Ngaahi Fakakaukau Maʻá e Efiafi Fakafāmili ʻi ʻApí
ʻOku ʻi he makasini ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ki he efiafi fakafāmili ʻi ʻapí. Ko ha ngaahi sīpinga pē ʻeni ʻe niʻihi.
“Ko e Fono ʻo e ʻAukaí,” p. 26: Fakakaukau ke faʻu ha palani fakafāmili ki he Sāpate ʻaukai ka hokó. Fokotuʻu ʻa e taimi ke lotu fakataha ai ʻa e fāmilí ke kamata mo fakaʻosi ʻa e ʻaukaí. Aleaʻi ʻa e meʻa te mou ʻaukai ki aí pea mo e founga ʻe tāpuakiʻi ai kimoutolu ʻi haʻamou vahevahe hoʻomou fakamoʻoní ʻi he lolotonga ʻo e ʻaukaí. Kapau ʻoku ʻi ai ha mēmipa ʻo e fāmilí he ʻikai lava ʻo taʻe-kai mo taʻe-inu, aleaʻi ha toe ngaahi founga kehe ʻe lava ai ʻo kau atu.
“ ʻOua ʻe Falala ki he Nima ʻo e Kakanó,” p. 40: Fakaafeʻi ʻa e kau mēmipa ʻo e fāmilí pe ko ha mēmipa kehe ʻo e fāmili ke nau vahevahe ha founga ne nau hoko ai ko ha taha lelei ange ʻi he taʻu kuo hilí,. Hili ia pea fakaafeʻi ʻa e kau mēmipa ʻo e fāmilí ke nau fokotuʻu ha taumuʻa ko ē te ne tokoniʻi kinautolu ke nau aʻusia ʻa e tuʻunga ʻoku fie maʻu kinautolu ki ai ʻe he ʻOtuá.
Ke fakatātaaʻi ʻa e founga hono tokoniʻi ʻetau ngaahi feingá ʻe he Tamai Hēvaní, fakaafeʻi ʻa e fānau kei iiki angé ke nau toʻo hake ha faʻahinga meʻa ʻoku mamafa. Pea toki ʻai ha taha ʻo e mātuʻá pe taha ʻo e fānau lalahi angé ke tokoni ki ai. Ko e fē ʻoku faingofua angé pea ko e hā hono ʻuhingá? Ko e hā ha faʻahinga meʻa te tau toki lava pē ʻo fai ʻo ka tokoni ʻa e Tamai Hēvaní?
“Maʻu ʻi ha Kumipuka [Cumbuca],” p. 48: Fakakaukauʻi fakafāmili hano faʻu haʻamou kumipuka ʻoku ʻi loto ai ha meʻa mahuʻinga. Pea mou taufetongi leva hono fakatātaaʻi e meʻa ne fai ʻe he “ngelí.” Aleaʻi e founga ʻo e feinga ʻa Sētane ke tauheleʻi kitautolú, founga te tau lava ai ʻo fakaʻehiʻehi mei he tauhelé, pea mo e meʻa te tau lava ʻo fai kapau ʻe maʻu kitautolu ʻe he tauhelé.
“Tāpuaki Fakataulaʻeiki ʻo Linisií,” p. 66: Aleaʻi pe ko e hā ʻa e tāpuaki fakataulaʻeiki, pea fakaafeʻi ʻa e kau mēmipa ʻo e fāmilí ke nau fakamatala ha meʻa ne hokotonu kiate kinautolu ʻi hono maʻu ʻo e ngaahi tāpuaki fakataulaʻeikí. Te ke lava ʻo fehuʻi ange: Naʻá ke ongoʻi fēfē ʻi hoʻo maʻu ʻa e tāpuakí? Naʻá ne tokoniʻi fēfeeʻi koe? Ko e hā ʻokú ke fakamālōʻia ai ʻa e lakanga fakataulaʻeikí?