Ko ha MOMENITI ʻi Taimi
Ko e ʻUluaki Fineʻofá
Naʻe fakatahataha ha kiʻi kulupu ʻo ha kau fafine ʻi he 1842 ʻi Nāvū ʻi ʻIlinoisi ke faʻu ha kiʻi kautaha tuitui ke tuitui ha vala moʻó e kau ngāue he temipalé. Kae hangē ko hono faleʻi kinautolu ʻe he Palōfita ko Siosefa Sāmitá, ko honau ngaahi fatongiá ʻoku “ ʻikai maʻá e fakafiemālieʻi pē ʻo e paeá, ka ke fakamoʻui mo e laumālié.”1 Ko e kamataʻanga ia ʻo e Fineʻofá.
Naʻe fokotuʻu fakalao ʻe Siosefa Sāmita ʻa e Fineʻofá ʻ i he ʻaho 17 ʻo Māʻasi 1842. Pea naʻe hoko ʻa ʻEma, ʻa hono uaifí, ko e fuofua palesitení.
Naʻe vave leva ʻa e kamata e ngāue ʻa e kau fafiné ʻo tokoniʻi ʻa e paeá. Naʻe faʻa fie maʻu ʻe he kau toki nofo foʻoú, kau ai mo e kau hiki fonua maí, ha meʻakai, fale, mo ha vala ʻi heʻenau fuofua aʻu maí. Naʻe tofanga mo ha tokolahi foki ʻi ha ngaahi faingataʻaʻia fakaetuʻasino, mahamahaki pea mo e mate ʻa e siʻi kau mēmipa ʻo e fāmilí.
ʻI heʻene aʻu ki he faʻahitaʻu māfana ʻo e 1842, kuo lahi fau e tupu tokolahi ʻa e houalotu ʻo e Fineʻofá ʻo ʻikai ke nau lava ʻo hao ai ʻi ha fale ʻi Nāvū. Naʻe fili leva ʻa e kau fafiné ke nau fakataha ʻi ha vao ʻakau ofi ki he tuʻuʻanga ʻo e temipalé. ʻI he lolotonga ʻo e fahaʻitaʻu momoko ʻo e 1842–43, naʻe toloi ʻenau ngaahi fakatahá, kae kei feʻaʻahiʻaki pē ʻa e houʻeiki fafine ʻo e “kōmiti fie maʻú,” ʻa ia ko ha fokotuʻutuʻu ʻeni ia ki muʻa ʻi he faiako ʻaʻahí.