taau ʻoku tau maʻu ʻi he hoko mai ha uiuiʻi foʻou. Ka ʻoku tali ʻe he ʻOtuá ʻa e feilaulau anga fakatōkilalo taha ʻa e mēmipa masiva tahá, pea te tau lava kotoa ʻo fakahoko ha faikehekehe. ʻOku ʻikai fie maʻu ke tau momou pe mā; ko e meʻa pē ʻoku fie maʻú ke tau foaki hotau lelei tahá ki he ʻEikí. Te Ne hanga leva ʻo tāpuakiʻi mo fakaivia kitautolu, ʻi ha founga fakaofo pea ngaohi kitautolu ke tau kakato.